Read kalabari Sọlọmọnị Ḅẹlẹtẹịn Nume 1 Bible Online

Sọlọmọnị Ḅẹlẹtẹịn Nume 1 - kalabari bible

Sọlọmọnị Ḅẹlẹtẹịn Nume 1

¹Nume mamgba iḅitẹịn nume tẹ Sọlọmọnị su ye.

²Mimgbe ị́ ị̀ ḅịḅị nọnjị pịkị siin anị nọnjị tẹẹ; ị́ ḅẹlẹma ḅẹlẹ iru nẹngịm.

³Ị́ kẹ kụnụarị gbọrụ ḅara emi; ị́ ẹrẹ naa anị kẹ tomḅọ ḅiokoromarị, ị́ ḅẹlẹma ḍụkụ ḅịa ẹrẹḅọ ofori.

⁴Ị̀ ọkị tẹ wa mangị-so; ị̀ amadaḅọ sọ tẹ ị̀ kẹ í ḅio muu. Wa ḅioḅẹlẹ gboloma ḅa; ḅuu gbẹdẹmaa, tẹ ḅẹlẹma ḅio sọ faa. Ereme mamgba ị́ ḅẹlẹmarị ye mẹ ḅụụ-buamaye-o!

⁵Jeruselemu ḅẹ ereme, à kurukuru wararị, pịkị tọrụ-iḅi kọn wararị. Keda ḅẹ ịkpa ḅio ḅẹ akpụrụ-awarị kurukuru ḅara, kụma Sọlọmọnị ama-da opu-warị ḅẹ ḅọkọ gbaịn aḅịtẹ iḅi ḅara iḅim.

⁶Ọmịnị ị̀ oju sụa tọrụ kẹ ì ḍiki iderima ma, ịrụa mẹ ì oju-kiri fọị tẹ anị sụa tọrụ ḍima tẹẹ ẹrẹsị. Ì owiapụ-amịnapụ ma ịganị ị̀ pịrị tẹẹ, mịẹ tẹ à girepu-ḍụọ mẹ ḅio kọrịnama kọrịm, kụma à sakị nyana-a à kẹ ì girepu-ḍụọ kaị.

⁷Ḍuko ị̀ pịrị, ị̀ ḅẹlẹmaḅọ, Ị́ ị́ anana-ogbo mẹ kẹ tọ-anga mu tẹ ini osuka fị ḅẹ? Eneḅaka-ogbo ḅẹ ịrụa mẹ ḅụ in sime tẹ ịnyọsara ḅẹ yọ tọ-anga? Tiye ẹrẹsị àrị osi anana-ḍikiḍikiapụ ma ogboku ị́ ḍọkị na-iḅi?

⁸Anị anga mẹ í nimi-a ḅẹḅẹ, ereme ogboku ḅụ ḅẹlẹma tẹịn ẹrẹḅọ, anana-ogbo mẹ ḍuka mu; osuka fị kiri ḍọkị í oḅori ma pịrịị, anana-ḍikiḍikiapụ ma akpụrụ-awarị ma kpeki ḅụ.

⁹Ị̀ ḅẹlẹmaḅọ, ị́ ḅụụ-ḅẹlẹmam! À kẹ í iḅi tọmarị ye anie, Fero kirimẹnjị-arụ ma fọnọ mẹnjịarị ḅụụ-ḅẹlẹma ịwọ ịyọrọ asụ ma.

¹⁰Ị́ amgba simearị kịlalị ma anị iḅimarị, yela pọkọsụa aḍigi ma ị́ kọngọ sọ iḅimarị.

¹¹Kụma wa golu pọkọsụa-ikoli mịẹ ị́ pịrị ḅa, seleḅa kẹ ḅirimatẹ ye.

¹²Ị̀ amadaḅọ ori ọ̀ nangwọtẹ ngada ọgọnọ ḅọlọlọ simem, tẹ ị̀ sẹntị kụnụ wasam.

¹³Ị̀ ḅẹlẹmaḅọ maha nwẹn-sịn sẹntị kụnụ ḅara kụnụarị, ori ì ekpe ọgọnọ ḅọlọlọarị wararị sakị.

¹⁴Ị̀ ḅẹlẹmaḅọ piri-ḅio-ḅẹ afịlawa kịkarị, anie Ẹnị-Gedi ḅe kụrọ-aḍụọ ma ḅio sụa-sara wararị aị ma.

¹⁵Ị̀ ḅẹlẹmaḅọ, ị́ kọn iḅi! Ị́ atọrụngbọ ma kịọnkịọn-arị ḅara gbala olosịkịya atọrụngbọ ọkụ.

¹⁶Ịyaa, ị́ ḅụụ-ḅẹlẹma mọ, ị̀ ḅụụ yela tẹịn ḅọ; í ì ḅioḅẹlẹma la ḅara ḍikii! Wamịna iḅila anie ịwọ osuka;

¹⁷sida asịn wamịna warị mẹ ḅẹ ḅeriaị sọ ḅa, Sayịpẹrẹsị asịn isun-suku mẹ mịẹ ḅa.