Read kalabari Jerimaya 26 Bible Online

Jerimaya 26 - kalabari bible

Jerimaya 26

¹Jehohakịmụ, Josaya tụḅọ ḅe Juda daarị tarị sakị ḅụ, KỊNỊNYANAḄỌ ḅe ẹkwẹnm:

²KỊNỊNYANAḄỌ ḅe ị̀ ḅẹẹm, “Tamụnọ-warị mẹ ḅẹ ogigo mẹ ogboku sịẹsime tẹ à tọn ị́ pịrị tẹ í ḍuko ḅẹ aị mamgba ḍuko wasama Juda ḅẹ ama ma ḅụ sime tẹ ḅo sunsin Tamụnọ pịrị ḅẹ apụ ma pịrịị. Gberie-sọ siin ma.

³Ẹbịsịya tomi ma poki tẹ ịna si etela ma ḅụ ḅara-siin ḅa. Ini ọkọ mịẹm ḅẹḅẹ, anịsakị arị ì kuroma ḍima ḅa ịna si-sịḅịḅio amịẹaị ẹrẹsị à tọn tẹ kẹ ịn ḅaa-guluguluma ḅẹ ye mẹ ḅụ.”

⁴KỊNỊNYANAḄỌ ḅe ḍuko ị̀ pịrịm à tomi ma ḅẹẹ, “Yẹrị, KỊNỊNYANAḄỌ ḅe ọkọ ḅẹẹm mịnẹ ọmịnị ị̀ ḅịḅịpoki nyanam, à kẹ ọ́ pịrị tẹ tolumaye mẹ ḍukamẹnjị ḅụ,

⁵pịkị ị̀ afịrịmẹnjịapụ ịkịankoroapụ ma ẹkwẹn ma kẹ ye-sịn ḅụ anie à kẹ ọ́ fịrịma siin ọ́ fịrịmarị apụ ma. Jene-jene amụ ọmịnị in ḍuko ye poki-a.

⁶Ọ́ paa poki-a tọrọkọ-tọrọkọ muarị ḅẹḅẹ, anịsakị à mị Tamụnọ-warị mẹ kẹ à kẹ Silo mịẹ ḅara mịẹ ḅa, tẹ tomikiri ḅẹ asịẹ mamgba mị opu ama mẹ ẹrẹ kẹ ye karị ye sọma ḅa.”

⁷Agbamịẹapụ ma, ịkịankoroapụ ma, na tomi mamgba ị̀ naam à mịna aị ma ḍukoarị sakị Tamụnọ-warị mẹ ḅio,

⁸tẹ à KỊNỊNYANAḄỌ ḅe tọn ị̀ pịrịm à ḍuko nwẹn ḅẹẹ aị ma ḍuko fama tẹso, ịn nwẹnị ì kun tẹ oloku, “Ị́ fịị nyanam miemẹ gotẹ!

⁹Tiye ẹrẹsị ị́ KỊNỊNYANAḄỌ ḅe ẹrẹ ḅụ ḍuko mịnẹ mị Tamụnọ-warị mẹ ḅo Silo na kịka ḅa, anịsakị mịẹ opu ama mẹ ini anị guluguluma tẹ gbọrụḅọ-sọ ḅarị anị ḅio anga ḅịa.” Anịtẹso tomi ma ḅo ì ikelema-korom.

¹⁰Juda ḅẹ sịḅịdapụ ma paka tẹ ye naa tẹso, ịn nwẹnị fọnya ḅara kẹ ama-da warị mẹ ḅụ sime tẹ ḅo Tamụnọ-warị mẹ la tẹ ịna akiri ọkị Ịwọ Ogigo-ḅọkọ mẹ ḅụ.

¹¹Anịtẹso agbamịẹapụ ma na ịkịankoroapụ ma na nwẹnị sịḅịdapụ ma na tomi ma na ḅẹẹm, “Ḅị tomḅọ ḅe, ḅaa-ḅẹrẹ-pẹlẹ ọ̀ sịḅị gbana na-iḅim, ọ̀ tụḅụrụ ẹkwẹn kọn mị opu ama mẹ pịrị tẹ ẹrẹsị. Ọmịnị ḅarana ọmịna aḅeri kẹ naam.”

¹²Anịtẹso à ḅẹẹm, “À ḍuko mị Tamụnọ-warị mẹ na mị opu ama mẹ na ọgọnọ gbana tẹ ọ́ naa ye goyegoye, KỊNỊNYANAḄỌ ḅe ị̀ fịrịmam à ḍuko wasamaa.

¹³Ọmịnị ó ḍumo kọn-arị ḅara na ọ́ mịẹarị aị na ḍima tẹ pịkị KỊNỊNYANAḄỌ ọmịna Tamụnọ ḅe ḅịḅịpoki nyanam. Ọmịnị ọkọ mịẹm ḅẹḅẹ, ori ò kuroma ḍima ḅa, ọ̀ ḅẹẹm ori ọkị-ḅo ọmịna ọgọnọ gbana ḅa ḅẹ guluguluma mẹ gboloma ye ḅụ.

¹⁴Yẹrị kụma, àrị ọmịna kụrọ ḅio emi! Ọmịnị ó kuromarị inoma ofori tẹ kura ḅẹ ḅara goyegoye kẹ ị̀ na mịẹẹ.

¹⁵Kụma ó miemẹ nimi lamaa, ọmịnị ị̀ ḅaam ḅẹḅẹ, ọmịnị na mị ama mẹ ḅẹ apụ ma na mịẹ si ofori tomḅọ ḅaa-ḅẹrẹ-ḅarasi nyana ḅa, KỊNỊNYANAḄỌ ḅe mie ị̀ fịrịma ye à mị ḅeri nụnụ ẹkwẹn mẹ kẹ ọ́ pịrịị ẹrẹsị.”

¹⁶Anịtẹso sịḅịdapụ ma na tomi ma na agbamịẹapụ ma na ịkịankoroapụ ma na ḅẹẹm, “Ḅị tomḅọ ḅe KỊNỊNYANAḄỌ, wamịna Tamụnọ ḅe, ẹrẹ ḅụ ẹkwẹn wa pịrịm, ọ̀ kẹ ḅaa ḅụ suu-suu ḅọkọ ofori.”

¹⁷Anie ḅọrọ tẹso, omongiapụ ma ḅẹ jen-apụ nwẹnị tomi ma tẹ ḅo kobiri apụ ma ḅẹẹ:

¹⁸Hẹzịkaya ama-daarị sakị Juda ḅụ, ịkịankoro Mayịka, Morẹsẹtị ḅẹ ḅọ ḅe, ḍuko tomi ma pịrịm mịnẹ Kụrọmamgba nyana KỊNỊNYANAḄỌ ḅe ḍuko tẹẹ: Ini opu anama fọnọ-mẹnjịarị kiri soku ikulele kẹ Zayọnị kẹ ḍụọ kọrị kiri kịkama soku ḅa. Jeruselemu sara sọ ḅa, tẹ Tamụnọ-warị mẹ opu-piri sọ ḅa.

¹⁹Ama-da Hẹzịkaya na Juda ḅẹ apụ ma na ịn Mayịka ḅaa-a. Anie nakara Hẹzịkaya KỊNỊNYANAḄỌ ḅe mangịma tẹ ḅụụkụrọma tẹ mịẹ tẹ ò ḍiki-ḅụụjịrị nyana ọ̀ pịrịm. Tẹ KỊNỊNYANAḄỌ ḅe amịna kuroma ḍimam ọ̀ ḅẹẹm ori ọkị-ḅo ịna ọgọnọ gbana ḅa nwẹn ḅẹẹ opu ḅụụ-fụka mẹ gboloma ye ḅụ. Mịọkụ wa ḅalafama opu ḅụụ-fụka dogi-ḅo wamịna ọgọnọ gbana ḅẹ-yearị.

²⁰(Jen gbọrụ tomḅọ sọ simem, Yuraya, Sẹmaya tụḅọ, Kiriyati-jeharimụ ḅụ sime tẹ ḅo ḅọ ḅe, anie KỊNỊNYANAḄỌ ḅe ẹrẹ ḅụ ẹkwẹn mị opu ama mẹ na sịẹ mẹ na ọgọnọ gbana ḅọ ḅe, Jerimaya mịẹ gbọrụ ḅara mẹ.

²¹Ama-da Jehohakịmụ na ori ọmụapụ na opu fịrịmẹnjịapụ na Yuraya ḍuko ye naa sakị, amadaḅọ ḅe ọ̀ ḅaa ḅẹ ḍọkịm. Kụma Yuraya nwẹnị anị gboloma ye naa; anie ḅụ ọ̀ ḅalafa ḅụ mangị-so Ijiputi mu tẹ ọ̀ ḅara gbarịm.

²²Anịsọ Ama-da Jehohakịmụ ḍụkụ-a tẹ Ẹlịnetanị, Akịbọ tụḅọ ḅe, na ja oyia apụ na kẹ Ijiputi fịrịmam in mu Yuraya ọlọ ḅo ḅẹ ḅara.

²³Ini ọ̀ kẹ pịkị-ḅo Ama-da Jehohakịmụ pịrịm, tẹ ọ̀ nwẹnị ọ̀ ḅaa tẹ ori oju akpakpa mẹ kẹ ama ḍụẹịn ḍiḅi piri-ḅio gbin koroma.)

²⁴Kụma yẹrị, Ahikamụ, Safani tụḅọ ḅe, ị́ jụ emi ẹrẹsị in ị̀ saḅama tomi ma pịrị tẹ ini ị̀ ḅaa-a.