Read kalabari Jerimaya 22 Bible Online

Jerimaya 22 - kalabari bible

Jerimaya 22

¹Mie KỊNỊNYANAḄỌ ḅe ḅẹẹ ye, “Juda ḅẹ amadaḅọ ḅe amada-warị mẹ muu, tẹ mị oku mẹ ḍuko wasama anị anga:

²yei Juda ḅẹ amadaḅọ, KỊNỊNYANAḄỌ ḅe ẹkwẹn mẹ pokii, tẹ Devidi emine ọgọnọ lẹgị wararị ḅọ — ị́yẹrị na í opu fịrịmẹnjịapụ na ị́ atomi tẹ ma ogigo-aḅọkọ ma mẹnjị-mẹnjị sọ-ḅoarị apụ ma.

³Yẹrị, KỊNỊNYANAḄỌ ḅe oloko-sụa ọ́ pịrịarị mịnẹ ọ́ jụmọ inoma ofori ye na kuraye na mịẹẹ. Ọ́ kịnị inomarị ḅọ mẹ gbaịn ḅọrọma mḅọ inomarị ḅọ mẹ ḅụ. Ó si ḅara anịanịa ponoma ḅara kẹ jen asịẹ ḅẹ apụ na, ḍapụ-na-iyingiapụ-na fịtẹ awọmẹ na, diapụ-fịtẹ-ereme na mịẹ ma, pịkị in ponoma ma. Mị fịafịa yọ mẹ ḅụ ọ́ mịẹye-ofori apụ ḅaa ma.

⁴Ọ́ karakara ḅara kẹ à sụa oloko mẹ kokoarị ḅẹḅẹ anị sakị ẹrẹ mie Devidi furo-ḅẹ-apụ ama-da tọrọkọ-tọrọkọ mu ḅarịye. Ini na ịna opu fịrịmẹnjịapụ na ịna atomi na mịẹ ama-da warị mẹ ḅẹ ogigo-aḅọkọ ma ḅụ mẹnjị-sọ-sọ tọrọkọ-tọrọkọ mu ḅarịye, kiri mẹnjị ọmụ-arụ goyegoye na asụ amẹẹ na ọgọnọ ḅụ.

⁵Kụma ọmịnị ì oloko ma poki tẹ mịẹ-a ḅẹḅẹ, à karị ọ́ pịrịarị mịnẹ mị amada-warị mẹ ḅịkị tẹ sii kọsị ḅa. Yẹrị, KỊNỊNYANAḄỌ ḅe ọkọ ḅẹẹm.”

⁶“Ị̀ ḅụụ ḅụ, Juda amada-warị mẹ Giliyadi amakiri na Lẹbanọnị Tụndụ ma na iḅi ḅara iḅi wararị; kụma arị anị kẹ fa tẹ yọ sọma ḅa, gbọrụḅọ-sọ anga-a yọ.

⁷À tomi kẹ fịrịmarị in ḅo anị kan gulugulumaa. Inimgba ịna akumbu ọkị-ḅo tẹ kẹ anị ḅẹ iḅi sida asịn ḅeriye ma pẹlẹ-pẹlẹ-gbin ḅa, tẹ arị kẹ fịnị ḅio wakị suu ḅa.”

⁸“Anie ḅọrọ tẹso, tọnwa jen asịẹ ḅẹ apụ mẹnjị ḅọrọ-ḅọrọtẹ ẹrị tẹ jụmọ-jụmọ gbela ḅa tiye ẹrẹsị yẹrị, KỊNỊNYANAḄỌ ḅe, nwẹn sime ye kẹ mị opu ama mẹ mịẹ mọ.

⁹Anịtẹso ịn pakịrị ḅa mịnẹ ọmịnị yẹrị ọmịna Tamụnọ ḅe na ọmịnị na fị ọḅọkụ mẹ kẹ gbin koroma tẹ sunsin oru-atamụnọ pịrị tẹ fịrịmẹnjị arị pịrị tẹẹ.”

¹⁰Juda ḅẹ apụ, ọmịnị Amadaḅọ Josaya gotẹ owu ma; ọmịnị ọ̀ fịị kẹ ò ḍuu ma. Kụma ọ́ tẹmẹ-akụ ḅara kẹ owu ọ̀ tụḅọọ Johazi ḅe pịrịị, ini ori ọkị-soarị, gbala-gbala pịkị-ḅo ḅịa ḅara, gbala-gbala, jen kẹ ini ori iyi amakiri mẹ ẹrị ḅịa ḅara.

¹¹KỊNỊNYANAḄỌ ḅe Josaya owiḅọtụḅọ Johazi ḍaḅọ tọrụ ḍima tẹ Juda da ḅọ ḅe ḅẹẹarị, “Mị angaa ò so tẹẹ, gbala-gbala ọ̀ ḅarị pịkị-ḅo ḅịa.

¹²Ini ori ọkị-so mu sịẹ mẹ ḅụ ọ̀ fịị ḅa, tẹ ḅarị jen kẹ mị amakiri mẹ ẹrị ḅịa.”

¹³Japụ inoma ḅọkọ ḅụ ḅọrọtẹ amịna warị namarị tomḅọ mẹ mḅọ fa tẹẹ, tẹ nwẹnị mingirima ḅụ anị mịẹ ḍụḅamarị, anie amịna sịẹ ḅẹ apụ mịẹ tẹ ịn papaa kọrịnama-kọrịarịḅọ mẹ tẹ ịna gbẹẹ-ye kẹ ịn gbẹẹ-gbẹẹ-a ḅọ mẹ.

¹⁴Amịna ḅụụ ḅẹẹarị tomḅọ mẹ, anie ḅẹẹarị: “À wulalatẹ iḅi warị nama ị̀ ḅụụ pịrị ḅa, ḅio-ḅio-ḅio tẹ ọgọnọ warị nyana ye,” mḅọ fa tẹẹ. Mie ḅụ ori ikiḅa-ḅọkọ-ḅọkọ sụarị ọ̀ warị, sida ḍụḅọ kẹ anị pono-pono ḅọrọmarị, tẹ awụ agba kẹ ọmbịarị.

¹⁵Anie mịẹ tẹ í iḅi ja amadapụ nẹngị í sida awarị nama ye mẹ ḅụ, iḅi jen-apụ aị nẹngị aị ma? Ị́ ḍa ḅin tẹ ḅioḅẹlẹ ḍumo kọn ị́ nẹngịm. Ọ̀ sakị mamgba kịnị-inoma-a iḅi ḍumo kọnm, tẹ lolom ọ̀ mịẹ ye mịẹ ye ḅụ.

¹⁶Ọ̀ karakara ḅẹrẹkọn igoin-apụ pịrịm, tẹ ye-mẹmgba ori na iḅim. Anie mie KỊNỊNYANAḄỌ ḅe nimi fiearị ye.

¹⁷Kụma í inetẹ ye iḅi ngẹrị pịrị ḅẹ ḅara ḍikiarị; ị́ mịẹye-ofori apụ ma ḅaarị tẹ kụrọ ḅara kẹ ị́ atomi ponomarị. KỊNỊNYANAḄỌ ḅe ọkọ ḅẹẹm.

¹⁸Mie ḅụ KỊNỊNYANAḄỌ ḅe Josaya owiḅọtụḅọ Jehohakịmụ, Juda ḅẹ amadaḅọ ḅe gboloma ye ḅụ ḅẹẹarị: Gbọrụḅọ sọ ò ḍuu ḅịa ọ̀ fịị ḅụ, anịanịa ḅẹẹ: Anị ḅalafama ḅara ḍikii, ì ikiaḅọ, anị ḅalafama ḅara ḍikii! Gbọrụḅọ tọrụ sọ owu minji sara ọ̀ pịrị ḅịa, anịanịa owu, tẹ ḅẹẹ, yei ị̀ nyanaḅọ! Ị̀ amadaḅọ!

¹⁹Asụ kịka nama ḅe fịị tẹ ịn kẹ ò ḍiḅi ḅẹ ḅara mie ịn kẹ ò ḍiḅi ḅarị ḅara, ini ọ̀ fọnọ pakama ḅa Jeruselemu ogigo-aḅọkọ ma ḅụ tẹ ọ̀ kẹ wakị nguma ḅa.

²⁰Jeruselemu ḅẹ apụ, ó so Lẹbanọnị mu tẹ olokuu, ó so Basani mu tẹ owuu, Mohabụ tụndụ ma ọgọnọ ó sime tẹ gele-pọkọ kẹ sịịn, ọmịna jụ ḅẹ apụ mamgba owu ịna ḅara-si tẹẹ ẹrẹsị.

²¹Ye ọmịnị na loloarị sakị KỊNỊNYANAḄỌ ḅe ẹkwẹn ọ́ pịrịm, kụma ó poki ḍụkụ-a. Ọmịna ḍumo mamgba ḅụ ó miemẹ mịẹ tẹẹ; gbala-gbala ó minini tẹ KỊNỊNYANAḄỌ ḅe ḅịḅị poki-poki-a.

²²Fẹrụ ọmịna sịḅịdapụ ma ofuro so ḅa, Tẹ ọmịna jụ ḅẹ apụ ma ini ikoliapụ ḅara kẹ ini ọkị so ḅa ọmụ ḅio, ini ọmịna opu ama mẹ tọrụ-tuu tẹ anị ḅụụ-jịrịma ḅa ọ́ mịẹ tẹ asi-aị mamgba ẹrẹsị.

²³Ọ́ gbala-ḅọrọ Lẹbanọnị asida ma ogboku ḅo aị ḅara kẹ ye-ḅụụ-la-a ḅara kẹ ịnyọsara simearị, kụma anị kpọma sịḅị-jịrịmaye sọ ọ́ pịrị ḅa ḅo ọ́ la ḅarị akụ ye ḅụ, anị iyiarị ẹrẹḅọ daarị akụye kịka ḅa.

²⁴KỊNỊNYANAḄỌ ḅe nwẹnị Ama-da Jehohakịnị, Juda da sime Jehohakịmụ ḅe tụḅọ ḅẹ, “Piki-pikiye-ofori ḅara ḅụ yẹrị ḍumo wararị Tamụnọ sakị goyegoye, nwẹnị ị̀ ama-ḅara ḅẹ ḅara-tụngbalị sụa gulu elekima sọ àrị í siin-pakama

²⁵tẹ kẹ í gotẹ ḅalafaarị apụ ma pịrị ḅa, ị́ ḅaa ḅẹ ḍọkịarị apụ ma. Arị ị́ kẹ Nebukadineza, Babịlonịya ḅẹ Amadaḅọ ḅe na ori ọmụ apụ na pịrị ḅa.

²⁶À kụrọ-ḅara kẹ ị́yẹrị na í iyingi na kun-so ḅa. Ó mu ḅarị sịẹ mẹ ọmịna ḅụ ḅẹ gbọrụḅọ-sọ anịjụ iyi-a, tẹ ọmịnị maa apụ anịjụ fịị ḅa.

²⁷Ó jen kẹ mị sịẹ mẹ ḅẹ amakiri mẹ ẹrị ḅẹ ḅii lama ḅa, kụma gbala-gbala ọ́ pịkị-ḅo ḅịa.”

²⁸À nwẹnị ḅẹẹ, “Ama-da Jehohakịnị ḅe, ọ̀ fị tẹ jongo sọ tẹ ini ọ̀ kẹ wakị nguma tẹ gbọrụḅọ-sọ ḅarị ò ḅii-a? Anie mie in gotẹ ori na ori awọmẹ na kun-so ini anị gboloma gberie-sọ nimi-a amakiri mu ye?”

²⁹Yei amakiri, amakiri, amakiri! KỊNỊNYANAḄỌ ḅe ḍuko tẹ ye mẹ pokii:

³⁰“Ḅị tomḅọ ḅe ịn ḅẹrẹ-pẹlẹ ori ọgọnọ gbana tẹ mịnẹ ori awọmẹ fịị Ọ̀ mịẹ ye mịẹ ye gbala-gbala ḅara ḅẹ sọ ma gboo pịrị tomḅọ sọ ḅa. Ò furo-ḅẹ-apụ paka ḅịa Juda ḅụ ama-da ḅẹ apụ, Devidi tọrụ ḍima ḅẹ apụ ḅara ḅụ. Yẹrị, KỊNỊNYANAḄỌ ḅe ọkọ ḅẹẹm.”