Read kalabari Ayịzaya 46 Bible Online

Ayịzaya 46 - kalabari bible

Ayịzaya 46

¹Mie Babịlọnị ḅẹ oru-atamụnọ ma kunoma mẹ! Gbọrụ sakị ḅụ in sunsin Bẹlị na Nebo na pịrị simem, kụma ini arị tan yedogi-anama ọgọnọ gbanatẹ, arị nwẹnị iku dogiye sọ ịnyọ-pọkọta tẹ anama ma pịrịarị.

²Oru-afụḅara ma inetẹ ịn ḅọrọma ḅịa; ini in kuun-ọkị so tẹẹ. Mie Babịlọnị atamụnọ ma kunoma mẹ!

³Jekọbụ furo paka apụ, ọmịnị ì pokii, ị̀ atomi mamgba ḅụ kirikọn-apụ. Ini ọmịnị iyi koroma kụra ḅio àrị ó ḍikiḍikiarị.

⁴Yẹrị ọmịna Tamụnọọ, tẹ pịkị ó ḍikiḍiki nwenii ọmịnị omongi tẹ ọmịna sịḅị iḅulu ḅịya ḅa. Yẹrị ọ́ tẹmẹm, à pịkị ó ḍikiḍiki ḅa; à ḅarasụa ọ́ pịrị tẹ ọ́ pụkọ-pakamaḅo ḅa.

⁵KỊNỊNYANAḄỌ ḅe ḅẹẹarị, “Ọ́ kẹ ị̀ na pii-pii ḅẹẹ ḅarị ḅọ tụḅọ? Jụmọ tẹ ị̀ kịkaḅọ emi?”

⁶Tomi ịna akpa ma finji-finji tẹ golu ọsụma pakama-ḅoarị; tẹ in ye-tọn-aị ọgọnọ seleḅa tọn-tọn pakama-ḅoarị. In golu-tẹmẹḅọ ọkọ tẹ ori anị kẹ tamụnọ mịẹarị; anịtẹso ini iḅo tẹ sunsin anị pịrịarị.

⁷Ini anị kẹ apana ḅaa tẹ dogiarị; ini anị kẹ gbọrụ yọ koromarị, tẹ anị yọ anị koro-simearị. Gbọrụḅọ nwẹnị anị tẹkẹ-tẹkẹ, anị inetẹ pakịrị-a, anịanịa mḅọ ḅọrọma opu ḅụụ-fụka ḅụ.

⁸Ó miemẹ kẹ ḅiokoromaa, ọmịnị si-mịẹapụ; ọmịnị à mịẹ tẹ ye kẹ kuroma ḅụ suu.

⁹Ọmịnị alatẹ sakị ḅụ paka ye kẹ ḅiokoromaa; ó minini mịnẹ yẹrị kịngẹ anie Tamụnọọ tẹ ị̀ kịka jụmọ ofori.

¹⁰Sukuyọ-saakị ḅụ à mịẹ sime ye mẹ dogi-ḅo ḅẹ ye ḍukom; alatẹ sakị ḅụ à ḍuko wẹrịm paka ḅẹ ye mẹ. À ḅẹẹm mịnẹ à tọn tẹ aị ma gbala-gbala gbarị ḅịa, anịsakị à mịẹ ḅẹ tẹ kẹ ḅiotọn ye goyegoye à mịẹ ḅa.

¹¹Arị ịrụa mẹ saakịarị pakịrị anga mẹ ḅụ gbọrụ tomḅọ sịn-arị ò ḅoo; ori ekule kịka tẹ fiin ḅo jịasịma sịẹ tẹ yẹrị tọn wẹrịtẹ ye mẹ mịẹ ḅa. À ḍuko tẹẹ, anị mịẹ ḅa.

¹²“Ọmịnị ì pokii, kọngọ kụrọma atomi tẹ kuromarị apụ mịnẹ owu-ḅara-iḅi ala-jụ emi.

¹³Àrị owu-ḅara-iḅi ene ọkị-ḅo kpekimarị gbala-gbala anị ala-jụ ofori. Ì owu-ḅara-iḅi alalị mẹ ala ḅaka ḅịa. À Jeruselemu ḅọrọma ḅa tẹ anịanga kụn ọkị-ḅo Izirẹlị pịrị ḅa.”