Read kalabari Jerimaya 20 Bible Online

Jerimaya 20 - kalabari bible

Jerimaya 20

¹Ịma tụḅọ Pasọ, Agbamịẹḅọ ḅe, tẹ Tamụnọ-warị mẹ ḅẹ fịrịmẹnjịapụ ma sịḅịdaḅọ ḅe mịna aị ma tẹ à ḍuko wasamarị aị ma naa sakị,

²ọ̀ tọn tẹ ini ì fomu tẹ ikoli kẹ ị̀ ịkasị tẹ ị̀ kẹ Benijamịnị Ogigo-ḅọkọ mẹ ḅẹ ọgọnọ-jụ koromam, Tamụnọ-warị mẹ ḅio.

³Anị ḅẹ ene-ḅaa dede-ḅio ḅio ḅụ, Pasọ ị̀ ḅụ ikoli mẹ siin tẹso, àrị ọ̀ ḅẹẹm, “KỊNỊNYANAḄỌ ḅe kẹ ị́ sịn ẹrẹ Pasọ-a. Ọ̀ kẹ ị́ pịrị tẹ ẹrẹ anie — Anga mamgba Ḅalafama Ye.”

⁴KỊNỊNYANAḄỌ ḅe ḅioju ḍuko tẹẹ, “Arị ị́ mịẹ tẹ ị́ ḅalafama ye sọ ị́ ḅụụ na í ikiapụ na pịrị ḅẹ-yearị, tẹ ị́ tọrụngbọ kẹ ẹrịarị ogbo ini inimgba ḅaa ḅa, si kẹ ịn tọn apụ ogie ḅịḅị ḅụ. À Juda ḅẹ apụ mamgba kẹ Babịlonịya ḅẹ amadaḅọ kụrọ suku-ḅio suu ḅẹ-yearị; ori ikoliapụ ḅara kẹ jen-apụ ọkị so ori ama iri mu ḅa tẹ osi apụ ḅaa ḅa.

⁵À pịkị wẹrịso tẹ si kẹ ịn tọn apụ ma mị opu ama mẹ ḅẹ ngọ mamgba fọịn tẹ anị nyana aị mamgba kọrị-ọkị ḅa, Juda ḅẹ amadapụ ma kẹ koko ḅụụ-wẹrịma aị kịngẹ sọ, tẹ ye goyegoye dogi-so Babịlonịya mu ḅa.

⁶Ị́yẹrị kịngẹ kụma, Pasọ, na ị́ warị na sọ in kun tẹ ọ́ kẹ so Babịlonịya mu ḅa. Anị anga ị́ fịị tẹ ini í ḍiḅi ḅa, na í ikiapụ mamgba na, ị́ tọnwa iruo aị ḍuko pịrị tẹ apụ ma.”

⁷KỊNỊNYANAḄỌ, í oḅori kẹ ị̀ sịn tẹẹ, àrị oḅori-sọ tẹẹ Ị́yẹrị kụrọ ị̀ nẹngị wararị tẹ ị́ kụrọ kẹ ị̀ nẹngịma tẹẹ. Ḅẹḅọ-ḅẹḅọ ì sulearị; Bebe ene mẹ ḅụ ini ì komboarị.

⁸Àrị ẹkwẹn anga ẹkwẹn anga, àrị owu pakama tẹ oloku nyanam, “Kụrọ-kụrọ! Ḅaa-guluguluma!” KỊNỊNYANAḄỌ, sakị mamgba ini ị̀ kẹ papaa ḅara mịẹ tẹ ì ḍiki-iderimarị arị í oku mẹ ḍuko wasamarị ẹrẹsị.

⁹Kụma à ḅẹẹarị sakị, “À KỊNỊNYANAḄỌ ḅe kẹ ḅioḅọrọma ḅa tẹ ḅarị jen kẹ ori ẹrẹ ḅụ ẹkwẹn ḅịa,” anịtẹso í oku mẹ fịnị kịka tẹ ị̀ ḅụụ ḅio kọrịarị. À ḅụụkụrọma tẹ anị ọlọ-sịẹmarị ị̀ ḅụụ ḅio, kụma à ḅarị inetẹ jen kẹ anị da ọḅụ pịrị-a.

¹⁰À naarị ḅẹḅọ-ḅẹḅọ ḅeri-ḅio ḅeri-ḅio ḅarị, “Anga mamgba tẹmẹ-naịn-naịnmaye! Ó yee wa ọ̀ mịẹarị ye mẹ ḍuko sịḅịdapụ ma pịrị!” Ọkị mu ị̀ na kpeki tẹịn ikiapụ la sọ à ḅịkị-koro ḅẹ ḅara ḍikiarị. Ini mẹẹ: “Ẹbịsịya kịnị inetẹ ò tuu koroma ḅa”, “anịtẹso wa nwẹnị ò kun tẹ wamịna gbẹẹfị ḅii ḅa.”

¹¹Kụma, KỊNỊNYANAḄỌ, ị̀ jụ emi, ị́ kụrọ tẹ opu kụrọ nyana wararị, tẹ ḅaa-ḅọkọ kẹ ị̀ ḍọkịarị apụ ma ḅịkị ḅa. Ịna tọrụ-tuu gbamaso ḅa, in ḅiiarị ye ini inetẹ nyana ḅịa ẹrẹsị. Ịna tọrụ-tuu mẹ gbala-gbala ḅioḅọrọ ḅịa.

¹²Kụma, Kụrọmamgba nyana KỊNỊNYANAḄỌ, kura ḅara mie ị́ kẹ tomi daaḍikiarị; ịna aḅioḅẹngbọ na ịna akuroma ma na ḅio sime ye, í nimi wararị. Mie ḅụ yee àrị ị́ ẹrị mịnẹ í si kẹ ị̀ tọn apụ ma ḅara ḅụ ị̀ gbẹẹfị ḅiiarị, kẹ gotẹ ọkọ ḍukoarị, àrị ị̀ ḅẹrẹ kẹ ị́ aḅara-ḅio sụa wararị.

¹³Nume su KỊNỊNYANAḄỌ ḅe pịrịị! KỊNỊNYANAḄỌ ḅe tokinii! Ori anie si-mịẹapụ kụrọ ḅara-ḅio in ponomarị apụ ma pụkọ-pakamaḅoarị.

¹⁴Arị iyi ene mẹ wori! Ì iyingi ì iyi koroma ene mẹ kẹ ḅioḅọrọma!

¹⁵Mịẹ tẹ ị̀ ḍa ḅioḅẹlẹ tomḅọ ḅe worii, ori oku mẹ da ḅo ọ̀ pịrị ḅọ ḅe tẹ ḅẹẹm, “Owiḅọ tụḅọọ! Í owiḅọtụḅọ nyana tẹẹ!”

¹⁶Yee ori arị ama ma kịka anie KỊNỊNYANAḄỌ ọkụrụkụrụ ofori ḅara kẹ guluguluma tẹ ama ma. Yee ò dede-ḅio akụye gotẹ kọn-arị owu naa, na ọmụ oloku na eneḅaka ogbo ḅụ,

¹⁷ori ị̀ ḅaa-a nwenii arị iyi ye ẹrẹsị. Mimgbe ì iyingi tụḅọ-dogi-akpa ì ḍuḅu sọ tẹẹ.

¹⁸Tiye ẹrẹsị àrị iyi? Ḅụụ-fụka na kururu na nyana kịngẹ mụnọọ, tẹ tọrụ-tuu kẹ ì ḍumo kunoma?