Read kalabari Jerimaya 19 Bible Online

Jerimaya 19 - kalabari bible

Jerimaya 19

¹KỊNỊNYANAḄỌ ḅe ḍuko ị̀ pịrịm à mu ọgbọịn-lịka kẹ tẹmẹ jongo fẹ. Ọ̀ pịkị ḍuko ị̀ pịrịm à tomi ma ḅẹ omongiapụ ma ḅẹ jen-apụ na, omongiapụ ḅara sime tẹ agbamịẹapụ ma na ọkị

²tẹ Ẹkẹkẹ-apakịrị Ogigo-Ḅọkọ mẹ ḅụ mẹnjị-toluḅọrọ mu Hinọmụ Tụndụ-suku mẹ la. Anị anga àrị ọ̀ kẹ ị́ pịrị ḅarị oku mẹ ḍuko wasama ḅẹm.

³KỊNỊNYANAḄỌ ḅe ḍuko ị̀ pịrịm à ḅẹẹ, “Juda ḅẹ amadapụ na Jeruselemu ḅẹ apụ na, ọmịnị Yẹrị Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe, nyana tẹ ḍukoarị ye pokii. Arị ọkị-ḅo mị yọ mẹ ọgọnọ gbana ḅẹ-yearị opu ḅụụ-fụka mẹ gboloma ye naa ḅọ naa ḅọ naịn-ḅọrọ ḅa.

⁴À gotẹ miemẹ mịẹ ḅẹ-yearị, ị̀ atomi ma ị̀ kẹ gbin koroma-so tẹ agba mịẹ-mịẹ oru-atamụnọ ma pịrị ḅụ mị yọ mẹ pilema tẹẹ — oru-atamụnọ ma tẹ ịna elemu aḍapụ-o, Juda ḅẹ amadapụ ma-o arị gboloma ye ḅụ ḅẹ gberie-sọ nimi-a aị ma. Ịn mịẹye-ofori apụ ọmbie kẹ mị yọ mẹ ḅinma tẹẹ,

⁵tẹ ịn pịkị agbamịẹ-anga nama Balị pịrịtẹ ini ịna ḍọkọḍọkọ-awọmẹ kẹ fịnị ḅio dọkịma ḅẹ ḅara, agbamịẹ ḅụ. Gbala-gbala arị in mie mị ḅẹ oloko-sụa ịn pịrị-a; gbala-gbala ì kuroma ḅụ sọ anị sọ-a.

⁶Mie ḅụ ọkọ ẹrẹsị, sakị mẹ ḅo ḅa, anie ịn ḅarị jen kẹ Tofẹti anịanịa Hinọmụ Tụndụ-suku kẹ mị yọ mẹ sịn ḅịa sakị mẹ. Anie nakara, ịn kẹ anị nimi ḅarị ẹrẹ anie — Kịnị-ḅaaḅa Tụndụ-suku.

⁷Mịanga ḅụ à Juda na Jeruselemu na ḅẹ apụ ma tọn aị mamgba kẹ papaa aị mịẹ ḅa. À mịẹ tẹ si kẹ ịn tọn apụ ma ịn nẹngịma tẹ ọmụ kiri ḅụ ịn ḅaa ḅa. Àrị ịna oju-akpakpa ma kẹ fịye sọma So-tọrụ ḅẹ afeni na piri-ḅio-ḅẹ anama na pịrị ḅa.

⁸Arị ọkị-ḅo mị opu ama mẹ ọgọnọ gbana ḅarị ḅalafama ḅaa-guluguluma mẹ mịẹ tẹ ḅẹḅọ-ḅẹḅọ tẹ mẹnjị-ḅọrọarị ḅọ sịḅị-kanakana tẹ ḅụụ-bua ḅa.

⁹Si kẹ ịn tọn apụ ma opu ama mẹ ikelema-koro ḅa tẹ ḅụụkụrọma tẹ anị ḅẹ atomi ma ḅaa ḅa. Ama mẹ ọkị ẹrẹsị ịn kẹ anị ikelema ḅara mẹ kpọma ḅalafama ḅarị ḅara ḅụ anị ḅio sime apụ jụmọ-jụmọ ḅaa pẹị ḅa, tẹ ịna soku-ḅẹ ḍọkọḍọkọ-awọmẹ sọ ḅọrọ ḅịa.”

¹⁰Anịtẹso KỊNỊNYANAḄỌ ḅe ḍuko ị̀ pịrịm à jongo mẹ ḅaa, ị̀ na mu owiapụ ma tọrọkọ ḅụ

¹¹tẹ ḍuko ịn pịrị mịnẹ Kụrọmamgba nyana KỊNỊNYANAḄỌ ḅe ọkọ ḅẹẹm, “À mịna atomi ma na mị opu ama mẹ na ḅaa sara ḅa, tẹ anị fịị aḅaịn-jongo mẹ kịka ḅa, tẹ ḅarị inetẹ jen kẹ kpesi ḅịa. Kịnị Tofẹti ḅụ ịna aḍụẹịn ḍiḅi ḅa, jen ịn kẹ ḍiḅi ḅẹ anga ḅarị paka ḅịa ẹrẹsị.

¹²À minini tẹ mịnẹ à mịẹ opu ama mẹ na anị angarị apụ na kẹ Tofẹti kịkama ḅa.

¹³Jeruselemu ḅẹ awarị ma na, Juda ḅẹ amadapụ awarị ma na, tẹ karakara-ḅara-ḅụ warị mamgba tẹ ini arị isun ọgọnọ kụnụaị dọkịma lolia ma pịrị tẹ aị ma, pịkị iru sara ḍiepịrịye kẹ oru-atamụnọ pịrị tẹ ayọ ma — arịmgba fịafịa-a ḅara sime ḅa Tofẹti sime-ḅara.”

¹⁴Anịtẹso à Tofẹti koroma-som, anie KỊNỊNYANAḄỌ ḅe ị̀ fịrịmam à mu ori oku ḍuko wasama ḅẹ anga mẹ, tẹ mu Tamụnọ-warị mẹ ogigo ḅio sịẹsime tẹ ḍuko kịnị mamgba pịrịm

¹⁵mịnẹ Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe, ḍuko tẹẹ, “À ḅẹẹm àrị ọkị-ḅo mịẹ opu ama mẹ na anị kpeki ama ma na ọgọnọ gbana ḅa ḅẹ fomu-ḅara mẹ arị ọkị-ḅo ḅa, ọ́ kọngọ kụrọma tẹ à ḍukoarị ye poki ḍụkụ ḅịa ẹrẹsị.”