Read kalabari Jerimaya 28 Bible Online

Jerimaya 28 - kalabari bible

Jerimaya 28

¹Anị gbọrụ kụra mẹ ḅụ, Zẹdẹkaya ama-da tẹ ini karama kụra mẹ ḅẹ sọnọ karama akalụ mẹ ḅụ Azuru tụḅọ Hananaya, Gibiyọnị ḅụ ḅo gbọrụ ịkịankoroḅọ, ẹkwẹn ị̀ pịrịm Tamụnọ-warị mẹ ḅio. Agbamịẹapụ ma na tomi ma tọrọkọ mie ò ḍuko ị̀ pịrị ye

²mịnẹ Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḅẹẹ tẹ, “À Babịlonịya amadaḅọ ḅe kụrọ mẹ ḅịkịma tẹ.

³Maa kụra la ḅẹ sakị Tamụnọ-warị ḅẹ ngọ mamgba tẹ Ama-da Nebukadineza ọkị so Babịlonịya mu aị ma à kẹ pịkị-ḅo mịanga lama ḅa.

⁴Jehohakịnị, Juda ḅẹ amadaḅọ, Jehohakịmụ tụḅọ ḅe na Juda ḅẹ apụ mamgba tẹ ịn kẹ ọ̀ ḅụ sụa kun-so Babịlonịya mu apụ ma sọ. Inn, à Babịlonịya amadaḅọ ḅe kụrọ mẹ ḅịkịma ḅa. Yẹrị KỊNỊNYANAḄỌ ḅe ọkọ ḅẹẹm.”

⁵Anịtẹso agbamịẹapụ ma na tomi mamgba tẹ anị jụ sịẹsime-sime apụ na tọrọkọ Tamụnọ-warị mẹ ḅio, arị Hananaya ḅẹẹm:

⁶“Ḅụụ-buamaye! À ḅiokpọ wararị, KỊNỊNYANAḄỌ ḅe miemẹ mịẹ ḅa! Piki-pikiye-ofori ḅara ḅụ à ḅiokpọ wararị, KỊNỊNYANAḄỌ ḅe mịẹ tẹ í koro ịkịan mẹ ḅo karakara ye sọ ḅa, tẹ ọ̀ Tamụnọ-warị mẹ ḅẹ ngọ mamgba na tomi mamgba tẹ ini ikoliapụ ḅara kẹ kun-so Babịlonịya mu apụ ma na kẹ pịkị-ḅo ḅa.

⁷Kụma à ḍuko ị́yẹrị na tomi ma na pịrịarị ye pokii.

⁸Iḅere-iḅerea kụra ḅio ẹkwẹn ịkịankoroapụ ma, tẹrẹmẹ ḅo ị̀ sakị na in nye na la, ọmụ na ḅuru-ḅa na obi na tẹ ḅo tọnwa asịẹ na opu kụrọ nyana ama-da ayọ ọgọnọ gbana ḅẹ ịkịan korom.

⁹Kụma gbọrụ ịkịankoroḅọ dein ịkịan korom ḅẹḅẹ, ịn kẹ ori karakara ịkịankoroḅọ nwẹn ḅẹẹ ye lekiri ḅarịye anie, KỊNỊNYANAḄỌ ḅe karakara-ḅara-ḅụ ori ẹrị ịkịan mẹ mịẹ tẹ anị karakara ye sọ ḅa.”

¹⁰Anịtẹso Hananaya ị̀ kọngọ sime nama kpọọ gboloma sịn mẹ siin tẹ anị anyịma kọsịmam,

¹¹tẹ tomi mamgba tọrọkọ ḅụ ḅẹ, “KỊNỊNYANAḄỌ ḅe ḍuko ị̀ pịrị tẹ mị-ḅara mie ọ̀ kẹ Ama-da Nebukadineza kẹ ma asịẹ mamgba kọngọ sụa wararị aị ma anyịma siin ḅarị ḅara; tẹ ò miemẹ mịẹ ḅa maa akụra amụ ḅọrọ-a ogbo. Anịtẹso à nwẹnị mẹnjị so.”

¹²Miemẹ mịẹ tẹ sakị kẹlẹ ḅọrọ tẹso, KỊNỊNYANAḄỌ ḍuko ị̀ pịrịm

¹³à mu ḍuko Hananaya pịrịị: “KỊNỊNYANAḄỌ ḅe ḅẹẹ tẹ mịnẹ í inetẹ sịn kẹ mị nama kpọọ gboloma sịn anyịma ḅa, kụma ori ikulele kẹ mịẹ ye kẹ anị kiri ḍima ḅa.

¹⁴Kụrọmamgba nyana KỊNỊNYANAḄỌ ḅe, Izirẹlị Tamụnọ ḅe, ḍuko tẹẹ mịnẹ ori ikulele kọngọ sụa ye kẹ mịna asịẹ mamgba kọngọ sụa ḅa, tẹ ịn fịrịmẹnjị Ama-da Nebukadineza, Babịlonịya ḅẹ ḅọ ḅe pịrị ḅa. KỊNỊNYANAḄỌ ḅe ọkọ ḅẹẹm mịnẹ piri-ḅio-ḅẹ anama amẹẹ sọ fịrịmẹnjị Nebukadineza pịrị ḅa.”

¹⁵À miemẹ ḍuko Hananaya pịrịm, tẹ mie kẹ sụa ḍukom, “Hananaya, pokii! KỊNỊNYANAḄỌ ḅe ị́ fịrịma-a, tẹ ị́ mịẹ tẹ mịna atomi ma iruo ye mininiarị.

¹⁶Anie ḅụ KỊNỊNYANAḄỌ ḅe ḅioju ḅarị mịnẹ ori ị́ fọnọ sikima ḅa. Tẹrẹmẹ mịẹ kụra mẹ fa ị́ fịị ḅa, anie ị́ ḍuko tomi ma pịrị tẹ ịn kọngọ-kụrọma KỊNỊNYANAḄỌ ḅe pịrị tẹ ẹrẹsị.”

¹⁷Tẹ anị gbọrụ kụra mẹ ḅụ sọnọma akalụ karama akalụ mẹ ḅụ Hananaya nwẹnị fịị.