Read kalabari Ayịzaya 62 Bible Online

Ayịzaya 62 - kalabari bible

Ayịzaya 62

¹Àrị ẹkwẹn pakama tẹ kẹ Jeruselemu ḅiokpọma ḅa; À gbọsime ḅịa nwenii á ḅọrọma ḅa, Tẹ árị owu-ḅara-iḅi mẹ pọnjị-tọnjọ ḍin ḅụ kọrị ḅara kẹ kọrị paka ḅa.

²Jeruselemu, sịẹ-sịẹ ma í owu-ḅara-iḅi mẹ ẹrị ḅa! Ịna amadapụ mamgba í ebube ẹrị ḅa. Ị́yẹrị ini ịwọ ẹrẹ kẹ ị́ sịn ḅa, KỊNỊNYANAḄỌ ḅe ḅarana kẹ ị́ pịrị ẹrẹ.

³Ị́ nwẹnị tọrụ-gbẹ amada-sun sọ KỊNỊNYANAḄỌ ḅe pịrị ḅa.

⁴Kịnị ḅarị jen kẹ “Sịkịtẹ-ḅọ” kẹ ị́ sịn ḅịa, Anịanịa ị́ amakiri mẹ sịn, “Koroma-so tẹ Ẹrẹḅọ ma.” Ị́ ịwọ ẹrẹ sọ ḅarịye anie, “Tamụnọ Á Ḍiki Ḅioḅẹlẹarị.” Ini ị́ amakiri mẹ sịn ḅa, “Diḅọ na Ḅioḅẹlẹ ḅụ angarị Ẹrẹḅọ,” Kẹ gotẹ ọkọ ḍukoarị, KỊNỊNYANAḄỌ ḅe í ḍiki-ḅioḅẹlẹarị, Tẹ ori diḅọ sọ ị́ amakiri mẹ pịrị ḅa.

⁵Asatụḅọ kpaịntẹ iriawọ-tụḅọ ọkị simearị ḅara kịka ḅara ḅụ ị́ tẹmẹḅọ ḅe í sime ḅa. Ẹrẹḅọ simearị owiḅọ ò simearị ẹrẹḅọ ma ḅụ ḅioḅẹlẹ nyana ḅara, Anị ḅara mie ị́ Tamụnọ ḅe ị́ ḅụ ḅioḅẹlẹ ḅarị ḅara.

⁶Jeruselemu, í onu ma ọgọnọ arị ama-koru apụ kẹ koroma tẹẹ; In gbọsime ḅịa eneḅaka-o, ḍin-o Ịn KỊNỊNYANAḄỌ ḅe mịẹ ḅẹ tẹ minini aị ma kẹ ò ḅiokoroma nyanam Tẹ gbala-gbala ḍụkụ tẹ ori arị kẹ ḅioḅọrọma ḅịa.

⁷Ịn ḍụkụ tẹ ori ịnyọsara nyana-a, nwenii ò Jeruselemu kẹ tarị anị sime-ḅara wẹrị. Tẹ anị mịẹ tẹ anị tomikiri mẹmgba tokiniarị apụ ama sọ.

⁸KỊNỊNYANAḄỌ ḅe tẹmẹ-la ḅara kẹ ye minini tẹẹ, Tẹ ọ̀ kụrọ ḅụ ori anị mịẹ ḅa; “Ọmịna mbịaka ḅarị jen kẹ si kẹ ọ́ tọn apụ ma fị-fị ye sọ ḅịa, Tẹ ja sịẹ ḅẹ apụ ḅarị jen kẹ ọmịna iru ḅuu ḅịa.

⁹Kụma ọmịnị mbịaka mẹ ḍiḅi tẹ anị kpọọ tẹ pẹlẹ apụ ma Anie anị ḅẹ fịturu mẹ fị tẹ KỊNỊNYANAḄỌ ḅe tokini ḅarịye. Ọmịnị kụrọ mgbọlụ ma tẹlẹma pakama-ḅo tẹ kaịn kobiri apụ ma Anị ḅẹ iru mẹ ḅuu ḅa ị̀ warị mẹ ḅẹ ogigo mẹ ḅio.”

¹⁰Jeruselemu ḅẹ apụ, ọmịnị opu ama mẹ ḅio paka mu Tẹ etela mịẹ ọmịna atomi pịkịma-ḅoarị apụ pịrị! Opu etela tẹlẹmaa; anị ḅẹ aḍụḅarị ma kolokolo siin! Kẹ elekima sụa ḅẹ ye kẹ pikee, mịẹ tẹ sịẹ-sịẹ ma inetẹ nimi ḅẹ ḅara.

¹¹Mịnẹ KỊNỊNYANAḄỌ ḅe ḍuko wasama bebe tomikiri mẹ pịrịarị: “Ḍuko kpọma-ḅẹlẹmarị Jeruselemu ḅẹ apụ ma pịrịị, ‘KỊNỊNYANAḄỌ ḅe ọ́ ḅọrọma ḅẹ ḅoarị; ori ọ̀ gbẹẹ-aị na ḅoarị.’ ”

¹²Ịn kẹ ịn sịn ḅarị ye: “Tamụnọ Fịafịa Atomi, KỊNỊNYANAḄỌ Ḅe Ḅọrọma Tẹ Apụ.” Ịn kẹ Jeruselemu sịn ḅarị ye: “Ḍọkị Pakama-ḅotẹ Ama, Tamụnọ Sịkị-a Opu Ama Mẹ.”