Read kalabari Nimi Tolumaḅọ 8 Bible Online

Nimi Tolumaḅọ 8 - kalabari bible

Nimi Tolumaḅọ 8

¹Tụḅọ ye-nimi tomḅọ ḅe sime-ḅara sịẹm? Tụḅọ giregirema ye ḅụ ḅẹ gbọrụ ye fiearị ye nimi tẹ ḍuko ḅẹ? Tomḅọ ye-nimi mḅọ tọrụ saakịm, tẹ ọ̀ tọrụ-fụrụma mẹ ḍimam.

²Amadaḅọ ḅe tọn ye mẹ kokoo, gbala ị́ Tamụnọ tọrọkọ tẹmẹ-la ḅara kẹ ye karị tẹ ẹrẹsị, anị ḅụ ḅụụ-ḅalaḅala nyana ma.

³Ḅẹrẹ mẹ si tẹ ḅẹḅẹ, ọ̀ tọrọkọ sakị fama-a ḅara kẹ saakị mẹnjị-soo, kẹ gotẹ ọkọ ḅarị, ọ̀ ḅụụ ḅẹlẹ ye ḅẹlẹ ye mie ọ̀ mịẹ ḅarịye.

⁴Kẹ gotẹ ọkọ ḅẹẹarị, amadaḅọ ḅe ẹkwẹn-ḅịḅị mẹ anie ḍụḅatẹịn ye, anịsakị tụḅọ inetẹ ọ̀ ḅẹ ḅa, “Í tiye mịẹarị?”

⁵Ye kẹ kịnị lama, lama ye, oloko koko ḅọ na bịama ḅịa, anịsakị ye-nimiḅọ ḅẹ ḅioḅẹngbọ mẹ sakị mẹ na, etela mẹ na nimi wararị.

⁶Tomḅọ nyana ḅụụ-fụka iku mḅọ ponomarị sọ, ḅẹrẹ goyegoye anịḅẹ sakị na, etela na, nyana wararị.

⁷Kẹ gotẹ ọkọ ḅẹẹarị, mḅọ tọrọkọ-jụ paka ḅẹ ye nimi-a, kụma tụḅọ inetẹ anị sime ḅẹ ḅara ḍuko mḅọ pịrị ḅẹ?

⁸Tẹmẹ ḅe koko wẹrị ḅẹ kụrọ nyana, anịanịa fịị ene ḅẹ ḅẹrẹtọn kụrọ nyana kpọkpọ gbọrụḅọ-sọ ofori; ọmụ ḅio paka-so mu ịnyọsara kẹ ḅẹẹ-ḅẹẹ ḅọ ofori, anịanịa si-sịḅịḅio ịn kẹ anị ḅio suu tẹ apụ ḍụa-ḅọrọma ḅịa.

⁹Mịna aị mamgba arị ẹrị tẹ kẹ elekima sụam arị ì ḅioḅẹngbọ kẹ tomikiri mẹ ḅụ mịẹarị aị ma pịrịarị sakị mẹ; tomḅọ nwẹnị kẹ ye kẹ jen tomḅọ mịẹ gotẹ ḅẹrẹtọn mḅọ ponoma ḅa.

¹⁰Anịtẹso ọkụma, arị ẹrị tẹ ịn si-sịḅịḅio-sụa ḅọ ḅe ḍiḅi tẹ; ịn nwẹnị sọsị ḅio fịafịa yọ mẹ sọ na, paka na, tẹ nwẹnị ini anga tẹ so opu ama mẹ ḅio ịn mịẹ tẹ aị kẹ ịn tokini ḅa. Miemẹ sọ ḅintẹ ḅara kẹ anị fieye nimi-a ye.

¹¹Kẹ gotẹ ọkọ ḅẹẹarị, ịn fomu-ḅara pẹlẹ tomḅọ mịẹ siye pịrị, pịrị, in sarama anị mịẹ-mịẹ-a; tomina awọmẹ ma ḅioḅẹngbọ mẹ gbọrsịḅị tẹlẹma siye mịẹ pịrị wararị ẹrẹsị.

¹²Si-mịẹḅọ sakị sọnọa asi kẹ si mịẹm, tẹ mḅọ ḍumo nangwọmam ḅẹsọ, à nimi wararị mịnẹ anịsọ Tamụnọ mangịmarị apụ ma ye ini na kpaịn ḅa, gbala ịn Tamụnọ mangịmarị ẹrẹsị;

¹³kụma anị si-sịḅịḅio-sụaḅọ ḅe na kpaịn ḅịa, mḅọ ene ma pịkị tomḅọ tẹmẹ kiri-ḅio nangwọ ḅara kẹ nangwọ ḅịa, gbala mḅọ Tamụnọ mangịma-a ẹrẹsị.

¹⁴Gbọrụ siye tomikiri mẹ ḅụ mịẹarị: ja asakị, karakaraye-mịẹapụ ma si-sịḅịḅio-sụapụ ma nyana fomu-ḅara daarị; tẹ ja asakị, si-sịḅịḅio-sụapụ ma karakaraye-mịẹapụ ma nyana na-iḅi gbẹẹ-ye ọkị nyanarị. À ḅẹẹm miemẹ sọ ḅintẹ ḅara kẹ anị fieye nimi-a ye.

¹⁵Mie ḅụ à ḍuko ọ́ pịrị tẹ ọ́ tọrụ-ḅẹlẹ gbala tomḅọ tomikiri mẹ ḅụ gbọrụ iḅiye sọ nyana-a, kụma fị-na-ḅuu-na, tẹ mḅọ ḅụụ tii sikima tẹ, kẹ gotẹ ọkọ ḅẹẹarị, miemẹ anie tomikiri mẹ ḅụ Tamụnọ kẹ mḅọ pịrị ḍumo-ene ma ḅụ mḅọ kọn lịlị ḅụ mḅọ kẹ so ḅarịye.

¹⁶Arị ì ḅioḅẹngbọ sịkị nimi Lekiri pịrịm, tẹ tomikiri ḅụ kọrịarị kọrịnama ẹrị ḅẹ ḅii tẹso ọkụma, mono ḅarị ḍin na, eneḅaka na ḅụ ị̀ atọrụngbọ sọ-a ḅara ḍikii;

¹⁷anịtẹrẹmẹ à ḅo Tamụnọ kọrịnama mamgba ẹrịm mịnẹ, tomḅọ inetẹ kọrịnama tẹ tomikiri mẹ ḅụ kọrịarị ye ḍọkị-nimi ḅịa. Tomḅọ lịlị tẹ anị ḍọkị-ḅara ḍọkị-ḅara sọ mḅọ ḍọkị pakama-ḅo ḅịa; ye-nimiḅọ ye-nimi mu laa ḅara laa ḅara sọ, ori inetẹ anị ḍọkị-pakama-ḅo ḅịa.