Read kalabari Ayịzaya 56 Bible Online

Ayịzaya 56 - kalabari bible

Ayịzaya 56

¹KỊNỊNYANAḄỌ ḅe ori atomi ḅẹẹarị: “Kịnị-inoma ofori ye na kuraye na mịẹẹ, kẹ gotẹ ọkọ ḍukoarị, ala-a àrị ọ́ ḅọrọma ḅa.”

²“Sakị mamgba Ịnyọsara-Ene mẹ kokoarị tẹ anị kẹ papaa ye mịẹ-a apụ ma arị in boma ḅa. Gbọrụ siye sọ mịẹ-a apụ ma arị in boma ḅa.”

³Jen sịẹ ḅẹ ḅọ tẹ ḅo amịna ḅụụ kẹ KỊNỊNYANAḄỌ ḅe atomi ma na gboloma tẹ ḅọ ḅẹẹ ma mịnẹ: “KỊNỊNYANAḄỌ ḍụkụ tẹ arị ori atomi na sunsin ọ̀ pịrị ḅịa.” Pootẹ owiḅọ gbala-gbala kuroma ma mịnẹ mḅọ inetẹ awọ iyi ḅịa ẹrẹsị mḅọ inetẹ Tamụnọ atomi ma ḅẹ ḅọ sọ ḅịa.

⁴KỊNỊNYANAḄỌ ḅe ọkọ sime tomḅọ ḅe ḅẹẹarị, “Ị́ Ịnyọsara-Ene mẹ koko ḅụ ḅọrọ tẹ ị̀ kụn-arị ḅẹḅẹ, pịkị ị̀ ḅụụ-ḅẹlẹarị ye mịẹ tẹ ḅioḅẹngbọ-kẹ-sịrẹrẹ-niḅi ḅara sime tẹ ị̀ ọḅọkụ mẹ wẹrịarị ḅẹḅẹ,

⁵anie ḅụ ini ị́ ẹrẹ kẹ ḅiokoroma ḅa ị̀ warị ḅio ḅụ, pịkị ị̀ atomi ma ogboku ḅụ, ọkị mu í owiapụ-awọmẹ na eremịna-awọmẹ na nyana ye kẹ ị́ kẹ ḅiokoroma ḅẹ sakị nẹngị ḅa. Gbala-gbala kịnị ị́ kẹ ḅioḅọrọma ḅịa.”

⁶Tẹ KỊNỊNYANAḄỌ ḅe jen asịẹ ḅẹ apụ ma tẹ ḅo ori atomi ma ḅụ sọarị apụ ma, anie ọ̀ ḅẹlẹma tẹ fịrịmẹnjị ọ̀ pịrịarị apụ ma, anie Ịnyọsara-Ene mẹ koko tẹ ḅioḅẹngbọ-kẹ-sịrẹrẹ-niḅi ḅara kẹ ori ọḅọkụ mẹ wẹrịarị apụ ma ḅẹẹarị:

⁷“Arị ọ́ kẹ Zayọnị ḅo ḅa, ị̀ fịafịa tụndụ mẹ, ị̀ tẹkẹ warị mẹ ḅio ḍereku kẹ ọ́ pịrị, tẹ pịkị ị̀ agbamịẹ-anga ọ́ mịẹarị agba ma daa-ọkị ḅa. Ịn kẹ ị̀ Warị mẹ sịn ḅarịye anie tomikiri ḅẹ asịẹ mamgba ḅẹ atomi ma tẹkẹ warị.”

⁸Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, anie amịna atomi Izirẹlị kẹ kun-ḅara ḅụ pịkị ama ḅo tẹ ḅọ ḅe, minini tẹ mịnẹ ọ̀ paa jen-apụ sọ kẹ ḅo ịna ḅụ sụa ḅa.

⁹KỊNỊNYANAḄỌ ḅe kịnị tọrụ nimi-a apụ asịẹ ma ḅẹẹ tẹ in piri-ḅio-ḅẹ anama kịka tẹ ḅo ori atomi kanị guluguluma.

¹⁰Ori mẹẹ, “Sịḅịdapụ mamgba, kịnị ọkịarị ini ì atomi ḅeri nụnụ ḅẹ apụ ma, ịna atọrụngbọ pụụn wararị! Gberie-sọ in nimi-a. Oloku-oloku-a warị-koru-obiri amẹẹ mie ịn kịkarị — koro mono ma ḅọrọ tẹ ḍawọ kịngẹ mie ịn mịẹarị. Ịn kpọma mono ḅẹlẹma ḅara ḍikii!

¹¹Fị ye fị ye pọkọ-ta-a obiri amẹẹ mie ịn kịkarị, anie kẹ ịn pịrị tẹ gbala-gbala ini na iḅi-iḅi ye ofori apụ. Mịna sịḅịdapụ ma in yefieye naa-a. Ịna ḅụ ọrụḅọ-ọrụḅọ amịna ḅụụ-ḅẹlẹ ye mịẹarị tẹ mḅọ na iḅi ḅẹ ye ḍọkịarị.

¹²Mịna iru ḅuu apụ ma ḅẹẹarị, ‘Ó yee wa iru kalịye ḅuu wa, tẹ wa inetẹ nyana ḅẹ ye mẹmgba ḅuu siin! Ḅaa ḅụ wa iḅi mịmgba wa sime-ḅara nẹngị ḅarịya!’ ”