Read kalabari Sọlọmọnị Ḅẹlẹtẹịn Nume 2 Bible Online

Sọlọmọnị Ḅẹlẹtẹịn Nume 2 - kalabari bible

Sọlọmọnị Ḅẹlẹtẹịn Nume 2

¹Yẹrị anie papaa lẹsẹrẹ kiri ḅụ so-pakarị rosi nwẹn-sịn fịlawa, tụndụ suku so-pakarị lili nwẹn-sịn fịlawa.

²Nangị asịn ogboku so-pakarị lili nwẹn-sịn fịlawa mẹ na kịkarị ḅọ anie ị̀ ḅẹlẹmaḅọ ma ereme ogboku ḅụ.

³Opu piri-ḅio-ḅẹ asịn ogboku ḅụ apụlụ nwẹn-sịn sịn mẹ sime-ḅara, mie ị̀ ḅụụ yelatẹịn ḅọ ḅe sime-ḅara, ọ̀ kẹ ja owiapụ na tọnma ḅụ. Arị anị ḅẹ sịḅị-kikima-yọ ḅụ lẹgị-sime ḅẹlẹmam, tẹ anị ḅẹ mgbọlụ mẹ ị̀ ḅịḅị ḅẹlẹm.

⁴Ori ị̀ kẹ ori alalị fị warị kuḅu mum, tẹ ḅẹlẹma ḅịtẹ kẹ ị̀ gbaịnm.

⁵Samụnọtẹ girepu[1] sịnmgbọlụ kẹ ịwọ ịnyọ kẹ ị̀ pịrịị, tẹ apụlụ sịnmgbọlụ ma kẹ ì ḅio deinmam. Ị̀ ḅụụ ịnyọ fa tẹẹ í gotẹ lẹlẹ ḅụ.

⁶Mimgbe í ere-ḅara[2] ị̀ sịḅị saakị tẹ ị́ ama-ḅara[3] ì oju mọnị-mọnị tẹẹ.

⁷Jeruselemu ḅẹ ereme, ó minini ị̀ pịrịị; ọmịnị ịnwa na tụḅụra na kẹ ye karịị, mịnẹ ọ́ wamịna ḅẹlẹma ḅụụ-fụkama ḅịa.

⁸Àrị ị̀ ḅẹlẹmaḅọ pọkọ naarị. Ọ̀ tụndụ ma ọgọnọ ḅụ mangị ma-ḅoarị, Ọ̀ kala tụndụ ma ọgọnọ ḍosi-ḍosi tẹ bọọma ị̀ dama-ḅoarị.

⁹Ị̀ ḅẹlẹmaḅọ ḅe sarasara ma mangịarị ḅara gbala ịnwa, gbala pịkị asambịrịma tụḅụra. Anị anga ọ̀ warị-akaka sịẹ wararị. Ori ikiḅa-ḅọkọ ḅụ toluma ḍikiarị, tẹ foo anga ḅụ iḅi nungu ḅọrọma-ḅọrọma ḍikiarị.

¹⁰Ị̀ ḅẹlẹmaḅọ ẹkwẹn ị̀ pịrịarị. Ọkọ ẹrẹsị ḅoo, ị̀ ḅẹlẹmaḅọ; ì iḅi-ḅọ, ị̀ na ḅoo.

¹¹Oḅoku sakị mẹ ḅọrọ tẹẹ; eene daasịẹ tẹẹ;

¹²piri ọgọnọ-jụ ḅẹ fịlawa ma panga-ḅaa tẹẹ, mie nume-su sakị mẹ; ḍụọ-kọrị apiri ma ḅio olosịkịya nume pọkọ fiearị.

¹³Ịla asịnmgbọlụ saakị ḅịyarị; kụrọ asịn panga-ḅaa tẹ kụnụ wasarị. Ọkọ ẹrẹsị ḅoo, ị̀ ḅẹlẹmaḅọ ì iḅi-ḅọ, ị̀ na ḅoo.

¹⁴Ị̀ ḅẹlẹmaḅọ, ị́ ḅọị faam, ịkụ foo wararị yọ ḅụ olosịkịya ḅọị ḅara. Yee àrị í iḅi tọrụkuḅu ẹrị, tẹ ị́ sịḅịḅio sima pọkọ naa.

¹⁵Pụnụ ma kuun, ḍọkọḍọkọ apụnụ ma kuun, tẹrẹmẹ ịn wamịna girepu-ḍụọ ḅio panga-ḅaa tẹ aị ma guluguluma.

¹⁶Ị̀ ḅẹlẹmaḅọ sime ị̀ pịrịm, yẹrị sọ sime ọ̀ pịrịm. Lili nwẹn-sịn afịlawa ogboku mie ò fịye kẹ ori anana-ogbo pịrị fịarị,

¹⁷nwenii dede fẹrụ fie tẹ kanakana kaan-so. Ì iḅi-ḅọ, pịkịma-ḅoo, tuu sime-ḅara, ịnwa Bẹta tụndụ ma ọgọnọ ḅụ sime-ḅara.