Read kalabari Ayịzaya 42 Bible Online

Ayịzaya 42 - kalabari bible

Ayịzaya 42

¹ KỊNỊNYANAḄỌ ḅe mẹẹ: Ị̀ fịrịmẹnjịḅọ mịanga emi, anie à mịẹ kụrọmarị ḅọ ḅe À sẹlẹ ọkị gbọrụḅọ ḅe, mịẹ ị̀ ḅụụ-ḅẹlẹma ḅọ ḅe, Àrị ị̀ tẹmẹ kẹ ọ̀ ḅụụ ḅio suu ḅinma tẹ, Ọ̀ karakara ḅẹrẹkọn ọkị-ḅo sịẹ-sịẹ ma pịrị ḅa.

²Ori oloku ḅịa, anịanịa ọ̀ pọkọ saakị anịanịa etela ma ḅụ oloku-oloku ẹkwẹn.

³Penge wararị okporo mẹ ori anyịma ḅịa anịanịa gbọrsịḅị kọrị-kọrị biin-arị tọnjọ mẹ biinma. Ori inoma ofori ḅara kẹ anga tọrọkọ-tọrọkọ mu alama ọkị-ḅo tomi mamgba pịrị ḅa.

⁴Ò ḅiokpọmaye anịanịa ḅiokpọ fama ḅịa; Ọ̀ mịẹ tẹ tomikiri mẹ ḅụ ọrụḅọ-ọrụḅọ mḅọ la kiri nyana wẹrị ḅa. Sụma-yọ simearị amakiri ma ḅẹ apụ ḅio-sẹsẹ ḅara kẹ ò tolumaye koruarị.

⁵Tamụnọ So-tọrụ mẹ tẹmẹ tẹ anị kẹ anị finji mu la anga lamam; Ori tomikiri mẹ na anị ọgọnọ angarị aị mamgba na mịẹm; Ori ḍumo na ọwụ-sara na kẹ ori atomi pịrịm. Tẹ mịọkụ KỊNỊNYANA-TAMỤNỌ ḅe ọ̀ fịrịmẹnjịḅọ ḅẹẹarị,

⁶Yẹrị, anie KỊNỊNYANAḄỌ ḅee; àrị ị́ sịn tẹ kụrọ kẹ ị́ pịrị tẹẹ. Ẹrị mịnẹ tomikiri ini ọrụḅọ-ọrụḅọ la kiri kẹ mḅọ pịrịm. Ị́ ḅụụ à ḅọrọtẹ kịnị mamgba na ọḅọkụ fị ḅa; ị́ ḅụụ à ḅọrọ tẹ bele ọkị-ḅo sịẹ-sịẹ ma pịrị ḅa.

⁷Ị́ tọrụngbọ-pụụntẹ-apụ ma tọrụngbọ finji ḅa, pịkị kanakana ikoli awarị ḅio lẹgị wararị apụ ma pakama-ḅo ḅa.

⁸“Yẹrị kịngẹ anie KỊNỊNYANAḄỌ ị́ Tamụnọ ḅe. Jen tamụnọ ị̀ na ì ebube nyana ḅịa; À ḍụkụ tẹ oru-afụḅara ì tokini nyana ḅịa.

⁹À ḍuko wẹrị aị ma ḅo paka tẹ mịọkụ. Mịọkụ arị ịwọ aị ḍuko ị́ pịrị ḅa amụ arị paka ḅẹ sakị la-a ogbo.”

¹⁰Ịwọ nume-su KỊNỊNYANAḄỌ ḅe pịrịị; bebe tomikiri mẹ su ò tokinii! Ò tokinii, ọmịnị tọrụ dọkụarịapụ; ò tokinii, tẹmẹ-aị mamgba tọrụ ḅio ḅụ Ó suu, sụma-yọ ḅẹ ama ma na arị anga ḅụ angarị apụ mamgba na!

¹¹Yee ịkpa mẹ na arịḅẹ ama ma na Tamụnọ tokini; yee Keda ḅẹ apụ ò tokini! Yee Sẹla ḅẹ opu ama mẹ ḅio angarị apụ ma ḍereku ḅụ oloku tụndụ ma ọgọnọ-jụ ḅụ!

¹²Yee sụma-jụ ḅẹ ama ma ḅụ angarị apụ ma tokini na ebube na kẹ KỊNỊNYANAḄỌ ḅe pịrị!

¹³KỊNỊNYANAḄỌ ḅe ọmụḅọ kịka tẹ paka owu-sọ ḅẹ muarị; Ọ̀ tẹlẹma tẹ ḅio-sẹsẹ ọmụgbin pịrị wararị; Ori ọmụ oloku kọn-arị, owu koro tẹ anị ḍụrụkụ-ḍụrụkụ ḅara; Ori ọ̀ kụrọ ḍie-pakamarị si kẹ ọ̀ tọn apụ ma ọgọnọ.

¹⁴Tamụnọ mẹẹ: Kpọma alatẹ sakị à nwẹn kẹ gbọsime tẹẹ; àrị ị̀ atomi ḅịḅị ọkị-a. Kụma à ye mịẹ ḅẹ sakị ḅo tẹẹ; àrị iyi la tẹ ẹrẹḅọ kịka tẹ oloku pakamarị.

¹⁵À tụndụ ma na gele-akiri ma na guluguluma tẹ osuka ma na sịn ma na samụnọma ḅa. À tọrụ akaka ḅẹ lẹsẹrẹtẹ akiri ma kẹ ịkpa sọma tẹ ḍaḅa ma minji samụnọma ḅa.

¹⁶“À tọrọkọ tarị tẹ ị̀ atọrụngbọ-pụụntẹ-apụ kẹ jene-jene amụ ịn ḅọrọ ye mu-a etela ḅụ ḅọrọ ḅa. Arị ịna kanakana kẹ bele sọma tẹ gbima-gbima amakiri mẹ mịẹ miniminima ḅa ịna tọrọkọ. Ma ma mie à minini aị ma, tẹ gbarị-a ḅara ḅụ arị arị mịẹ ḅa.

¹⁷Inimgba tẹ oru-afụḅara kẹ ḅiokpọmarị apụ, mḅudu ma kẹ amịna atamụnọ sịn-arị apụ, iderima tẹ tọrụ-tuu ḅa.”

¹⁸KỊNỊNYANAḄỌ ḅe mẹẹ, “Ọmịnị iningi apụ, ó pokii! Ó ḍiki lamaa, ọmịnị tọrụngbọ-pụụntẹ-apụ!

¹⁹Tọrụngbọ-pụụn ị̀ fịrịmẹnjịḅọ nẹngị ḅọ emi, ye-naa-a à kẹ oku fịrịmarị ḅọ ḅe nẹngị ḅọ?

²⁰Izirẹlị, í ye ẹrị lama tẹẹ, kụma anị tiye fie ị́ pịrị? Í ḅeri nyana wararị kẹ ye-naa ḅẹm, kụma karakaramatẹ ị́ naa ḅo ye tiye?”

²¹KỊNỊNYANAḄỌ ḅe anie amịna atomi ḅọrọma gotẹ ḅio-sẹsẹarị Tamụnọọ, mie ḅụ ori ori oloko ma na toluma aị ma na gelema tẹ ḅii tẹ mịnẹ ori atomi arị kụn.

²²Kụma mịọkụ kịnị ori atomi aị fọịn tẹ; ini ịn kẹ tọrụsiẹrị yọ ḅụ ịkasị wẹrị tẹ ikoli-awarị ḅio ịn kẹ ḅọị tẹ. Ịn kụrọ-ḅara kẹ ịna aị pụkọ-ọkị tẹ ịna aị fọịnm, gbọrụḅọ-sọ ḅo tẹ ịn pakama-ḅo-a ḅara ḅụ.

²³Ọmịna aḅụụ miemẹ poki ḅẹ ḅọ emi? Mịọkụ sakị tọrọkọ mu, ọ́ bala ḅara kẹ poki ḅẹ?

²⁴Tụḅọ Izirẹlị koroma-so ama kẹ fọịn apụ pịrị? KỊNỊNYANAḄỌ ḅe ḅioju, in si kẹ mịẹ ḅọ ḅe! Wa ḍụkụ tẹ ò ḅiim wa ḍumo kọn ḅẹ ḅara kẹ ḍumo kọn-a anịanịa ọ̀ kẹ wa pịrị tolumaye mẹ poki tẹ mị.

²⁵Mie ḅụ ori ịganị ḅẹ kụrọ wamịna ḅụ ịnọm tẹ wa ọmụ kụrọ-ḅara ḅẹ tọrụsiẹrị ẹrịm. Ori ịganị fịnị kịka tẹ kọrị Izirẹlị ikelemam, kụma gbala-gbala paka sime ye tiye-o tiye-o wa nimi-a; anị ḅụ wa ḍawọ ḅo gberie-sọ ofori.