Read kalabari Ayịzaya 61 Bible Online

Ayịzaya 61 - kalabari bible

Ayịzaya 61

¹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe Ọ̀ tẹmẹ kẹ ị̀ ḅụụ ḅio suu ḅinma tẹẹ. Ori ị̀ sẹlẹ ọkị tẹ ị̀ kẹ fịrịma tẹ Iḅi-oku kẹ mu igoin-apụ ma pịrị ḅẹ ḅara, Ḅioḅẹngbọ kaan-sara tẹ apụ ma gwọ, Ḍuko kun-ḅara ḅio simearị apụ ma pịrị ịn paka-ḅo ḅa, pịkị ikoli ḅio simearị apụ ma ḅẹẹ ini ịna sịḅị atomi sọ ḅa.

²Ori ị̀ fịrịmam à mu ḍuko wasama Mịnẹ sakị mẹ ḅo la tẹ KỊNỊNYANAḄỌ ḅe ori atomi ḅọrọma ḅẹ sakị mẹ Tẹ si kẹ ịn tọn apụ ma nẹngịma. Ori ị̀ fịrịma tẹ à mu kururuarị apụ mamgba dedema.

³Kẹ Zayọnị ḅụ kururuarị apụ ma pịrị Ḍereku na ḅioḅẹlẹ na, ḅioḅẹngbọ-si nakara, Tokini nume-su, kururu nakara. Ini opu asịn kịka ḅa Anie KỊNỊNYANAḄỌ ḅe ḅarana ḍiḅi aị. Inimgba kuraye mịẹ ḅa, Tẹ Tamụnọ tokini ḅa ọ̀ kọrị tẹ ye gotẹ.

⁴In siin iḅere-iḅerea kụra ḅio kan-sara sime opu ama ma nama ḅa.

⁵Ị̀ atomi, jen asịẹ ḅẹ apụ fịrịmẹnjị ọ́ pịrị ḅa Ini ọmịna anana ogbo-ogbo ma ḍikiḍiki ḅa. Tẹ ọmịna ḍụọ kọrị tẹ ọmịna kụrọ aḍụọ ma tẹlẹma ḅa.

⁶Tẹ ọmịnị KỊNỊNYANAḄỌ ḅe agbamịẹapụ ḅara mie ịn kẹ ó nimi ḅarịye, Wamịna Tamụnọ fịrịmẹnjịapụ. Ọ́ sịẹ-sịẹ ma ḅẹ ngọ mẹ fị ḅa Tẹ kẹ ḅụụ-tọn ḅa mịnẹ anị ọmịna nye sọ tẹẹ.

⁷Ọmịna ḅụụ-jịrị na tọrụ-tuu na kuno tẹẹ. Ọmịnị ọmịna amakiri ḅụ anga ḅa Tẹ ọmịna ngọ maa kiri paka ḅa Ọmịna ḍereku sime mu ḅẹẹ-sakị ḅẹẹ-sakị la ḅa.

⁸KỊNỊNYANAḄỌ ḅe mẹẹ, “À tomḅọ la kiri kẹ mḅọ pịrị ḅẹlẹma tẹ kịnị ponoma na si mịẹ na ḍiki ḅioḅuarị. À karakara ḅara kẹ gbẹẹ-ye kẹ ị̀ atomi pịrị ḅa tẹ sime-gbamaso ọḅọkụ kẹ ini na fị ḅa.

⁹Sịẹ-sịẹ ma ogboku ḅụ ini ereso ḅa Sịẹ-sịẹ ma ogboku ḅụ ini ereso ḅa Ini ẹrịḅọ-ẹrịḅọ nimi ḅa Mịnẹ ini ma anie à bomatẹ apụụ.”

¹⁰Jeruselemu ḍerekuarị KỊNỊNYANAḄỌ ḅe kọrị tẹ ye mẹ ẹrẹsị. Á kịkarị ye owiḅọ sime ḅẹ tẹ ḅirima ẹrẹḅọ. Tamụnọ ḅọrọma na owu-ḅara-iḅi na kẹ kapa sọma tẹ kẹ á sụa tẹẹ.

¹¹Kiri ḅio ḍiḅi sịn mgbọlị piki-pikiye-ofori ḅara kẹ so-pakarị gbọrụ ḅara mẹ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ori atomi ḅọrọma ḅarị ḅara, tẹ sịẹ mamgba ò tokini ḅa.