Read kalabari Jerimaya 32 Bible Online

Jerimaya 32 - kalabari bible

Jerimaya 32

¹KỊNỊNYANAḄỌ ḅe ẹkwẹn ị̀ pịrịm Zẹdẹkaya, Juda ḅẹ amadaḅọ ḅe ama-da tẹ oyia akụra karama kụra mẹ ḅụ, anie pịkị Ama-da Nebukadineza Babịlonịya da tẹ maa kụra fa sii karama kụra mẹ.

²Anị sakị mẹ ḅụ Babịlonịya ḅẹ amadaḅọ ọmụ-ogbo mẹ owu kẹ Jeruselemu pakarị, tẹ amadaḅọ onu mẹ ḅio ini ị̀ kẹ ikoli suu wararị.

³Ịn kẹ ị̀ sịḅị-sẹịn tẹ Ama-da Zẹdẹkaya ị̀ kẹ ikoli suu ye anie, à ḍukom mịnẹ KỊNỊNYANAḄỌ ḅe ḅẹẹm, “À mịẹ tẹ Babịlonịya ḅẹ amadaḅọ ḅe mị opu ama mẹ ọkị ḅa,

⁴tẹ Ama-da Zẹdẹkaya ọ̀ ḅara gbarị ḅịa. Ini ọ̀ saḅama Babịlonịya ḅẹ amadaḅọ ḅe pịrị ḅa; ori ori na tọrụ kẹ dama-dama tẹ ọ̀ ḅarana ẹkwẹn ọ̀ pịrị ḅa.

⁵Ịn Zẹdẹkaya ọkị-so Babịlonịya mu ḅa, tẹ ori anị anga sime nwenii tẹ arị ori na à mịẹ ḅẹ ye mịẹ ḅa. Ọ̀ nwẹnị Babịlonịya na owu sọ-sọ, owu ọ̀ ḅara iḅi ḅịa. Yẹrị KỊNỊNYANAḄỌ ọkọ ḅẹẹm.”

⁶KỊNỊNYANAḄỌ ḅe ḍuko ị̀ pịrịm

⁷mịnẹ Hanamẹlị, ị̀ ḍa iyimbere Salumu tụḅọ ḅe ị̀ dama-ḅo tẹ ị̀ ḅara ḅii ḅa mịnẹ àrị ọ̀ ḍụọ-ḍiḅi kiri fẹẹ Anatọtị ḅụ, Benijamịnị ibe mẹ ḅụ, yẹrị anie ori na kpeki-tẹịn mịnaḅọ tẹ anị fẹ tẹ kẹ ì nye sọma kụrọ mẹ nyanaḅọ ẹrẹsị.

⁸Anịtẹso, KỊNỊNYANAḄỌ ḅe ḍuko gbọrụ ḅara ḅụ, Hanamẹlị ị̀ dama-ḅom ikoli-warị mẹ ḅio, tẹ ị̀ ḅara ḅiim à ḍụọ-ḍiḅi kiri mẹ fẹ. Mie ḅụ à nimim mịnẹ karakara-ḅara-ḅụ KỊNỊNYANAḄỌ ḅe ẹkwẹn ị̀ pịrị tẹẹ.

⁹Arị Hanamẹlị ḅara ḅụ ḍụọ-ḍiḅi kiri mẹ fẹẹm tẹ igbigi mẹ kẹ ọ̀ gbẹm; tuḅo-pẹlẹ-ḅịḅị mẹ ḅo seleḅa tẹra pakịrị fa si lam.

¹⁰À nwẹnị ḅara kẹ anị ḅẹ ḍiri mẹ ḅio sụa tẹ ye-oḅoloye kẹ anị oḅolo; tẹ kiri ḅụ sime apụ ḅara kẹ anị ḅio sụa tẹso, à nwẹnị igbigi mẹ gbẹẹ pakama.

¹¹Anịtẹso à fẹẹ ḍiri mẹ ọkịm, anị na anị ḍiki tẹ kẹ ye mẹ na, maaịn ma ye kẹ oḅolo ye mẹ tẹ ḅịḅị-kẹ-ogbosọ ḅara mẹ ḍukoarị ye mẹ pịkị ini anị ḍiki tẹ kẹ finji wararị ye mẹ na

¹²arị arị kẹ Baruku pịrịm, anie Nẹrịya owiḅọtụḅọ, pịkị Masẹya taa-owiḅọtụḅọ ḅe. Hanamẹlị na, kiri mẹ ḅụ sime tẹ ḅara-pono kẹ fẹẹ ḍiri mẹ ḅio sụa apụ ma na, amadaḅọ onu mẹ ḅio sime owiapụ ma na tọrọkọ mie à kẹ ọ̀ pịrị yee.

¹³Inimgba tọrọkọ ḅụ à Baruku ḅẹẹm,

¹⁴“Kụrọmamgba nyana KỊNỊNYANAḄỌ, Izirẹlịapụ tẹkẹarị Tamụnọ ḅe tọn ị́ pịrịtẹ mịna aḍiri ma ọkịị — kiri-fẹ-ḍiri-apakịrị ma tẹ oḅolo wararị ye mẹ na finji wararị ye mẹ na — arị kẹ aram-ḅẹlẹ ḅio sụa, mịẹ tẹ arị kpaịn sime tọrọkọ-jụ kụra-kụra la ḅẹ ḅara.

¹⁵Kụrọmamgba nyanaḅọ ḅe, Izirẹlịapụ tẹkẹarị Tamụnọ ḅe, ḍuko tẹẹ mịnẹ mị amakiri mẹ ḅio in siin warị-warị, ḍụọ-ḍiḅi akiri-kiri na kụrọ aḍụọ-ḍụọ na fẹ ḅa.”

¹⁶À kiri-fẹ-ḍiri-pakịrị mẹ kẹ Baruku pịrị tẹso, à tẹkẹm,

¹⁷“Ḍụḅa Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́yẹrị So mẹ na Kiri mẹ na tẹmẹm í opu kụrọ ḅụ; ị́ ḅụụ ḅụụ-fụkama ḅaka gberie sọ ofori.

¹⁸Í kuno-kuno-a ḅẹlẹma nyana kịnị ẹndẹ-ẹndẹ pịrịarị, kụma ị́ pịkị fomu-ḅara kẹ tomi pịrịarị ịna ḍapụ-na-iyingiapụ-na asi gotẹ. Ị́yẹrị anie opu na kụrọ na nyana Tamụnọ; ị́yẹrị anie Kụrọmamgba nyana KỊNỊNYANAḄỌ ḅee.

¹⁹Nimi aị mie ị́ tọn koromarị, tẹ opu kụrọ nyana aị mịẹarị; tomi mịẹarị ye goyegoye ị́ ẹrịarị, tẹ ị́ ịna amịẹaị sime-ḅara ḍiki tẹ gbẹẹ-ye kẹ ịn pịrịarị.

²⁰Alatẹ sakị ḅụ, ị́ ḅụụ-buama-aị na ḅụụ-gbiripuma-aị na mịẹm Ijiputi ḅụ, ị́ pịkị paa arị mịẹ-mịẹ nwenii ḅo mịmgba lam, Izirẹlị ḅụ na osi asịẹ mamgba ogboku na ḅụ, anie ẹrẹsị anga mamgba ḅụ ini í nimi tẹẹ.

²¹Ḅụụ-buama-aị na ḅụụ-gbiripuma-aị na, tẹ si kẹ wa tọn apụ ma tẹmẹ-naịn-naịnma aị ma, mie ị́ kẹ opu kụrọ kẹ ị́ atomi Izirẹlị pakama-ḅo ye Ijiputi ḅụ.

²²Ị́ nwẹnị anị ḅụụ-ḅẹlẹmatẹ iḅiọkụma fịye so-pakamarị amakiri mẹ kẹ ịn pịrị, ị́ wẹrịtẹ minini ịna elemu-aḍapụ ma pịrị ḅara.

²³Kụma in ḅo mị amakiri mẹ anga tẹ anị kẹ ịna nye sọma sakị ini ị́ tọn koroma aị ma poki tẹ mịẹ-a, anịanịa í tolumaye ḍiki anga. Ị́yẹrị tọn ịn pịrịm ịn mịẹ nwẹn ḅẹẹ aị ma ḅẹ gberie-sọ ịn mịẹ-a. Tẹ mie ḅụ ị́ fịị-gulugulu ọkị-ḅo ịna ọgọnọ gbanam.”

²⁴“Babịlonịya ḅẹ apụ ma in sime tẹ owu-sọ ḅẹ ayọ nama ama mẹ ikelema tẹ ama mẹ ọkị ḅẹ ḅara gotẹ owu kẹ anị pakarị. Ọmụ na, ḅuru-ḅa na, obi na mịẹ tẹ ama ḅịkị ịna aḅara-ḅio sọ ḅa. Í inetẹ ẹrị ḅa mịnẹ í ḍuko aị mamgba ḅo karakaraye sọ tẹẹ.

²⁵Anịsọ, Ḍụḅa Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́yẹrị kọkọ tọn ị̀ pịrị à ḍụọ-ḍiḅi kiri fẹẹ, kịnị kiri mẹ ḅụ simearị ogbo, opu ama mẹ Babịlonịya ḅẹ apụ ma aḅara sọ ḅẹ-yearị sakị mẹ ḅụ.”

²⁶Anịtẹso KỊNỊNYANAḄỌ ḅe ị̀ ḅẹẹm,

²⁷“Yẹrị anie KỊNỊNYANAḄỌ ḅee, tomi mamgba Tamụnọ ḅee; ị̀ ḅụụ ḅụ kụrọ ḅaka gberie-sọ ofori.

²⁸À mị opu ama mẹ kẹ Nebukadineza, Babịlonịya ḅẹ Amadaḅọ ḅe na ori ọmụ-ogbo na pịrị ḅẹ-yearị; ini anị ọkị

²⁹tẹ anị dọkịma ḅa. Ịn dọkịma ḅo kiri lama ḅa. Tomi ma arịḅẹ isun ọgọnọ-jụ ḅụ kụnụaị dọkịma-dọkịma Balị pịrị tẹ pịkị iru sara oru-atamụnọ pịrị-pịrị tẹ kẹ ị́ ịganịma sime awarị ma sọ dọkị ḅa.

³⁰Izirẹlị na Juda na ḅẹ apụ ma ḅẹ tarị suku ḅụ saakị kụra ḅio ini ì ḅioḅẹngbọ sima tẹ ị̀ ịganịma tẹ ịn mịẹ tẹ aị ḅụ.

³¹Mị opu ama ḅẹ apụ ma ịganịma ḅụratẹ ama mẹ bịan nama kụra ḅio. À tọn-pẹlẹ tẹ mịnẹ arị anị guluguluma ḅa,

³²anie Juda na Jeruselemu ḅẹ apụ ma na, ịna amadapụ na sịḅịdapụ na ịna agbamịẹapụ na ịkịankoroapụ na mịẹ tẹ si-aị mamgba gotẹ.

³³Ini ọḅụ pịkị í gbinm; karakaraye à ye kẹ in toluma-toluma-tolumarị sọ, in poki tẹ ye ḍawọ ḍụkụ-a.

³⁴Ịn mịẹ nwenii tẹ ịna oru-afụḅara ma sọ kẹ ị́ Warị mẹ, nama tẹ kẹ sunsin ị́ pịrị ḅẹ yọ mẹ ḅio koroma tẹ anị pilema tẹẹ.

³⁵Hinọmụ Tụndụ-suku mẹ ḅụ ini agbamịẹ-anga ma nama Balị pịrịm, kẹ ịna owiapụ-awọmẹ na eremịna-awọmẹ na kẹ agbamịẹ Molẹkị nwẹn-sịn tamụnọ ḅe pịrị ḅẹ ḅara. Yẹrị tọn ịn pịrị-a ịn miemẹ mịẹ, tẹ ì kuroma kịngẹ sọ anị sọ-a mịnẹ ini ọkọ sime ye mịẹ, tẹ Juda ḅẹ apụ ma mịẹ tẹ in si mịẹ.”

³⁶KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ị̀ ḅẹẹm, “Jerimaya tomi ma ḅarị mịnẹ ọmụ, ḅuru-ḅa na obi na mịẹ tẹ mịẹ opu ama mẹ ḅịkị Babịlonịya ḅẹ amadaḅọ ḅe aḅara sọ ḅa. Mịọkụ à nyana tẹ ḍuko ḅẹ jen ye pokii.

³⁷À tomi ma kobiri ḅo ḅẹ-yearị, anie arị ì owi ịganị ḅụ ịn gala-galama mu asịẹ mamgba ḅụ, tẹ arị ịn kẹ pịkị mịanga ḅo ḅa, tẹ mịẹ tẹ ịn mị yọọ anga ḅa, kpaịn ḅara ḅụ.

³⁸Anịsakị ini ị̀ atomi sọ tẹ yẹrị ịna Tamụnọ sọ ḅa.

³⁹Àrị ịn kẹ gotẹ ḍumoarị gbọrụ ye kẹ ịn pịrị ḅa: sakị mamgba ị́ kụn, ịna iḅi na ịna awọmẹ iḅi na gotẹ.

⁴⁰À sime-gbamaso ọḅọkụ kẹ ini na fị ḅa. Iḅi aị mịẹ ịn pịrị ḅụ gbala-gbala à ḅara-siin ḅịa, tẹ à mịẹ tẹ ini ịna ḅioḅẹngbọ mẹmgba kẹ ị̀ ḍiki-ḅalafaa ḅa, mịẹ tẹ ịn ḅarị gbala-gbala ị̀ ḅụụ pịkị-so ḅịa ḅara.

⁴¹Iḅi aị mịẹ ịn pịrị ì ḅioḅẹlẹmarị ye sọ ḅa, tẹ arị ịn mịẹ tẹ ịn mị amakiri mẹ ḅụ kụrọ-sịẹ gbamaso ḅa.”

⁴²“À mịẹ opu ḅụụ-fụka mẹ ọkị-ḅo mịna atomi ma pịrị gbọrụ ḅara mẹ, à pịkị ọkọ kẹ à minini ịn pịrị tẹ iḅi aị mamgba ọkị-ḅo ịn pịrị ḅẹ-yearị.

⁴³Tomi ma ḅẹẹarị mịnẹ mị amakiri mẹ ịkpa na kịka ḅa, anie tomi-o, nama amẹẹ-o, anga ḅịa anga mẹ, tẹ ini anị saḅama ḅọrọma Babịlonịya pịrị ḅa. Kụma kịnị pịkị siin ḍụọ-ḍiḅi akiri fẹẹ ḅa mị amakiri mẹ ḅụ.

⁴⁴Tomi arị fẹẹ ḅa, tẹ ḅara kẹ kiri-fẹ-ḍiri-apakịrị ma ḅio sụa tẹ ye-oḅoloye kẹ oḅolo tẹ ḅẹrẹ-kiri ḅụ sime apụ sọ ḅara sime ḅa. Miemẹ Benijamịnị ibe ḅụ kiri ọkị ḅa, Jeruselemu ikelema-koro wararị kala-ama ma ḅio, Juda ḅẹ ama ma ḅio, na tụndụ ọgọnọ ḅẹ ama aḅio na, tụndụ suku ḅẹ ama ma aḅio na, Juda ḅẹ suku-jụ na ḅụ. À tomi ma kẹ pịkị-ḅo ịna amakiri suu ḅa. Yẹrị, KỊNỊNYANAḄỌ ḅe, ọkọ ḅẹẹm.”