Read kalabari Jerimaya 39 Bible Online

Jerimaya 39 - kalabari bible

Jerimaya 39

¹Zẹdẹkaya Juda da tẹ eseni karama kụra mẹ ḅẹ oyi karama akalụ mẹ ḅụ anie Ama-da Nebukadineza, Babịlonịya ḅẹ amadaḅọ ḅe ò bebe ọmụ-ogbo na ḅo tẹ owu kẹ Jeruselemu paka ye.

²Zẹdẹkaya ama-da tẹ oyi gberie finji karama kụra mẹ ḅẹ ini karama akalụ mẹ ḅẹ eseni aḍin karama ene mẹ ḅụ ini opu ama mẹ ḅẹ onu mẹ kan-tolu-ḅọrọm.

³(Ịn Jeruselemu ọkị tẹso, Babịlonịya ḅẹ geletẹ fịrịmẹnjị-opuapụ mamgba ḅo ogboku ḅẹ Onu-ḅọkọ mẹ ḅụ ịna akiri ọkịm, ịna ḅụ Nagalị-sareza na, Samuga-nebo na, Sasẹkimu na jen Nagalị-sareza nwẹn-sịn gbọrụḅọ na.)

⁴Ama-da Zẹdẹkaya na ori ọmụapụ mamgba pakarị ye mẹ ẹrị sakị ịn ḅụụkụrọma tẹ opu ama ḅụ mangị-so ḅẹ ḅara mịẹm ḍin ḅụ. Ama-da warị mẹ ḅẹ kala ḍụọ mẹ etela mẹ ḅụ mie ịn pakaye, onu ma ḅẹ maa apakịrị ma gboloma ḅọkọ mẹ ḅụ ḅọrọ ḅụ, tẹ nwẹnị Jodanị tọrụ-akaka da-mu pakịrị mẹ ḅụ mangị-so.

⁵Kụma Babịlonịya ọmụ-ogbo mẹ ịn ḍuka tẹ Jeriko ḅẹ lẹsẹrẹ-kiri mẹ ḅụ Zẹdẹkaya kunm. Anịtẹso ini ori ọkị mu Ama-da Nebukadineza pịrịm, anie Ribila opu ama mẹ ḅio sime-sime ḅọ ḅe, Hamatị kiri ḅụ, tẹ anị anị anga Nebukadineza ḅẹrẹ-pẹlẹ ori ọgọnọ gbanam.

⁶Ribila ḅụ ọ̀ Zẹdẹkaya tọrụ-ogbo ḅụ ori owiapụ-awọmẹ ḅaam, tẹ ọ̀ pịkị Juda ḅẹ fịrịmẹnjị-opuapụ ma sọ ḅaam.

⁷Anie ḅọrọ tẹso, ọ̀ Zẹdẹkaya atọrụngbọ sọkị-siin tẹ ikoli kẹ ori ịkasị koromam, ini ọ̀ kẹ so Babịlonịya mu ḅẹ ḅara.

⁸Ma ma mịẹarị sakị Babịlonịya ḅẹ apụ ma ama-da opu warị mẹ na, tomi ma awarị ma na dọkịmarị, pịkị Jeruselemu onu mẹ kan-arị.

⁹Kunoma ḅụ, Nebuzaradanị, ḅẹrẹtọn ọmụ-ogbo mẹ pịrị ọmụ-alaḅọ ḅe ikoliapụ ḅara kẹ opu ama mẹ ḅio kirikọn atomi ma, pịkị mangị paka mu ịna ḅụụ sọ apụ kẹ sụa, ọkị so Babịlonịya mum.

¹⁰Juda ḅẹ amakiri mẹ ḅụ ori koroma so apụ anie igoin-tẹịn apụ, tẹ gberie-sọ nyana-a apụ, tẹ ọ̀ kụrọ aḍụọ na ḍụọ kọrị akiri na kẹ ịn pịrịm.

¹¹Ama-da Nebukadineza miemẹ tọn Nebuzaradanị, ḅẹrẹtọn ọmụ-ogbo mẹ pịrịarị ọmụ-alaḅọ ḅe pịrịm:

¹²“Mu tẹ Jerimaya ḍọkị ẹrị tẹ iḅiọkụma ò ḍikiḍikii. Ye kẹ ọ̀ lama ma, kụma ò ḅii-ye ḅii-ye mịẹ ọ̀ pịrịị.”

¹³Miemẹ ḅụ, Nebuzaradanị na, Nebusasịbanị na, Nagalị-sareza na osi amadaḅọ ḅe fịrịmẹnjị-opuapụ ma na

¹⁴amada-warị mẹ ḅẹ ogigo mẹ ḅio ị̀ ọkị-som. Ini ị̀ kẹ Gedalaya ḅara sụam, anie Ahikamụ owiḅọtụḅọ pịkị Safani taa-owiḅọtụḅọ ḅe. Ori mie ẹrị ḅarịye mịnẹ à gberie-sọ ị̀ la-a ḅara kẹ mu warị lam. Tẹ anie ḅụ à nwẹnị tomi ma ogboku sime.

¹⁵À paa Amada-opu-warị mẹ ḅẹ ḅẹrẹ-siri onu mẹ ḅio ikoli ḅio emi ogbo, KỊNỊNYANAḄỌ ḅe ḍuko ị̀ pịrịm,

¹⁶à ḍuko Ẹbẹdị-mẹlẹkị, Sudanị ḅẹ ḅọ ḅe, pịrị mịnẹ Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ḍuko tẹẹ, “À ḍukom à mịẹ ḅa nwẹn ḅẹẹ gbọrụ ḅara mẹ, à gulugulu ọkị-ḅo mị opu ama mẹ ọgọnọ gbana ḅẹ-yearị, lọkọlọkọ-a. Tẹ miemẹ pakarị sakị, ị́ anịanga sime tẹ tọrụngbọ kẹ ẹrị ḅa.

¹⁷Kụma yẹrị, KỊNỊNYANAḄỌ ḅe, ị́ gbaịn wẹrị ḅa anị ene mẹ ḅụ, tẹ kịnị ị́ saḅama í gotẹ ḅalafaarị atomi ma pịrị ḅịa.

¹⁸Arị í koko kpaịnma ḅa, tẹ kịnị ị́ ḅaa ḅịa. Í í ḍumo kẹ mangị-so ḅa, ị́ ị̀ kẹ ḅiokpọma ye ẹrẹsị. Yẹrị, KỊNỊNYANAḄỌ ḅe, ọkọ ḅẹẹm.”