Read kalabari Lẹvitikọsị 24 Bible Online

Lẹvitikọsị 24 - kalabari bible

Lẹvitikọsị 24

¹KỊNỊNYANAḄỌ ḅe nwẹnị Mozizi ḅẹẹ

²“Tọn Izirẹlịapụ ma pịrịị ịn tọnjọ mẹ gotẹ ḅara kẹ pọnjị pakama-ḅo kịọnkịọntẹ olivu pulo ọkị-ḅo ị́ pịrị, mịẹtẹ gbọrụ tọnjọ biin-a ḅara kẹ sakị mẹmgba kọrị ḅarị ḅara.

³Kobiri Akpụrụ-warị mẹ ḅio ḅụụ ḍie-pakama kiki-pẹlẹ-ḅịtẹ mẹ ḅụ paka-ḅo anga ḅụ, Erọnị anị kẹ sakị mẹmgba ọrụtọn ḅara wẹrị ḅa KỊNỊNYANAḄỌ ḅe tọrọkọ ḅụ ḅoḅiri-so ḅụ ọkị-ḅo dede-ḅio la anị kẹẹ-koro ọ́ pịrị wararị oloko sọ gbamaso ḅa ọmịna aḅụọ mamgba ikelema-koro ḅụ.

⁴Gwa-a karakara golu tọnjọ-sịẹmaye mẹ ọgọnọ, ori anị kẹ sakị mẹmgba ọrụtọn ḅara wẹrị ḅa KỊNỊNYANAḄỌ ḅe tọrọkọ ḅụ.”

⁵“Ọmịnị iḅiọkụ gbẹẹtẹ iḅi fịlawa ọkị tẹ kẹ fịturu oyi maa kpoo finji fọị ḅa; fịlawa kala akpa pembeye kẹ oyia akiri ḍiya ḅẹ maa akiri gbọrụ kpoo, gbọrụ kpoo ḅụ sọ ḅa.

⁶Anịsakị gwa-a karakara golu dẹbịlẹ mẹ ọgọnọ ḅụ ọmịnị arị kẹ maa ise ḅụ dẹẹ ḅa sonio akpo gbọrụ ise, gbọrụ ise ḅụ sime ḅa.

⁷Ọ́ gwa-a karakara kụnụaị kẹ gbọrụ ise, gbọrụ ise ḅụ sụa ḅa, mịẹtẹ anị fịturu mẹ ḅụ, fịnị ḅụ fịye agba mịẹ KỊNỊNYANAḄỌ ḅe pịrị ḅẹ ḅiokoroma kiri sọ ḅarị ḅara.

⁸Ịnyọsara-Ene goyegoye ḅụ Erọnị sakị mẹmgba Izirẹlịapụ ma sịḅị ẹrẹsị anị kẹ ọrụtọn ḅara koroma ḅa KỊNỊNYANAḄỌ ḅe tọrọkọ ḅụ, sime gbamaso ọḅọkụ ḅara ḅụ.

⁹Anị Erọnị na, ori owiapụ-awọmẹ na pịrị ḅa, anịsakị fịafịa yọ ḅụ ịn sime tẹ anị fị ḅa, fịnị ḅụ mịẹ KỊNỊNYANAḄỌ ḅe pịrị agbamịẹye mẹ ḅụ paka-ḅo fịafịa-tẹịn ḍiekiri, anị sime ọ̀ pịrịm nwẹn ḅẹẹ sakị; sime ọ̀ pịrị mu ḅẹẹ-sakị ḅẹẹ-sakị la ḍiekiri.”

¹⁰Gbọrụ owiḅọtụḅọ tẹ ọ̀ ḍa Ijiputi ḅẹ ḅo kụma ori iyingi Izirẹlị ḅẹ ḅọ nwẹnị Izirẹlịapụ ma ogbo ḅio paka-ḅo. Ori na jụmọ na nwẹnị kobiri-ogbo mẹ sime anga ḅụ kamụ sọ.

¹¹Izirẹlị ḅẹ ẹrẹḅọ ma owiḅọtụḅọ ḅe nwẹnị Tamụnọ Ẹrẹ fie sime tẹ ye karị. Ịn nwẹnị ori ọkị-ḅo Mozizi pịrị — ò iyingi ẹrẹ Sẹlomoti anie Dibiri ẹrẹḅọtụḅọ, Danị furo-ḅẹ-ḅọ ḅe —

¹²ịn nwẹnị ori ịkasị koroma, tẹ KỊNỊNYANAḄỌ ḅe ḅịḅị kẹ anị pịrị ḅẹ ḅara koru.

¹³KỊNỊNYANAḄỌ ḅe nwẹnị Mozizi ḅẹẹ,

¹⁴“Kobiri-ogbo mẹ ogbo-ḅio ḅụ ori ḅe tẹ ye karị ḅọ ḅe pakama-ḅo tẹ inima tẹ ò ye mẹ karị tẹ naa apụ ma ịna aḅara kẹ ọ̀ sịḅị ọgọnọ gbana, anịsakị yee tomina-ogbo mẹmgba ḍụḅarị kẹ ò gbin ḅaa.

¹⁵Anịsakị Izirẹlịapụ ma ḅẹẹ, ḅẹḅọ-ḅẹḅọ tẹ ḅịḅị kẹ amịna Tamụnọ lama ḅọ, lama ḅọ, amịna si dogi ḅa.

¹⁶Oriḅe tẹ KỊNỊNYANAḄỌ ḅe ẹrẹ fie sima ḅọ, sima ḅọ, ini mḅọ ḅaa ḅa, tomina-ogbo mẹmgba ḍụḅarị kẹ mḅọ gbin ḅa; igoniḅọ ḅe na, ama-kuḅu ḅẹ ḅọ ḅe na gbọrụ ḅara, mḅọ Tamụnọ Ẹrẹ fie sima, sima, ini mḅọ ḅaa ḅa.”

¹⁷“Tomḅọ ḅaa ḅọ, ḅaa ḅọ ini mḅọ ḅaa ḅa.

¹⁸Jụmọ nama ḅaa ḅọ ḅaa ḅọ, mḅọ jen nama kẹ ò kiri ḍima ḅa. Ḍumo na ḍumo na ḅụra ḅa.”

¹⁹“Tomḅọ mḅọ na kpeki tẹ angarị ḅọ ekelima tẹ kẹ jen ḅara wẹrị wẹrị, mḅọ kẹ anị mịẹ ḅara, mie ọ́ kẹ anị tomḅọ mẹ sọ mịẹ ḅarị ḅara.

²⁰Mgbe anyịma na mgbe anyịma ḅụra ḅa; tọrụngbọ pụnma na tọrụngbọ pụnma ḅụra ḅa; aka ḅakụ siin na aka ḅakụ siin ḅụra ḅa. Tomḅọ jụmọ ekelima ḅara, mḅọ sọ ọkọ kẹ ekeli ḅa.

²¹Tomḅọ tẹ nama ḅaa ḅọ ḅaa ḅọ, jen nama kẹ ò kiri ḍima ḅa; anịsakị tomḅọ tẹ jen tomḅọ ḅaa ḅo ḅaa ḅọ, ini mḅọ ḅaa ḅa.

²²Gbọrụ oloko mie ọ́ sụa kẹ igoniḅọ na, ama-kuḅu ḅẹ ḅọ na pịrị ḅarịye; gbala Yẹrị anie KỊNỊNYANAḄỌ ọmịna Tamụnọ ḅee ẹrẹsị.”

²³Mị-ḅara mie Mozizi ẹkwẹn Izirẹlị ḅẹ apụ ma pịrị ḅara; tẹ ịn nwẹnị kobiri-ogbo mẹ sime anga mẹ ḅụ ḅịḅị kẹ Tamụnọ lama ḅọ ḅe pakama-ḅo, tẹ ḍụḅarị kẹ ò gbin ḅaam. Mị-ḅara mie Izirẹlị ḅẹ apụ ma kẹ KỊNỊNYANAḄỌ ḅe tọn Mozizi pịrị ye mẹ mịẹ ḅara.