Read kalabari Ayịzaya 49 Bible Online

Ayịzaya 49 - kalabari bible

Ayịzaya 49

¹Sụma anga simearị asịẹ, ọmịnị ì pokii, ọmịnị iḅere-iḅerea jụ angarị apụ! Tẹrẹmẹ àrị iyi paka-ḅo, KỊNỊNYANAḄỌ ḅe ị̀ sẹlẹ ọkị tẹ tọn tẹ arị ọ̀ fịrịmẹnjịḅọ sọọ.

²Ọ̀ mịẹ tẹ ị̀ ẹkwẹn ma okologie oḅu ḅara oḅum. Ọ̀ ḅara mie ọ̀ kẹ ị̀ gbaịn ḅọrọma yee. Mie tẹ à ḍiein kịkam, oḅuarị tẹ tẹlẹma wararị ye, kẹ mịẹ ḅụ suu.

³Ori ị̀ ḅẹẹm, “Izirẹlị, ị́yẹrị ị̀ fịrịmẹnjịḅọ, í gotẹ kịnị ì tokini ḅa.”

⁴À ḅẹẹm, “À kọrịnama kọrị tẹẹ, kụma anị gbọrụ iḅi sọ mịẹ-a ḅara ḍikii!” Àrị ị̀ ịnyọ mẹmgba fama tẹẹ, kụma à kọrị pakama gberie-sọ ofori. Anịsọ, àrị inetẹ KỊNỊNYANAḄỌ ḅe kẹ ḅiokpọma ḅa mịnẹ ori ị̀ ḍụa ḅa; ori à mịẹarị ye mẹ ḅẹ gbẹẹ-ye kẹ ị̀ pịrị ḅa.

⁵Tẹrẹmẹ in ì iyi pakama-ḅo, KỊNỊNYANAḄỌ ị̀ tọn tẹẹ ị̀ kẹ ọ̀ fịrịmẹnjịḅọ mịẹ tẹ àrị ori atomi kẹ pịkịma-ḅo; Izirẹlị ḅụ gala-gala wararị apụ ma kẹ pịkịma-ḅo. KỊNỊNYANAḄỌ ḅe ị̀ kẹ kụn nyana kiri ḅụ koromarị, ọ̀ ḅụụ mie arị ịnyọ sụarị.

⁶KỊNỊNYANAḄỌ ḅe ị̀ ḅẹẹm: Ị̀ fịrịmẹnjịḅọ, à tarị fịrị mẹ nẹngị ye nyana ị́ pịrị wararị. Ị́ Izirẹlịapụ tẹ fịị-a so apụ ma kẹ ḅo elemu in nyana opu mẹ lama ḅarị mẹ kịngẹ-a, kụma à pịkị ị́ kẹ bele sọma sịẹ-sịẹ ma pịrị ḅa, mịẹ tẹ bebe tomikiri mẹ ḅọrọma ḅẹ ḅara.

⁷Izirẹlị tẹkẹarị Fịafịa Ḅọ ḅe, pịkị ḅọrọma ḅọ ḅe opuma ḅụụ-fụka da tẹ ḅọ ḅe ḅẹẹarị, anie sịẹ-sịẹ ḍiki-ḅioḅuarị ḅọ ḅe, pịkị ḅẹrẹtọn-apụ fịrịmẹnjịḅọ ḅe, “Amadapụ ẹrị ḅa í kụn ḅara-ḅio paka-ḅo tẹẹ; tẹ saakị sịẹ ḅa ọ́ mangịma ḅụ, amada-furo ḅẹ apụ sọ anị ẹrị ḅa, tẹ in sịḅị-tuu tẹ ọ́ kụn ḅa.” Miemẹ paka ḅa, KỊNỊNYANAḄỌ ḅe ọ̀ fịrịmẹnjịḅọ sẹlẹ ọkị tẹ ẹrẹsị; Izirẹlị tẹkẹarị Fịafịa Ḅọ ḅe ò minini ye mịẹ-mịẹm gotẹ.

⁸KỊNỊNYANAḄỌ ḍuko ori atomi pịrịarị: Ọ́ ḅọrọma ḅẹ sakị mẹ ḅo sakị, arị iḅi tọrụ kẹ ó ḍiki ḅa, tẹ ọ́ ḅarasụa gotẹ kọn-arị owu mẹ pakịrị ḅa. Arị ó ḍikiḍiki tẹ ọ́ gbaịn ḅọrọma ḅa tẹ ọmịna ḅụụ ḅọrọtẹ tomi mamgba na ọḅọkụ fị ḅa, à mịẹ tẹ ọmịnị ọmịna anga sime tẹ fa tẹ koro-simearị amakiri mẹ ḅụ siin gbọrụ sakị kẹ anga ḅa.

⁹Arị ikoliapụ ma ḅẹẹ ḅa, “Ọ́ paka-soo!” pịkị kanakana ḅio simearị apụ ma sọ, ọ́ paka bele ḅio ḅoo! in tụndụ ma ọgọnọ sime tẹ osuka fịarị anana ma kịka ḅa,

¹⁰Gbala-gbala ḅuru ḅarị in tarị ḅịa, anịanịa minji. Ịrụa na ịkpa na ọfịrị gbala-gbala ye kẹ in lama ḅịa, kẹ gotẹ ọkọ ḅẹẹarị, in ḅẹlẹmarịḅọ ḅe tọrọkọ tarị in pịrị ḅa. Ori tọrọkọ tarị tẹ ịn kẹ mu ngụngụḅa minji-minji la ḅa.

¹¹Tụndụ ma ọgọnọ arị opu etela mịẹ saḅama ḅa tẹ etela tẹlẹma ị̀ atomi pịrị tẹ in mẹnjị ye mu ḅa.

¹²Ị̀ atomi ala lama wararị anga sime tẹ ḅo ḅa, ọgọnọ-jụ pakịrị anga na, ịrụa-ideriarị-anga anga na, suku-jụ-pakịrị Asiwanị ama ḅụ na.

¹³So, nume suu! Kiri, ḍereku kẹ oloku! Yee tụndụ ma kaan-paka nume ḅụ! KỊNỊNYANAḄỌ ḅe ori atomi dedema ḅa; Ọ̀ sịḅị-kụrụkụrụ nyana ori atomi tọrụsiẹrịarị apụ ma pịrị ḅa.

¹⁴Kụma Jeruselemu ḅẹ apụ ma ḅẹẹm, “KỊNỊNYANAḄỌ ḅe wa kẹ gbin koroma tẹ so tẹẹ! ọ̀ wa kẹ ḅioḅọrọma tẹẹ.”

¹⁵Mie ḅụ KỊNỊNYANAḄỌ ḅe pakịrịarị, “Ẹrẹḅọ inetẹ arị iyi kalatụḅọ kẹ ḅioḅọrọma tẹ arị iyi tụḅọ mẹ ḅẹlẹma ḅịa? Gbọrụ iyingiḅọ nwẹnị á tụḅọ kẹ ḅioḅọrọma sọ, gbala-gbala arị ị́ kẹ ḅioḅọrọma ḅịa”!

¹⁶Jeruselemu, arị ị́ kẹ ḅioḅọrọma ḅịa!. Arị ị́ ẹrẹ kẹ ị̀ aḅara akuḅu ḅụ kẹẹ tẹẹ.

¹⁷Siin ị́ nama ḅẹ apụ ḅoarị ala-a sakị, tẹ ị́ kan guluguluma apụ ma so ḅa.

¹⁸Ḍiki ikelema tẹ pakarị ye ẹrị! Ị́ atomi kobiriarị — ini ama ḅoarị! piki-pikiye-ofori ḅara ḅụ, yẹrị anie ḍumo wararị Tamụnọ sakị goyegoye ḅụ, ị́ ị̀ atomi ma kẹ ḅụụ-tọn ḅa, ịya ḅẹ ẹrẹḅọ á ḅiriaị kẹ ḅụụ-tọn ḅara famam.

¹⁹Ị́ ama ma gulugulu-faa tẹ kiri mẹ papaa gbiin-koro sime wararị kụma mịọkụ anị kpakụrụ ḅaka ḅa pịkịma-ḅo tẹ anị ḅio anga ḅarị apụ ḅụụ. Gulugulu-faa ḅụ ị́ koroma-so apụ ma kpọma ị́ ḅụụ ḅele faa ḅa.

²⁰Ị́ atomi ini in kun-so mu anga ḅụ iyi apụ ma gbọrụ ene ḅụ ḅẹẹ ḅa: Mị amakiri mẹ kpakụrụ ḅakam wa wa ḅụụ ḅelema tẹ anga ḅẹ yọ ḅiiarị.

²¹Anịtẹso ị́ ị́ ḅụụ gbela ḅa: Tụḅọ mịna awọmẹ mamgba iyi ị̀ pịrị? Àrị ị̀ awọmẹ fama tẹ à ḅarị inetẹ jen apụ nyana-a. Ini ì kun tẹ ì koroma ala anga mum; tụḅọ ma awọmẹ ma ḍikiḍikii pakama-ḅo? Yẹrị ngẹrị koro-simem; mịna awọmẹ ma tọ-anga sime tẹ ḅo?

²²Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ori atomi pịrịarị: À ḅara kẹ sịẹ-sịẹ ma fẹngụma tẹ ini ị̀ awọmẹ kẹ ịna sịẹ ḅo ḅa.

²³Amadapụ ḍapụ ḅara sime ị́ pịrị ḅa; amada-ereme iyingiapụ ḅara sime ị́ pịrị ḅa. In ḅo tọrọkọ sịḅị-tuu tẹ ị́ kụn ḅa; in ḅụụ iderima ḅara kẹ ị́ mangịma ḅa. Anịtẹso í nimi ḅa mịnẹ yẹrị anie KỊNỊNYANAḄỌ ḅee; ḅarasụa pịrị gotẹ ì koru tẹ papaa-ḅara ọlọ ḅẹ ḅọ ofori.

²⁴Í inetẹ ọmụḅọ ḅara-ḅio ọ̀ fọịn ḅo ye pụkọ-ọkị ḅẹ? Í inetẹ ajaguda ḅẹrẹtọn ḅọ ḅara-ḅio simearị ikoliḅọ pụkọ-pakamaḅo ḅẹ?

²⁵KỊNỊNYANAḄỌ ḅe pakịrịarị, Anị gbọrụ ye mẹ mie paka ḅẹ-yearị; ọmụḅọ ḅẹ ikoliapụ ma ini ọ̀ ḅara ọkị so ḅa, tẹ ajaguda ḅẹrẹtọn ḅọ ḅe fọịn ọkị aị ma in kụrọ-ḅara kẹ arị ọkị ḅa. Ḅẹḅọ-ḅẹḅọ tẹ owu kẹ ị́ pakarị ḅọ arị mḅọ na sọ ḅa, tẹ ị́ awọmẹ pụkọ-pakamaḅo ḅa.

²⁶À mịẹ tẹ í ponomarị apụ ma jụmọ-jụmọ ḅaa ḅa; kịnị-ḅa na owi ịganị na iru tọrụ-ḅaaḅaa ḅara kẹ ịna tọrụ ḅaa ḅa. Anịtẹso tomi mamgba nimi ḅa mịnẹ yẹrị anie KỊNỊNYANAḄỌ ḅe, ị́ ḅọrọma tẹ ị́ kẹ ị́ sịḅị ḅẹ tomḅọ mịẹarị ḅọ ḅe. In nimi ḅa mịnẹ yẹrị anie Izirẹlị kụrọtẹ Tamụnọ.