Read kalabari Sọlọmọnị Ḅẹlẹtẹịn Nume 6 Bible Online

Sọlọmọnị Ḅẹlẹtẹịn Nume 6 - kalabari bible

Sọlọmọnị Ḅẹlẹtẹịn Nume 6

¹Eremịna ogbo ḅụ iḅitẹịn ẹrẹḅọ, ị́ ḅẹlẹmaḅọ ḅe ḅọrọ tọ-anga mu? Ị́ ḅẹlẹmaḅọ ḅe ḅọrọ etela ḍuko wa pịrị, mịẹ tẹ wa inetẹ ḅarasụa ị́ pịrị tẹ ọ̀ ḍọkị ẹrị ḅẹ ḅara.

²Ị̀ ḅẹlẹmaḅọ so ọ̀ ḍụọ mu tẹẹ, kụnụaị sụa-sụa asịn ma so-pakarị yọ mẹ. Ọ̀ mịẹ tẹ ori anana-ogbo mẹ ye fịarị ḍụọ mẹ ḅio ori pịkị lili nwẹn-sịn afịlawa kaịn-arị.

³Ị̀ ḅẹlẹmaḅọ sime ị̀ pịrịm, yẹrị pịkị sime ọ̀ pịrịm; lili afịlawa ma ogboku ọ̀ mịẹ tẹ ori anana-ogbo ye fịarị.

⁴Ị̀ ḅẹlẹmaḅọ, ị́ Jeruselemu iḅi ḅara iḅim, ị́ ḅụụ-ḅẹlẹmarị ḅara Tariza opu ama ọkụ, arị opu ama ma ḍikiarị tẹ tomḅọ naịn-ḅọrọ ḅara sime-ḅara anie ị́ kẹ í ḍikiarị ḅọ mịẹarị ḅara.

⁵Ị́ atọrụngbọ pịkị sikima ị̀ ḅụ arị ì kuun-sịẹmarị, ị́ sịḅị-ḅẹ-inume mẹ Giliyadi tụndụ ḅụ mangị ideriarị oḅori ma kịka tẹ sẹkịarị.

⁶Ị́ aka ma anana-ogbo ḅịya ḅara ḅịyarị, anie sịkịrị fịafịamatẹ aị ọkụ. Ịna ḅụ gberie-sọ iri-faa-a; inimgba kịra-gbasị wararị.

⁷Ị́ tọrụ-gbaịn-ḅịtẹ ḅio ị́ amgba ma kamarị.

⁸Amadaḅọ ḅe inetẹ tesi amada-ereme nyana ḅa, anịanịa ịgwa-apụ inia si, pịkị kịẹnkịẹn-ọkụ-ofori iriawọ,

⁹kụma gbọrụḅọ kịngẹ mie à ḅẹlẹmarị, á pịkị ḅẹlẹma na-iḅi ḅara simem, olosịkịya ọkụ. Árị ngẹrị mie á iyingi iyi ẹrẹḅọọ, iyingiḅọ ḅụụ yelatẹịn tụḅọ. Ereme mamgba á ḍikiḍiki tẹ á tokiniarị; amada-ereme na ịgwa-apụ na nume su-su á tokiniarị.

¹⁰Nwẹn kẹ ḅaaene ḅara kẹ nungu ḅọrọma ḍikiarị ḅọ mẹ tụḅọ? Árị iḅi tẹ ḅịyarị, Á ḅịya tọrụ sọarị ḅara ịrụa anịanịa akalụ ọkụ.

¹¹À koro alịmọnịdị asịn ma sime anga mum, ịwọma pakarị aị ma ḍiki ḅẹ ḅara tụndụ mẹ suku ḅẹ lẹsẹrẹ-kiri mẹ ḅụ, kụrọ asịn ma ḅẹ ịwọ ịnyịnya ma ẹrị ḅẹm, pịkị pọmigireneti asịn ma tẹ sụa sara wararị aị ma na.

¹²Ì oju sẹkịarị; ị́ ị̀ mịẹ tẹ ị́ ḅẹlẹma ì ḅio-sẹsẹmarị ḅara gbala ikulele kirimẹnjị-ọmụarụ dọkụḅọ ọmụ gotẹ ḅio-sẹsẹ ḅara.

¹³Sẹkị! sẹkị! Sulamụ ḅẹ ẹrẹḅọtụḅọ. Yee wa ị́ sẹkịarị ḅara ḍiki. Ó tiegotẹ ì ḍiki ḅẹ ḍọkịarị à sẹkịarị ogbo, ọkọrọ mịẹ tẹ ye ḍikiarị apụ ma ogboku?