Read kalabari Ayịzaya 45 Bible Online

Ayịzaya 45 - kalabari bible

Ayịzaya 45

¹KỊNỊNYANAḄỌ ḅe Sayịrọsị sẹlẹ pakama-ḅo tẹẹ, ori ama-daa! Ori ọ̀ tọn tẹ ọ̀ sịẹ-sịẹ ma nẹngịma ḅa; ori ọ̀ kẹ fịrịmarị, ò mu amadapụ kụrọ siin ịna aḅara; KỊNỊNYANAḄỌ ḅe opu ama ma ḅẹ ogigo aḅọkọ ma finji ọ̀ pịrị ḅa. KỊNỊNYANAḄỌ Sayịrọsị ḅẹẹarị:

²Yẹrị ḅarana í etela tẹlẹma ḅa, tẹ tụndụ ma na gele-akiri ma na ḅaa lẹsẹrẹma ḅa. Àrị ojo ogigo-aḅọkọ ma kan-sara tẹ anị ḅẹ ikulele ẹngbẹsẹ aị ma anyịma kọsịma ḅa.

³Kanakana ḅọị ayọ ḅụ arị ngọ tan-tan ị́ pịrị ḅa; anịtẹso í nimi ḅa mịnẹ yẹrị anie KỊNỊNYANAḄỌ ḅee, tẹ Izirẹlịapụ tẹkẹarị Tamụnọ ḅe ẹrẹ kẹ ị́ sịn tẹẹ.

⁴Arị ị́ tọn pakamarị ị́ ḅarasụa ị́ fịrịmẹnjịḅọ Izirẹlị pịrị, yẹrị sẹlẹ ọkị tẹ apụ ma. Arị opu kụn kẹ ị́ pịrị tẹẹ, karakaraye ị́ ì nimi-a sọ.

⁵Yẹrị anie KỊNỊNYANAḄỌ ḅee, jen tamụnọ ofori. Àrị ị́ nyana na-iḅi ịnyọ kẹ ị́ pịrị ḅa, karakaraye ị́ ì nimi-a sọ.

⁶À miemẹ mịẹarị, ḅẹḅọ-ḅẹḅọ tomikiri gbọrụ ịkọlị ḅụ ọkị mu osi ịkọlị la nimi ḅẹ ḅara mịnẹ yẹrị anie KỊNỊNYANAḄỌ ḅe, tẹ jen tamụnọ ofori.

⁷Yẹrị bele na kanakana na pakamarị; Yẹrị boma na opu ḅụụ-fụka na ọkị-ḅoarị. Yẹrị, KỊNỊNYANAḄỌ ḅe, ma mamgba mịẹarị.

⁸Àrị owu-ḅara-iḅi kẹ So-tọrụ ḅụ fịrịma ḅa eene ọkụ; kiri mẹ finji tẹ anị daa-ọkị tẹ omoni ḅara-ḅio paka-ḅo na tomḅọ la kiri kẹ mḅọ pịrị na paka ḅa. Yẹrị, KỊNỊNYANAḄỌ ḅe mịẹ tẹ miemẹ paka ḅa.

⁹Jen ene aram-ḅẹlẹ anị tẹmẹḅọ na ye-nụnụa tẹ, ja aḅaịn-aḅẹlẹ mamgba na kịka wararị ye mẹ? Ọgbọịn-lịka anị kẹ ye-tẹmẹḅọ gbela-gbela, ò tiye mịẹarị? Aḅaịn-ḅẹlẹ ḍuko-sụasụa, mịnẹ anị tẹmẹḅọ ḅara-ḍịn-a ḅoto?

¹⁰Amịna ḍaḅọ-na-iyingiḅọ-na ḅẹẹ-ḅẹẹ ḅọ emi, “Ó tiegotẹ mị-ḅara kẹ ị̀ wẹrị?”

¹¹KỊNỊNYANAḄỌ ḅe, Izirẹlị tẹkẹarị Fịafịa Ḅọ ḅe, ḅaa paka ḅẹ ye tọn wẹrịarị ḅọ ḅe ḅẹẹarị, “Ị́ kụrọ nyana-a ḅẹrẹ kẹ ì gbela ị̀ awọmẹ gboloma ye ḅụ, anịanịa à mịẹ na-iḅi ye ḍuko ị̀ pịrị!

¹²Yẹrị anie kiri mẹ tẹmẹḅọ ḅe tẹ tomḅọ tẹmẹm ori anị yọ anga. Ị̀ kụrọ ḅụ à So mẹ finjima saram; Yẹrị ḅẹrẹtọn ịrụa mẹ na, akalụ mẹ na, lolia ma na pịrịarị.

¹³Yẹrị ḅarana Sayịrọsị jikemam ọ̀ kọrịnama kọrịị tẹ à tọn wẹrị ye mẹ mịẹ tẹ ye kẹ kura ḅụ wẹrịị. Ọ̀ mẹnjị ḅọrọ ye muarị etela mamgba à mịẹ gono-gonoma ḅa. Ò siin ị̀ ama Jeruselemu nama ḅa, tẹ kun-ḅara ḅio sime atomi ma mịẹ tẹ ini ịna asịḅị atomi sọ ḅa. Gbọrụḅọ sọ ori ọkọ, anịanịa ọḅụ kẹ ọ̀ pịrị fị-a mịnẹ ò miemẹ mịẹẹ.” Kụrọmamgba nyana KỊNỊNYANAḄỌ ḅe ọkọ ḅẹẹm.

¹⁴KỊNỊNYANAḄỌ ḅe Izirẹlị ḅẹẹarị: Ijiputi na Sudanị na ngọ ma ị́ aị sọ ḅa, tẹ sẹba ḅẹ gele-geletẹ owiapụ ma í omoniapụ sọ ḅa; ini ikoli kẹ ini ịkasị tẹ ini í ḍuka-ḅo ḅa. Ịn sịḅị-tuu tẹ ḍuko finji ḅa: Tamụnọ ọmịnị na emii — ori kịngẹ Tamụnọọ.

¹⁵Izirẹlịapụ tẹkẹarị Tamụnọ ḅe tẹ amịna atomi ḅọrọmarị ḅọ ḅe, anie amịna ḅụụ kikimarị Tamụnọọ.

¹⁶Oru-afụḅara mịẹarị apụ mamgba ḅụụ-jịrị ḅa; inimgba tọrụ-tuu ḅa.

¹⁷Kụma KỊNỊNYANAḄỌ ḅe Izirẹlị ḅọrọma tẹ, anịsakị árị owu-ḅara-iḅi mẹ sime mu ḅẹẹ-sakị ḅẹẹ-sakị la ḅa; gbala-gbala arị atomi ḅarị jen kẹ tọrụ-tuu ḅịa.

¹⁸KỊNỊNYANAḄỌ ḅe So ma tẹmẹm ori anie Tamụnọ ḅẹẹ! Ori kiri mẹ sime ḅẹ ḅara tọn tẹ anị mịẹm ori anị mịẹ tẹ anị kụrọ sịẹ tẹ sime alamarị. Ori anị mịẹ tẹ anị gberie-sọ anị ḅụ ofori ḅara sime-a, kụma kịnị sime tẹ anga ḅẹ yọ. Ori anie ḅẹẹarị ḅọ: Yẹrị anie KỊNỊNYANAḄỌ ḅee, anịsakị jen tamụnọ ofori.

¹⁹Amụ à ḅọị anga ẹkwẹn-a anịanịa à mịẹ ḅẹ ye kikima. Amụ arị Izirẹlịapụ ma ḅara ḅii-a, mịnẹ ịn kịnị ofori yọ mẹ ḅụ ị̀ ḍọkị. Yẹrị anie KỊNỊNYANAḄỌ ḅee, tẹ karakara mẹ ḍukoarị; à mịẹ tẹ kịnị kuraye nimiarị.

²⁰KỊNỊNYANAḄỌ ḅe mẹẹ: Ó ḅo kobirii, sịẹ-sịẹ ma ḅẹ atomi; tẹ tomikiri mẹ daarị kụrọ mẹ ḅịkị ye ḅụ fịị-a so apụ, ọ́ ḅẹrẹkọn mẹ ḅoo! Tomi ma ịn sịn kẹ kịra oru-afụḅara ma dogi mẹnjịma-mẹnjịmarị tẹ inetẹ ịn ḅọrọma ḅịa atamụnọ ma tẹkẹarị arị atomi ma in nimi gberie-sọ ofori!

²¹Ó ḅo ọmịna ḅịḅị ḍuko ḅẹrẹ-siri ḅụ; yee ḅẹrẹ pakịrịarị apụ ma jụmọ-jụmọ na ḅẹrẹ-ḅiya. Iḅere-iḅerea kụra ḅio ḅụ paka ḅẹ ye ḍuko ḅọ tụḅọ? Yẹrị-yaa, KỊNỊNYANAḄỌ ḅe, amịna atomi ḅọrọmarị Tamụnọ ḅe? Jen tamụnọ ofori.

²²Mịọkụ ọ́ pịkị ị̀ daa, tẹ ḅọrọmaa, bebe tomikiri mẹ kana-koro ḅẹ atomi! Yẹrị kịngẹ anie Tamụnọ tẹ emi ḅọ.

²³À minini kịnị pịrị ye mẹ karakaram tẹ anị ḍima ḅịa. Yẹrị sime-ḅara ḅụ à mininiarị tẹmẹ-la ḅara ḅụ: Ḅẹḅọ-ḅẹḅọ ḅo tẹ ị̀ tọrọkọ kparakị ḅa tẹ ye karị ḅa mịnẹ mḅọ amadaḅọ kụn kẹ ị̀ pịrị ḅa.

²⁴Ịn ḅẹẹ ḅa mịnẹ ị̀ ḅụ ngẹrị ḅụ mie kịnị owu-ḅara-iḅi na ịnyọ na ḍọkị nyana ḅarịye; kụma ì ḍiki-ḅioḅuarị apụ mamgba tọrụsiẹrị ḅụ tọrụ-tuu ḅa.

²⁵Yẹrị, KỊNỊNYANAḄỌ ḅe, Jekọbụ furo-ḅẹ-apụ mamgba pụkọ-pakamaḅo, tẹ ini ì tokini ḅa.