Read kalabari Lẹvitikọsị 2 Bible Online

Lẹvitikọsị 2 - kalabari bible

Lẹvitikọsị 2

¹KỊNỊNYANAḄỌ ḅe nwẹnị pịkị ḅẹẹ, “Ḅẹḅọ-ḅẹḅọ kẹ agba mịẹ KỊNỊNYANAḄỌ ḅe pịrị ḅara ḅụ mgbọlị-afịaị kẹ agba mịẹarị ḅẹḅẹ, mḅọ anị gbẹẹ kọsịma fọọn mịẹ ḅa, tẹ olivu pulo kẹ anị ọgọnọ sara, tẹ ịn kẹ fịranịkịnịsẹnịsị sịn kụnụaị kẹ pịkị anị ọgọnọ sara ḅa,

²tẹ anị ọkị-ḅo Erọnị owiapụ-awọmẹ, agbamịẹapụ ma pịrị ḅa. Anịsakị namakọrị agbamịẹḅọ ḅe nwẹnị ḅara-kuḅu ḅin kalịye ọkị ḅa gbẹẹtẹ mgbọlị-afịaị mẹ na, pulo mẹ na ḅụ, tẹ anị ḅẹ kụnụaị mẹmgba na ọkị tẹ anị dọkịma ḅa agbamịẹ-anga mẹ ọgọnọ, kẹ anịmgba kẹ ḅiokoroma kiri ḅara ḅụ. Fịnị ḅụ mịẹarị agba, KỊNỊNYANAḄỌ ḅe ḅụụ-ḅẹlẹarị kụnụ.

³Anịsakị mgbọlụ agbamịẹye mẹ ḅụ kirikọn-ye mẹ sime Erọnị na, ori owiapụ-awọmẹ na pịrị ḅa; aniemẹ anie fịafịa-tẹịn pakịrị agbamịẹye mẹ ḅụ kẹ fịnị ḅụ mịẹ KỊNỊNYANAḄỌ ḅe pịrị agba ḅụ ḅẹ ye ẹrẹsị.”

⁴“Ọmịnị ọpọ ḅio fọị tẹ fịye kẹ mgbọlị-afịaị agbamịẹye ḅara kẹ ḅo ḅẹ sakị, anị sunmaye sọ-a gbẹẹ fọọn mịẹ, tẹ olivu pulo kẹ pikiri fịye sọ ḅa, anịanịa olivu pulo kẹ tan tẹ sunma-a ḍọkọḍọkọ ịkịka sọ ḅa.

⁵Ọmịna agba mẹ nwẹnị pẹmpẹmtẹ ikulele ọgọnọ fọị tẹ mgbọlụ agbamịẹye ḅẹḅẹ, anị gbẹẹ fọọn mịẹ, tẹ sunmaye sọ-a, olivu pulo kẹ pikiri fịye sọ ḅa.

⁶Ị́ anị puma tẹ olivu pulo kẹ anị ḅio sụa ḅa. Anie mẹ anie mgbọlụ agbamịẹye.

⁷Ị́ agbamịẹye mẹ nwẹnị ḅẹlẹ ḅio sọọtẹ mgbọlụ agbamịẹye ḅẹḅẹ, anị olivu pulo sọ tẹ gbẹẹ fọọn mịẹ tẹ ye sọ ḅa.

⁸Anịsakị ị́ nwẹnị mgbọlụ agbamịẹ-aị tẹ mịna ḅara ma kẹ mịẹ mgbọlụ agbamịẹ-aị ma ọkị-ḅo KỊNỊNYANAḄỌ ḅe pịrị ḅa; tẹ ị́ anị kẹ namakọrị agbamịẹḅọ ḅe pịrị sakị, ori anị kẹ agbamịẹ-anga mẹ suku ḅo ḅa.

⁹Agbamịẹḅọ ḅe nwẹnị mgbọlị-afịaị agbamịẹye mẹ ḅụ kẹ ḅiokoroma kiri mẹ ọkị, tẹ agbamịẹ-anga mẹ ọgọnọ anị dọkịma ḅa, fịnị ḅụ mịẹarị agba KỊNỊNYANAḄỌ ḅe ḅụụ-ḅẹlẹarị kụnụ.

¹⁰Anịsakị mgbọlụ agbamịẹye mẹ ḅụ kirikọn-ye mẹ sime Erọnị na, ori owiapụ-awọmẹ na pịrịm, aniemẹ anie fịafịa-tẹịn pakịrị agbamịẹye mẹ ḅụ, kẹ fịnị ḅụ mịẹ KỊNỊNYANAḄỌ ḅe pịrị agba ḅụ ḅẹ ye ẹrẹsị.

¹¹“Mgbọlị agbamịẹye tẹ ọmịnị ọkị-ḅo KỊNỊNYANAḄỌ ḅe pịrị ye ḅụ sọ ḅẹ ye sunmaye ofori, kẹ gotẹ ọkọ ḅẹẹarị, ọ́ kẹlẹ sọ agbamịẹye ḅara ḅụ fịnị kẹ ye sunmaye na, ḅẹm na dọkịma KỊNỊNYANAḄỌ ḅe pịrị ma.

¹²Ọmịnị tarị-soku fịye ọkị-ḅo KỊNỊNYANAḄỌ ḅe pịrịị, kụma KỊNỊNYANAḄỌ ḅe ḅụụ-ḅẹlẹarị kụnụye ḅara ḅụ ọmịnị arị kẹ agbamịẹ-anga ọgọnọ ḅụ agba mịẹ ma.

¹³Ọ́ fụn kẹ ọmịna mgbọlụ agbamịẹ-aị mamgba ḅio sụa ḅa; ọ́ ḍụkụ tẹ ọmịna Tamụnọ na ọmịnị na fị ọḅọkụ mẹ ḅẹ fụn ọmịna mgbọlụ agbamịẹye ḅụ sọ ḅịa ḅara ofori. Ọmịna agbamịẹ-aị mamgba ḅụ ọ́ fụn kẹ sụa mịẹẹ.

¹⁴“Ọ́ kụra mẹ ḅụ tarị-sịnmgbọlụ agba mịẹ KỊNỊNYANAḄỌ ḅe pịrịarị ḅẹḅẹ, ọ́ kẹ ọmịna tarị-sịnmgbọlụ agba mẹ mịẹ ḅarịye anie fịnị kẹ fọị grẹgrẹtẹ ịwọ fịye.

¹⁵Anịsakị ọmịnị olivu pulo kẹ anị ḅio sụa ḅa, tẹ pịkị ịn kẹ fịranịkịnịsẹnịsị sịn kụnụaị kẹ anị ọgọnọ gbana ḅa. Anie mẹ, anie sịnmgbọlụ agba mẹ.

¹⁶Agbamịẹḅọ ḅe nwẹnị grẹgrẹtẹ sịnmgbọlụ agbamịẹye mẹ ḅụ anị ḅẹ kẹ ḅiokoroma ḅara ḅẹ kiri mẹ ọkị ḅa pulo na anị na, pịkị anị ḅẹ ịn kẹ fịranịkịnịsẹnịsị sịn kụnụaị mẹmgba na ọkị tẹ dọkịma ḅa. Anie mẹ anie fịnị ḅụ mịẹ KỊNỊNYANAḄỌ ḅe pịrị agba.”