Read kalabari Lẹvitikọsị 11 Bible Online

Lẹvitikọsị 11 - kalabari bible

Lẹvitikọsị 11

¹KỊNỊNYANAḄỌ ḅe nwẹnị Mozizi na Erọnị na ḅẹẹ,

²“Ọmịnị Izirẹlịapụ ma ḅẹẹ, ‘Tomikiri ḅụ piri-ḅio simearị nama amẹẹ na, feni amẹẹ na mamgba ḅụ mịna aị ma anie ḍumo wararị aị tẹ ọ́ pẹị ḅarị aị arị ogbo-ḅio ḅụ.

³Ḅẹẹ-nama-nama tẹ ḅụọ ḅụ okuro mẹ ḍiema wararị tẹ ḍiematẹ okuro ḅụọ sụa nama, tẹ pịkị nama ma ogbo ḅio ḅụ amgba-na-iku-na ḅio fịye fị kọnma wẹrị tẹ pakama-pakama-ḅo tokuruarị anama ma ọmịnị inetẹ pẹị ḅa.

⁴Anịsọ arị aị ma tẹ amgba-na-iku-na ḅio fịye fị kọnma wẹrịtẹ pakama-pakama-ḅo tokuruarị, anịanịa, ḅụọ ḅụ okuro sụa anama ma ḅụ mịna anama ma ọ́ pẹị ma: Ike-sụa-nama ḅe, ọmịna aḅụụ ḅụ ọ̀ fịafịa-a, gbala ori amgba-na-iku-na ḅio fịye fị kọnma wẹrị tẹ pakama-pakama-ḅo tokuruarị kụma ọ̀ ḅụọ ḅẹ okuro ḍiema-a ẹrẹsị;

⁵pịkị ewita ḅe na, gbala ori amgba na iku ḅio na fịye fị kọnma wẹrị tẹ pakama-pakama-ḅo tokuruarị kụma ọ̀ ḅụọ ḅẹ okuro ḍiema-a ẹrẹsị ọmịna aḅụụ ọ̀ fịafịa-a.

⁶Ịnwa ḅe sọ ori amgba na iku ḅio na fịye fị kọnma wẹrị tẹ pakama-pakama-ḅo tokuruarị kụma ò ḅụọ ḅẹ okuro ḍiema-a ẹrẹsị ọmịna aḅụụ ọ̀ fịafịa-a.

⁷Opuropo ḅụọ ḅẹ okuro ḍiema wararị tẹ ò ḍiematẹ okuro ḅụọ sụam, kụma Ori amgba na iku ḅio na fịye fị kọnma wẹrị tẹ pakama-pakama-ḅo tokuru-a ẹrẹsị ọmịna aḅụụ ọ̀ fịafịa-a nama sọm.

⁸Ịna meni ḅụ ọ́ nama ọkị pẹị ma, ịna ḅụ fịtẹ koro-sime wararị ọkpa mẹ sọ ọ́ ḅara kẹ lama ma; ọmịna aḅụụ ịn fịafịa-a aị sọ wararị.’ ”

⁹“Mịna aị ma ọmịnị inetẹ pẹị ḅa, minji ma ḅio simearị aị mamgba ḅụ ye ọkị pẹị ḅara ḅụ. Minji ḅio simearị ye goyegoye tẹ ịsịram na ẹfẹrẹfẹ na sụa, aị, anị ala-minji-o, ḅuu-minji-o, ọmịnị inetẹ pẹị ḅa.

¹⁰Kụma ala-minji anịanịa ḅuu-minji ḅio ḅẹ ye, ḅẹ ye tẹ ịsịram na, ẹfẹrẹfẹ na sụa-a ye tẹ ogbo sọ, sọ mẹnjịarị ḍumo wararị aị tẹ minji mẹ ḅio simearị aị goyegoye anie tọn-tọnye sọ ọ́ pịrị ye.

¹¹Tọn-tọn-aị arị nwẹn sọ ọ́ pịrị ḅa. Arịḅẹ ameni ma ọ́ pẹị ma, anịsakị ịna fịtẹ oju ọkpa ma tọn-tọn-aị sọ ḅa.

¹²Minji ḅio simearị ye goyegoye tẹ ịsịram na, ẹfẹrẹfẹ na sụa-a ye goyegoye anie ọmịna tọn-tọnye.

¹³“Mịna aị ma feni amẹẹ ma ogbo ḅio ḅụ tọn-tọn-aị sọ ọ́ pịrị ḅa. Ọmịnị ịn pẹị ma; ini anie tọn-tọn-aị. Mịna aị ma anie: igo ḅe na, ẹdẹlẹ ḅe na, ịn kẹ ọsịpire sịn inji gbọn feni ḅe na,

¹⁴ekule ḅe na, ịn kẹ falịkọnị sịn feni ḅe na ò sime-ḅara sime afeni na,

¹⁵ịn kẹ revini sịn feni ḅẹ na ò sime-ḅara sime afeni na,

¹⁶okpo ḅe na, ḍin agụnkwọ ḅe na, kịara ḅe na, agụnkwọ ḅe na, ịn sime-ḅara sime afeni na,

¹⁷ngbukungbuku ḅe na, kẹwẹ ḅe na, akịalala ḅe na,

¹⁸ḅu-ọḅọkọ ḅe na inji-gbọn-feni ḅe na, ḍụẹịn-pẹị-ẹdẹlẹ ḅe na,

¹⁹egbe ḅe na, okola ḅe na ịn sime-ḅara sime afeni na, sịḅị ọgọnọ ịkụ sụa feni ḅe na, poku ḅe na.”

²⁰“Pamba-sụa ḍọkọḍọkọ feni awọmẹ tẹ inia aḅụọ sụa tẹ kẹ mẹnjịarị aị mamgba anie ọmịna tọn-tọn aị.

²¹Anịsọ pamba-sụa ḍọkọḍọkọ feni awọmẹ ma tẹ inia aḅụọ sụa tẹ kẹ mẹnjịarị aị ma ogbo-ḅio ḅụ arị aị ma tẹ kẹ kiri ọgọnọ ḍosi ḅẹ anda-na-iko-na aḅụọ sụa tẹrẹmẹ kiri nanga aḅụọ suku sụa aị ma ọmịnị inetẹ pẹị ḅa.

²²Ịna ḅio ḅụ ọmịnị inetẹ pẹị ḅarị aị anie: igurube ḅe na ò sime-ḅara sime aị na, sịḅị firitẹ igurube ḅe na ò sime-ḅara sime aị na, adẹịn ḅe na ò sime-ḅara sime aị na, pịkị ịkpakpa ḅe na ò sime-ḅara sime aị na.

²³Kụma osi pamba-sụa ḍọkọḍọkọ feni awọmẹ mamgba tẹ inia aḅụọ sụa aị ma anie ọmịna tọn-tọn-aị.

²⁴Mịna aị ma ḅụụ ḅụ ó ḅo fịafịa-a apụ sọ ḅa; ḅẹḅọ-ḅẹḅọ tẹ amịna ḅara kẹ ịna ḍụẹịn lama ḅọ, lama ḅọ fịafịa-a ḅọ sọ nwenii ḅoḅiri-so la ḅa.

²⁵Ḅẹḅọ-ḅẹḅọ tẹ ḅara kẹ ịna ḍụẹịn ḅụ ḅẹ anga, ḅẹ anga lama tẹ dogi ḅọ, dogi ḅọ mḅọ amịna akapa sịkịrị tẹ Fịafịa-a ḅara sime nwenii ḅoḅiri-so la ḅa.

²⁶Nama goyegoye tẹ ḅụọ ḅụ ḍiematẹ okuro sụa wararị kụma jen-jen ḅụ ḅele-a anịanịa amgba na iku ḅio na fịye fị kọnma tẹ pakama-pakama-ḅo fị-a nama goyegoye anie ọmịna aḅụụ fịafịa-a nama; ḅẹḅọ-ḅẹḅọ tẹ ḅara kẹ arị lama ḅọ, lama ḅọ ḅarị fịafịa-a ḅọ sọ ḅa.

²⁷Nama tẹ ini eleke mamgba kẹ mẹnjịarị anama ogbo-ḅio ḅụ, ini eleke mamgba ḅụ imime sụa tẹ kẹ mẹnjịarị anama goyegoye anie fịafịa ye ọmịna aḅụụ ḅẹ ḅọ, ḅẹ ḅo tẹ ḅara kẹ ịna ḍụẹịn lama ḅọ, lama ḅọ ḅo fịafịa-a ḅọ sọ nwenii ḅoḅiri-so la ḅa.

²⁸Ori ḅe tẹ ịna ḍụẹịn dogi ḅọ, dogi ḅọ amịna akapa sịkịrị tẹ fịafịa-a ḅara sime mu ḅoḅiri-so la ḅa; ọmịna aḅụụ ịn fịafịa-a.”

²⁹“Ogbo sọ ḅara kẹ mẹnjị gbolomarị anama tẹ kiri ọgọnọ ḅụ gboloma tẹ mẹnjịarị anama ḅụ mịna aị ma anie fịafịa-a aị ọmịna aḅụụ: ofunguru ḅe na, nkịapị ḅe na, opu ologboingboin ḅe na ịn sime-ḅara sime aị na,

³⁰warị-ḅụlọ ḅe na, kiri ọgọnọ ḅe seki ḅe na, ologboingboin ḅe na, onwi ḅio ḅẹ ologboingboin ḅe na, ogumangala ḅe na ịn sime-ḅara sime aị na.

³¹Ogbo sọ ḅara kẹ mẹnjịarị anama mamgba ogbo-ḅio ḅụ mịna aị ma anie fịafịa-a anama ọmịna aḅụụ ḅẹḅọ-ḅẹḅọ tẹ ịn fịị tẹso, ḅara kẹ ịn lama ḅọ, lama ḅọ Fịafịa-a ḅọ sọ nwenii ḅoḅiri-so la ḅa.

³²Anịsakị ḅẹẹye-ḅẹẹye tẹ ịna ḅụ ḅẹ nama, ḅẹ nama fịị sakị ḅụ ḅịkị ponoma ye, ponoma ye fịafịa-a ye sọ ḅa, anị ḅọrọ dẹrị fịnị-o, anịanịa opu kapa, anịanịa nama oju apara, anịanịa, akpa, anịanịa ḅẹ ye-sụa ye, ye-sụa ye tẹ kẹ anị ḅụ mịẹ ye, mịẹ ye sọ, anị minji ḅio taụ tẹ sịkịrị nyanam, tẹ anị fịafịa ye sọ ḅịa nwenii mu ḅoḅiri-so la ḅa, anịtẹrẹmẹ anị fịafịa ye sọ ḅa.

³³Arị anama ma ḅụ ḅẹ nama, nama ḅịkị, anịanịa, siin-koro lịka kẹ tẹmẹ ye-sụa ye ḅio sọ, sọọ, ye tẹ anị ḅio sime aị mamgba fịafịa-a aị sọ ḅa, anịsakị ye-sụa ye mẹ ọmịnị anị ḅaa ḅa.

³⁴Ḅẹ fịye, ḅe fịye tẹ kịnị fị ḅẹ tẹ anị ḅio sime tẹ minji inetẹ la ḅẹ ye goyegoye fịafịa-a ye sọ ḅa; ḅuu, ḅuu ye mamgba tẹ ọkọsime ye-sụa ye goyegoye ḅio sime ye, sime ye ḅuu ḅọ, ḅụụ ḅọ fịafịa-a ḅọ sọ ḅa.

³⁵Anịsakị ye goyegoye tẹ ịna ḍụẹịn mẹ ḅụ ḅẹ pakịrị fuku mu la ye, la ye fịafịa-a ye sọ ḅa anị fịturu na jaị fọị ọpọ-o, ḅẹlẹ sịẹma tẹ fịye sọ fị ọpọ sọ, ọmịnị anị fomu kan kọsịma ḅa, arị fịafịa-a; anịsakị arị fịafịa-a aị sọ ọ́ pịrị ḅa.

³⁶Ẹbịsịya ngụngụḅa, anịanịa minji koko anga anie fịafịa ḅarị anga, kụma ḅẹẹye-ḅẹẹye tẹ ịna ḍụẹịn mu la ye, la ye ḅarị fịafịa-a.

³⁷Ịna ḍụẹịn mẹ ḅẹ pakịrị fuku mu ḅẹ sịnmgbọlị, sịnmgbọlị tẹ ḍiḅi ḅẹ ye ọgọnọ koro, koro, aniemẹ anie Fịafịa-a ye.

³⁸Kụma ịn minji kẹ sịnmgbọlị mẹ ọgọnọ sara wararị tẹ ma ḍụẹịn mẹ ḅẹ pakịrị fuku mu anị la-la, ọmịna aḅụụ anị fịafịa-a ye sọ tẹ.”

³⁹“Ḅẹẹ-nama-nama tẹ ọmịnị inetẹ pẹị ḅarị nama ngẹrị fị-fịị, ori ḅe tẹ ḅara kẹ ọ̀ ḍụẹịn mẹ lama ḅọ, lama ḅọ fịafịa-a ḅọ sọ nwenii ḅoḅiri-so la ḅa,

⁴⁰anịsakị ori ḅe tẹ fịị nama ḅe ḅụ nama ọkị pẹị ḅọ, pẹị ḅọ amịna akapa sịkịrị ḅa tẹ fịafịa-a ḅara sime nwenii ḅoḅiri-so la ḅa anịsakị ori fịị nama ḅe ḍụẹịn mẹ dogi ḅọ ḅe sọ amịna akapa sịkịrị tẹ fịafịa-a ḅara sime nwenii ḅoḅiri-so la ḅa.”

⁴¹“Ogbo sọ tẹ mẹnjịarị ye goyegoye tẹ kiri mẹ ọgọnọ mẹnjịarị ḍọkọḍọkọ anama goyegoye anie tọn-tọn ye, ọmịnị anị pẹị ma.

⁴²Ḅẹẹye-ḅẹẹye tẹ furo-furo kẹ mẹnjịarị ye na, ḅẹẹye-ḅẹẹye tẹ inia aḅụọ mamgba kẹ mẹnjịarị ye, anịanịa tọnwa aḅụọ sụa ye na ogbo sọ tẹ mẹnjịarị aị tẹ kiri mẹ ọgọnọ mẹnjịarị ḍọkọḍọkọ aị mamgba ọ́ pẹị ma, kẹ gotẹ ọkọ ḅẹẹarị, ini ma anie tọn-tọn-aị.

⁴³Ọmịnị ọmịna aḅụụ kẹ ḅẹ ḍọkọḍọkọ mẹnjị ye tẹ ogbo ḅụ mẹnjịma ḅọrọarị aị ma na sọ tẹ tọn-tọn ḅara sime ma; anịsakị ọmịnị ịn kẹ ọmịna aḅụụ pilema ma, anieofori ó ḅofa ḅo fịafịa-a apụ sọ.

⁴⁴Kẹ gotẹ ọkọ ḅẹẹarị, Yẹrị anie KỊNỊNYANAḄỌ ọmịna Tamụnọ ḅee; ọmịnị anịẹrẹsị ọmịna aḅụụ mịẹ fịafịamaa; gbala à fịafịa wararị ẹrẹsị. Ọ́ gbọrụ ḍọkọḍọkọtẹ ogbo ḅụ mẹnjịarị ye tẹ kiri mẹ ọgọnọ ikiriarị ye sọ kẹ ọmịna aḅụụ pilema ma.

⁴⁵Kẹ gotẹ ọkọ ḅẹẹarị, Yẹrị anie KỊNỊNYANAḄỌ ḅe tẹ Ijiputi ama mẹ ḅio ọmịna Tamụnọ sọ ḅẹ ẹrẹsị ọ́ pakama-ḅo ḅọọ ọkọẹrẹsị ọ́ fịafịa ḅa, kẹ gotẹ ọkọ ḅẹẹarị, Yẹrị à fịafịa wararị.”

⁴⁶“Miemẹ anie piri-ḅio-ḅẹ nama ḅe na, feni ḅe na, tẹmẹ tẹ ḍumo wararị ye, tẹ minji ma ḅio mẹnjịarị ye goyegoye na, tẹmẹ tẹ kiri mẹ ọgọnọ ogbo-ogbo ḅụ mẹnjịarị ḍọkọḍọkọ aị goyegoye na gboloma oloko mẹ,

⁴⁷kẹ fịafịa ye na fịafịa-a ye na, pịkị ḍumo wararị aị ma ḅụ pẹị na-iḅi aị na pẹị na-iḅi-a ma na ogboku kịrị mịẹ pakama.”