Read kalabari Ayịzaya 52 Bible Online

Ayịzaya 52 - kalabari bible

Ayịzaya 52

¹Jeruselemu, kụrọ tẹ siin opu sọọ! Tamụnọ fịafịa kịrị opu ama, tọrụ-gbẹ ḅara sime! Oru nimi apụ ma ḅarị gbala-gbala jen kẹ í ogigo-aḅọkọ ma sọ-mu ḅịa.

²Yei, Jeruselemu, ị́ ḅụụ gugu tẹ paka-ḅoo! Fọọn mẹ ḅio fọnya saakị paka-ḅo tẹ í emine ọgọnọ lẹgịị! Ọmịnị ịn kẹ ọmịna ịkasị ikoli ma anyịma siin, yei kpọma-ḅẹlẹmarị Jeruselemu ḅẹ apụ tẹ kun-ḅara ḅio emi apụ!

³KỊNỊNYANAḄỌ ḅe ori atomi ḅẹẹarị: Ọmịnị omoni-sọ sakị ọmịna sịḅị ḅẹ igbigi gbẹẹ gbọrụḅọ-sọ ofori; anị gbọrụ ḅara ḅụ ọ́ pakama-ḅo ḅụ gberie-sọ gbẹẹ ḅịa.

⁴Ọmịnị Ijiputi ḅụ jen sịẹ ḅẹ apụ ḅara kẹ anga ḅẹ mu sakị ọmịnị ọmịna sịḅị atomi ḅara kẹ mu angam; anị sime-ḅara sime-ḅara sọ, Asiriya kụrọ-ḅara kẹ ọmịnị ọkị so tẹ gberie-sọ gbẹẹ-a.

⁵Tẹ mịọkụ Babịlọnị ḅụ anị gberie mẹ paka tẹ; ọmịnị kun-soapụ, tẹ gbọrụ igbigi sọ ọmịna sịḅị ḅọrọ-a. Ḅẹrẹtọn ọ́ pịrịarị apụ ma ḅụụ-boma-boma tẹ sịkọpẹlẹ-a ḅara kẹ ì ḍiki-iderimarị.

⁶Ḅo ḅarị sakị ḅụ ó minini ḅa mịnẹ yẹrị anie Tamụnọọ, tẹ àrị ẹkwẹn ọ́ pịrị tẹẹ.

⁷Tụndụ ma saḅa-koro saḅa-koro tẹ iḅi-oku kẹ ḅo ḅọ ḅe ẹrị mẹ kpọma ḅụụ-buama ḅara ḍikii, ori iḅi-oku ọkị-ḅoarị, dein oku mẹ! Ori owu-ḅara-iḅi ḍuko wasama tẹ Zayọnị, ḅẹẹarị, “Ị́ Tamụnọ anie amadaḅọ!”

⁸Ama mẹ koruarị apụ ma olokuarị, gbọrụ ḅịḅị kẹ ḍereku ḅụ olokuarị! Ini inetẹ ḅarana tọrụngbọ kẹ ẹrị ḅa KỊNỊNYANAḄỌ ḅe pịkịma Zayọnị ḅoarị mẹ!

⁹Ó ḍereku kẹ oloku pakama Jeruselemu ḅẹ kan-saratẹ ayọ! KỊNỊNYANAḄỌ ḅe ori ama pụkọ-pakamaḅo tẹ ori atomi dedema ḅa.

¹⁰KỊNỊNYANAḄỌ ḅe ọ́ fịafịa kịrị kụrọ kẹ mịẹ ḅụ suu ḅa; Ori ori atomi ḅọrọma ḅa, tẹ bebe tomikiri mẹ anị ẹrị ḅa.

¹¹Ọmịnị ẹrị mịnẹ ọ́ Babịlonịya koroma-som, ọmịnị-mgba tẹ Tamụnọ-warị mẹ ḅẹ kọrịnama-kọrịaị ma dogiarị apụ! Ọ́ ḅara kẹ gbọrụ tọn-tọnye sọ lama ma; ọ́ ḅụụ wẹrị fịafịama tẹ paka-soo.

¹²Mị sakị ọ́ fọnya kẹ paka-so ḅịa; ọ́ ḅụụkụrọma tẹ sịḅị ḍụa ḅara kẹ mangị-so ḅịa. KỊNỊNYANAḄỌ ọmịna Tamụnọ ḅe mie ọmịna tọrọkọ-sụn tẹ pakịrị-pakịrị ḅụ ọ́ gbaịn ḅọrọma ḅarịye.

¹³KỊNỊNYANAḄỌ ḅe mẹẹ, “Ị̀ fịrịmẹnjịḅọ fịrị mẹ lolo ḅa; kịnị iḅiọkụ kụn kẹ ọ̀ pịrị ḅa.

¹⁴Tọnwa apụ ḅụụ-gbiripum ini ori ẹrị sakị; Ò ḍima ḅụra ḅara ḅụ ọ̀ ḅarị tomḅọ sọ kịka-a ḍiki-tọrụ ḅụ.

¹⁵Kụma mịọkụ tọnwa asịẹ ọ̀ ḅụ ḅụụ-bua ḅa, tẹ amadapụ ḅụụ-bua ḅụ gbọsime ḅa. Ini ịn gbala-gbala amụ nimi-a ye ẹrị tẹ anị fiearị ye naa ḅa.”