Read kalabari Ayịzaya 34 Bible Online

Ayịzaya 34 - kalabari bible

Ayịzaya 34

¹Tomikiri ḅẹ opu asịẹ ma ḅẹ apụ mamgba, ó ḅoo! Ó ḅo kobiri ikelema tẹ pokii. Yee bebe tomikiri mẹ na anị ḅio angarị apụ mamgba na mịanga ḅo tẹ poki.

²KỊNỊNYANAḄỌ ḅe ịganị nyana sịẹ-sịẹ mamgba na ịna ọmụ-ogbo mamgba na pịrị wararị. Ọ̀ tọn pẹlẹ tẹ ịn fịị gulugulu ḅa.

³Ịna aḍụẹịn ma kịnị ḍiḅi ḅịa, kụma arị sara sime tẹ ḅụrụ-ḅụrụ fụrụ ḅa; tẹ tụndụ mamgba awụ ḅịya ḅa ọmbie ḅụ.

⁴Ịrụa mẹ na, akalụ mẹ na, lolia ma na kọrị sara tẹ fọọn sọ ḅa. So-tọrụ mẹ kịnị ḅarị ẹrị ḅịa, anị abịlala kịka tẹ iko iwo ḅa, tẹ lolia ma ḅịkị koro ḅa, gbala ịnyịnya kụrọ sịn, anịanịa figi sịn, ḅụ siin-sara ḅara.

⁵KỊNỊNYANAḄỌ ḅe So-ḅio sime tẹ amịna okologie tẹlẹma tẹẹ, mịọkụ anị Idọmụ pẹlẹ ḅa, ini ma tẹ ọ̀ tọn-pẹlẹ ḅaa guluguluma pịrị tẹ apụ ma.

⁶Ọmbie na ḅẹlẹkị na ori okologie mẹ ọmbịma fama ḅa, anie anana na oḅori na ọmbie na ḅẹlẹkị na mịẹ-mịẹ ḅara kịka ḅa ini ịn kẹ agbamịẹ-anga ḅụ. Bozara opu ama mẹ ḅio mie KỊNỊNYANAḄỌ ḅe mie mị agba mẹ mịẹ ḅarị ye; ò miemẹ kẹ gburo-gburoma Idọmụ amakiri ḅụ tọnwa-apụ kẹ gbọrụ kiri ḅa mịẹ ḅa.

⁷Tomi ma piri-ḅio-ḅẹ pootẹ-anambulo na asambịrịma anambulo na ḅịkị ḅara ḅịkị ḅa, tẹ kiri mẹ awụ ḅịya ḅa ọmbie mẹ ḅụ, tẹ ḅẹlẹkị anị gbaịn ḅa.

⁸Mie KỊNỊNYANAḄỌ ḅe Zayọnị pụkọ-pakamaḅo ḅẹ sakị mẹ, tẹ si kẹ wa tọn apụ ma ḅara gbẹẹfị ḅii.

⁹Idọmụ ḅẹ atọrụ ma koluta ḍi ḅa, tẹ kiri mẹ ḅo kọrịarị ḍụḅarị sọ ḅa. Bebe sịẹ mẹ ḅẹ amakiri mẹ koluta kọrị-kọrị ḅara kọrị ḅa.

¹⁰Anị eneḅaka na ḍin na kẹ dọkị ḅa, tẹ onwin anị ḅụ turee-tureema iwo gbamaso ḅa. Kiri mẹ papaa koro-sime ḅa ḅụọ-fa-ḅụọ-paka ḅụ, tẹ ye-muarị tẹ anịanga jen kẹ mẹnjị ḅọrọ ḅẹ gbọrụḅọ-sọ ḅarị ofori.

¹¹Mgbukumgbuku ma na agụnkwọ ma na kiri mẹ kẹ ịna nye sọma ḅa. KỊNỊNYANAḄỌ ḅe anị kẹ sịn gberie-sọ ofori tẹ papaa koro-sime wararị ye yọ sọma ḅa, tẹrẹmẹ tẹmẹ ma ḅụ anị sime-ḅara.

¹²Sịẹ mẹ da ḅẹ ḅọ paka ḅịa, tẹ ḅẹrẹtọn-apụ mamgba so fama ḅa.

¹³Ama-da awarị ma na onu gbori wararị ama mamgba na ḅio nangị asịn na ọmị asịn na so-paka gele ḅa, tẹ piri obiri ma na mgbukumgbuku ma na arị ḅio anga ḅa.

¹⁴Piri-ḅio-ḅẹ anama anịanga mẹnjịma ḅọrọ ḅa, tẹ si-atẹmẹ pịkị japụ-japụ sịn ḅa. Si-tẹmẹ opu-iyingi árị ịnyọsara ḅẹ anga ḍọkị ḅẹ ḅo ḅa.

¹⁵Anị anga ḅụ mgbukumgbuku amẹẹ ịna awarị nama tẹ anyị koroma ḅa, ini ịwọ aị ma kẹngẹ pakama-ḅo tẹ in ḍikiḍiki ḅa. Ẹdẹlẹ ma sọ gberie, gberie ḅo ḅa tẹ anịjụ kobiri ḅa.

¹⁶KỊNỊNYANAḄỌ ḅe ḍiri mẹ, tẹ ọ̀ tẹmẹ tẹ ḍumo wararị aị ẹrẹ simearị ye mẹ ḍọkịị, tẹ anị ḍukoarị ye goo. Mịna ọ̀ tẹmẹ-aị ma ḅẹ gberie-sọ kẹ koro-a so ḅịa, owi na ịyọrọ na ḅụ paka ḅịa gberie-sọ ofori. KỊNỊNYANAḄỌ ḅe tọn tẹ anị ọkọ simem; ò ḅioju in kobiri ḅo ḅa.

¹⁷KỊNỊNYANAḄỌ ḅe mie kiri mẹ ḍie, tẹ ọrụḅọ-ọrụḅọ nye kẹ mḅọ pịrị ḅarịye. In kiri mẹ ḅụ anga ḅa ḅụọ-fa-ḅụọ-paka ḅụ, tẹ anị sime ịn pịrị gbamaso ḅa.