Read kalabari Jerimaya 33 Bible Online

Jerimaya 33 - kalabari bible

Jerimaya 33

¹À paa amadaḅọ ḅe onu mẹ ḅio ḅẹ ikoli warị mẹ ḅio emi ogbo, KỊNỊNYANAḄỌ ḅe siin ori oku-ḅịḅị ḍuko ị̀ pịrịm.

²KỊNỊNYANAḄỌ ḅe, Kiri mẹ tẹmẹ tẹ anị kẹ anị sime yọ ḅụ wẹrị ḅọ ḅe, ẹkwẹn ị̀ pịrịm. KỊNỊNYANAḄỌ kẹ ẹrẹ fị ḅọ ḅe ḅẹẹm,

³Ị̀ sịịn, anịsakị àrị ị́ pakịrị ḅa. À ḅụụ-buama-aị na ḅụụ-gbiripuma-aị na tẹ ị́ arịḅẹ gberie-sọ nimi-a ḅẹ aị ḍuko ị́ pịrị ḅa.

⁴Kẹ gotẹ ọkọ ḅẹẹarị, mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ye: “Jeruselemu ḅẹ warị ma na Juda ḅẹ amada-warị ma na tẹ mịẹ opu ama mẹ ḅio ịn kan-sara aị ma gbolomaye ḅụ ini ama ọkị amịẹaị ma mịẹarị sakị, pịkị okologie na,

⁵ịn Babịlonịya ḅẹ apụ na sọ sime ye mẹ ḅụ. Ị̀ owi ịganị ḅụ à ḅaa ḅẹ apụ ma aḍụẹịn ma arị ḅio ḅin ḅa. Àrị ị̀ tọrụ ḅọị ḅa mị opu ama mẹ ḅụ, anị ḅẹ si-sịḅịḅio mamgba gotẹ.

⁶Kụma à mị opu ama mẹ na anị ḅẹ atomi na gwọ ḅa, tẹ mịẹ tẹ ịn ḅo siin oju-iḅi nyana ḅa. À kpọma dein na pịkị kpaịn-wararị sakị na kẹ in ḍie ḅa.

⁷À Juda na Izirẹlị na mịẹ tẹ ịn lọkọlọkọ ḅa, tẹ à siin ịn nama tẹ ịn tarị ḅara mẹ sime ḅa.

⁸Arị ịn mịẹ fịafịama ḅa ịn kẹ ị̀ mịẹ asi ma ḅụ, tẹ arị ịna asi na kọngọ-kụrọma ị̀ pịrị mẹ na wẹrịso ịn pịrị ḅa.

⁹Jeruselemu ḅo ḍereku dogi-ḅoarị yọ na kụn kẹ ḅụụ-tọn-arị yọ na sọ ị́ pịrị ḅa; tomikiri mẹ ḅio sịẹ goyegoye ḅalafa tẹ oju-sẹkị ḅa ini à mịẹ Jeruselemu pịrịarị iḅi aị ma na àrị ọkị-ḅo opu ama mẹ pịrịarị lọkọlọkọ na gboloma ye naa sakị.”

¹⁰Mie KỊNỊNYANAḄỌ ḅe ḅẹẹ ḅara: Tomi ḅẹẹarị mịnẹ mị yọ mẹ ịkpa kịkarị, anie tomi anịanịa nama sọ anị ḅio anga-a. Ịn karakaraye ḍukoarị; Juda ḅẹ ama ma na Jeruselemu ḅẹ etela ma na papaa kịnị ofori ḅara kẹ emi; tomi anịanịa nama sọ arị ayọ anga-a. Kụma mịna anga ma ḅụ ó siin naa ḅa

¹¹ḅioḅẹlẹ oloku na ḍereku na ere-ịya-alalị apọkọ fiearị ye na. Ọ́ kịnị nume-suarị ye naa ḅa, ini ị̀ warị ḅio ịmịẹtẹ ḅẹẹ agba mịẹarị ogbo. Ịn ḅẹẹ ḅa: Ịmịẹtẹ kẹ Kụrọmamgba nyana KỊNỊNYANAḄỌ ḅe ḅẹẹ, ori iḅim ẹrẹsị, tẹ ọ̀ ḅẹlẹma sime gbamasom! À mị amakiri mẹ mịẹ tẹ anị tarị-tarị anị lọkọlọkọ ḅara lọkọlọkọ ḅa. Yẹrị, KỊNỊNYANAḄỌ ḅe ọkọ ḅẹẹm.

¹²Kụrọmamgba nyana KỊNỊNYANAḄỌ ḅe mẹẹ, “Amakiri mẹ tẹ ịkpa kịkarị tẹ tomi anịanịa nama sọ anga-a yọ mẹ ḅio nama fị-fị osuka siin paka tẹ anana-ḍikiḍikiapụ ịna anana ma kẹ mu ḅa.

¹³Tụndụ ọgọnọ ḅẹ ama ma ḅio, tụndụ akaka ḅẹ lẹsẹrẹtẹ akiri ma ọgọnọ, Juda ḅẹ suku-jụ mẹ na, Benijamịnị ibe ḅụ na Jeruselemu ikelema-koro ḅẹ kala-ama ma ḅio na, Juda ḅẹ ama ma ḅio ḅụ anana-ḍikiḍikiapụ siin jen kẹ ịna anana kịẹn nimi ḅa. Yẹrị, KỊNỊNYANAḄỌ ḅe, ọkọ ḅẹẹm.”

¹⁴KỊNỊNYANAḄỌ ḅe ḅẹẹm, “Sakị mẹ ḅoarị, anie arị à minini Izirẹlị na Juda na pịrị ye mẹ mịẹ ḅẹ sakị mẹ.

¹⁵Anị sakị mẹ ḅụ arị ama-da ḅẹ ḅọ sẹlẹ pakama-ḅo ḅa, Devidi furo paka tẹ karakara mịẹarị ḅọ. Anị amadaḅọ ḅe kura ḅara na inoma ofori ḅara na mie ọ̀ kẹ ye mịẹ ḅarịye, bebe amakiri mẹ ikelema-koro ḅụ.

¹⁶Juda na Jeruselemu na ḅẹ apụ ma arị ịn pụkọ-pakamaḅo tẹ ịn ye-ḅụụ-la-a ḅara kẹ anga ḅa. Ịn kẹ opu ama mẹ sịn ḅarị ẹrẹ — KỊNỊNYANAḄỌ Ḅe Wamịna Ḅọrọmaḅọọ.

¹⁷Yẹrị, KỊNỊNYANAḄỌ ḅe, minini tẹ mịnẹ sakị mamgba Devidi furo paka-ḅo Izirẹlị ḅẹ amadaḅọ sọ ḅa

¹⁸tẹ anịsakị agbamịẹapụ sakị mamgba Livayị furo ḅụ paka-ḅo tẹ fịrịmẹnjị ị̀ pịrị tẹ dọkịma-agba na mgbọlị-fịaị agba na, ja agba aḅara na mịẹ-mịẹ ị̀ pịrị ḅa.”

¹⁹KỊNỊNYANAḄỌ ḅe nwẹnị ị̀ ḅẹẹ,

²⁰“Yẹrị na eneḅaka mẹ na ḍin mẹ na ọḅọkụ fị tẹẹ, mịẹ tẹ sakị mamgba arị arị karakara asakị ḅụ ḅo ḅarị ḅara; anịsakị anị ọḅọkụ mẹ, kaan ḅịa gbala-gbala.

²¹Anị gbọrụ ḅara ḅụ, arị ị̀ fịrịmẹnjịḅọ Devidi na ọḅọkụ fị tẹẹ, mịnẹ à sakị mamgba ò furo-ḅẹ-ḅọ kẹ ama-dama ḅa, à pịkị Livayị furo ḅẹ agbamịẹapụ ma na ọḅọkụ fị tẹẹ mịnẹ sakị mamgba ini fịrịmẹnjị ị̀ pịrị ḅa; tẹ arị ọḅọkụ ma arị gbala-gbala kaan nyana-a.

²²Arị ị̀ fịrịmẹnjịḅọ Devidi furo-ḅẹ-apụ ma kịẹn-ḅịḅị mịẹ ḍụḅama ḅa, pịkị Livayị furo ḅẹ agbamịẹapụ kịẹn-ḅịḅị sọ, mịẹ tẹ kịnị inetẹ ịn kịẹn nimi ḅịa ḅara, anị sime So-tọrụ ḅẹ alolia ma anịanịa tuḅu ọgọnọ ḅẹ onwin kịẹn pịrị ḅara mẹ.”

²³KỊNỊNYANAḄỌ ḅe nwẹnị ị̀ ḅẹẹ,

²⁴“Tomi ḍukoarị ye ị́ kẹ elekima sụa tẹ, mịnẹ yẹrị Izirẹlị na Juda na sịkị tẹ, maa afuro ma tẹ à sẹlẹ ọkị apụ ma? Tẹ anie ḅụ ini ị̀ atomi ma ḍiki-iderima tẹ ḅarị jen kẹ sịẹ ḅara kẹ ini ọkị-a.

²⁵Kụma yẹrị, KỊNỊNYANAḄỌ ḅe, na eneḅaka mẹ na ḍin mẹ na ọḅọkụ fị wararị, tẹ àrị oloko sụa tẹ kẹ ḅẹrẹtọn kiri mẹ na So-tọrụ mẹ na pịrị tẹẹ.

²⁶Tẹ piki-pikiye-ofori ḅara ḅụ, à kẹ anie mịẹ gbọrụ ḅara mẹ mie à kẹ Jekọbụ furo-ḅẹ-apụ na ị̀ fịrịmẹnjịḅọ Devidi ḅe na fị wararị ọḅọkụ mẹ koko kpaịnma ḅarị ḅara. À Devidi furo ḅẹ gbọrụḅọ sẹlẹ pakama-ḅo tẹ ọ̀ ḅẹrẹtọn Ebira-amụ na, Ayịzịkị na Jekọbụ furo-ḅẹ-apụ ma pịrị ḅa. Àrị ọkụrụkụrụ nyana ị̀ atomi pịrị tẹ mịẹ tẹ in siin lọkọlọkọ ḅa.”