Read kalabari Ayịzaya 59 Bible Online

Ayịzaya 59 - kalabari bible

Ayịzaya 59

¹Ó kuroma ma mịnẹ KỊNỊNYANAḄỌ ḅe ori ịnyọ nyana-a kẹ ọ́ ḅọrọma, anịanịa ori iningi ḅaka tẹ ọ́ ḅarasụa gotẹ kọn-arị owu mẹ naa ḅụ!

²Ọmịna asi mie ò gotẹ ọ́ naa-a ye. Ọmịna asi mie ó puu ḅelemarị Tamụnọ ḅụ, ọ́ ḅụụkụrọma tẹ sunsin ọ̀ pịrịarị sakị.

³Ọmịnị iruo tẹẹ, kụrọ-kụrọ amịẹaị mịẹ tẹ pịkị kịnị ḅaa tẹẹ.

⁴Ọ́ ḅẹrẹ-siri muarị kụma ọ́ ḅẹrẹ karakara nyana-a. Iruo aị ḅụ mie ọ́ sịrẹrẹ wararị kẹ ọmịna ḅẹrẹ ḍuko ọkị. Ọ́ tọn-arị aị tọn-arị aị kẹ ye kẹ ja apụ lama.

⁵Ọ́ tọn-arị si-aị ma arị si oronwi anyị na kịkam, arị kịnị ḅaarị ḅara ḅụ. Anyị mẹ ḅaa kọsịma, kụma oronwi paka-ḅoarị! Kụma ó ḅịyarị aḅẹrẹ ma kẹ ọ́ mịẹ ḅẹ gbọrụ iḅi sọ ofori;

⁶arị mịẹye ḅụ sọ-a ḅara anie gbala olokongoḅa warị kẹ ḅịtẹ ḍori mịẹye ḅụ sọ-a ḅara!

⁷Sakị mamgba ọ́ gbọrụ siye tọn-arị, tẹ ḅụụ-fụkamam ó koru tẹ anị mị. Mịẹye-ofori apụ ma ḅaa ḅụ gbala-gbala ó ḅio-maaịn-tọn nyana-nyana-a. Ó mu anga mu anga sima na guluguluma na mie ọ́ mịẹ koroma tẹ soarị,

⁸tẹ gbọrụḅọ-sọ yela-a ḅara sime nyana-a ọmịnị emi anga ḅụ. Ọ́ nyana tẹ mịẹarị ye goyegoye jụmọ inoma ye famam. Sụngụma-sụngụmatẹ etela mie ọ́ mẹnjị-mẹnjị ye, tẹ anị etela mẹnjịarị tẹ ye ḅụụ la-a so ḅarị ḅọ ofori.

⁹Tomi ma mẹẹ, “Mịọkụ wa nimi tẹ Tamụnọ gotẹ wa ponomarị apụ ma ḅara-ḅio wa ḅọrọma-a ye. Wa wa kẹ mẹnjị ḅẹ bele kẹ ḅiotọn-arị kụma kanakana ngẹrị mie emi ye,

¹⁰tẹ wa tọrụngbọ-pụụntẹ-apụ ḅara kẹ ḅii ma mẹnjịarị. Eneḅaka-fịafịa-ogbo ḅụ wa pụmbụma-pụmbụmarị, gbala ḍin ọkụ, gbala wa fịtẹ-apụ kanakana tomikiri ḅụ simem.

¹¹Wa tẹmẹ-naịn-naịn tẹ ḅụụ-ḅalaḅalarị; wa ḅii lamarị Tamụnọ ponoma na iri-amịẹaị na ḅụ wa ḅọrọma, kụma gberie-sọ paka-a.”

¹²“KỊNỊNYANAḄỌ, wa kẹ ị́ mịẹ tẹ asi-aị ḅakam. Wamịna asi ḅẹrẹ kẹ wamịna ọgọnọ gbanarị. Wa arịmgba nimi lama wararị.

¹³Wa kọngọ-kụrọma ị̀ pịrị tẹẹ, ị̀ sịkị tẹẹ, pịkị ḍụkụ tẹ ì ḍukamẹnjị-a. Wa jen-apụ ponoma tẹ ọḅụ kẹ ì gbin tẹ. Wamịna akuroma ma papaa aị; wamịna ẹkwẹn ma iruo aị.

¹⁴In tomḅọ la kiri kẹ mḅọ pịrị dee-siin tẹẹ, tẹ kuraye mịẹ ḅarị inetẹ ḅo kpeki-a. Karakara ama-karakara-ogbo ḅụ mbelembelearị, tẹ anịanga kịnị mingirima-mingirima-a mịẹ gbọrụ kiri sọ ḍọkị ẹrị-a.

¹⁵Kịnị mingirima-mingirima-a kalịye sọ ofori, anie mịẹ tẹ ḅẹḅọ-ḅẹḅọ tẹ si mịẹ dasịẹmarị ḅọ mẹ amịna ḅụụ ḍọkị ẹrịarị mịnẹ mḅọ si mịẹ gbo pịrị ḅọ sọ tẹẹ.” KỊNỊNYANAḄỌ ḅe miemẹ ẹrị tẹẹ, anị ọ̀ ḅụụ siinm mịnẹ tomḅọ la kiri kẹ mḅọ pịrị ofori.

¹⁶Ọ̀ ḅụụ-bua tẹ ẹrịm mịnẹ gbọrụḅọ-sọ ofori ḅarasụa in ponomarị apụ ma pịrị. Mie ḅụ ori ọ̀ kụrọ kẹ ịn pụkọ-pakamaḅo tẹ owu-ḅara-iḅi nyana ḅa.

¹⁷Ò tomḅọ la kiri kẹ mḅọ pịrị kẹ ọmụḅọ kapa sọma tẹ sụa ḅa, tẹ owu-ḅara-iḅi nwẹnị ọmụḅọ okpoko-sun sọ ọ̀ pịrị ḅa. Ḅio tọn kụrọma tẹ ye kẹ kura ḅara ḅụ wẹrị ọ̀ kapa sọ ḅa, tẹ nwẹnị fomu-ḅara kẹ iri ḅara kẹ kịnị kẹ tọrụsiẹrịarị apụ ma pịrị.

¹⁸Si kẹ ọ̀ tọn apụ ma mịẹ ye mie ò ḍiki tẹ fomu-ḅara kẹ ịn pịrị ḅarịye, jen-a jen-a sụma-jụ ḅẹ amakiri ma ḅụ angarị apụ ma.

¹⁹Ịrụa mẹ saakịarị yọ ḅụ ọkị mu anị tuuideriarị yọ la, ḅẹḅọ-ḅẹḅọ ò ḍiki ḅalafaa ḅa, pịkị ori opu kụrọ sọ. Ò ḅo ḅarị ḅara owi minji na kụrọ fẹrụ na kịka ḅa.

²⁰KỊNỊNYANAḄỌ ḅe ori atomi ḅẹẹarị, “À Jeruselemu ḅo tẹ ọ́ ḍụa tẹ ọmịnị-mgba ḅụ ọmịna si ḅụ pịkị tẹ apụ ma ḅọrọma ḅa.

²¹Tẹ àrị ọḅọkụ kẹ ọmịnị na fịarị; arị ị̀ kụrọ na ì toluma aị na kẹ ọ́ pịrịarị, arị ọmịna aị sọ mu ḅẹẹ-sakị ḅẹẹ-sakị la ḅẹ ḅara; tẹ mịọkụ sakị tọrọkọ mu ḅụ, ọmịnị ị̀ ḅịḅị poki tẹ ọmịna awọmẹ na ọmịna furo-ḅẹ-apụ na toluma tẹ ini ị̀ ḅịḅị poki ḅa, tọrọkọ-jụ ḅo ḅarị sakị mamgba ḅụ.”