Read kalabari Ayịzaya 35 Bible Online

Ayịzaya 35 - kalabari bible

Ayịzaya 35

¹Ịkpa mẹ ḍereku ḅa, tẹ ye so paka, paka-a yọ mẹ ḅụ fịlawa panga-ḅaa sara ḅa.

²Ịkpa mẹ nume-su tẹ ḍereku ḅụ oloku ḅa; anị Lẹbanọnị tụndụ ma iḅi ḅara iḅi tẹ Kamẹlị na Sarọnị na ḅẹ ḍụọ ḍiḅi akiri ma iḅi ḅara iḅi tẹ nwẹnị fịaị pakama. Ḅẹḅọ-ḅẹḅọ KỊNỊNYANAḄỌ ḅe iḅi sime-ḅara mẹ ẹrị ḅa, pịkị ori opu na kụrọ na ẹrị ḅa.

³Ịnyọ kẹ lọkọtẹ aḅara ma pịrịị, pịkị ịnyọ-fa ḅụ gbolokiarị aḅụọ-sịḅị ma sọ.

⁴Ḍuko ḅio ḅịkị tẹ ḅọ, ḅịkị tẹ ḅọ pịrịị, “Sịẹ kụrọọ, tẹ ḅalafa ma! Tamụnọ ị́ pụkọ-pakama ḅẹ ḅoarị, Ò fomu-ḅara kẹ si kẹ ị́ tọn-arị apụ ma pịrị ḅẹ ḅoarị.”

⁵Tọrụngbọ-pụụntẹ-apụ inetẹ ye ẹrị ḅa, ḅeri-iningiapụ pịkị ye naa ḅa.

⁶Ekeliapụ ḍosi-ḍosi sẹkị ḅa, tẹ inetẹ ẹkwẹn-a apụ ma oloku ḅa ḍereku ḅụ. Ịkpa mẹ ḅio kuroro puu, puu tẹ minji mẹnjị ḅọrọ ḅa;

⁷ḅụọ dọkịmarị onwi kiri mẹ ḍaḅa sọ ḅa, tẹ samụnọ kiri mẹmgba ngụngụḅa, ngụngụḅa opou osuka kiri mẹ ḅụ gele, geletẹ asịra so-paka ḅa, piri obiri anga-anga yọ mẹ.

⁸Anị anga opu etela paka ḅa, ini anị sịn ḅa, “Fịafịa Si Ofori Etela Mẹ.” Gbọrụ si-mịẹḅọ sọ anị etela mẹnjị ḅọrọ ye mu ḅịa; gbọrụ oḅori-ḅọ sọ anị mẹnjịarị apụ ma da-irima ḅịa.

⁹Ọkụkụ anịanga paka ḅịa gbọrụ ḅalafama si anama sọ anị etela ḅọrọ ḅịa. KỊNỊNYANAḄỌ ḅe pụkọ-pakamaḅo tẹ apụ ma anị etela ḅọrọ so ama mu ḅa.

¹⁰In ḅioḅẹlẹ kẹ mu Jeruselemu la ḅa; nume-suarị, oloku-oloku ḍerekuarị. In ḅioḅẹlẹ mu ḅẹẹ-sakị ḅẹẹ-sakị la ḅa, kururu na ḅioḅẹngbọ-si na ḅarị ịn la-a gbamasom.