Read kalabari Ayịzaya 55 Bible Online

Ayịzaya 55 - kalabari bible

Ayịzaya 55

¹KỊNỊNYANAḄỌ ḅe mẹẹ: Minji ḅu pọkọ-tarịarị ḅọ goḅọ-goḅọ ḅoo, mie minji! Ọmịnị igbigi nyana-a apụ, ó ḅo mbịaka fẹ fị! Ḅoo! Iru na ndo-minji na fẹẹ ị́ gbẹẹ ḅẹ gbọrụ igbigi sọ ofori!

²Tiye ẹrẹsị ó furo ḅin ḅịa ye gotẹ igbigi famarị? Tiye ẹrẹsị ọmịnị ọ́ kọrị ḅo igbigi kẹ papaa fama tẹ ḅuru paa ọ́ tarịarị? Ọmịnị ì poki tẹ à ḍukoarị ye mịẹ; anịsakị ó ḅioḅẹlẹ ḅara kẹ fịye mamgba ḅụ iḅitẹịn fịye fị ḅa.

³Mịọkụ ó pokii, ị̀ atomi, tẹ ị̀ ḍọkụma-ḅoo; ọmịnị ị̀ ḍọkụma-ḅoo, tẹ ó ḍumo nyana ḅa! À sime alama ḅarị ọḅọkụ kẹ ọmịnị na fị ḅa tẹ à minini Devidi pịrị aboma ma kẹ ọ́ pịrị ḅa.

⁴Arị ọ́ kẹ sịẹ-sịẹ ma sịḅịdaḅọ na ịn mịẹ ḅẹ ye tọn-arị ḅọ na sọma tẹ, tẹ ọ̀ ḅụụ ḅụ à ḅọrọ tẹ ị̀ kụrọ kẹ in ḍie tẹ.

⁵Mịọkụ ọ́ jen asịẹ sịn-ḅo ḅa; sakị ḅẹ gbọrụ sakị ḅụ ini ó nimi-a, kụma mịọkụ ịn mangị-ḅo ọmịna ḅụ sọ ḅa! Yẹrị, KỊNỊNYANAḄỌ ọmịna Tamụnọ, Izirẹlị tẹkẹarị Fịafịa Ḅọ ḅe mịẹ tẹ miemẹ paka ḅa; à kụn na ebube na kẹ ọ́ pịrị ḅa.

⁶Ọ́ pịkị KỊNỊNYANAḄỌ ḅe da tẹ ọ̀ tẹkẹẹ, mịọkụ ò kpeki wararị sakị mẹ ḅụ.

⁷Yee si-sịḅịḅio-sụapụ ma ịna ḍumo kọn ḅara mẹ ḅụ ḅara-siin, tẹ ịn ḅẹrẹ kuromarị ḅara mẹ ḍima. Yee ịn tọrụ pịkị KỊNỊNYANAḄỌ, wamịna Tamụnọ ḅe da; ori ọkụrụkụrụ nyana wararị tẹ sarama si-wẹrịsoarị.

⁸KỊNỊNYANAḄỌ ḅe mẹẹ: Ị̀ akuroma na ọmịna akuroma na kịka-a, ì etela ma pịkị ọmịna etela ḅụ kịrịm.

⁹So mẹ Kiri mẹ ḅụ gele-faa ḅara, anie ì etela ma na kuroma ma na sọ ọmịna aị ḅụ gele-faa ḅara.

¹⁰Ị̀ ẹkwẹn ma eene-mgbọ na eene na kịkarị, anie So-tọrụ koro ḅo kiri pisimarị aị ma. Ịn mịẹ tẹ ḍiḅi aị ma so-pakarị tẹ ḍiḅi ḅẹ mgbọlị na fị ḅẹ fịye na nyanarị.

¹¹Anị ḅara mie à kọn-arị ẹkwẹn mẹ sọ sime ḅarị ḅara anị à tọn tẹ anị mịẹ ḅẹ ye gbarị ḅịa; à gotẹ anị kẹ fịrịma ye goyegoye anị mịẹ ḅa.

¹²Ó ḍereku kẹ Babịlọnị ḅụ paka-so ḅa; dein ḅụ mie ini ọmịna tọrọkọ-sụn tẹ ọ́ kẹ paka-so ḅarịye. Tụndụ ma na gele-akiri ma na nume oloku pakama ḅa, tẹ sịn ma ḍereku kẹ oloku ḅa.

¹³Ọmị osuka mịọkụ ḅụ so-pakarị yọ mẹ Sayịpẹrẹsị asịn so-paka ḅa; nangị kiri mẹ ḅụ matụlụ nwẹn-sịn asịn ma so-paka ḅa. Miemẹ kẹ ḅiokoromaye sọ mu ḅẹẹ-sakị ḅẹẹ-sakị la ḅa, kẹ yẹrị KỊNỊNYANAḄỌ ḅe mịẹ tẹ ye mẹ kẹ ḅiokoroma.