Read kalabari Ayịzaya 33 Bible Online

Ayịzaya 33 - kalabari bible

Ayịzaya 33

¹Wamịnị na fịya-a apụ ma ịn fa tẹ! Ịn kụrọ-ḅara kẹ jen-apụ aị ọkị tẹ pịkị ịn kẹ dẹrịma tẹ, tomi-juḅẹye jen-apụ amụ kụrọ-ḅara kẹ amụ ịna aị ọkị tẹ ịn kẹ dẹrịma-a sọ. Kụma ịn nyana tẹ kẹ kụrọ-ḅara kẹ jen-apụ aị ọkị na ịn kẹ dẹrịma sakị mẹ ḅo kunoma ḅa, tẹ ini ḅioju sọ ḅo jen-apụ ịna aḅara ḅụ kụrọ-ḅara kẹ ye ọkị tẹ oḅori kẹ ịn sịn ḅẹ apụ sọ ḅa.

²KỊNỊNYANAḄỌ, ọkụrụkụrụ nyana wa pịrị. Wa ị́ kẹ ḅiokpọmarị. Ene-ene ḅụ wa gbaịn tẹ wa ḅọrọma ḅụụ-fụka asakị ḅụ.

³Ị́yẹrị owu sọ wa pịrịarị sakị, sịẹ, sịẹ ma mangị-soarị ini mu fiearị ye naa sakị.

⁴Ịn nyana-aị kịnị arị koro tẹ fọịn soarị.

⁵KỊNỊNYANAḄỌ ḅe kpọma ḍụḅa ḅara ḍiki! Ori mie ḅẹrẹtọn ye goyegoye pịrịarị. Ọ̀ karakara ḅẹrẹkọn na karakara ḍumo kọn ye-mịẹ-ḅara na kẹ Jeruselemu ḅinma ḅa,

⁶tẹ mịẹ tẹ opu sịẹ mẹ jike-a ḅara kẹ sịẹsime ḅa. Sakị mamgba ori amịna atomi gbaịn ḅọrọma tẹ nimi na ye-ḍawọ-ḍịịn na kẹ ịn pịrịarị. Ḍụḅa tẹịn ngọ tẹ ịn nyana ye anie fịafịa ḍumo ḅụ KỊNỊNYANAḄỌ ḅe mangịma.

⁷Ḅiokpọ owiapụ ḅarasụa nyana ḅẹ ẹrẹsị olokuarị. Amịna ama tọrụ ḍima tẹ ḅụụkụrọma tẹ dein ḍọkị ḅẹ ḅo apụ ma ḅioḅẹngbọ-si ḅụ owu lamarị.

⁸Opu etela ma fịị dogi-ḅo ḅara simearị ẹrẹsị kịnị ḅarị arị ḅụ mẹnjị ye mu-a. Ḅara-pono pịrị aḍiri ma ịn kan tẹ, pịkị ḅarị ḅịḅị-kẹ-ogbosọ ma kẹ ye-sịn-a. In kun kẹ pịrịarị gbọrụḅọ-sọ ḅarị ofori.

⁹Amakiri mẹ papaa koro-simearị, tomi ma mangị-so tẹ. Lẹbanọnị ḅẹ opu apiri ma kpatụ tẹ, Sarọnị ḅẹ iḅi ḍụọ ḍiḅi kiri mẹ ḅo ịkpa sọ tẹ, anịsakị Basani na Kamẹlị Tụndụ na ḅẹ asịn ma ịnyịnya sararị.

¹⁰KỊNỊNYANAḄỌ ḅe tomikiri ḅẹ asịẹ ma ḅẹẹarị, “Mịọkụ à saakị ye mịẹ ḅa. Arị à kụrọ nyana la ḅara ḍie pakama ḅa.

¹¹Ye ḅụ sọ-a aị mie ọ́ mịẹ ḅẹ tẹ tọn-arị, tẹ ọ́ mịẹarị ye goyegoye papaa ye. Ị̀ tẹmẹ kọrị-fịnị kịka tẹ ọ́ dọkịma fama ḅa.

¹²Ọ́ dọkị ḅarị ḅara anie ịkụ tẹ dọkị ḅo tọrụ sọ tẹ paịn-paịn-sararị ye ọkụ; ọ́ dọkịma fọọn mịẹ tẹ nangị asịn kịka ḅa.

¹³Yee ḅẹḅọ-ḅẹḅọ, kpeki ḅọ na sụma ḅọ na, à mịẹ tẹ ye mẹ naa tẹ ị̀ kụrọ kẹ ye-sịn.”

¹⁴Zayọnị ḅẹ si-mịẹapụ ma tẹmẹ-naịn-naịn ḅụ oju-sẹkịarị. Ini mẹẹ, “Tamụnọ ḅẹrẹkọn kịkarị ye kọrị gbamasoarị fịnị. Wamịna ḅụ ọkọ kịka kọrị-fịnị ḅio sọ tẹ inetẹ fịị-a tẹ paka-ḅo ḅẹ ḅọ tụḅọ?”

¹⁵Í inetẹ fịị-a tẹ paka-ḅo ḅa í kuraye ḍuko tẹ mịẹarị ḅẹḅẹ. Ị́ nyana kụrọ kẹ igoin-apụ ma inoma ma, pịkị ọḅụ fị ma. Kịnị ḅaa-ḅaa ḅẹ ḅẹrẹ ḅịyarị apụ ḅụ sọma, anịanịa ja si amịẹaị mịẹ ḅẹ ḅẹrẹ.

¹⁶Anịsakị ye ḅarị ị́ la ḅịa, ị́ pịkị ye ḅụụ la-la anga ḅụ emi ḅọ ḅara sime ḅa, gbala ọmụ la-laa kụrọnị-anga ḅụ í emi ye ọkụ. Ị́ fịye nyana tẹ fị ḅa, pịkị minji nyana tẹ ḅuu ḅa.

¹⁷Sụma mu pakịrị-pakịrị mamgba laarị amakiri daarị amadaḅọ pịkị siin gbọrụ sakị kẹ tọrụ-gbẹ ḅara kẹ paka-ḅo tẹ ọmịnị ẹrị ḅa.

¹⁸Elemu ọ́ nyana-nyana jen asịẹ ḅẹ ama igbigi oso apụ ḅalafa mẹ na kịnị sọkịrị apụ ma na ḅọrọtẹ papaa kuroma ḅụ simearị aị sọ ḅa.

¹⁹Ọ́ ḅarị jen kẹ jen asịẹ ḅẹ opu ẹkwẹn-kọn-apụ tẹ ọmịnị inetẹ in fiearị ama ḅẹ ḅịḅị naa apụ ẹrị ḅịa.

²⁰Zayọnị ama mẹ ḍiki, wa Tamụnọ alalị fịarị opu ama mẹ! Jeruselemu mẹ ḍiki! Gberie sọ anị ḅio anga ḅarị apụ la ḅịa ḅara ḍiki! Anị kịka ḅarịye akpụrụ-warị tẹ siin so jen yọ mu-mu-a ye, anị ḅẹ adolịa ma so-soa, anị ḅẹ aḍigi ma gbala-gbala pẹlẹ-pẹlẹ-a.

²¹KỊNỊNYANAḄỌ ḅe ori ebube kẹ wa ḍie ḅa. Wa finjimatẹ atọrụ ma na okolo ma na akaka anga ḅa, kụma fịya-a ọmụ-arụ arị aḅio dọkụ ḅịa.

²²Kẹ gotẹ ọkọ ḍukoarị, KỊNỊNYANAḄỌ ḅe anie wamịna ḅẹrẹkọnḅọ; KỊNỊNYANAḄỌ ḅe anie oloko sụa wa pịrịarị-ḅọ. KỊNỊNYANAḄỌ ḅe anie wamịna amadaḅọ, ori mie wa ḅọrọma ḅarịye.

²³Ọmịna arụ ḅio pike wararị asịn ma kpọkọrọ-kpọkọrọ tẹẹ, opu vala sịn mẹ suku kụrọ-a ẹrẹsị vala mẹ ọ̀ sụa-a. Anịtẹso tọnwa fọịn aị paka tẹ kịnị ḍiema-ọkị ḅa, tẹ ekeliapụ sọ ye fọịn so ḅa.

²⁴Wamịna ama ḅio angarị gbọrụḅọ-sọ ḅẹ ḅịa, “Àrị obiarị,” tẹ in si mamgba wẹrịso ḅa.