Read kalabari Jerimaya 16 Bible Online

Jerimaya 16 - kalabari bible

Jerimaya 16

¹KỊNỊNYANAḄỌ ḅe siin ẹkwẹn ị́ pịrị tẹ ḅẹẹm,

²“Ẹrẹḅọ sime ma, anịanịa nwẹn pembema anga ḅụ tụḅọ iyi.

³À mị angaa ini iyi awọmẹ na ịna ḍapụ-na-iyingiapụ-na ḅụ paka ḅarịye ḍuko ị́ pịrị ḅa.

⁴Ịn ḅalafama obi ḅụ ḅọrọtẹ fịị ḅa, tẹ gbọrụḅọ-sọ in ḍuu ḅịa, anịanịa ịn kẹ ḍiḅi. Ịna oju akpakpa ma tunduru sime ḅarị ḅara sara kịka ḅa kiri mẹ ọgọnọ. Ini ọmụ ḅio fịị ḅa anịanịa ḅuru-ḅa ḅụ fịị, ịna oju akpakpa ma fịye sọ feni amẹẹ na piri-ḅio-ḅẹ anama na pịrị ḅa.”

⁵“Ị́ ịn ḍụẹịn ḍuuarị gbọrụ warị sọ sọ-mu ḅịa. Gbọrụḅọ sọ gotẹ kururuma. À ḅarị jen kẹ ị̀ atomi boma ḅịa, anịanịa ḅẹlẹma na ọkụrụkụrụ na kẹ in ḍie.

⁶Mị amakiri mẹ ḅụ igoin-apụ na alapụ na fịị ḅa, kụma in ḍiḅi ḅẹ ḅọ ofori anịanịa in ḍuu. Gbọrụḅọ-sọ amịna oju pẹlẹ anịanịa sịḅị sẹịn-siin tẹ kẹ mḅọ kururuarị ye ḍie-pakama ḅịa.

⁷Gbọrụḅọ-sọ jụmọ na fịye fị anịanịa ḅuu gboloma ma, mḅọ ḅẹlẹmarịḅọ fịị ye kẹ mḅọ dedema ḅụ. Gbọrụḅọ-sọ ọkụrụkụrụ nyana jụmọ pịrị ma, fịịḅọ mẹ nwẹnị mḅọ ḍaḅọ anịanịa mḅọ iyingiḅọ sọ.”

⁸“Kịnị alalị fịarị warị sọ-mu ma. Ini na lẹgị sime tẹ fịye fị ma pịkị minji ḅuu ma.

⁹Yẹrị, Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe, nyana tẹ ḍuko ḅẹ ye pokii. À ḍereku na ḅioḅẹlẹ na apọkọ ma yaụma ḅa, pịkị ere-ịya-alalị ḅioḅẹlẹ apọkọ ma sọ. Mị angaa simearị apụ ma ḍumo sime tẹ ẹrị ḅa miemẹ pakarị sakị.”

¹⁰“Í mie mẹmgba ḍuko ịn pịrị sakị, ini í gbela ḅa à gotẹ tọn-pẹlẹ tẹ mị kụrọ-ḅara mẹ kẹ in fomuarị ye. In gbela ḅa ịn mịẹ siye, tẹ ḅẹrẹ ịna ḅara si ye, anie ịn kẹ KỊNỊNYANAḄỌ, ịna Tamụnọ ḅe, mị si.

¹¹Anịtẹso í ḍuko ịn pịrị ḅa mịnẹ KỊNỊNYANAḄỌ ḅe ḍuko tẹẹ, ‘ọmịna elemu aḍapụ ma ị̀ ḅụụ pịkị-som, tẹ sunsin oru-atamụnọ pịrị tẹ fịrịmẹnjị ịn pịrịm. Ini ị̀ kẹ gbin koroma-so tẹ ì toluma aị ma poki tẹ mịẹ-a.

¹²Kụma ọ́ mịẹ si, ọmịna elemu aḍapụ ma mịẹ ye nẹngị tẹẹ. Ọmịnị-mgba kọngọ kụrọma tẹ si wararị, tẹ ọmịnị ị̀ ḅịḅị poki-a.

¹³Anịtẹso, mie ḅụ, arị ó sukuruma pakama ḅa mị amakiri mẹ ḅụ, tẹ ó mu ọmịnị-o, ọmịna elemu aḍapụ ma-o, amụ nimi-a anga mu ḅa. Tẹ anịanga ọ́ fịrịmẹnjị oru-atamụnọ pịrị ḅa eneḅaka na ḍin na ḅụ, tẹ àrị ọkụrụkụrụ nyana ọ́ pịrị ḅịa.’ ”

¹⁴KỊNỊNYANAḄỌ ḅe mẹẹ, “Sakị mẹ ḅoarị, kịnị ḅarị jen kẹ ị̀ ḅụụ ḅụ ye karị ḅịa sakị mẹ, anie ḍumo wararị Tamụnọ ḅe tẹ Izirẹlịapụ ma pakama-ḅo ḅọ ḅe Ijiputi amakiri ḅụ.

¹⁵Anie nakara, ini ị̀ ḅụụ ḅụ ye karị ḅa, anie ḍumo wararị Tamụnọ tẹ Izirẹlịapụ ma ọkị-ḅo ḅọ ḅe ọgọnọ-jụ ḅẹ amakiri mẹ na osi asịẹ ma amakiri mamgba na ḅụ ịn pakama-ḅo ḅọ ḅe, arị ịn gala-gala mu la anga ma. Arị ini ọkị-ḅo ịna ḅara-kuḅu ḅẹ ama mẹ lama ḅa, à kẹ ịna elemu-aḍapụ pịrị amakiri mẹ. Yẹrị KỊNỊNYANAḄỌ ḅe ọkọ ḅẹẹm.”

¹⁶KỊNỊNYANAḄỌ ḅe mẹẹ, “À tọnwa inji-ḅaapụ kẹ fịrịmarị in ḅo mịna atomi ma kun. Anịtẹso à tọnwa piri-deeapụ kẹ fịrịma ḅa, tẹ in mu ịn ḍọkị-ḍọkị tẹ in kun ḅa tụndụ goyegoye na gele-akiri goyegoye na ḍọkị ideri koro ḅụ, pịkị ịkụ ma ḅụ ḅẹ afukuru ma ḅio.

¹⁷Ịn mịẹarị ye goyegoye arị ẹrịarị. Gberie sọ ị̀ ḅụụ ḅụ kikima-a; ịna asi ma ị̀ tọrụ gbarị-a.

¹⁸Àrị ịn mịẹ tẹ ịn maa kiri kẹ ịna si na si-sịḅịḅio na gbẹẹ ḅa, ịn fịtẹ tomḅọ oju akpakpa ḍumo nyana-a ḅara kẹ ḍumo nyana-a oru-afụḅara kẹ ị̀ amakiri mẹ pilema tẹ ẹrẹsị, tẹ ịn pịkị iruo atamụnọ kẹ anị ḅio ḅinma tẹ.”

¹⁹KỊNỊNYANAḄỌ, ị́yẹrị anie ị̀ gbaịn tẹ pịkị ịnyọ kẹ ị̀ pịrịarị ḅọ; ị́ ḅarasụa ị̀ pịrịarị ḅụụ-fụka sakị ḅụ. Sịẹ-sịẹ ma tomikiri ḅẹ ịkọlị ma ḅụ sime tẹ ḅo tẹ ḅẹẹ ḅa, “Wamịna elemu-aḍapụ ma jen gberie-sọ nyana-a, kụma iruo atamụnọ, gberie-sọ gberie-a kụma ye-ḅụ-sọ-a oru-afụḅara.

²⁰Tomḅọ inetẹ mḅọ ḅara-kuḅu ḅẹ atamụnọ mị ḅẹ? Ẹn-ẹn, mḅọ mịẹm ḅẹḅẹ arị karakara atamụnọ sọ ḅịa.”

²¹“Ọkọ ẹrẹsị, mie ḅụ,” KỊNỊNYANAḄỌ ḅe mẹẹ, “mị gbọrụ sakị mẹ ḅụ à gbọrsịḅị sịẹ-sịẹ ma mịẹ tẹ ini ị̀ kụrọ na ì opu na nimi ḅa; in nimi ḅa mịnẹ yẹrị anie KỊNỊNYANAḄỌ ḅee.”