Read kalabari Kururu Owu-apọkọ 1 Bible Online

Kururu Owu-apọkọ 1 - kalabari bible

Kururu Owu-apọkọ 1

¹Jeruselemu mẹ tẹ tomi ḅin sime anga mẹ, anị tọ-ḅara kẹ yaụtẹ koro-sime tẹ mọ! Ndẹẹ á ḅo diḅọ-fịtẹ-ẹrẹḅọ sime-ḅara sime tẹ ḅara, árịma tẹ opu asịẹ ogbo ḅio gburo-gburo sime ḅọ ma Árị ma tẹ opu ama ogbo ḅio amadaḅọ tụḅọ sọ sime ḅọ ma, ḅo omoniḅọ sọ tẹẹ.

²Ḍin ḅụ árị akụ ḅara kẹ tẹmẹ-la owu kọnm, owu aminji á tọrụ ḅụ puu-puu saram. Á ḅẹlẹma apụ mamgba ogbo-ḅio ḅụ, gbọrụḅọ-sọ kọn tẹ á dedema-a; árị ikiapụ mamgba oḅori kẹ á sịn ḅara kẹ árị na mịẹ tẹẹ; ịn ḅo árị na fịya-a apụ sọ tẹẹ.

³Kụrọ ḅara ḅụ in Juda kun-so mu omoni na kụrọ kọrịnama na ḅụ suu tẹẹ; mịọkụ opu asịẹ ma ogbo-ḅio anie árị angarị, kụma ịnyọsara yọ ḍọkị ẹrị-a ḅara; á ḍukarị apụ mamgba ḅo á la fama tẹẹ, á ḅụụ-ḅalaḅala ogboku ḅụ.

⁴Mẹnjị Zayọnị mu etela ma kururuarị, gbala gbọrụḅọ-sọ ịn pẹlẹ alalị ma ḅo-a ẹrẹsị; árị ogigo-aḅọkọ mamgba fa tẹ koro-sime wararị, árị agbamịẹapụ opu akụ ḅụ iningiarị; árị eremịna-awọmẹ ma ini ịn nụnụ so tẹ, tẹ árịma ḅioju nwẹnị ye ḅụụ ḅụ akụ ḅara kẹ tọrụsiẹrịarị.

⁵Árị na ọmụ gbin apụ ḅo á sịḅịdapụ sọ tẹẹ, árị na fịya-a apụ lọkọlọkọ tẹẹ, gbala KỊNỊNYANAḄỌ ḅe á mịẹ tẹ á tọrụsiẹrị ẹrẹsị á nyana mịẹ-irima aị ma gotẹ; árị awọmẹ ma árị ọmụ gbin apụ tọrọkọ kun-ḅara ḅụ mẹnjị-so tẹẹ.

⁶Kpọma-ḅẹlẹmarị Jeruselemu ama-da opu mẹmgba ịmaịn-so fama tẹẹ. Árị ama-da owiapụ-awọmẹ ma kịkarị ye anie, osuka ẹrị tẹ fị-a ḅẹ okuro-sụa anama; ịnyọ ofori ḅara ḅụ ịn ḍumo-mangị kọnm, ịn ḍukarị ḅo ḅe tọrọkọ.

⁷Jeruselemu á ḅụụ-fụka na árị akụ eneḅaka na ḅụ, á ḅụụ yela aị mamgba tẹ elemu sakị ḅụ á nyana aị ma kẹ ḅiokoromam. Árị atomi ḅịkị árị ọmụḅọ ḅe ḅara-ḅio sọ, tẹ ḅarasụa á pịrị ḅẹ gbọrụḅọ-sọ ofori sakị, ọmụḅọ ḅe á ḅụụ ḅioḅẹlẹ nyanam, á ḅịkị mẹ kombo ḅụ.

⁸Jeruselemu kịnị kururuma ḅara kẹ si mịẹm, anịẹrẹsị á ḅo sịḅị-ngụngụnma ḅara simem; kụn kẹ á pịrị apụ mamgba á ḍiki-simam, gbala ini á paụ ẹrị tẹ ẹrẹsị; inn, árị ma ḅioju sọ iningim, tẹ ḅụụ-jịrị ḅụ á tọrụ sikimam.

⁹Á sọ muno mẹ á kẹ konju ḅụ sụa iderima kapa ḅụ simem, árị á kọọn ḅẹ fịị kẹ ḅiokoroma-a; anịẹrẹsị á ḅịkị mẹ tẹmẹ-naịn-naịnmam, á dedema ḅọ nyana-a. “Yei KỊNỊNYANAḄỌ, ị̀ ḅụụ-fụka mẹ ḍikii, gbala kịnị-na-fịya-a ḅọ ḅe owu-ḅara-iḅi nyana tẹ ẹrẹsị!”

¹⁰Kịnị na fịya-a ḅọ ḅe amịna aḅara sụn-pakama á ḅụụ yela aị mamgba ọgọnọ gbana tẹẹ; inn, árị opu asịẹ ma á fịafịa yọ mẹ gbaịn-koro, tẹ anị fọịn ḅara ẹrị tẹẹ, inima tẹ í tomina-ogbo mẹ ḅio sọ-ḅo mẹ ị́ tọn-tọn apụ ma.

¹¹Árị atomi mamgba iningim ịn wẹrịtẹ fịye ḍọkị fị ḅẹ ḅara; kẹ mịẹ tẹ ini ịnyọ nyana ḅụ, ini ịna ngọ kẹ fịye ḍima-ḍima fịm. “Yei KỊNỊNYANAḄỌ, ḍikii, tẹ ẹrịị, gbala in ì ḍiki-sima tẹ ẹrẹsị.”

¹²Ọmịnị mamgba tẹ mẹnjị-mẹnjị-ḅọrọarị apụ, anị ọmịna aḅụụ gberie-sọ la-a mọ? Ọ́ paa ḍikii, tẹ ẹrịị, ì kururu mẹ pembe kururu ḅọrọ emi ḅẹḅẹ aniemẹ tẹ ḅo ị̀ ọgọnọ gbana ye mẹ, aniemẹ tẹ KỊNỊNYANAḄỌ ḅe kẹ ọ̀ ḅalafama ịganị ene ḅụ, ì fomu ye mẹ.

¹³Gele yọ ḅụ ọ̀ fịnị kẹ fịrịmam ị̀ mgbe ḅio ori anị iderima-ḅo suum; ori ịgbọ sụa ị̀ aḅụọ ma pịrịm, ori ị̀ pịkịma-ḅom, tọrụ furu tẹ ḅarị mịẹ nimi-a ḅara ḅụ ori ì kuroma-som, bebe ene mẹmgba ḅụ.

¹⁴Ini ị̀ amịẹ-irima ma fịna-gboloma kọngọ sụa ikuye mịẹm; ori ḅarana arị fịna gbolomam; ini arị kẹ ị̀ kọngọ sụam; ọ̀ mịẹ tẹ ị̀ ḅụụ ịnyọ faam; KỊNỊNYANAḄỌ ḅe ị̀ kẹ inima tẹ àrị inetẹ daasịẹ tẹ ye mịẹ ḅịa apụ ḅara-ḅio suum.

¹⁵Ị̀ kụrọ-kụrọtẹ owiapụ mamgba, KỊNỊNYANAḄỌ ḅe ịn kalama famam ì ogboku ḅụ; ị̀ asambịrịma owiapụ ma gbẹẹ kọsịma ḅẹ ḅara gotẹ, ori ọmụ-ogbo sịn kobiri ị̀ ẹngbẹsẹm. KỊNỊNYANAḄỌ ḅe iru pọnjịye ye pọnjị ḅara kẹ Juda ḅẹ apụ ma nanga kọsịma tẹẹ.

¹⁶“Mịna aị ma gotẹ à tẹmẹ-la ḅara kẹ owum; owu-minji pre-pre-prema ị̀ tọrụ saram; ì dedema ḅẹ ḅọ sọ ị̀ na kpeki-a, ì ḅiokpọ mẹ sịn-saakịma ḅarị gbọrụḅọ; ị̀ awọmẹ fị fama tẹẹ, gbala owu ọmụḅọ ḅe ḅara iḅi tẹ ẹrẹsị.”

¹⁷Zayọnị árị aḅara sụn-pakamam, kụma á dedema ḅẹ gbọrụḅọ-sọ ofori KỊNỊNYANAḄỌ ḅe Jekọbụ na tụḅụrụ ḅara kẹ tọn tẹ, mịnẹ ori na kpeki tẹ angarị apụ ori ọmụapụ sọọ Jeruselemu ḅo ịna ogbo-ḅio muno-muno-muno ye sọ tẹẹ.

¹⁸KỊNỊNYANAḄỌ ḅe ọ̀ mịẹ kuramam, kẹ gotẹ ọkọ ḅẹẹarị, yẹrị ori ẹkwẹn-ḅịḅị na tụḅụrụm; kụma ọ́ naa, ọmịnị tomi-kụlọkụlọ mamgba, tẹ ị̀ ḅụụ-fụka mẹ ḍikii; ị̀ iriawọ na ị̀ asawọ na, kun-ḅara ḅụ so fama tẹẹ.

¹⁹Àrị ị̀ na ḅẹlẹma sime apụ ma lam, kụma in oḅori kẹ ị̀ sịnm; ị̀ agbamịẹapụ na ì omongiapụ na, opu ama mẹ ḅio fịị gulugulu famam kẹ mịẹ tẹ ini ịnyọ nyana ḅụ, ini ịn fị ḅẹ fịye ḍọkịarị ogbo.

²⁰Yei KỊNỊNYANAḄỌ, ḍikii, gbala à ḅụụ-ḅalaḅala ḅụ emi ẹrẹsị ị̀ tẹmẹ sule owu kọn-arị apụ ogbo-ḅio emi ì ḅioḅẹngbọ ị̀ ḅụụ ḅio ḅụ inwima tẹ, gbala à sịḅị-kụrọma lama tẹ ẹrẹsị. Etela-ogbo ḅụ okologie mẹ mịnapụ ma ḅaarị, warị mẹ ḅio anị nwẹnị gbala fị kịka.

²¹Àrị iningiarị ḅara mẹ naa; ì dedema ḅẹ gbọrụḅọ-sọ ofori. Ị̀nịna fịya-a apụ mamgba ị̀ ḅụụ-fụka gbolomaye naa tẹẹ; ịn ḅioḅẹlẹarị mịnẹ ị́yẹrị anị mịẹm. Anị ene mẹ tẹ í ḍuko wasama tẹ ene mẹ ọkị-ḅoo, tẹ yee ini à sime-ḅara mẹ sime.

²²Yee ịna si amịẹaị mamgba ḅo ị́ tọrọkọ la, tẹ ị́ ị̀ na mịẹ tẹ ḅara mẹ kẹ ini na mịẹẹ, gbala ị̀ amịẹ-irima mamgba gotẹ ị̀ iningi ma tọnwa aị sọm tẹ ì ḅioḅẹngbọ nwẹnị naịn-ḅọrọ.