Read kalabari Lẹvitikọsị 5 Bible Online

Lẹvitikọsị 5 - kalabari bible

Lẹvitikọsị 5

¹KỊNỊNYANAḄỌ ḅe nwẹnị pịkị ḅẹẹ, “Ḅẹḅọ-ḅẹḅọ nwẹnị karakara-ḅara-ḅụ ogbo-sịẹḅọ ḅara kẹ sịn-ḅịḅị nyana mịnẹ mḅọ ḅo mḅọ tọrụngbọ kẹ ẹrị ye, anịanịa ḅeri kẹ naa ye ḍukoo, tẹ mḅọ mḅọ nimi ye ḍuko ḍụkụ-a si mịẹ-mịẹ, karakara ye, mḅọ anie ogbo-sịẹḅọ, anịsọ mḅọ mịẹ-irima mḅọ ọgọnọ gbana ḅa.”

²“Anịanịa ḅẹḅọ-ḅẹḅọ nimi-a ḅara ḅụ ḅara kẹ fịafịa-a ye lama-lama, anị nwẹnị piri-ḅio-ḅẹ fịafịa-a fịtẹ nama, anịanịa tomi na angarị fịafịa-a fịtẹ opu nama, anịanịa ogbo ḅụ mẹnjịarị aị ḅụ fịafịa-a fịtẹ nama-o, feni-o, mḅọ ḅo fịafịa-a ḅọ sọ tẹ, mḅọ ḅẹrẹ-ḅarasii nyana ḅa.

³Anịanịa, mḅọ ḅụụ kẹ tomḅọ ḅụ paka-ḅo fịafịa-a ye, anị ḅẹẹye-ḅẹẹye sọ, tẹ mịẹtẹ kịnị fịafịa-a ye lama, tẹ anị mḅọ ḅụụ ḅọị wararị ḅẹḅẹ, mḅọ ḅo anị nimi gbọrụ sakị, mḅọ ḅẹrẹ-ḅarasii nyana ḅa.”

⁴“Anịanịa, ḅẹ tomḅọ-tomḅọ nwẹnị iḅiye, anịanịa siye mịẹ ḅẹ ḅara ḅụ kuroma nyana-a ḅara kẹ amịna ḅịḅị-ḅọkọ kẹ ye karị-karị, tomi kuroma nyana-a ḅara kẹ karị ye karị ye, tẹ anị mḅọ ḅụụ ḅọị wararị; mḅọ ḅo anị nimi gbọrụ sakị, mịna aị ma ḅụ, ḅẹẹye-ḅẹẹye ḅụ mḅọ ḅẹrẹ-ḅarasii nyana ḅa.”

⁵“Tomḅọ mịna aị ma ḅụ ḅẹẹye-ḅẹẹye ḅụ ḅẹrẹ-ḅarasii nyana wararị ḅẹḅẹ, mḅọ mḅọ mịẹ si mẹ ḍuko-pakama ḅa;

⁶tẹ si mẹ tẹ mḅọ mịẹ tẹ ye mẹ gotẹ anana, anịanịa oḅori ogbo-ḅio ḅụ ḅẹrẹ-ḅarasii wẹrịso agbamịẹ gbọrụ ịyọrọ ọkị-ḅo KỊNỊNYANAḄỌ ḅe pịrị ḅa, anana-o, ịyọrọ oḅori-o, kẹ si sin agba mịẹ gotẹ; tẹ agbamịẹḅọ ḅe ọ̀ mịẹ si mẹ gotẹ ḅẹrẹ fama ọ̀ pịrị ḅa.”

⁷“Kụma mḅọ inetẹ anana, anịanịa oḅori nyana-a ḅẹḅẹ, anịrẹ kẹ si mẹ tẹ mḅọ mịẹ ye mẹ ḅụ ḅẹrẹ-ḅarasii agba mịẹ ye ḅara ḅụ ọkị-ḅo KỊNỊNYANAḄỌ ḅe pịrị ḅarịye nwẹẹrẹsị maa amgbọ, anịanịa, asambịrịma olosịkịya maa amgbọ; gberie sime si sin agba mịẹ pịrị ḅa, anịsakị osi ye sime dọkịma-agba mịẹ pịrị ḅa.

⁸Mḅọ arị ọkị-ḅo agbamịẹḅọ ḅe pịrị ḅa, oriḅe tẹ tarị si sin agbamịẹye mẹ kẹ mịẹ ḅarị ḅọ ḅe; ò feni ḅe kọngọ fangala ḅa, kụma ọ̀ sịḅị mẹ kanị-siin ma.

⁹Ò si siin agbamịẹye ḅẹ ọmbie mẹ ḅụ ye kẹ agbamịẹ-anga mẹ akaka asana ḅa; tẹ nwẹnị ọmbie mẹ ḅụ kirikọn-ye mẹmgba kẹ agbamịẹ-anga mẹ suku sara fama ḅa. Miemẹ anie si sin agba.

¹⁰Anịtẹrẹmẹ ọ̀ maaịn karama ye mẹ kẹ kụrọ ḅara-ḅio sime ḅọ kẹ oloko sụa ḅara mẹ kẹ dọkịma agba mịẹ ḅa; anịsakị agbamịẹḅọ ḅe nwẹnị si mẹ tẹ mḅọ mịẹ tẹ ye mẹ ḅẹ ḅẹrẹ fama mḅọ pịrị ḅa, tẹ Tamụnọ si-wẹrịso mḅọ pịrị ḅa.”

¹¹“Kụma mḅọ nwẹnị nwẹẹrẹsị amẹngbọ, anịanịa asambịrịma olosịkịya amẹngbọ nyana-a ḅẹḅẹ, anịrẹ mḅọ si mẹ tẹ mḅọ mịẹ tẹ ye mẹ gotẹ si sin agbamịẹye ḅara ḅụ iḅiọkụ gbẹẹtẹ iḅi fịlawa ọkpụrụbịa kẹ oyia akiri ḍiya ḅẹ gbọrụ kiri ọkị-ḅo si sin agba mịẹ ḅa, mḅọ pulo kẹ anị ḅio sụa ma, mḅọ pịkị ịn kẹ fịranịkịnịsẹnịsị sịn kụnụaị kẹ anị ọgọnọ sara ma, gbala miemẹ anie si sin agba ẹrẹsị.

¹²Anịsakị ori anị ọkị-ḅo agbamịẹḅọ ḅe pịrị ḅa, tẹ agbamịẹḅọ ḅe nwẹnị anị ḅụ kẹlẹ ọkị ḅa anị ḅẹ ḅiokoroma kiri ḅara ḅụ, tẹ agbamịẹ-anga mẹ ọgọnọ ḅụ miemẹ dọkịma ḅa, fịnị ḅụ mịẹ KỊNỊNYANAḄỌ pịrị agbamịẹ-aị ma ọgọnọ ḅụ; Mie mẹ anie si sin agba.

¹³Mị-ḅara ḅụ agbamịẹḅọ ḅe ḅẹrẹ fama mḅọ pịrị ḅa si tẹ mịna aị ma ḅụ ḅẹẹye-ḅẹẹye ḅụ mḅọ mịẹ si mịẹ si, Tamụnọ si-wẹrịso mḅọ pịrị ḅa. Anịsakị kirikọn-ye mẹ sime agbamịẹḅọ ḅe pịrị ḅa, sịnmgbọlụ agbamịẹye ḅụ anị wẹrịtẹ sime-ḅara.”

¹⁴KỊNỊNYANAḄỌ ḅe nwẹnị Mozizi ḅẹẹ,

¹⁵“Ḅẹḅọ-ḅẹḅọ nwẹnị nimi tẹ mịẹ-a ḅara ḅụ sime KỊNỊNYANAḄỌ ḅe pịrị fịafịa aị ma ḅụ ḅẹẹye-ḅẹẹye ḅụ minini ḅara mẹ mịẹ-a si-mịẹḅọ-mịẹḅọ, mḅọ anana-ogbo ḅio ḅụ ḅẹkụ ḅụụ ḅụ ofori gbọrụ ejimina ọkị-ḅo KỊNỊNYANAḄỌ ḅe pịrị ḅa mḅọ ḅara si ḅẹrẹ mẹ ḅẹ agbamịẹye ḅara ḅụ, ị́yẹrị fịafịa ye tọnye mẹ ḅụ ejimina ḅe la ye tọn nimi ḅa seleḅa apakịrị ḅụ; miemẹ anie ḅẹrẹ-ḅarasii agba.

¹⁶Mḅọ nwẹnị pịkị fịafịa ye mẹ ḅụ mḅọ mịẹ-irima ye mẹ gbẹẹ, tẹ anị kẹ sọnọa akiri ḍiya ḅẹ gbọrụ kiri kẹ anị ḅụ sụa tẹ kẹ agbamịẹḅọ ḅe pịrị ḅa. Agbamịẹḅọ ḅe nwẹnị ḅẹrẹ-ḅarasii agbamịẹ ejimina ḅe kẹ ḅẹrẹ fama mḅọ pịrị ḅa, tẹ Tamụnọ si-wẹrịso mḅọ pịrị ḅa.”

¹⁷“Ḅẹḅọ-ḅẹḅọ, ḅẹẹye-ḅẹẹye tẹ KỊNỊNYANAḄỌ ḅe tọn tẹ mịẹ ma nwẹn ḅẹẹ ye mịẹ-mịẹ, mḅọ anị nimi-a tẹ mịẹm ḅẹsọ, anịsọ ḅẹrẹ mḅọ ḅara si tẹẹ, tẹ mḅọ mịẹ-irima mẹ dogi ḅa.

¹⁸Mḅọ anana-ogbo ḅio paka-ḅo ḅẹkụ ḅụụ ḅụ ofori gbọrụ ejimina anịanịa mḅọ nimim ḅẹrẹ-ḅarasii agbamịẹye la-la ye ọkị-ḅo agbamịẹḅọ ḅe pịrị ḅa, tẹ agbamịẹḅọ ḅe mịẹ-irima tẹ mḅọ nimiatẹ nyana ye mẹ ḅụ ḅẹrẹ fama mḅọ pịrị ḅa, tẹ Tamụnọ si wẹrịso mḅọ pịrị ḅa.

¹⁹Miemẹ anie ḅẹrẹ-ḅarasii agba. KỊNỊNYANAḄỌ ḅe tọrọkọ mḅọ ḅẹrẹ-ḅarasii nyana tẹ.”