Read kalabari Lẹvitikọsị 13 Bible Online

Lẹvitikọsị 13 - kalabari bible

Lẹvitikọsị 13

¹KỊNỊNYANAḄỌ ḅe nwẹnị pịkị Mozizi na Erọnị na ḅẹẹ,

²“Tomḅọ oju-kiri ḅụ foin anga, anịanịa ọpọpọlị, anịanịa warị-warị mịẹ anga paka tẹ mḅọ oju-kiri ḅụ pịkị-ḅo sofịnị-obi mịẹ ḅara simem ḅẹḅẹ, anị sakị ḅụ ini mḅọ ọkị-ḅo Erọnị, agbamịẹḅọ ḅe, anịanịa ori owiapụ-awọmẹ agbamịẹapụ ma ḅẹ gbọrụḅọ pịrị ḅa.

³Agbamịẹḅọ ḅe nwẹnị mḅọ oju-kiri ḅụ obi mẹ simearị anga mẹ pekele-ḍiki ḅa; tẹ mḅọ oju-kiri ḅụ obi mẹ simearị anga ḅẹ inume mẹ pịkị iḅulu ḅịya, tẹ obi mẹ sime-ḅara ḅụ anị mḅọ oju-kiri mẹ ḅọrọ sọ-mu tẹ ḅẹḅẹ, aniemẹ anie sofịnị-obi agbamịẹḅọ ḅe mḅọ pekele-ḍiki fama tẹso, ọ̀ nwẹnị ḍuko-pakama ḅa mịnẹ mḅọ fịafịa-a.

⁴Kụma obi mẹ mḅọ oju-kiri mẹ ḅụ sime arị anga mẹ pịna-pịna wararị, tẹ oju-kiri mẹ ḅọrọ sọ-mu ḅara sime-a, anịsakị anị ḅụ simearị inume mẹ amụ iḅulu ḅịya-a ḅẹḅẹ, agbamịẹḅọ ḅe sọnọma aḍin kẹ obiḅọ ḅe sikima wẹrị ḅa.

⁵Sọnọma aḍin karama ene mẹ ḅụ agbamịẹḅọ ḅe pịkị mḅọ pekele-ḍiki ḅa, tẹ Ori atọrụ ḅio ḅụ obi mẹ oju-kiri mẹ ḅụ wasama-a tẹ anị sime-ḅara simem ḅẹḅẹ, anị sakị mẹ ḅụ, agbamịẹḅọ ḅe pịkị sin jen sọnọma aḍin kẹ mḅọ sikima wẹrị ḅa.

⁶Sọnọma aḍin karama ene mẹ ḅụ agbamịẹḅọ ḅe pịkị sin mḅọ pekele-ḍiki ḅa, tẹ obi mẹ wasama-a oju-kiri mẹ ḅụ tẹ kpatụm ḅẹḅẹ, anịrẹ mie agbamịẹḅọ ḅe mḅọ ḅẹẹ ḅarịye mḅọ fịafịam; anị gberie-sọ gberie-a, papaa ọpọpọlị, tẹ mḅọ amịna akapa sịkịrị, tẹ fịafịa ḅa.

⁷Kụma ḅụụ fịafịa mẹ gotẹ mḅọ amịna ḅụụ kẹ agbamịẹḅọ ḅe ḍie fama tẹrẹmẹ ọpọpọlị mẹ kan saram ḅẹḅẹ, mḅọ pịkị sin ḅụụ kẹ agbamịẹḅọ ḅe ḍie ḅa;

⁸tẹ agbamịẹḅọ ḅe mḅọ pekele-ḍiki ḅa, ọpọpọlị mẹ nwẹnị oju-kiri mẹ ḅụ kan wasama tẹ ḅẹḅẹ, anie anị ḅo sofịnị-obi sọ tẹ, anịrẹ agbamịẹḅọ ḅe mḅọ fịafịa-a ḅara kẹ mḅọ ḍuko-pakama ḅa.”

⁹“Tomḅọ nwẹnị sofịnị-obi kọn-arị ḅẹḅẹ ini mḅọ ọkị-ḅo agbamịẹḅọ ḅe pịrị ḅa.

¹⁰Agbamịẹḅọ ḅe mḅọ pekele-ḍiki ḅa, tẹ foin tẹ pịna-pịnarị anga oju-kiri mẹ ḅụ emi, tẹ inume mẹ mịẹtẹ anị iḅulu ḅịya tẹ foin wararị anga mẹ ḅụ ala-a toluarị aị oju-meni mẹ ḅụ kpọụ-kpọụ sara wararị ḅẹḅẹ,

¹¹anie ḅarị gwọ ḅụ so ḅịa sofịnị-obi mḅọ oju ḅụ, tẹ agbamịẹḅọ ḅe mḅọ fịafịa-a ḅara kẹ mḅọ ḍuko-pakama ḅa, ori ḅarị mḅọ sikima wẹrị ma, gbala mḅọ fịafịa-a ẹrẹsị.

¹²Sofịnị-obi mẹ nwẹnị mḅọ oju-kiri ḅụ kan paka-ḅo tẹ anị nwẹnị gbọrsịḅị obiḅọ mẹ sịḅị ḅụ ọkị mu mḅọ ḅụọ-suku la tẹ bebe oju-kiri mẹmgba gbaịn, tẹ agbamịẹḅọ ḅe sọ inetẹ tọrụngbọ kẹ anị ẹrịarị ḅẹḅẹ

¹³agbamịẹḅọ ḅe anịrẹ mḅọ pekele-ḍiki ḅa, tẹ ẹrịm sofịnị-obi mẹ mḅọ bebe oju-kiri mẹmgba gbaịn-koro fama tẹ ḅẹḅẹ, ori mḅọ ḍuko-pakama ḅa, obi mẹ ḅụ mḅọ fịafịam, arịmgba pịkị-ḅo pịna-pịna fama tẹ, mḅọ fịafịam.

¹⁴Kụma ịnọ mḅọ oju pakam ḅẹḅẹ, mḅọ ḅo fịafịa-a ḅọ sọ ḅa.

¹⁵Anịsakị agbamịẹḅọ ḅe ịnọ mẹ pekele-ḍiki ḅa, tẹ mḅọ ḍuko-pakama ḅa mḅọ fịafịa-a; ịnọ mẹ anie fịafịa-a ye, kẹ gotẹ ọkọ ḅẹẹarị, aniemẹ anie sofịnị-obi.

¹⁶Kụma ịnọ mẹ sin pịkịm, tẹ ḍima ḅo pịna-pịnam ḅẹḅẹ, anịrẹ mḅọ agbamịẹḅọ ḅe dama-ḅo ḅa,

¹⁷tẹ agbamịẹḅọ ḅe mḅọ pekele-ḍiki ḅa, tẹ obi mẹ pịkị pịna-pịnam ḅẹḅẹ, anịrẹ agbamịẹḅọ ḅe obiḅọ mẹ ḍuko-pakama ḅa mḅọ fịafịam mḅọ fịafịa wararị.”

¹⁸Gbọrụḅọ oju-kiri ḅụ ọpọpọlị paka tẹ ḅịya tẹ,

¹⁹tẹ ọpọpọlị kiri mẹ ḅụ ye foin tẹ pịna-pịnarị, anịanịa awụ ḅịyarị ḅẹḅẹ anị sakị mẹ ḅụ mḅọ anị kẹ agbamịẹḅọ ḅe ḍie ḅa.

²⁰Agbamịẹḅọ ḅe mḅọ pekele-ḍiki ḅa, tẹ anị pokolo sọ-mu oju-kiri mẹ ḅọrọ wararị, tẹ anị ḅẹ inume mẹ pịkị-ḅo iḅulu ḅịya tẹ ḅẹḅẹ, anịrẹ agbamịẹḅọ ḅe mḅọ ḍuko-pakama ḅa mḅọ fịafịa-a aniemẹ anie sofịnị-obi, anị ọpọpọlị mẹ ḅio kan paka-ḅom.

²¹Kụma agbamịẹḅọ ḅe anị pekele-ḍiki tẹ anị ọgọnọ simearị inume mẹ iḅulu ḅịya-a, anị pịkị pokolo oju-kiri mẹ ḅọrọ sọ-mu-a, kụma kpatụ wararị ḅẹḅẹ, anịrẹ agbamịẹḅọ ḅe sọnọma aḍin kẹ mḅọ sikima koroma ḅa.

²²Anị oju-kiri mẹ ḅụ kan wasama ḅẹḅẹ, anịrẹ agbamịẹḅọ ḅe mḅọ fịafịa-a ḅara kẹ mḅọ ḍuko-pakama ḅa; obi anị ḅio sọ tẹ.

²³Kụma anị wasama-a tẹ anị sime gbọrụ ogbo mẹ ḅụ emi ḅẹḅẹ, aniemẹ anie ọpọpọlị mẹ ḅịya tẹ ḅin paka wararị kiri; anịsakị agbamịẹḅọ ḅe mḅọ ḍuko-pakama ḅa mḅọ fịafịam.

²⁴“Anịanịa fịnị kịnị dọkịmam, tẹ dọkị kiri mẹ ḅo ịnọ mịẹ tẹ pokolo oju-kiri mẹ ḅọrọ sọ-mu tẹ awụ ḅịya ḅara kẹ pịna-pịnarị, anịanịa, pịna-pịna wararị ḅẹḅẹ,

²⁵agbamịẹḅọ ḅe anị pekele-ḍiki ḅa, tẹ anị simearị kiri mẹ ḅẹ inume mẹ pịkị pịna-pịna tẹ pokolo oju-kiri mẹ ḅọrọ sọ-mu wararị ḅẹḅẹ, anịrẹ anị sofịnị-obi sọ tẹ; anị dọkị ye mẹ ḅio kan paka-ḅo tẹ; tẹ agbamịẹḅọ ḅe mḅọ ḍuko-pakama, mḅọ fịafịa-a; aniemẹ anie sofịnị-obi.

²⁶Kụma agbamịẹḅọ ḅe anị pekele-ḍikim, tẹ anị simearị kiri mẹ ḅẹ inume mẹ pịna-pịna-a, anịsakị ịnọ mẹ pịkị oju-kiri mẹ ḅụ pokolo sọ-mu-a, kụma kpatụ wararị ḅẹḅẹ, agbamịẹḅọ ḅe sọnọma aḍin kẹ mḅọ sikima wẹrị ḅa;

²⁷anịsakị sọnọma aḍin karama ene mẹ ḅụ agbamịẹḅọ ḅe pịkị mḅọ pekele-ḍiki ḅa anị nwẹnị oju-kiri mẹ ḅụ wasamarị ḅẹḅẹ, anịrẹ agbamịẹḅọ ḅe mḅọ ḍuko-pakama ḅa, mḅọ fịafịa-a; aniemẹ, anie sofịnị-obi.

²⁸Kụma anị kiri mẹ wasama-a, tẹ anị sime gbọrụ ogbo mẹ ḅụ emi, kụma paa kpatụ wararị ḅẹḅẹ, aniemẹ anie ḍọkị ye mẹ ḅe foin ye; anịsakị agbamịẹḅọ ḅe mḅọ ḍuko-pakama ḅa, mḅọ fịafịam; kẹ gotẹ ọkọ ḅẹẹarị, aniemẹ anie dọkị ye mẹ ḅụ bin-paka-ḅo ye.”

²⁹“Owiḅọ anịanịa ẹrẹḅọ sịḅị ḅụ anịanịa, ḅekeke ḅụ obi mẹ kọn-kọn,

³⁰agbamịẹḅọ ḅe obi mẹ pekele-ḍiki ḅa, tẹ anị sime-ḅara ḅụ, anị oju-kiri mẹ ḅụ pokolo sọ-mu wararị, anịsakị anị ḅẹ inume mẹ pulo pulo ḅịyarị tẹ ḅiri-mgbọ-mgbọ ḅụ emi ḅẹḅẹ, anịrẹ agbamịẹḅọ ḅe ḍuko-pakama ḅa, mḅọ fịafịa-a; aniemẹ anie ivirivi, sịḅị ọgọnọ anịanịa ḅekeke ḅẹ sofịnị-obi.

³¹Agbamịẹḅọ ḅe mịẹtẹ oju-kiri mẹ ḅẹlẹarị obi mẹ pekele-ḍiki ḅa, tẹ anị sime-ḅara ḅụ anị oju-kiri mẹ ḅọrọ sọ-mu-a, kurukurutẹ inume pịkị anị ḅụ ofori ḅẹḅẹ, anị sakị mẹ ḅụ agbamịẹḅọ ḅe sọnọma aḍin kẹ tomḅọ mẹ sikima wẹrị ḅa mḅọ oju-kiri ḅẹlẹmarị obi mẹ na mḅọ na.

³²Anịsakị sọnọma aḍin karama ene mẹ ḅụ, agbamịẹḅọ ḅe pịkị obi mẹ pekele-ḍiki ḅa tẹ ivirivi mẹ wasama-a, pulo-pulo ḅịyarị inume pịkị ofori, tẹ ivirivi mẹ pịkị oju-kiri mẹ ḅụ pokolo sọ-mu-a ḅẹḅẹ,

³³anịrẹ mḅọ amịna oju ḅụ inume mẹ sẹịn sin ḅa, kụma ivirivi mẹ mḅọ sẹịn ma, tẹ agbamịẹḅọ ḅe pịkị jen sọnọma aḍin kẹ mḅọ sikima wẹrị ḅa.

³⁴Anịsakị sọnọma aḍin karama ene ḅụ agbamịẹḅọ ḅe ivirivi mẹ pekele-ḍiki ḅa, tẹ ivirivi mẹ amụ wasama-a oju-kiri mẹ ḅụ, tẹ anị ḅẹ sime-ḅara ḅụ anị pịkị pokolo oju-kiri mẹ ḅio sọ-mu-a ḅẹḅẹ, agbamịẹḅọ ḅe ḍuko-pakama ḅa mḅọ fịafịa wararị; tẹ mḅọ amịna akapa sịkịrị ḅa tẹ fịafịa ḅa.

³⁵Kụma mḅọ sịkịrị fịafịa tẹrẹmẹ ivirivi mẹ wasamam ḅẹḅẹ,

³⁶anịrẹ agbamịẹḅọ ḅe mḅọ pekele-ḍiki ḅa; tẹ ivirivi mẹ oju-kiri mẹ ḅụ wasamam ḅẹḅẹ, agbamịẹḅọ ḅe ḅarị pulo ḅịyarị inume ḍọkị ḅịa, mḅọ fịafịa-a.

³⁷Kụma ọ̀ kẹ anị ẹrị atọrụngbọ ḅụ ivirivi mẹ ḅarị wasama-a, tẹ kurukuru inume anị ḅio paka tẹ ḅẹḅẹ, ivirivi mẹ gwọọ tẹ, mḅọ fịafịa tẹ, anịsakị agbamịẹḅọ ḅe mḅọ fịafịa ḅara kẹ mḅọ ḍuko-pakama ḅa.”

³⁸“Owiḅọ, anịanịa ẹrẹḅọ oju-kiri ḅụ kpọịnkoro-ịlọlị emi tẹ pịna-pịna wararị ḅẹḅẹ,

³⁹agbamịẹḅọ ḅe arị pekele-ḍiki ḅa. Oju-kiri mẹ ḅụ simearị kpọịnkoro-ịlọlị ma ḅịyarị pịna mẹ tọrụ-fịị ḅara sime wararị ḅẹḅẹ, anie ḅẹkụ tẹ oju-kiri mẹ ḅụ kan paka-ḅo aị; mḅọ fịafịa wararị.”

⁴⁰“Tomḅọ sịḅị-ḅẹ-inume ngẹrị kpịrị saram ḅẹḅẹ, anie mḅọ sịḅị firim, kụma mḅọ fịafịa wararị.

⁴¹Anịsakị tomḅọ sịḅị-ḅẹ-inume mḅọ fụḅara-ḅọkọ na, fụḅara mẹ ḅẹ maa akaka ma ḅụ kpịrị saram ḅẹḅẹ, mḅọ ịḅanị-fụḅara sụam, kụma mḅọ fịafịa wararị.

⁴²Kụma sịḅị mẹ firi wararị anga mẹ ḅụ, anịanịa ịḅanị-fụḅara mẹ ḅụ pịna-pịna ḅara kẹ awụ ḅịyarị obi emi gbọrụ kiri paka-paka, aniemẹ anie sofịnị-obi, firi wararị sịḅị mẹ ḅụ, anịanịa, ịḅanị-fụḅara mẹ ḅụ kan paka-ḅoarị ye.

⁴³Anịtẹso agbamịẹḅọ ḅe mḅọ pekele-ḍiki ḅa, tẹ obiḅọ mẹ oju-kiri ḅụ foin wararị anga mẹ sofịnị-obi kịka ḅara kẹ mḅọ firitẹ sịḅị, anịanịa, mḅọ ịḅanị-fụḅara ḅụ pịna-pịna tẹ awụ ḅịyarị ḅẹḅẹ,

⁴⁴mḅọ anie sofịnị-obi-kọnḅọ, mḅọ fịafịa-a, agbamịẹḅọ ḅe mḅọ ḍuko-pakama nyanam, mḅọ fịafịa-a, mḅọ kọn-arị obi mẹ mḅọ sịḅị ọgọnọ ḅụ emi.”

⁴⁵“Sofịnị-obi-kọnḅọ mẹ tẹ obi mẹ ḅụụ ḅụ emi ḅọ mẹ kaantẹ akapa mie mḅọ sụa tẹ sịḅị dala-a ḅara kẹ mḅọ sịḅị-ḅẹ-inume mẹ kẹ sara wẹrị ḅarịye, anịsakị mḅọ amịna ḅara kẹ mḅọ ḅịḅị ọgọnọ gbaịn tẹ oloku ḅa, ‘Fịafịa-a ḅọ, fịafịa-a ḅọ!’

⁴⁶Mḅọ fịafịa-a mẹ ḅụ sime ḅa obi mẹ mḅọ ḅụụ sime mu la ḅiri, la ḅiri; mḅọ fịafịa-a; mḅọ kobiri-ogbo mẹ ḅụ sikima paka mu ngẹrị anga ḅa.”

⁴⁷“Otito gbọrụ kapa ḅụ sọm, ḅọrọ nama isuke kapa-o, lọkọ-ḅịtẹ kapa-o,

⁴⁸ḅẹẹ ḍoritẹ ḅịtẹ goyegoye ḅụ, anịanịa nama oju apara ḅụ, anịanịa ḅẹẹye-ḅẹẹye tẹ ịn nama oju-apara kẹ mịẹ ye ḅụ,

⁴⁹tẹ otito mẹ kapa mẹ ḅụ eleleinda tọrụ anịanịa awụ tọrụ ḅịyam ḅẹḅẹ, aniemẹ anie otito, tẹ kẹ agbamịẹḅọ ḅe ḍie ḅarị ye.

⁵⁰Anịsakị agbamịẹḅọ ḅe obi mẹ pekele-ḍiki ḅa, tẹ sọnọma aḍin kẹ anị ye mẹ tẹ obi mẹ simearị ye mẹ sikima wẹrị ḅa.

⁵¹Anịtẹso sọnọma aḍin karama ene mẹ ḅụ ori anị pekele-ḍiki ḅa. Obi mẹ kapa mẹ ḅụ, anịanịa ḅẹẹ ḍoritẹ ḅịtẹ goyegoye ḅụ, anịanịa ḅẹẹye-ḅẹẹye tẹ ịn nama oju apara kẹ mịẹ ye goyegoye ḅụ wasamam ḅẹḅẹ, aniemẹ anie gbọrụ ye ḅụ saḅa mu jen laarị otito; anị ye mẹ fịafịa-a.

⁵²Agbamịẹḅọ ḅe anị dọkịma ḅa, kẹ gotẹ ọkọ ḅẹẹarị, aniemẹ anie gbọrụ ye ḅụ saḅa mu jen ye laarị obi; ịn fịnị kẹ anị ḅụ sụa dọkịma ḅa.”

⁵³“Agbamịẹḅọ ḅe anị pekele-ḍiki tẹ otito mẹ amụ wasama mu jen anga la-a ḅẹḅẹ,

⁵⁴anịrẹ agbamịẹḅọ ḅe tọn ḅa mịnẹ ịn minji kẹ anị ye mẹ tẹ obi emi ye mẹ sịkịrịị, anịsakị ọ̀ pịkị jen sọnọma aḍin kẹ anị sikima wẹrị ḅa.

⁵⁵Anị sịkịrị tẹsọ, agbamịẹḅọ ḅe otito sọ ye mẹ pekele-ḍiki tẹ anị ḅịya sime tọrụ mẹ ḅụ anị wasama mu jen anga la-a sọ, anị ḍima-a ḅẹḅẹ, anị ye mẹ fịafịa-a; fịnị ḅio ḅụ ọmịnị anị kẹ sụa dọkịma ḅa, otito sọ anga mẹ ḅọrọ tọrọkọ-o, ọḅụjụ-o.

⁵⁶Kụma agbamịẹḅọ ḅe anị sịkịrị tẹrẹmẹ anị pekele-ḍiki tẹ anị ḅịya sime tọrụ mẹ ḅutuḅutum ḅẹḅẹ, ori otito mẹ simearị anga mẹ kan-siin ḅa kapa mẹ ḅụ, anịanịa nama oju apara mẹ ḅụ, anịanịa ḅẹẹ ḍoritẹ ḅịtẹ goyegoye ḅụ.

⁵⁷Anịtẹrẹmẹ anị pịkị siin wasamarị ḅẹḅẹ, anị ye mẹ tẹ obi mẹ emi ye mẹ ọ́ fịnị kẹ anị dọkịma ḅa.

⁵⁸Kụma ini anị sịkịrị tẹ obi mẹ ḅarị ofori ḅẹḅẹ, ịn pịkị siin maaịn karama sakị kẹ anị sịkịrị ḅa, tẹ anị fịafịa ḅa.

⁵⁹Miemẹ anie sime nama isuke, anịanịa ḅẹẹ ḍoritẹ ḅịtẹ goyegoye, anịanịa ḅẹẹye-ḅẹẹye tẹ ịn nama oju apara kẹ mịẹ ye ḅụ otito emi tẹ anị fịafịam, anịanịa fịafịa-a tọn-pẹlẹ pịrị ḅarị oloko.”