Read kalabari Lẹvitikọsị 26 Bible Online

Lẹvitikọsị 26 - kalabari bible

Lẹvitikọsị 26

¹“Ọ́ sịḅị-tuu arị pịrị ḅẹ ḅara kẹ gbọrụ kpokobia sọ kara, anịanịa gbọrụ ye na kịkaye tẹmẹ anịanịa ịḅalị saakị sịẹma ọmịna aḅụụ pịrị ma, pịkị ye kịka ḅara sime ḍụḅarị tẹlẹma sịẹma ma; kẹ gotẹ ọkọ ḅẹẹarị, Yẹrị anie KỊNỊNYANAḄỌ ọmịna Tamụnọ ḅee.

²Ọmịnị ị̀ Ịnyọsara-Ene ma koko, tẹ kụn kẹ ị̀ Fịafịa Yọ mẹ pịrị ḅa; Yẹrị anie KỊNỊNYANAḄỌ ḅee.”

³“Ọ́ nwẹnị ì oloko kẹẹ-koro wararị aị ma ḍiki mẹnjị, tẹ à tọn aị ma mịẹ ḅẹ tẹ kẹ elekima sụa ḅẹḅẹ,

⁴anịrẹ arị ọmịna eene kẹ ọ́ fịrịma ḅa arị koro-koro sakị ḅụ, tẹ kiri mẹ anị ḅẹ tọnwa aị ma pakama-ḅo, tẹ piri-ḅio-ḅẹ opu asịn ma tọnwa ḅara kẹ ịna asịnmgbọlụ sụa ḅa.

⁵Ọ́ paa mbịaka soku-sokutẹ arị ḅẹ mgbọlụ sẹlẹ nwenii mu iru mịẹ girepu asịnmgbọlụ kobiri sakị la ḅa, anịsakị girepu asịnmgbọlụ ma ó kobiri nwenii mu jen fịye ḍiḅi sakị la ḅa. Anịsakị ọmịnị ọmịna fịaị fị furo ḅinma tẹ gberie-sọ ḅụụ la-a ḅara kẹ ọmịna ama ma ḅio anga ḅa.”

⁶“Ama mẹ ḅio à dein pịrị ḅa, tẹ ọ́ ḅọlọlọ sime ḅa, anịsakị gbọrụḅọ-sọ mịẹtẹ ọ́ ḅalafa ma. Ama mẹ ḅụ piri-ḅio-ḅẹ si anama ma arị ịn sikima fama ḅa, tẹ okologie mẹ ọmịna ama ḅio ḅọrọ tolu ḅịa.

⁷Ọmịnị ọmịnị na fịya-a apụ ḍuka ḅa, tẹ ini ọmịna tọrọkọ okologie mẹ ḅụ ḅịkị ḅa.

⁸Ọmịna aḅụụ ḅẹ sọnọ apụ kịnị sọnọa si ḍuka ḅa, anịsakị ọmịna aḅụụ ḅẹ kịnị sọnọa si, kịnị puku sọnọa ẹndẹ finji (10,000) ḍuka ḅa, anịsakị ọmịnị na fịya-a apụ ọmịna tọrọkọ okologie mẹ ḅụ ḅịkị ḅa.

⁹Anịsakị arị ọ́ kẹ ye-sịn, tẹ ọ́ mịẹtẹ ọmịnị awọ iyi sara tẹ mịẹtẹ ọ́ kama ḅa.

¹⁰Tẹ ó koko alama tẹ elemu ye koko anga ḅụ sime ye fị ḅa, anịsakị ọmịnị elemu sime ye sin fama tẹ ḅio ḅelema ịwọye pịrị ḅa.

¹¹À nwẹnị ọmịna ogbo-ḅio ị̀ anga yọ pakama ḅa tẹ àrị ọ́ sịkị ḅịa.

¹²Àrị ọmịna ogbo-ḅio sime tẹ ọmịnị na mẹnjị ḅa, tẹ ọmịna Tamụnọ sọ ḅa, tẹ ọmịnị ị̀ atomi sọ ḅa.

¹³Yẹrị anie KỊNỊNYANAḄỌ ọmịna Tamụnọ ḅe tẹ Ijiputi ama mẹ ḅio ọ́ pakama-ḅo ḅọ ḅee, mịẹtẹ ọmịnị ịna omoniapụ sọ ḅịa ḅara anịsakị arị ọmịna kọngọ ḅụ ẹngbẹsẹ sime iku sịn mẹ anyịma sin tẹ ọ́ mịẹtẹ ọ́ tụkụ tẹ mẹnjị tẹ.”

¹⁴“Kụma ọ́ nwẹnị ì poki-a, tẹ mịna oloko mamgba koko tẹ mịẹ ḅịa ḅẹḅẹ;

¹⁵ọmịnị ì oloko kẹẹ-koro wararị aị ma sịkị, tẹ kụrọ ḅara-ḅio emi ḅọ ḅara ḅụ à sụa oloko ma ọmịna aḅụụ si tẹ anie ḅụ ọ́ ḅarị ì oloko mamgba koko tẹ mịẹ-a kụma ị̀ ọḅọkụ mẹ kan ḅẹḅẹ;

¹⁶à miemẹ kẹ ọ́ mịẹ ḅa: à bẹkẹ-ḅara-kẹ tẹmẹ-naịn-naịn na, nyana ye goyegoye ḅara-ḅio fa fama na, tọrụngbọ-pụnma ọfịrị na tọn fịrịma tẹ obi na kururu na ḅụ ḍumo guluguluma ḅa. Anịsakị papaa mie ọmịnị ọmịna sịnmgbọlị ḍiḅi ḅarịye, kẹ gotẹ ọkọ ḅẹẹarị, ọmịnị na fịya-a apụ mie anị fị ḅarịye.

¹⁷Àrị ị̀ tọrụkuḅu kẹ ọmịna si anga ḅụ wẹrị ḅa, tẹ ọmịnị na fịya-a apụ tọrọkọ ḅụ ọ́ fịị sara ḅa; ó ḍiki-ḅioḅẹlẹ-a apụ ḅẹrẹtọn ọ́ pịrị ḅa, gbọrụḅọ-sọ ó ḍuka-a ogbo ó ḍumo-mangị kọn ḅa.”

¹⁸“Miemẹ ḅụ sọ ọmịnị ì poki ḍụkụ ḅịa ḅẹḅẹ, anịrẹ à pịkị sin miemẹ ḅe sọnọma akiri kẹ ó fomu ḅa ọmịna asi ma gotẹ.

¹⁹Anịsakị arị ọmịna kụrọ mẹ ḅẹ opu amịẹaị ma anyịma siin ḅa, tẹ ọmịna aso ma kẹ ikulele kịkama mịẹ, tẹ ọmịna kiri mẹ kẹ ojo mẹ kịkama mịẹ ḅa;

²⁰anịsakị ọ́ papaa ọmịna ịnyọ fama ḅa, kẹ gotẹ ọkọ ḅẹẹarị, ọmịna kiri ḅarị anị ḅẹ tọnwa aị pakama-ḅo ḅịa, tẹ kiri mẹ ḅẹ opu asịn ma ḅarị ịna sịnmgbọlụ sụa ḅịa.”

²¹“Anịtẹso ọmịnị ị̀ na tụḅụrụ ḅara mẹnjị tẹ ì poki ḍụkụ ḅịa ḅẹḅẹ, à ja tọnwa fomu-ḅara, ọmịna asi ma ḅin la ḅara ḅẹ sọnọma akiri ọkị-ḅo ọ́ pịrị ḅa.

²²Anịsakị arị ọmịna ogbo-ḅio ḅụ piri-ḅio-ḅẹ anama ma fima ḅa, arị aị ma tẹ ọmịna aḅara ọmịna awọmẹ pụkọ-pụkọ ọkị-ọkị tẹ ọmịna opu anama ma ḅaa-ḅaa tẹ kịẹn-ḅịḅị ḅụ mịẹtẹ ọ́ kịsị ḅarị aị ma; anie mịẹtẹ ọmịna etela ma ḅo fatẹ ḅara sime ḅa.”

²³“Mie ḅioḅẹngbọ na, ye-mịẹ-ḅara na datụkụma fomu-ḅara mẹ ḅụ ó vuunma pịkị ị̀ da-a, kụma ị̀ na tụḅụrụ ḅara mẹnjị-mẹnjị,

²⁴anịrẹ yẹrị sọ ọmịnị na tụḅụrụ ḅara mẹnjị ḅa, tẹ yẹrị ḅarana ọmịna asi ma gotẹ arịḅẹ sọnọma akiri kẹ ó fomu ḅaa ḅa.

²⁵Àrị ọmụ ọkị-ḅo ọmịna ọgọnọ gbana ḅa, tẹ gbẹẹfị ḅii ọḅọkụ mẹ pịrị ḅa; tẹ ọ́ nwẹnị ọmịna opu ama ma ḅio kobiri, kobiri, sime, sime arị ama gbaịn obi kẹ ọmịna ogbo-ḅio fịrịma ḅa, tẹ ọmịnị na fịya-a apụ ḅara-ḅio ini ọ́ ḅọrọma suu ḅa.

²⁶À fịye ḅo, ḅo ọ́ laarị anga mẹ pẹlẹ-siin sakị, oyi ereme gbọrụ fịturu fọị ọpọ ḅio, ọmịna fịye fọị ḅa, anịsakị fịye mẹ, iku ḅụ mie ini ọmịna fịye tọn, tọn ọ́ pịrị ḅarịye; tẹ ọ́ fị ḅa, kụma ọmịna furo ḅin ḅịa.”

²⁷“Miemẹ ḅụ sọ ọmịnị ì poki ḍụkụ ḅịa kụma ị̀ na tụḅụrụ ḅara mẹnjị ḅarị ḅẹḅẹ,

²⁸anịrẹ owi ịganị ḅụ arị ọmịnị na tụḅụrụ ḅara mẹnjị ḅa, tẹ ọmịna asi gotẹ ḅarana arịḅẹ sọnọma akiri kẹ ó fomu ḅa.

²⁹Ọmịnị ọmịna owiapụ-awọmẹ meni pẹị ḅa, ọ́ pịkị ọmịna eremịna-awọmẹ meni pẹị ḅa.

³⁰Àrị ọmịna geletẹ ayeyọ ma sukuruma-gbin ḅa, tẹ ọmịna kụnụaị ebeka ma pẹlẹ, pẹlẹ-gbin, tẹ ọmịna fịtẹ oju ma saakị, saakị ọmịna fịtẹ akpokobịa ma ọgọnọ gbana ḅa, tẹ ọmịnị ị̀ ḅụụ si ḅa.

³¹Anịsakị arị ọmịna opu ama ma kẹ gulugulu fatẹ ye ayọ ḅara wẹrị ḅa, tẹ ọmịna fịafịa ayọ ma mịẹtẹ arị faa ḅa, anịsakị ọmịna ḅụụ-ḅẹlẹma akụnụ ḅarị ḅo ì nini la ḅịa.

³²À kẹ ama mẹ fama ḅarị ḅara, ọmịnị na fịya-a apụ tẹ anị ḅio koro sịẹ ḅarị apụ mịẹtẹ ini anị ḅụ ḅụụ-gbiripu ḅa.

³³Opu asịẹ ma ogbo-ḅio ḅụ arị ọ́ gala-galama ḅa, anịsakị arị okologie mẹ wọrọ tẹ kẹ ó ḍuka ḅa, tẹ ọmịna ama nwẹnị faa, tẹ ọmịna opu ama ma ḅo sara sọ ḅa.

³⁴Anịtẹso ama mẹ anị ḅẹ ịnyọsara tọrụ-ḅẹlẹ akụra nyana ḅa anị fatẹ ḅara sime mu la sakị, la sakị, ọmịnị, ọmịnị na fịya-a apụ ama emi ogbo ḅụ, anị sakị mẹ ḅụ ama mẹ ịnyọsara ḅa, tẹ anị ḅẹ ịnyọsara tọrụ-ḅẹlẹ nyana ḅa.

³⁵Anị faa tẹ koro-sime wararị sakị goyegoye anị ịnyọsara ḅa, ịnyọsara mẹ tẹ ọmịna Ịnyọsara-Ene ma ḅụ anị nyana-a ye mẹ ọmịnị anị ḅio angarị sakị ḅụ.”

³⁶“Inima tẹ ọmịna ḅụ kirikọn wararị apụ ma kụma, ini na fịya-a apụ ma ama ma ḅio à tẹmẹ-naịn-naịn kẹ ịna ḅioḅẹngbọ ḅụ suu ḅa, ịnyịnya jike tẹ fie kịngẹ sọ ịn mịẹtẹ ini okologie mẹ ḅụ ḍumo-mangị kọn ḅọ ḍumo-mangị kọn ḅara kẹ kụrọ mangị kọn ḅa; anịsakị gbọrụḅọ-sọ in ḍuka-a ogbo ịn ḅịkị ḅa.

³⁷Ịn pụmbụ tẹ jụmọ-jụmọ ọgọnọ ḅịkị ḅa, gbala okologie ẹkịlẹ tẹ mangị-so ḅara, gbọrụḅọ-sọ ịn ḍuka-a sọ; anịsakị ọ́ ḅarị gbọrụ kụrọ sọ nyana tẹ kẹ ọmịnị na fịya-a apụ tọrọkọ sịẹsime ḅịa.

³⁸Ọ́ fịị faa ḅa opu asịẹ ma ogbo-ḅio ḅụ, tẹ ọmịnị na fịya-a apụ ama mẹ ọ́ pẹị fama ḅa.

³⁹Anịsakị inima tẹ ọmịna ḅụ kirikọn-apụ ma ịna mịẹ-irima gotẹ ọmịnị na fịya-a apụ ama ḅio kururu na obi na ḅụ gulugulu faa ḅa; anịsakị pịkị ịna aḍapụ mịẹ-irima sọ gotẹ ịn kururu na obi na ḅụ ịn gulugulu fa ḅara faa ḅa.

⁴⁰Kụma ịn nwẹnị ịna mịẹ-irima na, ịna aḍapụ kịnị pikirima ḅụ ịna mịẹ-irima tẹ ịn kẹ ị̀ mịẹ, tẹ mẹnjị ḅụ sọ ị̀ na tụḅụrụ ḅara mẹ kẹ si go,

⁴¹anie mịẹtẹ arị ini na tụḅụrụ ḅara mẹnjị tẹ ini ọkị-ḅo ini na fịya-a apụ ama ḅio suu ye; anị sakị rẹ ịn nwẹnị ịna ḅụụ-pẹlẹa ḅioḅẹngbọ mẹ ḅụụ iderima, tẹ ini ịna mịẹ-irima ḅụ ịna ḅụụ mịẹ tẹlẹma ḅẹḅẹ.

⁴²Anịrẹ arị à Jekọbụ na fị ọḅọkụ kẹ ḅiokoroma ḅa, pịkị arị Ayịzịkị na fị ọḅọkụ kẹ ḅiokoroma ḅa, pịkị àrị Ebira-amụ na fị ọḅọkụ kẹ ḅiokoroma, tẹ arị ama mẹ kẹ ḅiokoroma ḅa.

⁴³Kụma ini ama mẹ koroma-so ḅa, tẹ ini ofori sakị anị fa tẹ koro-sime wararị sakị ḅụ anị ḅẹ ịnyọsara tọrụ-ḅẹlẹ nyana ḅa; anịsakị ini ịna mịẹ-irima ḅụ ịna ḅụụ mịẹ tẹlẹma ḅa, gbala kụrọ ḅara-ḅio emi ḅọ ḅara kẹ à tọn aị ma ini arị sịkịm, tẹ pịkị ị̀ oloko kẹẹ-koro wararị aị ma ịna ḅioḅumam ẹrẹsị.

⁴⁴Anịsọ, aniemẹ mgba ḅụ, ini ini na fịya-a apụ ama ḅụ emi sakị sọ, arị ịn sịkị ḅịa, ịn pịkị ì ḅioḅuma tẹ mịẹtẹ arị ịkatakirikọn-a-ḅara kẹ ịn ḅaa guluguluma tẹ arị ini na fị ọḅọkụ kan ḅịa; kẹ gotẹ ọkọ ḅẹẹarị, Yẹrị anie KỊNỊNYANAḄỌ ịna Tamụnọ ḅee;

⁴⁵kụma àrị in gotẹ ịna atẹngịapụ, inima tẹ arị Ijiputi ama mẹ ḅio sịẹ-sịẹ ma tọrụ-ogbo ḅụ ọkị-ḅom mịnẹ àrị ịna Tamụnọ sọ ḅa nwẹn ḅẹẹ apụ ma na fị ọḅọkụ mẹ kẹ ḅiokoroma ḅa.”

⁴⁶Mịna aị anie kẹẹ-koro oloko ma na, kụrọ ḅara-ḅio emi ḅara kẹ tọn aị ma na, sụa oloko ma tẹ Sayịnayị tụndụ ọgọnọ ḅụ KỊNỊNYANAḄỌ ḅe Mozizi ḅụụ ḅụ Izirẹlịapụ ma na, ori na ogboku mịẹ aị.