Read kalabari Sọlọmọnị Ḅẹlẹtẹịn Nume 3 Bible Online

Sọlọmọnị Ḅẹlẹtẹịn Nume 3 - kalabari bible

Sọlọmọnị Ḅẹlẹtẹịn Nume 3

¹Àrị ì iḅila ọgọnọ mono sakị, ḍin goyegoye Àrị ị̀ ḅẹlẹmaḅọ kẹ ḍawọm; Àrị ori ẹrị ḅẹ ḍọkịm, kụma arị inetẹ ọ̀ ḍọkị-ẹrịa.

²Àrị ama mẹ ḅio mẹnjịma-mẹnjịma, etela ma na ọpọkụrụ ma na ḅio. Àrị à ḅẹlẹmaḅọ ḅe ẹrị ḍọkịm, à ḍọkịm, kụma arị inetẹ ọ̀ ḍọkị-ẹrịa.

³Ama-koru apụ ma tẹ ama mẹ mẹnjị iwo na ideri na sime apụ ma ị̀ ẹrịm. À nwẹnị in gbela, “Ị̀ ḅẹlẹmaḅọ ḅe ọmịnị ọ̀ ḍọkị-ẹrị tẹ?”

⁴Àrị in koroma-so gbọrụ sakị, à nwẹnị ori ẹrị. Àrị ori ọlọ-sịẹma tẹ ḍụkụtẹ ò so-a nwenii àrị ọ̀ kẹ mu ì iyingi warị lam, mu ini ì iyi ḅio mẹ la.

⁵Jeruselemu ḅẹ ereme, ọ́ minini ị̀ pịrị, ḅụọ-sarasara ịnwa ma na tụḅụra ma ḅụ ó ye karịị mịnẹ ọ́ wamịna ḅẹlẹma ḅụụ-fụkama ḅịa.

⁶Miemẹ ḅọrọ tiye tẹ onwin turee-tureema ḅo ḅara kẹ ḅoarị, kụnụaị na maha na kụnụ ma ḅoarị, tuḅoniapụ ma dẹrị-dẹrị kụnụaị ma?

⁷Sọlọmọnị ḅoarị, ori emine ọgọnọ ini ò dogi wararị; ọmụapụ tesi ò gbori wararị, Izirẹlị ḅụ iḅitẹịn ọmụapụ.

⁸Inimgba okologie owu aka nimi apụ; Ini ma ọmụ gbin ḅụụ-kpọtẹ opu apụ. Ịna ḅụ ọrụḅọ-ọrụḅọ okologie sụkam, ḍin ḅụ owu paka ḅẹ apụ ẹbịarị.

⁹Ama-da Sọlọmọnị ḅe iḅitẹịn sịn kẹ mịẹ emine ọgọnọ ḅụ ini ọ̀ lẹgị wararị ḅara kẹ ò dogim.

¹⁰Anị ḅẹ aḅụọ ma in seleḅa kẹ mịẹ gbaịnm; anị ọgọnọ gbaịn ḅịtẹ mẹ, in golu kẹ anị ḅụ ḅirima aị ḍorim, Anị ḅẹ afalafa lẹgị aị ma ini awụ ḅịtẹ kẹ gbinm, Jeruselemu ḅẹ ereme ḅẹlẹma ḅara kẹ ḍorim.

¹¹Zayọnị ḅẹ ereme, ó ḅo Ama-da Sọlọmọnị ẹrị. Ori ò iyingi kẹ ọ̀ sịḅị gbana kịranị mẹ sure wararị, ori ẹrẹḅọ ịya ene ḅaka ḅụ, ò ḅioḅẹlẹ na ḍereku na ene ḅaka mẹ ḅụ.