Read kalabari Ayịzaya 7 Bible Online

Ayịzaya 7 - kalabari bible

Ayịzaya 7

¹Amadaḅọ Ehazi, anie Jotamụ owiḅọtụḅọ, pịkị Uzaya taa-owiḅọtụḅọ ḅe Juda daarị sakị ọmụ korom. Rezini, Siriya ḅẹ amadaḅọ na Pẹka, Rimalaya tụḅọ Izirẹlị ḅẹ amadaḅọ ḅe na, owu kẹ Jeruselemu pakam kụma ini inetẹ anị ọkị-a.

²Ḅịḅị mu Juda ḅẹ amadaḅọ ḅe la sakị, mịnẹ Siriya ḅẹ ọmụ-ogbo-ogbo ḅo Izirẹlị kiri kụrọ-sịẹ tẹ ḅẹ sakị, ori na ori atomi na oju sẹkịm, sịn ma fẹrụ ḅio jike ḅara.

³KỊNỊNYANAḄỌ ḅe Ayịzaya ḅẹẹm, “Ị́ tụḅọ Siya Jasubu ọkịị, tẹ ori na mu Ama-da Ehazi na bịama. Etela ḅụ í ori ẹrị ḅa, ḅịtẹ ḍori apụ namakọrịarị anga mẹ ḅụ, ọgọnọ ḅẹ ḍaḅa mẹ ḅẹ minji ḅọrọ, ḅọrọ ideri-ḅoarị ogilolo mẹ sịḅị jụ ḅụ.

⁴Ọ̀ ḅẹ ọ̀ tẹlẹma tẹ ẹbị, ḅụụ-ḅalaḅala-a ḅara, tẹ tẹmẹ-naịn-naịn-a anịanịa kuroma ḅụụ-ḅaa ḅara sime. Ama-da Rezini ịganị na, ọ̀ jụ ḅẹ Siriya ḅẹ apụ na, Ama-da Pẹka na si kẹ kịnị mịẹ mẹ, biin ḅẹ-yearị pakịrị amẹngbọ ḅụ soarị onwin nẹngị-a.

⁵Siriya, Izirẹlị na amịna amadaḅọ na kẹ amịna ḅụ sụatẹ si ḅẹrẹ ḅịya tẹ.

⁶In ḅiiarị ini ọmụ kẹ Juda paka, tomi ma tẹmẹ-naịn-naịnma tẹ ini ịna jụ sọ, anị tẹso, ịn nwẹnị Tabili tụḅọ ḅe kẹ ama-dama.

⁷Kụma yẹrị KỊNỊNYANAḄỌ ḅe ḍuko-pakamarị mịnẹ miemẹ gbala-gbala mịẹ ḅịa.

⁸Tiye ẹrẹsị? Anị gotẹ ọkọ mịẹ ḅịa ye, Siriya kụrọ anị ḅẹ sịḅịda ama, Damasịkọsị, nẹngị-a, tẹ Damasịkọsị pịkị kụrọ Ama-da Rezini nẹngị-a. Izirẹlị kịngẹ kụma, kụra atesi sọnọ akụra finji sakị ḅụ anị kan-sara la ḅarị ḅara ḅụ anị ḅarị sime tẹ jen kẹ sịẹ ẹrẹ fị ḅịa.

⁹Izirẹlị kụrọ Sameriya nẹngị-a gbọrụ ḅọkọ ḅụ sọ, anị ḅẹ sịḅịda ama mẹ; tẹ Sameriya pịkị kụrọ Ama-da Pẹka nẹngị-a gbọrụ ḅọkọ ḅụ sọ.” “Í minini tẹ inema tọrọkọ mu-a ḅẹḅẹ, ị́yẹrị sọ í sime tọrọkọ mu ḅịa.”

¹⁰KỊNỊNYANAḄỌ ḅe jen oku kẹ Ehazi fịrịmam:

¹¹“KỊNỊNYANAḄỌ ị́ Tamụnọ ḅe ḅara ḅii ori elekima kẹ í ḍie; ḍuḅu ḅio ḅụ ḅo ye-o, anịanịa So-ḅio ḅẹ ọgọnọ-jụ ḅụ ḅo ye-o.”

¹²Ehazi nwẹnị pakịrị, “Àrị elekima ḅii ḅịa. À ḍụkụ tẹ KỊNỊNYANAḄỌ ḅe daaḍiki ḅịa.”

¹³Anị ẹkwẹn mẹ Ayịzaya pakịrịm, “Pokii, mịọkụ, Ama-da Devidi furo paka-ḅo, ịnyọ kẹ tomi tama tẹ ịn ḅarị inetẹ inema ḅịa si mẹ la ḅara mẹ paa boowa tẹ ị́ pịkị ịnyọ kẹ Tamụnọ sọ tama-a so ḅịa wararị ya?

¹⁴Ọkọ ḅẹḅẹ iḅim, KỊNỊNYANAḄỌ ḅe ḅioju ḅarana elekima kẹ í ḍie ḅa; iriawọ-tụḅọ tẹ fura wararị ḅọ ma owiḅọtụḅọ iyi tẹ Ịmanụwẹlị kẹ ọ̀ sịn ḅa.

¹⁵Tẹrẹmẹ ọ̀ ḍụḅa paka-ḅo tẹ iḅi na si na nimi ḅarị sakị, kịnị ndo-minji ḅuu ḅa pịkị ḅẹm taḅa ḅa.

¹⁶Tẹrẹmẹ ḅo anị sakị la sọ, ị́ tẹmẹ-naịn-naịnmarị maa amadapụ ma amakiri ma tomi arị koroma mangị faa ḅa.”

¹⁷KỊNỊNYANAḄỌ ḅe ọkị-ḅo ị́yẹrị na, ị́ atomi na, í bebe amada-furo mẹ na ọgọnọ gbana ḅẹ-yearị opu ḅụụ-fụka mẹ, sii Izirẹlị sịẹ mẹ Juda ḅụ puu so kụra ḅio ḅo ọ́ la tẹ ye nẹngị ḅa — ori Asiriya ḅẹ amadaḅọ kẹ ḅoarị.

¹⁸Anị ene mẹ ḅụ, KỊNỊNYANAḄỌ ḅe ọfịọn kẹ Ijiputi-ḅẹ-apụ sịn ḅa, elekima ḅara ḅụ, tẹ ini ọmọmọ kịka tẹ gbiima fiin ḅo ḅa, Nayịlị tọrụ mu laa anga laa anga ḅụ ọ̀ pịkị ọkọ kẹ Asiriya ḅẹ apụ sọ sịn tẹ ini akama kịka tẹ gbiima ịna ama ḅụ sime tẹ ḅo ḅa.

¹⁹In ḅo tụndụ ma suku ḅụ ḍụḅarị akiri ma ḅụ ḅin palị ḅa, pịkị ịkụ ma ḅẹ fukuru ma ḅio sọ ḅin ḅa, tẹ ịn pịkị nangị asịn apiri ma na anana osuka fịarị akiri ma na ḅụ sọ sara ḅa.

²⁰Anị ene mẹ ḅụ, KỊNỊNYANAḄỌ ḅe Yuferetisi tọrụ saḅa sịḅị-kịrịḅọ ọkọ ḅo ḅa — Asiriya ḅẹ tomikiri mẹ daarị opuḅọ ḅe ori — tẹ ori ọmịna mpọrị sẹịn sin ḅa, pịkị ọmịna asịḅị na oju ma na ḅụ simearị inume ma sịn sin ḅa.

²¹Anị ene mẹ ḅụ, gbọrụ ḍụọ-kọrịḅọ nwẹnị inetẹ gbọrụ asambịrịma nambulo kịngẹ na maa oḅori na ḅọrọma sọ,

²²ịn pakama ḅarị ndo-minji ḅo lama tẹ ori na iḅi ḅa. Inn, amakiri mẹ ḅụ kirikọn ḅarị boowa kala-apụ ma ndo-minji nyana tẹ ḅuu ḅa, pịkị ḅẹm nyana tẹ taḅa ḅa.

²³Anị ene mẹ ḅụ, iḅi kụrọ aḍụọ ma tẹ kụrọ suku maa ẹndẹ oyia asi finji finji tẹ seleḅa maa ẹndẹ oyia asi finji finji la aị ma ḍiḅi sime ayọ ma, nangị asịn piri na ọmị na arị gbaịn ḅa.

²⁴Kịnị mu anịanga iboli na ḍiein na kẹ piri dee ḅa. Inn, bebe sịẹ mẹ ḅẹ amakiri mẹ ḅụ ọmị na nangị asịn apiri na paka ḅin ḅa.

²⁵Tụndụ mamgba ọgọnọ tẹ fịaị paka, paka ayọ ma ḅụ nangị, nangị paka ḅin ḅa, tẹ gbọrụḅọ-sọ anị anga mu ḅịa. Anị sime opu anama na anana na osuka fị yọ pịrị ḅa.