Read kalabari Lẹvitikọsị 14 Bible Online

Lẹvitikọsị 14 - kalabari bible

Lẹvitikọsị 14

²“Miemẹ sofịnị-obi-kọnḅọ mẹ oloko sọ ḅa mḅọ amịna ḅụụ mịẹ fịafịamarị eneḅaka mẹ ḅụ. Kịnị mḅọ ọkị-ḅo agbamịẹḅọ ḅe pịrị ḅa.

³Agbamịẹḅọ kobiri-ogbo mẹ ḅụ mẹnjị paka ḅa, anịsakị agbamịẹḅọ ḅe mḅọ pekele-ḍiki ḅa. Anịtẹso sofịnị-obi mẹ sofịnị-obi-kọnḅọ mẹ oju ḅụ gwọọ tẹ ḅẹḅẹ,

⁴agbamịẹḅọ ḅe tọn ịn pịrị tẹ ini anị ḅọ mẹ tẹ ḅụụ mịẹ fịafịamarị ḅọ mẹ gotẹ ḍumo wararị fịafịatẹ maa afeni na, ịn kẹ sida sịn-arị sịn-ḅara na, awụ ḍigi na, oronwi-ḍiri kala ịkpangị na ọkị-ḅo ḅa.

⁵Anịtẹso agbamịẹḅọ ḅe tọn ịn pịrị tẹ ịn mẹnjịarị ḅuu-minji kẹ sụa aram-ḅẹlẹ ḅio feni ma ḅẹ gbọrụ ye ḅaa ḅa.

⁶Ọ̀ nwẹnị ḍumo wararị feni ḅe na, ịn kẹ sida sịn-arị sịn mẹ na, awụ ḍigi mẹ na, oronwi-ḍiri sịn-ịkpangị mẹ na kẹ sụa ọkị tẹ kẹ mẹnjịarị minji ḅio feni ḅe tẹ ịn ḅaa ye ḅe ọmbie mẹ gbọn,

⁷tẹ kẹ sọnọma asakị kẹ anị ḅọ mẹ tẹ sofịnị-obi kọn tẹ ḅụụ mịẹ fịafịama ḅẹ ḅọ mẹ oju asana ḅa; anịtẹso ori mḅọ ḍuko-pakama ḅa, mḅọ fịafịam tẹ nwẹnị feni ḅe ḅụ ḅara-siin tẹ ò fiin piri sọ ḅa.

⁸Anị ḅọ mẹ tẹ ḅụụ mẹ fịafịama ḅẹ ḅọ mẹ nwẹnị amịna akapa sịkịrị ḅa, tẹ mḅọ oju sime inume mamgba sẹịn sin fama, tẹ minji ḅio ḅiri tẹ amịna oju sịkịrị ḅa, tẹ mḅọ nwẹnị fịafịa ḅa. Anie mẹ ḅọrọtẹ so ọkụma, mḅọ kobiri-ogbo mẹ ḅio sọ ḅo ḅa, kụma mḅọ sọnọma aḍin kẹ amịna akpụrụ-warị sọ-a ḅara kẹ anga ḅa.

⁹Anịsakị sọnọma aḍin karama eneḅaka mẹ ḅụ, mḅọ amịna sịḅị-ḅẹ-inume mẹmgba na, amịna ḅekeke ḅẹ mpọrị na, amịna atọrụngbọ anjị na, mḅọ oju ḅẹ inume mẹmgba sẹịn siin fama ḅa. Anịtẹso mḅọ amịna akapa sịkịrị, tẹ minji ḅiri ḅa, anịsakị mḅọ fịafịa ḅa.”

¹⁰“Nine aḍin karama ene mẹ ḅụ mḅọ ḅẹkụ ḅụụ ḅụ ofori maa ejimina na, gbọrụ kụra sịḅị ḅụ ḅọrọtẹ ḅẹkụ ḅụụ ḅụ ofori gbọrụ asambịrịma anana na, mgbọlụ agba mịẹ ḅẹ pulo kẹ pikiri wararị iḅiọkụ gbẹẹtẹ iḅi fịlawa kala akpa kẹ oyia akiri ḍiya ḅẹ tẹra akiri na, olivu pulo gbọrụ karama pembe ye na ọkị-ḅo ḅa.

¹¹Anịsakị agbamịẹḅọ ḅe tẹ mḅọ mịẹ fịafịamarị ḅọ ḅe, tomḅọ mẹ tẹ ḅụụ mịẹ fịafịama ḅẹ ḅọ mẹ na mịna aị ma na kẹ Kobiri Akpụrụ-warị mẹ ḅọkọ mẹ ḅụ KỊNỊNYANAḄỌ ḅe tọrọkọ ḅụ koroma ḅa.

¹²Agbamịẹḅọ ḅe nwẹnị ejimina ma ḅẹ gberie na olivu pulo karama mẹ na kẹ sụa ọkị kẹ ḅẹrẹ-ḅarasii agba mịẹ, tẹ arị sikima tẹ kẹ KỊNỊNYANAḄỌ ḅe tọrọkọ ḅụ karakara ịmịẹtẹ agba mịẹ pịrị ḅa.

¹³Ọ̀ nwẹnị ịn si sin agba mẹ na, dọkịma-agba mẹ na mịẹ nama ḅaa anga mẹ ḅụ asambịrịma anana ḅe ḅaa ḅa fịafịa yọ mẹ ḅụ: gbala si sin agbamịẹye mẹ pembe ḅara, ḅẹrẹ-ḅarasii agbamịẹye mẹ sime agbamịẹḅọ ḅe pịrịm, aniemẹ anie fịafịa tẹịn ye.

¹⁴Agbamịẹḅọ ḅe ḅẹrẹ-ḅarasii agbamịẹ nama ḅe ọmbie mẹ ḅụ kẹlẹ ọkị tẹ anị kẹ anị ḅọ mẹ tẹ ḅụụ mịẹ fịafịama ḅẹ ḅọ mẹ ama-ḅara anga ḅẹ ḅeri mẹ ọgọnọ-jụ na, mḅọ ama-ḅara ḅẹ opu ḅara-tụngbalị mẹ ọgọnọ na, mḅọ ama-ḅara anga ḅẹ opu ḅụọ-tụngbalị mẹ na ọgọnọ tan ḅa.

¹⁵Anịtẹso agbamịẹḅọ ḅe pulo karama mẹ ḅụ pulo kalịye kẹ ori agbamịẹḅọ ḅe ere-ḅara ḅẹ ḅara-kuḅu ḅụ sara,

¹⁶tẹ ori ama-ḅara ḅẹ ḅara-tụngbalị kẹ ori ere-ḅara ḅẹ ḅara-kuḅu ḅụ simearị pulo mẹ gbọn tẹ kẹ sọnọma asakị kẹ KỊNỊNYANAḄỌ ḅe tọrọkọ asana ḅa.

¹⁷Anịsakị pulo mẹ tẹ ọ̀ ḅara-kuḅu ḅụ kọn ye mẹ ḅụ agbamịẹḅọ ḅe kẹlẹ kẹ anị ḅọ mẹ tẹ mḅọ ḅụụ mịẹ fịafịama ḅẹ ḅọ mẹ ama-ḅara anga ḅẹ ḅeri mẹ ọgọnọ-jụ na, mḅọ ama-ḅara ḅẹ opu ḅara-tụngbalị ọgọnọ na, mḅọ ama-ḅara anga ḅẹ ḅụọ mẹ ḅẹ opu ḅụọ-tụngbalị mẹ ọgọnọ na tan ḅa ḅẹrẹ-ḅarasii agbamịẹ nama ḅe ḅẹ ọmbie mẹ ọgọnọ ḅụ:

¹⁸tẹ pulo mẹ tẹ agbamịẹḅọ ḅe ḅara ḅụ kirikọn-ye mẹ, ori anị kẹ anị ḅọ mẹ tẹ amịna ḅụụ mịẹ fịafịama ḅẹ ḅọ mẹ sịḅị ọgọnọ sara ḅa. Anịtẹso agbamịẹḅọ ḅe nwẹnị KỊNỊNYANAḄỌ ḅe tọrọkọ ḅụ si-wẹrịso pịrị ḅẹrẹ fama mḅọ pịrị ḅa.”

¹⁹“Agbamịẹḅọ ḅe nwẹnị kẹ si-wẹrịso pịrị ḅẹrẹ fama anị ḅọ mẹ tẹ amịna Fịafịa-a ḅụ ḅo fịafịa ḅẹ ḅọ mẹ pịrị ḅẹ si sin agba mẹ mịẹ ḅa. Anie mẹ ḅọrọ tẹso, ọkụma ọ̀ dọkịma-agba mịẹ nama ḅe ḅaa ḅa;

²⁰tẹ agbamịẹḅọ ḅe agbamịẹ-anga mẹ ọgọnọ ḅụ dọkịma-agba mẹ na, sịnmgbọlụ agba mẹ na mịẹ ḅa. Mị-ḅara ḅụ mie agbamịẹḅọ ḅe si-wẹrịso pịrị ḅẹrẹ fama mḅọ pịrị tẹ mḅọ fịafịa ḅarịye.”

²¹“Kụma mḅọ nwẹnị igoinḅọ tẹ inetẹ ọkọ la ḅara nyana ḅịa ḅẹḅẹ, anịrẹ mḅọ ḅẹrẹ-ḅarasii agba mịẹ gotẹ gbọrụ ejimina ọkị-ḅo ḅa, tẹ kẹ si wẹrịso pịrị ḅẹrẹ fama mḅọ pịrị ḅa ẹrẹsị, nama ḅe sikima ḅa, tẹ sịnmgbọlụ agba mịẹ gotẹ pulo kẹ pikiritẹ iḅiọkụ gbẹẹtẹ iḅi fịlawa kala akpa kẹ oyia akiri ḍiya ḅẹ gbọrụ kiri na, olivu pulo gbọrụ karama na kẹ sụa ọkị-ḅo ḅa.

²²Mḅọ pịkị mḅọ inetẹ nyana ḅarịye, nwẹẹrẹsị amẹngbọ, anịanịa asambịrịma olosịkịya amẹngbọ ọkị-ḅo ḅa; arịḅẹ gberie anie si sin agba mịẹ ye, osi ye anie dọkịma agba mịẹ ye.

²³Anịsakị nine aḍin karama eneḅaka mẹ ḅụ, mḅọ amịna ḅụụ mịẹ fịafịama ḅa ẹrẹsị mḅọ arị ọkị-ḅo agbamịẹḅọ ḅe pịrị ḅa KỊNỊNYANAḄỌ ḅe tọrọkọ Kobiri Akpụrụ-warị mẹ ḅẹ ḅọkọ mẹ ḅụ.

²⁴Agbamịẹḅọ ḅe ḅẹrẹ-ḅarasii agbamịẹ ejimina ḅe na, olivu pulo karama mẹ na ọkị ḅa, anịsakị agbamịẹḅọ ḅe arị sikima tẹ karakara ịmịẹtẹ agba mịẹ ḅa KỊNỊNYANAḄỌ ḅe tọrọkọ ḅụ.

²⁵Ọ̀ nwẹnị ḅẹrẹ-ḅarasii agbamịẹ ejimina ḅe ḅaa ḅa, tẹ ḅẹrẹ-ḅarasii agbamịẹ ejimina ḅe ọmbie mẹ ḅụ kẹlẹ ọkị tẹ kẹ oriḅe tẹ ḅụụ mịẹ fịafịama ḅẹ ḅọ mẹ ama-ḅara anga ḅẹ ḅeri mẹ ọgọnọ-jụ na, mḅọ ama-ḅara ḅẹ opu ḅara-tụngbalị mẹ ọgọnọ na, mḅọ ama-ḅara anga ḅẹ ḅụọ mẹ opu ḅụọ-tụngbalị mẹ ọgọnọ na tan ḅa.

²⁶Agbamịẹḅọ ḅe pulo mẹ ḅụ kẹlẹ ọkị tẹ ori ere-ḅara ḅẹ ḅara-kuḅu ḅụ sara ḅa.

²⁷Tẹ ori ama-ḅara ḅẹ ḅara-tụngbalị kẹ ori ere-ḅara ḅe ḅara-kuḅu ḅụ simearị pulo mẹ kẹ sọnọma asakị kẹ KỊNỊNYANAḄỌ ḅe tọrọkọ asana ḅa.

²⁸Agbamịẹḅọ ḅe nwẹnị pulo mẹ tẹ ọ̀ ḅara-ḅio emi ye mẹ ḅụ pulo kẹ anị ḅọ mẹ tẹ ḅụụ mịẹ fịafịama ḅẹ ḅọ mẹ ama-ḅara anga ḅẹ ḅeri mẹ ọgọnọ-jụ na, mḅọ ama-ḅara ḅẹ opu ḅara-tụngbalị mẹ ọgọnọ na, ama-ḅara anga ḅẹ ḅụọ mẹ opu ḅụọ-tụngbalị na ọgọnọ tan ḅa anịanga mẹ tẹ ḅẹrẹ-ḅarasii agbamịẹ nama ḅe ọmbie mẹ kẹ tan anga mẹ ḅụ;

²⁹anịsakị pulo mẹ tẹ agbamịẹḅọ ḅe ḅara ḅio kirikọn-ye mẹ kẹ KỊNỊNYANAḄỌ ḅe tọrọkọ ḅụ si wẹrịso pịrị ḅẹrẹ fama mḅọ pịrị ḅụ, ori anị kẹ anị ḅọ mẹ tẹ ḅụụ mịẹ fịafịama ḅẹ ḅọ mẹ sịḅị ọgọnọ sara ḅa.

³⁰Anịtẹso ọ̀ nwẹnị nwẹẹrẹsị ma, anịanịa asambịrịma olosịkịya ma ḅụ, mḅọ inetẹ nyana ye ḅụ,

³¹gbọrụ ye kẹ si sin agba mịẹ, tẹ osi ye mẹ kẹ, sịnmgbọlụ agbamịẹye ḅụ sụa dọkịma-agba mịẹ ḅa tẹ agbamịẹḅọ ḅe nwẹnị KỊNỊNYANAḄỌ ḅe tọrọkọ ḅụ si-wẹrịso pịrị ḅẹrẹ fama anị ḅọ mẹ tẹ amịna ḅụụ mịẹ fịafịamarị ḅọ mẹ pịrị ḅa.

³²Mị-ḅara mẹ anie oloko mẹ sime anị ḅọ mẹ tẹ sofịnị-obi kọn tẹ inetẹ amịna ḅụụ mịẹ fịafịama ḅẹ agbamịẹ-aị ma nyana ḅịa ḅo mẹ pịrị ḅara.”

³³KỊNỊNYANAḄỌ ḅe nwẹnị Mozizi na, Erọnị na ḅẹẹ,

³⁴“Ó ḅo Kenanị ama mẹ tẹ à kẹ ọ́ pịrị nyana ḅe ama mẹ ḅio sọ ḅo tẹ àrị otito kẹ ọ́ nyana ama mẹ ḅẹ gbọrụ warị ḅụ sụa-sụa,

³⁵anịrẹ ori tẹ warị mẹ nyana ḅọ ḅe ḍuko agbamịẹḅọ ḅe pịrị ḅa, ‘Anị ị̀ ḅụụ sime-ḅara obi kikima ye ị̀ warị mẹ ḅio emi ye ọkụ.’

³⁶Anịtẹso agbamịẹḅọ ḅe tọn ḅa mịnẹ ịn warị mẹ ḅio sime aị sin fama tẹrẹmẹ agbamịẹḅọ ḅe mu warị mẹ ḍọkị-ḍiki, anieofori ò ḅofa ḍuko-pakama, ye tẹ warị mẹ ḅio sime aị mamgba fịafịa-a; aniemẹ mịẹ ḅọrọ tẹrẹmẹ agbamịẹḅọ ḅe warị mẹ ḍiki ḅẹ tẹ sọ-mu ḅa.

³⁷Ori otito mẹ pekele-ḍiki ḅa; otito mẹ warị-anga mẹ ḅụ eleleinda tọrụ, anịanịa awụ tọrụ ḅịyarị tẹ gbọọn-gbọn wararị tẹ warị-anga mẹ ḅụ ḍiḅi, ḍiḅi wararị tẹ ọgọnọ-ọgọnọ ḅụ ngẹrị ofori ḅẹḅẹ,

³⁸agbamịẹḅọ ḅe warị mẹ ḅio mẹnjị paka-ḅo warị mẹ ḅẹ ḅọkọ mẹ ḅụ sime tẹ sọnọma aḍin kẹ warị mẹ ịkasị wẹrị ḅa.

³⁹Sọnọma aḍin karama ene mẹ ḅụ agbamịẹḅọ ḅo pịkị sin warị mẹ ḍiki ḅa; otito mẹ warị mẹ ḅẹ warị-anga ma ḅụ wasama mu ja anga la-la,

⁴⁰anịrẹ agbamịẹḅọ ḅe tọn ḅa mịnẹ ịn ḍụḅarị ma tẹ otito mẹ sọ wararị aḍụḅarị ma sin tẹ arị kẹ ama mẹ ḅio pakama mu fịafịa-a ye-yọ ḅụ gbin ngumaa.

⁴¹Anịsakị ọ̀ mịẹtẹ ịn ḅio ḅụ warị-anga mẹ kọrọrọ ikelema-koro, tẹ ịn kẹ warị-anga mẹ mịẹ miniminima tẹ ịn kọrọrọ sara aị ma tan ama mẹ ḅio pakama mu fịafịa-a ye-yọ ḅụ sara ḅa.

⁴²Anịtẹso ịn ja aḍụḅarị kẹ osi-aị ma sime akiri ḅụ suu ḅa, tẹ ja miniminima aị ọkị tẹ kẹ warị-anga mẹ mịẹ miniminima ḅa.”

⁴³“Ori otito sọ aḍụḅarị sin tẹ warị-anga ma kọrọrọ tẹ mịẹ miniminima tẹrẹmẹ jen otito pịkị sin paka-paka;

⁴⁴agbamịẹḅọ ḅe anị sakị mẹ ḅụ pịkị mu ḍiki ḅa; tẹ otito mẹ nwẹnị warị mẹ ḅio ḅụ wasama wararị ḅẹḅẹ aniemẹ anie gbọrụ ye ḅụ saḅa jen laarị otito, anị fịafịa-a.

⁴⁵Ọ̀ warị mẹ kan sara ḅa; anị ḅẹ aḍụḅarị na, ḍụḅọ ma na, kẹ warị mịẹ miniminima aị mamgba na ori ama mẹ ḅio arị dogi paka mu fịafịa-a ye-yọ ḅụ sara ḅa.

⁴⁶Anie mẹ sikima; anị ḅọ mẹ tẹ warị mẹ ịkasị wararị ogbo anị ḅio sọ-mu ḅọ, sọ-mu ḅọ fịafịa-a ḅụ sime nwenii ḅoḅiri-so la ḅa.

⁴⁷Anịsakị anị ḅọ mẹ tẹ warị mẹ ḅio ḅọlọlọ sime ḅọ, sime ḅọ, mḅọ amịna akapa sịkịrị ḅa pịkị warị mẹ ḅio sime tẹ fịye fị ḅọ, fị ḅọ amịna akapa sịkịrị ḅa.”

⁴⁸“Kụma agbamịẹḅọ ḅe ịn warị mẹ mịẹ miniminima tẹrẹmẹ ḅo warị mẹ ḍọkị ḍiki tẹ obi mẹ siin paka-ḅo tẹ wasama-a ḅẹḅẹ, anịrẹ agbamịẹḅọ ḅe ḍuko-pakama ḅa warị mẹ fịafịa tẹ, kẹ gotẹ ọkọ ḅẹẹarị, obi mẹ gwọọ tẹ.

⁴⁹Anịsakị warị mẹ mịẹ fịafịama mẹ gotẹ ọ̀ kala feni amẹngbọ na, ịn kẹ sida sịn-arị sịn na, awụ ḍigi na, oronwi-ḍiri sịn-ịkpangị na ọkị ḅa,

⁵⁰tẹ feni ma ḅẹ gberie ḅaa ḅa mẹnjịarị minji simearị aram-ḅẹlẹ ḅio.

⁵¹Ọ̀ nwẹnị ịn kẹ sida sịn-arị sịn mẹ na, oronwi-ḍiri sịn-ịkpangị mẹ na, awụ ḍigi mẹ na kẹ ḍumo wararị feni ḅe na ḅụ sụa ọkị, tẹ arị kẹ mẹnjịarị minji mẹ ḅio feni ḅe tẹ ịn ḅaa ye ḅe ọmbie mẹ gbọn tẹ anị kẹ sọnọma asakị kẹ warị mẹ asana ḅa.

⁵²Mị-ḅara mie ò feni ḅe ọmbie mẹ na, mẹnjịarị minji mẹ na, ḍumo wararị feni ḅe na, sida nwẹn-sịn sịn mẹ na, oronwi-ḍiri sịn-ịkpangị mẹ na, awụ ḍigi mẹ na kẹ sụa warị mẹ mịẹ fịafịama ḅarị ḅara.

⁵³Anịtẹso, ò nwẹnị ḍumo wararị feni ḅe ḅụ ḅara-siin tẹ ori ama mẹ ḅio fiin paka mu piri sọ ḅa; mie ò si-wẹrịso ḅẹrẹ fama warị mẹ pịrị ḅarị ḅara, anịsakị anị fịafịa ḅa.”

⁵⁴“Miemẹ anie sime ḅẹẹ otito-otito anịanịa ivirivi na pịrị oloko mẹ.

⁵⁵Anị sime otito sọ kapa anịanịa otito sime warị na,

⁵⁶oju-kiri ḅụ foin anga, anịanịa ọpọpọlị, anịanịa warị-warị mịẹ anga pịrịm;

⁵⁷kẹ anị fịafịa-a sakị na, anị fịafịa wararị sakị na ḍie-pakama. Miemẹ anie sime sofịnị-obi pịrị oloko mẹ.”