Read kalabari Lẹvitikọsị 27 Bible Online

Lẹvitikọsị 27 - kalabari bible

Lẹvitikọsị 27

¹KỊNỊNYANAḄỌ ḅe nwẹnị Mozizi ḅẹẹ,

²“Izirẹlịapụ ma ḅẹẹ, ‘ịn kẹ ịlọ suma ḅụ minini KỊNỊNYANAḄỌ ḅe pịrị wararị tomḅọ, ịn inetẹ mḅọ pakịrị-ọkị ḅa mịna igbigi aḅịḅị ma gbẹ kụma,

³fịafịa-warị mẹ ḅẹ ye-tọnye ịn nwẹn kẹ tọn ḅara ḅụ: Si kụra saakị mu kụra atesi laatẹ owiḅọ — seleḅa pakịrị amesi oyi finji.

⁴Si kụra saakị mu kụra atesi laatẹ ẹrẹḅọ — seleḅa pakịrị asuei.

⁵Sọnọa akụra ọkị mu si kụra laatẹ owiḅọtụḅọ — seleḅa si apakịrị. Nwẹnị ẹrẹḅọtụḅọ ḅẹḅẹ — seleḅa oyia apakịrị.

⁶Gbọrụ akalụ ọkị mu sọnọa akụra laatẹ owiḅọtụḅọ — seleḅa sọnọa apakịrị. Nwẹnị ẹrẹḅọtụḅọ ḅẹḅẹ — seleḅa tẹra apakịrị.

⁷Kụra atesi ọkị iwo laatẹ owiḅọ — seleḅa jeia apakịrị. Nwẹnị ẹrẹḅọ ḅẹḅẹ — oyia apakịrị.

⁸Anịsakị ịlọ mẹ minini wararị ḅọ mẹ nwẹnị igoin ḅaka tẹ mḅọ inetẹ ịn pẹlẹ wararị igbigi mẹ gbẹẹ-a ḅẹḅẹ, ịn tomḅọ mẹ kẹ agbamịẹḅọ ḅe tọrọkọ ḅoo, tẹ agbamịẹḅọ ḅe mḅọ ịnyọ wẹrịtẹ la ḅara ḅụ mḅọ gbẹẹ ḅẹ ye ḍuko.’ ”

⁹“Mḅọ kẹ ịlọ mẹ minini ye mẹ nwẹnị tomi kẹ agba mịẹ KỊNỊNYANAḄỌ ḅe pịrị-pịrị nama ḅẹḅẹ, anị nama mẹ tẹ mḅọ kẹ KỊNỊNYANAḄỌ ḅe pịrị wararị nama mẹ anie fịafịa ye.

¹⁰Mḅọ gberie-sọ kẹ anị tọnma, anịanịa anị ḍima ma; iḅiye kẹ siye ḍima-o, anịanịa siye kẹ iḅiye ḍima. Mḅọ nwẹnị nama kẹ nama ḍima ḍima, tarị nama ḅe na aniemẹ tẹ ịn kẹ anị ḍima ye ḅe na ḅo sime KỊNỊNYANAḄỌ ḅe pịrị fịafịa anama sọ tẹẹ.

¹¹Anịsakị nama ḅe nwẹnị fịafịa-a, ịn kẹ agba mịẹ KỊNỊNYANAḄỌ ḅe pịrịarị nama ḅara-a ḅẹḅẹ, anịrẹ tomḅọ mẹ nama ḅe kẹ agbamịẹḅọ ḅe tọrọkọ ḅo ḅa.

¹²Agbamịẹḅọ ḅe nwẹnị nama ḅe sime iḅi ḅara, anịanịa sime si ḅara ḍiki tẹ ọ̀ laa ye ḍuko ḅa. Agbamịẹḅọ ḅe kẹ ọ̀ laa ye mẹ ḍuko ḅara mie anị sime ḅarị ḅara.

¹³Kụma mḅọ ọ̀ pakịrị ọkị ḅẹ ḅii-ḅii, mḅọ ọ̀ laa ye mẹ kẹ sọnọa akiri ḍiya ḅẹ gbọrụ kiri kẹ sụa gbẹẹ ḅa.”

¹⁴“Tomḅọ nwẹnị amịna warị mịẹ fịafịama tẹ kẹ KỊNỊNYANAḄỌ ḅe pịrị ḅẹḅẹ, agbamịẹḅọ ḅe anị laa ye ḍuko ḅa. Agbamịẹḅọ kẹ anị ḅẹ iḅi, anịanịa anị ḅẹ si ḅụ anị laa ye ḍuko ḅara mie anị sime ḅarị ḅara.

¹⁵Anị ḅọ mẹ tẹ warị mẹ mịẹ fịafịama KỊNỊNYANAḄỌ ḅe pịrị ḅọ mẹ mḅọ warị pakịrị ọkị ḅẹ ḅii-ḅii, mḅọ igbigi ḅụ anị laa ye kẹ sọnọa akiri ḍiya ḅẹ gbọrụ kiri kẹ anị ḅụ sụa gbẹẹ ḅa, tẹ anị mḅọ nye sọ ḅa.”

¹⁶“Tomḅọ nwẹnị kiri tẹ ḍuu ḅụ mḅọ fị tẹ sime mḅọ pịrị ye ḅẹ gbọrụ pakịrị sikima KỊNỊNYANAḄỌ ḅe pịrị ḅẹḅẹ, ọ́ kẹ anị laa ye nimi ḅarị ḅara anie anị ḅụ ḍiḅi ḅarị sịnmgbọlị la ḅarị ḅara; ịn kẹ bali sịn sịnmgbọlị tọn ye mẹ ḅẹ gberie ḍiḅi ḅarị anga laa ḅarịye seleḅa pakịrị amesi oyi finji.

¹⁷Mḅọ ịn ‘Ye Pịkịma-mu Nyanaḅọ Pịrị’ kụra mẹ ḅụ amịna ḍụọ kiri mẹ pịrị ḅẹḅẹ, anị ḅintẹ ḅara kẹ anị la-la ye mẹ la ḅa;

¹⁸kụma ‘Ye Pịkịma-mu Nyanaḅọ Pịrị’ kụra mẹ ḅọrọ tẹrẹmẹ mḅọ amịna kiri mẹ pịrị ḅẹḅẹ, anịrẹ agbamịẹḅọ ḅe igbigi ḅịḅị ḅụ anị laa ye kịẹn anị pịrị ḅa kụra ma tẹ kirikọn mu jen ‘Ye Pịkịma-mu Nyanaḅọ Pịrị’ kụra la ḅara ḅụ, anịsakị anị laa ye ḅụ ye so ḅa.

¹⁹Anịsakị oriḅe tẹ kiri mẹ pịrị ḅọ mẹ anị pakịrị ọkị ḅẹ ḅii ḅẹḅẹ, anịrẹ mḅọ igbigi ḅụ anị laa ye mẹ kẹ sọnọa akiri ḍiya ḅẹ gbọrụ kiri kẹ anị laa ye mẹ ḅụ sụa ḅa, tẹ anị paa mḅọ nye sọ ḅa.

²⁰Kụma mḅọ nwẹnị kiri mẹ pakịrị ọkị ḅẹ ḅii-a ḅẹḅẹ, anịanịa mḅọ nwẹnị kiri mẹ kẹ jụmọ dẹrị tẹ ḅẹḅẹ, anị ḅarị jen-maaịn kẹ pakịrị ḅịa.

²¹Kụma kiri mẹ ‘Ye Pịkịma-mu Nyanaḅọ Pịrị’ kụra ḅụ ini anị ḅụ ḅara-siin sakị, anị fịafịa sime KỊNỊNYANAḄỌ ḅe pịrị ḅa, kiri tẹ gbọrsịḅị saakị pịrị ye sime-ḅara; agbamịẹapụ ma anị nyanapụ sọ ḅa.

²²Mḅọ nwẹnị kiri tẹ mḅọ ḍuu fị ḅụ nyana ye ḅẹ gbọrụ pakịrị-a, tẹ kiri tẹ mḅọ fẹẹ ye sikima KỊNỊNYANAḄỌ ḅe pịrị ḅẹḅẹ,

²³anị sakị ḅụ agbamịẹḅọ ḅe ọkị mu ‘Ye Pịkịma-mu Nyanaḅọ Pịrị’ kụra ḅụ anị laa ḅẹ ye kịẹn anị pịrị ḅa, tẹ tomḅọ mẹ anị ene mẹ ḅụ anị laa ye mẹ gbẹẹ ḅa, sime KỊNỊNYANAḄỌ ḅe pịrị fịafịa ye ḅara ḅụ.

²⁴Mie ‘Ye Pịkịma-mu Nyanaḅọ Pịrị’ kụra mẹ ḅụ, kiri mẹ fẹẹ ḅọ mẹ ḅara ḅụ in anị pịkịma-mu anị dẹrị ḅọ mẹ pịrị ḅa, anị ḅọ mẹ tẹ ḍuu fị ḅara ḅụ anị nyana ḅọ mẹ.”

²⁵“Ye laa ye goyegoye fịafịa yọ mẹ ḅẹ ye kịẹn ye mie ịn kẹ anị kịẹn ḅarịye ịn kẹ gera sịn igbigi mẹ ḅẹ si gbọrụ sẹkẹlị mịẹ ḅa.”

²⁶“Kụma nama ma ḅụ tarị iyi nama ḅe sime KỊNỊNYANAḄỌ ḅe pịrịm. Gbọrụḅọ-sọ ḅarị siin ọ̀ sikima koroma ma, ḅọrọ pootẹ-nambulo-o, anịanịa anana sọ; ò sime KỊNỊNYANAḄỌ ḅe pịrịm.

²⁷Anị nwẹnị fịafịa-a nama ḅẹḅẹ, anịrẹ mḅọ ọ̀ fẹẹ ọkị ḅa mḅọ ọ̀ laa ye ḍuko ḅara ḅụ, tẹ anị kẹ sọnọa akiri ḍiya ḅẹ gbọrụ kiri kẹ anị ḅụ sụa ḅa; anịanịa nama ḅe nwẹnị pakịrị-a ḅẹḅẹ, mḅọ nama ḅe laa ye ḍuko ḅịḅị mẹ kẹ ini ọ̀ dẹrị ḅa.”

²⁸“Kụma ye tẹ tomḅọ saakị KỊNỊNYANAḄỌ ḅe pịrị tẹ ye, ḅẹẹye-ḅẹẹye tẹ mḅọ nyana ye, ḅọrọ tomḅọ-o, nama-o, anịanịa mḅọ ḍuu ḅụ fị kiri sọ ḅarị dẹrị, anịanịa pakịrị ma; saakị KỊNỊNYANAḄỌ ḅe pịrị tẹ ye goyegoye, fịafịa-tẹịn ye sọ KỊNỊNYANAḄỌ ḅe pịrị tẹẹ.

²⁹Gbọrụ tomḅọ tẹ ịn ịlọ minini ḅụ ḅaa KỊNỊNYANAḄỌ ḅe pịrị ḅẹ tẹ sikima ḅọ, ịn ḅarị mḅọ pakịrị-ọkị ma; ọmịnị mḅọ ḅaa ḅa.”

³⁰“Kiri mẹ ḅụ paka-ḅo aị mamgba kẹ oyia akiri ḍiya ḅẹ gbọrụ kiri mẹ, anị ḅọrọ sịnmgbọlị-o, anịanịa opu asịn ma ḅẹ asịnmgbọlụ sọ, arị fịafịa ḅara sime KỊNỊNYANAḄỌ ḅe pịrịm.

³¹Gbọrụ tomḅọ nwẹnị sime KỊNỊNYANAḄỌ ḅe pịrị oyia akiri ḍiya ḅẹ gbọrụ kiri mẹ pakịrị ọkị ḅẹ ḅii-ḅii, mḅọ ye mẹ laa ḅịḅị mẹ kẹ sọnọa akiri ḍiya ḅẹ gbọrụ kiri kẹ anị laa ye ḅụ sụa gbẹẹ ḅa.

³²Ọmịnị ọmịna anama ma na, nambulo ma na, anana ma na, oḅori ma na kịẹn sakị goyegoye, oyi ḅụ gberie fịafịa ḅara sime KỊNỊNYANAḄỌ ḅe pịrị ḅa.

³³Nama ma ḅụ gbọrụ tomḅọ sọ miemẹ iḅiye, anịanịa miemẹ si ye ḅẹẹ ma; anịanịa pịkị gberie-sọ ḍima ma. Mḅọ nama ḍima ḍima, mḅọ ḍima nama ḅe na, mḅọ kẹ osi nama ḅe ḍima ye ḅe na fịafịa ḅara sime ḅa; kịnị ọ̀ pakịrị ọkị ma.”

³⁴Mịna aị ma anie sime Izirẹlịapụ ma pịrị tọn-aị ma, tẹ Sayịnayị Tụndụ ọgọnọ ḅụ KỊNỊNYANAḄỌ ḅe tọn Mozizi pịrị aị ma.