Read kalabari Jerimaya 2 Bible Online

Jerimaya 2 - kalabari bible

Jerimaya 2

¹KỊNỊNYANAḄỌ ḅe ị̀ ḅẹẹm,

²à mị oku mẹ ḍuko wasama ḅẹḅọ-ḅẹḅọ pịrịị Jeruselemu ḅụ: Ị́ ịwọ sakị ḅụ í ḅioḅẹngbọ-kẹ-sịrẹrẹ-niḅi ḅara simem mẹ, à kẹ ḅiokoromarị, wa tarị simearị simearị ị́ kẹ ị̀ ḅẹlẹma ḅara mẹ, í ì ḍuka ịkpa mẹ ḅio mẹnjị ḅọrọ ḅara mẹ, kịnị amụ ye ḍiḅi-a kiri mẹ ḅụ tolu-ḅọrọ.

³Izirẹlị, í sime yẹrị ngẹrị pịrịm; ị́ tọn-tọn ḅara sime ị̀ pịrịm. Ye kẹ ị́ lama ḅọ lama ḅọ, à tọrụsiẹrị na opu ḅụụ-fụka na kẹ mḅọ fịrịmam. Yẹrị, KỊNỊNYANAḄỌ ḅe ọkọ ḅẹẹm.

⁴Ọmịnị Jekọbụ ọrụ ḅụ iyi apụ, ọmịnị Izirẹlị ḅẹ furo, ọ́ KỊNỊNYANAḄỌ ḅe oku mẹ pokii.

⁵KỊNỊNYANAḄỌ ḅe mẹẹ: Ọmịna elemu aḍapụ ma tọ ḅẹrẹ ḍuko ị̀ ọgọnọ gbana? Tiye ịn mịẹ tẹ ini ọḅụ kẹ ì gbin tẹ mẹnjị-so? Ịn sunsin ye-ḅụ-sọ-a oru-afụḅara pịrịm tẹ ini ma ḅioju sọ nwẹnị ḅo papaa ḅara sime.

⁶Ini ì gbolomaye kẹ ye-sịn-a, karakaraye yẹrị Ijiputi ḅara-ḅio ịn pụkọ-pakamaḅom sọ tẹ tọrọkọ tarị tẹ si piri-ḅio na ịkpa aḅio na onwin ịgwa-ịgwa ḅara sime kiri na, samụnọ tẹ ḍumo fama ḅara sime amakiri na tẹ gbọrụḅọ-sọ anga-a, tẹ gbọrụḅọ-sọ jene-jene ḅọrọ ye mu-mu-a yọ na ḅụ ịn kẹ tolu-ḅọrọ ye.

⁷Arị ini ọkị-ḅo fie-pakamarị kiri lam, anị ḅẹ fịye-soku sakị ḅẹ iḅi fịye, pịkị ja iḅi aị na. Kụma anie nakara ini ì kiri mẹ sima guluguluma tẹ; ini à kẹ ịn pịrị bebe yọ mẹ pilema tẹẹ.

⁸Agbamịẹapụ ma gbela-a: KỊNỊNYANAḄỌ ḅe ọ̀ tọ-anga emi? Ị̀ agbamịẹapụ ma í nimi-a. Ḅẹrẹtọn-apụ ma kọngọ-kụrọma ị̀ pịrịm; ịkịankoroapụ ma Balị ẹrẹ ḅụ ẹkwẹn tẹ sunsin ye-ḅụ-sọ-a oru-afụḅara pịrịm.

⁹Tẹ anie ḅụ yẹrị KỊNỊNYANAḄỌ ḅe siin ị̀ ḅẹrẹ ḍuko-ḍuko ịna furo-furo ma ọgọnọ gbana ḅa.

¹⁰Ịrụa-ideriarị-anga anga mẹ mu Sayịpụrọsị sọọ mẹ la, pịkị kịnị fịrịma mu ịrụa sakị paka-ḅoarị anga mẹ ḅụ Keda amakiri mẹ la. Ị́ ẹrị ḅa mịnẹ miemẹ kịka jen ye, jene-jene amụ paka-a.

¹¹Jen gbọrụ sịẹ sọ amụ amịna atamụnọ ḍima-a, karakaramatẹ arị aị ma tamụnọ-a ḅẹ sọ. Kụma ì atomi tamụnọ nwẹn ḅẹẹ aị tẹ inetẹ gberie-sọ mịẹ ịn pịrị ḅịa aị ma kẹ Tamụnọ tẹ kụn ọkị-ḅo ịn pịrị tẹ ḅọ ḅe kiri ḍima tẹẹ.

¹²Tẹ mie ḅụ à tọn So-tọrụ mẹ pịrị tẹ mịnẹ anị ḅalafama ḅara kẹ jikee, kịnị ḅụụ-bua tẹ ḅụụ-gbiripu ḅẹ ḅara,

¹³kẹ gotẹ ọkọ ḍukoarị ì atomi maa asi mịẹ tẹẹ: ini ị̀ ḅụ pịkị so tẹẹ, ḍumo-pịrịarị ngụngụḅa minji ḅe, tẹ minji koko olulu soku tẹ, paịn-paịn-sararị olulu ma tẹ gbala-gbala inetẹ minji ọlọ wẹrị-a aị ma.

¹⁴“Izirẹlị omoniḅọ-a, Omoniḅọ pịkị ori iyi-a. Ọkọ kụma tiye ẹrẹsị si kẹ ọ̀ tọn apụ ma ò ḍuka-ḍuka tẹ ò kun-arị?

¹⁵Ini oloku ọ̀ pịrịarị ḅara ọkụkụ ekirearị ye ọkụ; ịn mịẹ tẹ ori amakiri mẹ ịkpa sọ tẹ; tẹ ori ama ma kan-sara tẹ ayọ sọ tẹ ini arị kẹ gbin koroma mangị-so fama tẹẹ.

¹⁶Inn, Mẹmụfịsị na Tafanisi na ḅẹ apụ ọ̀ sịḅị fomu-puu tẹẹ.

¹⁷Izirẹlị, ị́ ḅarana miemẹ dogi-ḅo ị́ ḅụụ pịrịm! Ị́ yẹrị KỊNỊNYANAḄỌ, ị́ Tamụnọ ḅe ḅụ mangị-som, yẹrị tọrọkọ tarị ị́ pịrị ma muarị ogbo.

¹⁸Í kuromarị ị́ nyana ḅẹ sọye tiye í Ijiputi muarị ye mẹ ḅụ, Nayịlị tọrụ ḅẹ minji mẹ ḅuu mụnọọ? Í kuromarị ị́ nyana ḅẹ sọye tiye ị́ Asiriya muarị ye mẹ ḅụ, Yuferetisi tọrụ mẹ ḅẹ minji ḅuu mụnọọ?

¹⁹Ị́yẹrị ḅarana mịẹ si mie ị́ fomu ḅarịye, ị́ ị̀ ḅụụ pịkị-so ye mẹ ḅẹrẹ kọn ị́ ḅara sima ḅa. Ị́ ḍawọ ḅo ḅa anị akụ tẹ kura-a la ḅara ị́ KỊNỊNYANAḄỌ ị́ Tamụnọ ḅe koroma mangị-so ye mẹ tẹ ḅarị jen kẹ ḅioḅẹngbọ-kẹ-sịrẹrẹ-niḅi ḅara sime ị̀ pịrị-a. Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ, Kụrọmamgba Nyanaḅọ ḅe ọkọ ḅẹẹm.”

²⁰Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Izirẹlị, iḅere-iḅerea kụra ḅio ị́ ị̀ ḅẹrẹtọn kụrọ mẹ sịkịm; ị́ ḍụkụ tẹ ị̀ ḅịḅịpoki tẹ sunsin ị̀ pịrị-a. Gele tụndụ ọgọnọ goyegoye ḅụ pịkị ḍumo wararị sịn goyegoye suku ḅio í sunsin fịaị pakama-ḅo ḅa nwẹn ḅẹẹ atamụnọ pịrịm.

²¹Iḅi tẹịn kụrọ-sịn mgbọlị ḅara ḅụ mie à kẹ ị́ sẹlẹ pakama-ḅo tẹ ị́ kẹ ḍiḅi ye. Kụma í ḅo sime tẹ ḅara ḍikii! Í ḅo ḅụrụ tẹ kẹ mịẹ-mịẹ ye ofori kụrọ kịka tẹẹ.

²²Ị́ nwẹnị kụrọ-tẹịn ọsọn kẹ í oju sịkịrị sọ à paa ị́ ḅẹrẹ-ḅarasii mẹ ḅẹ elekima ẹrị ḅa.

²³Ndẹẹ í inetẹ ị́ ị́ ḅụụ pilema-a ḅẹẹ ḅẹ ḅara, mịnẹ jene-jene amụ í Balị tẹkẹ-a? Tụndụ suku mẹ ḅụ ị́ mịẹ siye ḍikii; ị́ mịẹ tẹ ye ẹrịị, Ọfịrị ḅụụ-ḅalaḅalamarị piri-ḅio-ḅẹ ike-sụa-nama ḅe mie ị́ kịkarị, kpọọ-a tẹ mangị ikele-ikelearị,

²⁴mangị mu ịkpa ḅio sọarị. Ori ọkọ kẹ ọfịrịarị sakị ḅụ tụḅọ inetẹ ò kun sịẹma ḅẹ? Ọ̀ nyana ḅẹ ḅụụ-fụka gotẹ gbọrụ owi sọ ọ̀ dama-mu-mua, ori owi na gboloma ḅẹ sakị ḅụ sakị mamgba ọ́ tẹlẹma wararị.

²⁵Izirẹlị, ịnyọ kẹ ị́ aḅụọ tama ma, anịanịa ị́ pọkọ-ḅẹ-ololo kpakịkịma ma, mangị-mangị oru-atamụnọ ḍuka mu ḅụ. Kụma ị́ mẹẹ, ‘Ẹn-ẹn! Arị inetẹ pịkị-ḅo ḅịa. À jen asịẹ ḅẹ atamụnọ ḅẹlẹma tẹ in ḍuka-mu ḅa.’ ”

²⁶KỊNỊNYANAḄỌ ḅe mẹẹ: In furuḅọ kun tẹ ọ̀ tọrụ-tuu gbọrụ ḅara mẹ mie ọmịnị Izirẹlịapụ mamgba tọrụ-tuu ḅarị ḅara, ọmịna amadapụ na opu fịrịmẹnjịapụ na, ọmịna agbamịẹapụ na ịkịankoroapụ na.

²⁷Ọmịnị-mgba tọrụ-tuu fama ḅa, ọmịnị tẹ ḅarị apụ ma mịnẹ sịn anie ọmịna ḍaḅọ, tẹ ịkụ pịkị ọmịna iyingiḅọ. Miemẹ paka ḅa, ọmịnị ọḅụ kẹ ì gbin tẹ so tẹ ẹrẹsị, ọ́ tọrụ pịkị ị̀ da ḅẹ nakara. Kụma ọ́ ḅụụ-fụka ḅio sọ sakị mie ó ḅiiarị à ḅo ḅarasụa ọ́ pịrị.

²⁸Ọ́ ḅarana mịẹ ḅụụ pịrị atamụnọ ma ịn tọ-anga emi? Ọ́ ḅụụ-fụka ḅio sọ sakị yee ini ọ́ ḅọrọma — ini inetẹ ḅarị ḅẹḅẹ. Juda, ì opu ama ma kịẹn-ḅịḅị la ḅara mie pịkị ị́ nyana atamụnọ ma la ḅara.

²⁹Ị́ ḅụụ-fụka tẹ í ḍuko-sụa ḅẹ ye tiye? Í tiye gotẹ kọngọ-kụrọma ị̀ pịrị?

³⁰Arị í fomum, kụma anị gbọrụ iḅi sọ kẹ ị́ mịẹ-a. Ị́ ḍụkụ tẹ arị ị́ datụkụma-a. Í ekirearị ọkụkụ kịka tẹ ị́ ịkịankoroapụ ma ḅaa tẹ.

³¹Izirẹlịapụ, ọmịnị à ḍukoarị ye pokii. Ọmịna ḅụ arị ịkpa kịka tẹ, kanakana tẹ siye dogi-ḅo ḅẹ amakiri kịka tẹ? Ọkọ-a kụma, tiye ẹrẹsị ọ́ ḅẹẹarị mịnẹ ọmịnị ọmịna ḅụụ-ḅẹlẹ ḅẹ ḅara mịẹ ḅa, mịnẹ ọ́ ḅarị jen kẹ pịkị ị̀ dama-ḅo ḅịa?

³²Iriawọ-tụḅọ á pọkọsụa ḅiriaị kẹ ḅioḅọrọma-ḅụrama, anịanịa ịya ḅẹ ẹrẹḅọ arị ịya ḅẹ ene ḅẹ ḅiriaị? Kụma ị̀ atomi ị̀ kẹ ḅioḅọrọma tẹ kịẹnkịẹn-ọkụ-ofori ene ma ḅụ.

³³Ọ́ kpọma ḅẹlẹmapụ ḍuka-mu-mu aḅọkọ nimi wararị. Si tẹịn ẹrẹḅọ sọ ọmịna ḅara ye ḍawọ ḅa.

³⁴Ọmịna akapa ma igoin-apụ na mịẹ si ofori apụ na ọmbie arị ọmbịma wararị, warị kan sọ-sọ tẹ ye furuarị apụ ọmbie-a. Kụma ma mamgba ọgọnọ ḅụ sọ,

³⁵ọ́ ḅẹẹarị: Yẹrị à mịẹ si ofori; piki-pikiye-ofori ḅara ḅụ KỊNỊNYANAḄỌ ḅe ọ̀ ḅarị ì ḍiki-ịganị-a. Yẹrị KỊNỊNYANAḄỌ ḅe ó fomu ḅa ọmịnị ó si mịẹ ye pịkị tẹ ẹrẹsị.

³⁶Ị́ ị́ ḅụụ mịẹ iderima tẹẹ, pịkị jen asịẹ ḅẹ atamụnọ da ḅụ. Ijiputi í pikirima ḅa, Asiriya kẹ ị́ mịẹ gbọrụ ḅara mẹ.

³⁷Í Ijiputi ḅụ pịkị-so ḅa, ḅụụ-jịrị kẹ sịḅị-tuu ḅụ. Yẹrị KỊNỊNYANAḄỌ ḅe ị́ kẹ ḅiokpọmarị apụ ma sịkị tẹẹ; ịna ḅụ ị́ nyana ḅẹ gbọrụ sọye sọ ofori.