Read kalabari Ayịzaya 41 Bible Online

Ayịzaya 41 - kalabari bible

Ayịzaya 41

¹Tamụnọ mẹẹ: Ọmịnị ala-jụ simearị ama ọ́ gbọsime tẹ ì pokii! Ọ́ ḅụụ tẹlẹma tẹ ḅẹrẹkọn-siri ḅụ ọmịna ḅịḅị ḍukoo; ịn sakị kẹ ọ́ pịrị tẹ ọmịnị ẹkwẹn ḅa. Yee wa ḅo kobiri tẹ kọn pẹlẹ tẹ kuraye mịẹ ḅọ nimi.

²Ịrụa saakị pakarị anga mẹ ḅụ ḅo owu-ḅara-iḅi-ḅi-ḅiarị ḅọ ḅe kẹ ḅo ḅọ tụḅọ? Tẹ mịẹ tẹ ò mu anga mu anga ori owu-ḅara-iḅi ḅioḅẹlẹ kọn-arị ḅọ tụḅọ? Tụḅọ amadapụ na sịẹ-sịẹ ma na ḅụ owu-ḅara-iḅi kẹ ọ̀ pịrịarị? Ori ori okologie kẹ ịn pẹlẹ sara ḅara fọọn ọkụ. Ori ori aḍịẹịn kẹ ịn gala-galamarị ḅara fẹrụ asịra kẹ fiin ḅara.

³Ori in ḍuka-ḍuka mẹnjị muarị tẹ gberie-sọ ọ̀ la-a. Ọ̀ sarasarama mu ḅaka ḅara mẹ mịẹ tẹ kẹlẹ kọn tẹ ori aḅụọ kiri la-a sọ tẹẹ!

⁴Tụḅọ mịẹ tẹ miemẹ paka? Tomikiri ḅẹ atomi ogboku ḅụ ye mịẹ-mịẹ ḅọrọarị ḅara mẹ tọn-pẹlẹ ḅọ tụḅọ? Yẹrị, KỊNỊNYANAḄỌ ḅẹ, ye suku-saakị ḅụ à simem, tẹ yẹrị, KỊNỊNYANAḄỌ ḅe, pịkị sime ḅa kunoma ḅụ.

⁵Sụma-jụ ḅẹ ama ma ḅụ ḅẹ apụ ma à mịẹ tẹ ye ẹrị tẹẹ, ịn tẹmẹ-naịn-naịntẹ oju sẹkịarị ḅalafa ḅụ. Mie ḅụ inimgba kobiri tẹ ḅoarị.

⁶Ḅara-ḍịn apụ ma ḅarasụa jụmọ-jụmọ pịrịarị pịkị jụmọ-jụmọ ḅiokpọmarị.

⁷Akanịḅọ ḅe golu-tẹmẹḅọ ḅe ḅẹẹarị, “Mịẹ ḅaka!” Oru-fụḅara mẹ ḅakụ miniminimarị ḅọ ḅe ngbọ kẹ anị ḅakụ-ḅakụ gbolomarị ḅọ ḅe ḅiokpọmarị. Ini mẹẹ, “ikulele sanị-sanị tẹ kẹ oḅoloarị kọrịnama mẹ iḅim” tẹ ịn nwẹnị ngọ kẹ oru-fụḅara mẹ ḅakụ kụrọma arị sime ḅẹ anga ḅụ.

⁸Kụma, Izirẹlị, ị̀ fịrịmẹnjịḅọ, ọmịnị mie à sẹlẹ ọkị tẹ apụ ma, Ebira-amụ, ì ikiaḅọ ḅe furo-ḅẹ-apụ ma.

⁹Tomikiri ḅẹ ịkọlị ma ḅụ àrị í ọkị-ḅom; sụma tẹịn ịkọlị ma ḅụ í simearị tẹ àrị ị́ sịn tẹ ị́ ḅẹẹm, ị́yẹrị ị̀ fịrịmẹnjịḅọọ. Àrị ị́ sịkị-a, kụma àrị ị́ sẹlẹ ọkịm.

¹⁰Ḅalafa ma — àrị ị́nịna emii! Yẹrị ị́ Tamụnọọ, ḍụkụ tẹ gberie-sọ ị́ tẹmẹ-naịn-naịnma ma! Àrị ị́ mịẹ tẹ ị́ kụrọ ḅa, pịkị ḅarasụa ị́ pịrị ḅa Àrị ị́ gbaịn tẹ ị́ ḅọrọma ḅa.

¹¹“Ịganị nyana ị́ pịrị wararị apụ ma owu-ḅara-sii ḅẹ ḅụụ-jịrị nimi ḅa. Owu kẹ ị́ pakarị apụ ma fịị ḅa,

¹²Ị́nịna ịgbanịarị apụ ma ị́ ịn ḍọkị ḅa, kụma ị́ ịn ẹrị ḅịa; ị́nịna owu sọarị apụ ma tomikiri mẹ ḅụ ịmaịn-faa ḅa.

¹³Yẹrị ị́ nyana Tamụnọọ; Àrị ị́ kụrọma tẹ ḅẹẹarị, Ḅalafa ma; à ḅarasụa ị́ pịrị ḅa!

¹⁴KỊNỊNYANAḄỌ ḅe ḅẹẹm: Izirẹlị, ị́ ịrụ wararị, pịkị ịnyọ nyana-a sọ, ḅalafa ma, à ḅarasụa ị́ pịrị ḅa. Yẹrị Izirẹlị tẹkẹarị Fịafịa Ḅọ ḅe, anie ị́ ḅọrọmarị ḅọ ḅe.

¹⁵Àrị ị́ mịẹ tẹ ị́ mbịaka fomu saratẹ fun siin arị ḍụḅọ sọ ḅa, ịwọ tẹ pịọ-pịọtẹ anangị simearị ḍụḅọ mie à kẹ ye ḅarịye. Í tụndụ ma fomu sara tẹ arị guluguluma ḅa; tụndụ ma kọsị ḅo fọọn sọ ḅa.

¹⁶Ị́ arị kẹ So-tọrụ wakị ḅa; fẹrụ mẹ arị kẹ fiin so ḅa, tẹ erise nwẹnị arị gala-galama ḅa. Anịtẹso í ḅioḅẹlẹ ḅa, yẹrị ị́ Tamụnọ ẹrẹsị; í ì tokini ḅa, yẹrị Izirẹlị tẹkẹarị Fịafịa Ḅọ ḅẹ.

¹⁷Ị̀ atomi minji ḅụụ-fụka ḅụ minji ḍọkịarị sakị, minji ḅuu pọkọ-tarị ḅụ ịna apọkọ ḅẹ ololo kpakịkị sakị, anị sakị ḅụ, yẹrị, KỊNỊNYANAḄỌ ḅe, ịna tẹkẹ pakịrị ḅa, Yẹrị, Izirẹlịapụ tẹkẹarị Tamụnọ ḅe gbala-gbala ịn kẹ gbin koroma so ḅịa.

¹⁸Gberie-sọ so-paka-a atụndụ ma ọgọnọ à tọrụ pakama tẹ minji mẹnjị ḅa tẹ ngụngụḅa minji sara ideri-ḅo tụndụ ma suku la ḅa. À mịẹ tẹ ịkpa mẹ ḅo ḍaḅa-ḍaḅa yọ sọ ḅa tẹ samụnọ kiri mẹ kẹ mẹnjịarị ngụngụḅa minji mịẹ ḅa.

¹⁹À mịẹ tẹ ịkpa mẹ ḅio sida sịn-arị so-paka ḅa, akasiya na, matụlụ na, olivu na asịn ma sọ. Gberie sọ paka-paka-a kiri ḅụ opu piri so-paka ḅa, payịnị na, junipa na, Sayịpẹrẹsị na asịn opu apiri.

²⁰Tomi mie ẹrị tẹ nimi ḅa mịnẹ yẹrị, KỊNỊNYANAḄỌ ḅe, anị mịẹm. Ịn nwẹnị anị fiearị ye naa ḅa mịnẹ Izirẹlị tẹkẹarị Fịafịa Ḅọ ḅe mịẹ tẹ anị pakam.”

²¹KỊNỊNYANAḄỌ ḅe, Izirẹlị amadaḅọ ḅe, miemẹ nyana tẹ ḍuko ḅẹẹm: Ọmịnị sịẹ-sịẹ ma oru-atamụnọ ma, ọmịnị ọ́ nyana tẹ ḍuko ḅẹ ye ḍukoo. Ọmịnị iḅi tẹịn aị tẹ ọ́ kẹ anị mịẹ kụrọma ḅẹ aị ọkị-ḅoo!

²²Ọ́ mịanga ḅoo, tẹ tọrọkọ-jụ paka ḅẹ ye ḅịrị ẹrịị, mịẹ tẹ anị kiri ọkị sakị wa nimi ḅarị ḅara. Ḍuko giregirema ḅẹrẹ-siri mẹ pịrị ḅọrọtẹ sakị ḅụ mịẹ-aị ma, pịkị arị fiearị ye ḍuko wa pịrị.

²³Ó ḍuko wa pịrịị, tọrọkọ mẹ ọlọ wararị ye anịsakị wa nimi tẹ mịnẹ ọmịnị tamụnọ! Ọ́ gbọrụ iḅiye, anịanịa opu fa ọkị-ḅoo; ọ́ ḅalafa na ḅụụ gwẹ-gwẹ na kẹ wamịna-aḅụụ ḅio suu ḅinmaa!

²⁴Ọmịnị na ọ́ mịẹarị aị mamgba na papaa aị; sunsin ọ́ pịrịarị apụ ma ịn kịnị ḅụụ sịẹarị!

²⁵Ịrụa mẹ saakịarị pakịrị anga mẹ ḅụ à gbọrụ tomḅọ sẹlẹ pakama-ḅo tẹ; Arị ori ọkị-ḅo ḅa ọgọnọ-jụ mẹ ḅụ, tẹ ori owu paka ḅa. Ọ̀ ḅẹrẹtọn apụ nanga ḅọrọ ḅa, lịka ọkụ, aḅaịn-ḅẹlẹ tẹmẹḅọ ọgbọịn-lịka nanga ḅara kịka ḅara.

²⁶Ọmịna ḅụ tụḅọ mie paka ḅẹ ye mẹ ḍuko wẹrị, mịẹ tẹ ọmịnị inetẹ ḅẹ ḅẹẹm mịnẹ ó kuraye ḍukom? Ọmịna ḅụ gbọrụḅọ-sọ anị ḅụ gbọrụ ẹkwẹn sọ kọn-a, gbọrụḅọ-sọ ó ḍuko gberie sọ naa-a!

²⁷Yẹrị, KỊNỊNYANAḄỌ ḅe, anie tarị oku mẹ ḍuko Zayọnị pịrị ye; Àrị oku kẹ Jeruselemu fịrịma tẹ ḅẹẹm in ḍuko, “Ọmịna atomi ḅoarị! Ini ama ḅoarị!”

²⁸À oru-atamụnọ ma ogboku ḅụ ḍiki sakị, ịna ḅụ ḅẹ gbọrụḅọ-sọ ḍuko ḅẹ gberie sọ nyana-a; gbọrụḅọ-sọ à gbela aị ma pakịrị-a.

²⁹Ma oru-atamụnọ mamgba in ye ḅụ sọ-a; gbala-gbala ini inetẹ mịẹ-mịẹ gberie-sọ ofori ma mḅudu ma ini ịnyọ na kụrọ na nyana-a.