Read kalabari Ayịzaya 40 Bible Online

Ayịzaya 40 - kalabari bible

Ayịzaya 40

¹Wamịna Tamụnọ ḅẹẹarị: Ị̀ atomi ḅio kpọmaa! Ịna ḅio kpọmaa!

²Ḅiokpọma ẹkwẹn kọn Jeruselemu ḅẹ apụ ma pịrịị. Ḍuko ịn pịrị ịn tọrụsiẹrị alama tẹ ḅara iḅi tẹẹ tẹ mịọkụ ịna asi ma ịn wẹrịso ịn pịrị tẹ. Ịna asi ma gotẹ àrị in fomu la tẹ ḅara iḅi tẹ.

³ Pọkọ oloku pakamarị: Ịkpa mẹ ḅio etela tẹlẹma KỊNỊNYANAḄỌ ḅe pịrị! Kịnị anga-a yọ mẹ ḅụ ḅẹ etela mẹ ḅụ simearị aị ma tan siin wamịna Tamụnọ pịrị!

⁴Pokolo ayọ ma sara pakama-ḅoo; tụndụ mamgba ḅaa lẹsẹrẹmaa. Tụndụ ma ḅo lẹsẹrẹ-kiri sọ ḅa, tẹ gbima-gbima-kiri mẹ kẹ minimini kiri mịẹ.

⁵Anịtẹso KỊNỊNYANAḄỌ ḅe ori ebube mịẹfinji ḅa, tẹ tomi mamgba anị ẹrị ḅa. KỊNỊNYANAḄỌ ḅe ḅioju mie minini tẹ.

⁶Pọkọ oloku pakamarị: Oku ḍuko wasamaa! À gbelarị: À tọ oku ḍuko wasama ḅẹ? Ḍuko wasama mịnẹ tomi mamgba osuka kịkarị; in ḍumo mu piri-ḅio-ḅẹ afịlawa laarị ḅiri nẹngị-a.

⁷Osuka kpatụarị, tẹ fịlawa ḍisiarị, KỊNỊNYANAḄỌ ḅe fẹrụ kẹ fịrịma tẹ anị fie ịn saramarị sakị. Tomi ḅarị sime mu etela osuka nẹngị-a.

⁸Inn, osuka kpatụarị, tẹ fịlawa ḍisiarị, kụma wamịna Tamụnọ ẹkwẹn mẹ sime mu ḅẹẹ-sakị ḅẹẹ-sakị laarị.

⁹Jeruselemu, gele tẹ tụndụ kpọlị tẹ iḅi-oku mẹ ḍuko wasamaa! Gele pọkọ kẹ sịn pakama, Zayọnị, iḅi-oku mẹ ḍuko pakamaa! Ẹkwẹn pakamaa, tẹ ḅalafa ma. Ḍuko Juda ḅẹ ama ma pịrị mịnẹ ịna Tamụnọ ḅoarị!

¹⁰Ḅẹrẹtọn kụrọ nyana tẹịn KỊNỊNYANAḄỌ ḅe kụrọ kẹ ḅẹrẹtọn ḅẹ ḅoarị Ọ̀ pọkọ pakama ḅo tẹ apụ ma na ḅoarị.

¹¹Ori anana-ḍikiḍikiḅọ ḅara kẹ ori atomi koko ḅa; Ori awọmẹ ma kobiri gboloma ḅa tẹ ori aḅara ḅụ in dogi ḅa; ọ̀ nwẹnị deinma iyingi apụ ma tọrọkọ sụn tẹ ini na mu ḅa.

¹²Tomḅọ inetẹ amịna ḅara-kuḅu kẹ bọlị ḅara kẹ abajị ḅio simearị minji mẹ tọn ḅẹ; anịanịa ḅara ẹnzụ kẹ So-tọrụ ḅẹ finjima mẹ tọn nimi ḅẹ? Tomḅọ inetẹ kiri mẹ ḅẹ lịka mẹ kẹ gbọrụ bọlị ḅio sụa ḅẹ anịanịa tụndụ ma na gele akiri ma na ḅẹ iku kẹ ye-tọnye ọgọnọ gbana tẹ tọn nimi ḅẹ?

¹³Tomḅọ inetẹ KỊNỊNYANAḄỌ ḅe mịẹ ḅẹ ye tọn ọ̀ pịrị ḅẹ? Tụḅọ inetẹ ye kẹ ò toluma, anịanịa datụkụma ẹkwẹn kọn ọ̀ pịrị ḅẹ?

¹⁴Tamụnọ ọ̀ tụḅọ na ḅẹrẹ ḅịyarị ọ̀ mịẹ ḅẹ ye nimi tẹ anị fiearị ye naa tẹ ḍawọ tẹrẹmẹ anị mịẹ ḅụ?

¹⁵KỊNỊNYANAḄỌ ḅe sime anga tomikiri ḅẹ asịẹ ma papaa aị, arị yela tọịn-koro minji sọ nẹngị-a, ala jụ simearị asọ ma fọọn feke-feke ḅara feke-fekem;

¹⁶Lẹbanọnị opu piri-ḅio simearị anama mamgba sọ boowa kẹ agbamịẹ wamịna Tamụnọ pịrị ḅụ, tẹ anị ḅẹ asịn ma boowa ḅara ḅakam kẹ fịnị mẹ tọnọ ḅụ.

¹⁷Sịẹ-sịẹ mamgba ọ̀ ḅụ gberie-sọ gberie-a; ọ̀ tọrọkọ inimgba papaa aị famam.

¹⁸Wa inetẹ kẹ Tamụnọ na pii-pii ḅẹẹ ḅarị ḅọ tụḅọ? Ndẹẹ í inetẹ ọ̀ kịkaye sime-ḅara ḍuko ḅẹ ḅara?

¹⁹Kọrịnama kọrị apụ mịẹ mḅudu na ori na kịka-a, anie ini ikulele kẹ mịẹ tẹ golu kẹ anị sara gbaịn tẹ seleḅa kẹ anị ḅẹ suku mẹ mịẹ ye mẹ.

²⁰Ine tẹ seleḅa anịanịa golu nyana ḅịa ḅọ ḅụrụ, ḅụrụ-a sịn sẹlẹ ọkịarị. Ọ̀ ḅara-ḍịntẹ akanịḅọ ḍọkị ḅo tẹ mḅọ ḅịkị koro ḅịa mḅudu mịẹ pakama-ḅoarị.

²¹Í nimi-a aro? Anịngẹ-kụraḅio amụ in ḍuko ị́ pịrị-a? Tomikiri mẹ saakị ḅara amụ ị́ naa-a?

²²Amịna emine ọgọnọ lẹgị wararị ḅọ ḅe anie anị tẹmẹ ye, anị emine mẹ kiri mẹ ọgọnọ-jụ ḅio tẹ So-tọrụ mẹ ḅọrọ iwo ḅụ anị emi; anị yọ ḍiki ideri kụma tomi ma ịrụ ḅo mẹnẹ ma kịkarị. Ori mie So-tọrụ mẹ kẹ ye gbaịn ye ḅara finjima ye, gbala akpụrụ-warị tẹ kịnị sọ tẹ anga ḅẹ yọ ḅara.

²³Ori mie opu kụrọ nyana ḅẹrẹtọn apụ iderima koromarị tẹ ịn kẹ ḅo papaa ye sọmarị.

²⁴Ịn kịkarị ye asambịrịma asịn, ịwọma so-pakarị tẹ amụ kuno sụa kụrọma-a aị. KỊNỊNYANAḄỌ ḅe fẹrụ kẹ fịrịmarị sakị, arị samụnọ tẹ fẹrụ mẹ arị kẹ fiin soarị samụnọ tẹ asịra ḅara ḅụ.

²⁵Wa inetẹ tụḅọ kẹ Fịafịa Ḅọ ḅe na pii-pii ḅẹẹ ḅẹ? Ọ̀ kịka jen tomḅọ emi?

²⁶Tọrụ saakị so tọrụ mẹ ḍikii! Ị́ ẹrịarị lolia ma tụḅọ arị tẹmẹ? Ọmụ-ogbo ḅara kẹ arị atọrọkọ sụn tẹ ịn pakama ḅoarị ḅọ ḅe. Arị akịẹn-ḅịḅị ò nimi wararị, tẹ ẹrẹ kẹ gberie-gberie sịn-arị! Ọ̀ kụrọ ḍụḅa ḅakam arị aḅụụ gberie-sọ iri-faa-a!

²⁷Izirẹlị, ọkọ kụma tiye ẹrẹsị í ḍuko sụarị mịnẹ KỊNỊNYANAḄỌ ḅe ị́ ḅụụ-fụka nimi-a anịanịa kẹ ye-sịn í inoma tọrụsiẹrị kọn-arị sakị?

²⁸Í nimi-a? Amụ ị́ naa-a? KỊNỊNYANAḄỌ ḅe anie sime-gbamaso Tamụnọọ; Ori bebe tomikiri mẹ tẹmẹm. Gbala, gbala ịnyọ ọ̀ ta ta-a anịanịa ọ̀ ḅụụ-lọkọ. Ori akuroma nimi ḅọ ofori.

²⁹Ori ịnyọ fa tẹ ịnyọ pọkọ ta tẹ apụ ḅụụ ḅio ịwọ ịnyọ kẹ sụarị.

³⁰Asambịrịma apụ sọ ḅo ḅụụ lọkọarị; asawọ amẹẹ inetẹ ḅịkị ḅa ịnyọ fa ḅụ.

³¹Kụma ini ma tẹ ḅarasụa gotẹ KỊNỊNYANAḄỌ ḅe kẹ ḅiokpọmarị apụ ma ḍọkị nimi ḅa ini ịwọ ịnyọ sụa tẹ. Ini igo fiin iwo tẹ ịwọ ịnyọ nyana ḅara kẹ naa sakị ḅa; ịn mangị ḅa tẹ ịn ḅụụ-lọkọ ḅịa; ịn mẹnjị ḅa tẹ ịnyọ ịna ḅụụ fa ḅịa.