Read kalabari Jerimaya 5 Bible Online

Jerimaya 5 - kalabari bible

Jerimaya 5

¹Jeruselemu ḅẹ apụ, ọ́ mangị etela ma ikelemaa! Ó ḍiki ikelemaa! Ọ́ ḅarana ẹrịị! Ó bebe ogumaḅiri mẹ ḍọkị-ḍikii! Ọmịnị inetẹ gbọrụḅọ ẹrị ḅẹ ḅoto, kuraye mịẹarị ḅọ tẹ ḅụụkụrọma tẹ ḅioḅẹngbọ kẹ ḅụụ ḅụ gbana na-iḅi ḅara sime Tamụnọ pịrị-ḅọ? Í inetẹ ḅarị ḅẹḅẹ, KỊNỊNYANAḄỌ ḅe si-wẹrịso Jeruselemu pịrị ḅa.

²Ọmịnị ọkịarị ó sunsin KỊNỊNYANAḄỌ ḅe pịrịarị sọ, ó ḍukoarị ye na ó fiearị ye na gberie-a.

³Tụkụmaye, KỊNỊNYANAḄỌ ḅe ḅioḅẹngbọ kẹ ḅụụ ḅụ gbana na-iḅi ḅara sime ḍumo ẹrị ḅẹ-ḅiiarị. Ọ̀ kụrọma ye kẹ ó fomum, kụma ọ́ bala-a; Ori ọ́ gbẹẹ-kọsịmam, kụma ọ́ ḍụkụ tẹ ye ḍawọ-a. Ọ́ kọngọ-kụrọma tẹ ọmịna asi ḅụ pịkị ḍụkụ-a.

⁴Anịtẹso à kuromam, “Mịna apụ ma anie papaa igoin tẹ gberie-sọ nimi-a apụ. Ini oḅori ḅara kẹ ye mịẹarị; ịna Tamụnọ ḅiiarị ye in nimi-a, ịn mịẹ ḅẹ ye tẹ KỊNỊNYANAḄỌ ḅiiarị ye.

⁵À tomi ma ḍọkụma-mu ḅa kụrọ ḅụ, tẹ ini na ẹkwẹn ḅa. Tụkụmaye ịna Tamụnọ ḅiiarị ye in nimi-a, ịn mịẹ ḅẹ ye tẹ KỊNỊNYANAḄỌ ḅe ḅiiarị ye.” Kụma inimgba KỊNỊNYANAḄỌ ḅe kụrọ sịkị tẹ ini ọ̀ ḅịḅịpoki ḍụkụ-a.

⁶Anie ẹrẹsị opu piri-ḅio paka-ḅo ọkụkụ ịn ḅaa ḅa; anana kun pẹị-pẹị anama ịkpa ḅio sime tẹ ḅo ịn kanị-kọsịma ḅa, tẹ sịrị amẹẹ ịna ama ḅio mẹnjị-mẹnjị ḅọrọ ḅa Arị atomi ma mẹnjị paka-paka, ini ịn kẹ maaịn-maaịn puu ḅa, ịna asi ma ḅaka tẹẹ ẹrẹsị; tẹ sakị-sakị ḅụ ini ọḅụ kẹ Tamụnọ gbin tẹẹ.

⁷KỊNỊNYANAḄỌ ḅe nwẹnị gbela, “À tiegotẹ ị̀ atomi asi ma wẹrịso ḅẹ? Ini ị̀ kẹ gbin-koroma-so tẹ karakaramatẹ tamụnọ-a aị ma mie in sunsin pịrịarị. Àrị ịn pịrị fị furo ḅinmam, kụma ịn sẹfịm tẹ ama-mẹnjị-ereme na koro-simem.

⁸Ini ma in ḍikiḍikiḅọ ofori owi-asụ amẹẹ tẹ ye fị ḅụụ na gbasịmatẹ aị kịkam, lẹlẹarị tẹ ọrụḅọ-ọrụḅọ mḅọ na kpeki tẹ angarị ḅọ taḅọ ḍukarị.

⁹Mịna aị ma gotẹ à fomu-ḅara kẹ ịn pịrị na-iḅi-a, à gbẹẹfị fị na-iḅi-a nwẹn sime sịẹ ḅụ?

¹⁰Arị ini na fịya-a apụ kẹ fịrịma tẹ ini ịna kụrọ-asịn ma pẹlẹ-gbin ḅa, kụma ịn gbọrsịḅị arịmgba guluguluma fama ḅịa. Arị ịn ḅẹ tẹ ịn ḅara ma kọlị-kọlị siin ḅa, arị aḅara ma ìnye-a ẹrẹsị.

¹¹Izirẹlị na Juda na ḅẹ apụ ma gbọrsịḅị ị̀ kẹ dẹrịma tẹẹ. Yẹrị, KỊNỊNYANAḄỌ ḅe ọkọ ḅẹẹm.”

¹²KỊNỊNYANAḄỌ atomi ma ò pịkị tẹ ḅẹẹ tẹẹ, “Karakaramatẹ ọ̀ mịẹ ḅẹ ye ofori. Wa kụrọ-kụrọ sakị nyana ḅịa. Wa ọmụ, anịanịa ḅuru-ḅa sakị nyana ḅịa”

¹³Ịn ḅẹẹ tẹ mịnẹ ịkịankoroapụ ma ḅụụ ye ofori, kụma fẹrụ kịngẹ; anịsakị in KỊNỊNYANAḄỌ ḅe ḅara gbọrụ oku sọ nyana-a.

¹⁴Ọkọ ẹrẹsị mie KỊNỊNYANAḄỌ, Kụrọmamgba nyana Tamụnọ ḅe ḅẹẹ yee: Tomi ma mịna ẹkwẹn ma kọn tẹ ẹrẹsị, à mịẹ tẹ ị̀ ẹkwẹn tẹ ị̀ ḅịḅị-ḅio simearị ye mẹ kọrị-fịnị sọ ḅa, tẹ mịna atomi ma nwẹnị anị dọkịmarị apakịrị sọ ḅa.

¹⁵Izirẹlịapụ, KỊNỊNYANAḄỌ ḅe ala-lamatẹ anga ḅụ gbọrụ sịẹ kẹ owu kẹ ọ́ paka ḅẹ ḅoarị. Anie kpọma kụrọtẹ elemu sakị ḅẹ sịẹ, ọmịnị ịna ẹkwẹn-ḅịḅị nimi-a sịẹ.

¹⁶Ịna iboli tẹịn-apụ ma opu kụrọ nyana wararị ọmụapụụ, ọkụrụkụrụ ofori ḅara kẹ kịnị-ḅaaḅa apụ.

¹⁷Ini ọ́ ḍụọ ḅio soku ḅo aị na ọmịna afịaị na fị siin ḅa. Ini ọmịna owiapụ-awọmẹ na eremịna-awọmẹ na ḅaa ḅa. Ini ọmịna anana na ja anama ogbo-ogbo ma na ḅaa sara ḅa, tẹ ọmịna kụrọ-asịn ma na figi-asịn ma na sima guluguluma ḅa. Ọ́ kẹ ḅiokpọmarị ọmụ dasịẹma ḅẹ ama ma ini ịna opu ọmụ-ogbo mẹ kẹ arị guluguluma ḅa.

¹⁸KỊNỊNYANAḄỌ ḅe mẹẹ, “Arị ene ma ḅụ kịngẹ sọ à gbọrsịḅị ị̀ atomi ḅaa guluguluma fama ḅịa.

¹⁹Ini à gotẹ mịna aị ma mịẹ ye gbela sakị, Jerimaya, ịn ḅẹẹ mịnẹ ini ị̀ ḅụụ pịkị-so tẹ fịrịmẹnjị jen asịẹ ḅẹ atamụnọ pịrị ḅara mẹ ịna ḅara kuḅu ḅẹ amakiri ḅụ, anie ịn pịkị fịrịmẹnjị jen asịẹ ḅẹ apụ pịrị ḅarị ḅara ịna nye-a amakiri ḅụ.”

²⁰KỊNỊNYANAḄỌ ḅe mẹẹ, “Ḍuko Jekọbụ furo paka apụ ma pịrị, ḍuko Juda ḅẹ apụ ma pịrị.

²¹Ọ̀ kẹ ye-sịn, ọmịnị oḅori-sọarị apantu amẹẹ tọrụngbọ nyana wararị, kụma inetẹ ye ẹrị-a apụ; tẹ ḅeri nyana wararị, kụma inetẹ ye naa apụ.

²²Yẹrị anie KỊNỊNYANAḄỌ ḅe, ó tiegotẹ ì ḍiki-ḅalafa-a? Ó tiegotẹ oju-sẹkị-a ị̀ tọrọkọ ḅụ? Yẹrị onwin mẹ ḅụ abajị mẹ daasịẹ ḅẹ anga tọn koromam, anị nwẹnị gbamaso daasịẹ anga sọ, saḅa-saḅa yọ. Abajị mẹ inetẹ iwo-na-ideri-na ḅa, kụma anị inetẹ anị saḅa ḅọrọ ḅịa; ọnụngọ ma ḍụrụkụ ḅa, kụma arị inetẹ kan tolu ḅịa.

²³Kụma ọmịnị tomi! Ọ́ kọngọ kụrọma tẹ ḅio tọnye-tọnye mịẹarị. Ọ́ pịkị sikima tẹ ì koroma so tẹẹ.

²⁴Gbala-gbala ó kuroma tẹ ị̀ kụn-a tụkụmaye yẹrị fẹngụ eene mẹ na ịrụa kụra aya-ḅịḅị ḅẹ eene mẹ na kẹ fịrịma tẹ fịaị soku sakị mẹ kẹ ọ́ pịrịarị sọ, kụra-kụra ḅụ.

²⁵Anie nakara ọmịna asi mịna iḅi aị ma kiki ọ́ pịrị tẹẹ.”

²⁶Si atomi ì atomi ogboku angarị, ịn ḅọị tẹ koruarị ḅara ịgbọ kẹ feni tuu apụ ẹbị ḅara, kụma in tuu ḍiein mẹ tomi mie ịn kẹ kun ḅẹ ye.

²⁷Gbala piri-deeḅọ feni kun ò feni-warị ḅinma ḅara ịna awarị ma ḅio in fọịn-aị fọịn-aị kẹ suu ḅinma tẹ. Anie mie in gotẹ kụrọ nyana tẹ ngọ-kọn wararị,

²⁸anie ẹrẹsị ịn ḍụḅa tẹ iḅi fịye fị apụ ḅara simearị. Ịna si amịẹaị ma daasịẹ anga nyana-a. In sime ḍapụ na iyingiapụ na fịtẹ awọmẹ karakara kẹ ịn pịrị-pịrị-a, anịanịa ja apụ ponomarị apụ ma la kiri ịgbanị ịn pịrị.

²⁹Kụma yẹrị KỊNỊNYANAḄỌ ḅe mịna aị ma gotẹ fomu-ḅara kẹ ịn pịrị ḅa; à mị sịẹ mẹ ḅara gbẹẹfị ḅii ḅa.

³⁰Amakiri mẹ ḅụ ḅalafamarị tẹ oḅoku kẹ ḅụụ-ḅamarị ye paka tẹẹ;

³¹ịkịankoroapụ ḅarị jen ḍuko-a, iruo aị sikima tẹ agbamịẹapụ ma ịkịankoroapụ tọn ḅara tọn ḅara mie ịn kẹ ḅẹrẹtọn-arị, tẹ ì atomi ma ini na tụḅụrụ-aị ḍuko-a. Kụma anịmgba ḅo kunoma la sakị ịn mịẹ ḅẹ ye tiye?