Read kalabari Kururu Owu-apọkọ 2 Bible Online

Kururu Owu-apọkọ 2 - kalabari bible

Kururu Owu-apọkọ 2

¹Ndẹẹ KỊNỊNYANAḄỌ ḅe ori ịganị ḅụ kpọma-ḅẹlẹmarị Jeruselemu mẹ kẹ kpiti-so ḅụ kuroma ḅara! Ori Izirẹlị ḅẹ ḅịyarị ebube mẹ kẹ So-ḅio wakị kiri-ḅio kuroma tẹẹ; ori ịganị ene mẹ ḅụ, ọ̀ kẹ ḅụọ gbanamarị ịkasiye mẹ sọ ọ̀ kẹ ḅiokoroma-a.

²KỊNỊNYANAḄỌ ḅe ọkụrụkụrụ nyana-a ḅara kẹ, Jekọbụ angarị anga mamgba fama tẹ; ọ̀ kụrọ ịganị ḅụ ò Juda ḅẹ ẹrẹḅọtụḅọ ma, kụrọtẹ ḅọị anga mẹ kan-sara tẹ; kụn nyana-a ḅara ḅụ ori ama-da kụrọ mẹ na, anị ḅẹ ḅẹrẹtọn-apụ na kẹ kiri-ḅio kuroma tẹ.

³Ḅalafama ịganị ḅụ, ori Izirẹlị nyana kụrọ mamgba pẹlẹ-siin tẹ; kịnị-na-fịya-a ḅọ ḅe tọrụ-ogbo ḅụ, ori ịna ḅụụ ori ama-ḅara nụnụ-ọkị tẹ; ò vuru-vuruma kọrịarị fịnị kọrị ḅara kọrị tẹ Jekọbụ ḅio ḅụ, tẹ kiri mamgba dọkịmam.

⁴Kịnị na fịya-a ḅọ kịka ḅara ḅụ, ori ori iboli anda wa da tẹẹ; ọmụḅọ ḅara kẹ ori ama-ḅara kuroma tẹ; wamịna atọrụngbọ ḍiki ḅioḅẹlẹ aị mamgba ọ̀ ḅaa fama tẹẹ, kpọma-ḅẹlẹmarị Jeruselemu akpụrụ-warị mẹ ḅio ḅụ; fịnị kọrị ḅara mie ọ̀ kẹ ori owi-ịganị ọsụma pakama ḅara.

⁵KỊNỊNYANAḄỌ ḅe ḅo gbala kịnị na fịya-a ḅọ sọ tẹ, ori Izirẹlị fama tẹ; ori anị ḅẹ amadapụ awarị mamgba kan-sara tẹ anị ḅẹ kụrọtẹ ḅọị anga ma kan-sara sara mịẹ tẹ, tẹ Juda ḅe ẹrẹḅọtụḅọ ma ḅio ḅụ, ḍụẹịn-ḍuu na, owu na, kururu na serima tẹẹ.

⁶Ọ̀ ḍụọ kan-sara ḅara kẹ ọ̀ sịḅị-kikima-yọ kan-sara tẹ, ori tọn kopini alalị fị anga mẹ kan-sara sara mị; KỊNỊNYANAḄỌ ḅe mịẹ tẹ Zayọnị ḅụ kopini alalị na Ịnyọsara-Ene na kunoma tẹ, tẹ ọ̀ ḅalafama ịganị ḅụ, amadaḅọ na, agbamịẹḅọ na ḍiki-sima tẹẹ.

⁷KỊNỊNYANAḄỌ ḅe ori agbamịẹ-anga ḍiki-sima, tẹ ọ̀ fịafịa yọ mẹ sịkị tẹ; arị amadapụ awarị ḅẹ onu ma, ọ̀ ḅọrọma kịnị-na-fịya-a ḅọ ḅe ḅara-ḅio suu tẹ; owu-ḅara-iḅi oloku KỊNỊNYANAḄỌ ḅe warị ḅio fiem, gbala ene pẹlẹ tẹ fịarị kopini alalị ọkụ.

⁸KỊNỊNYANAḄỌ ḅe tọn tẹẹ mịnẹ ọ̀ kpọma-ḅẹlẹmarị Jeruselemu onu mẹ kan-sara ḅa; ò ye-tọn ḍigi kẹ anị tọn siinm; anị kan-sara ḅụ ori ọ̀ ḅara ọlọ-sịẹma-a; ọ̀ mịẹ tẹ onu na anị palị kụrọma lịka na kururum, ịn ḅarị koro-a ḅara sime gbolomam.

⁹Árị ogigo-aḅọkọ jine kiri-ḅio sọ tẹẹ; arịḅẹ ẹngbẹsẹ-ikulele ma, ò ye kẹ lama tẹ arị anyịma tẹẹ; árị amadaḅọ na, amadaḅọ owiapụ-awọmẹ ma na, opu asịẹ ma ogbo ḅio emi; oloko mẹ ḅarị ofori, anịsakị arị ịkịankoroapụ sọ ḅarị KỊNỊNYANAḄỌ ḅe ḅụ ḅo ịkịan ẹrị-a.

¹⁰Zayọnị ḅẹ ẹrẹḅọtụḅọ ma omongiapụ ma, ẹkwẹn-a ḅara kẹ kiri-ḅio lẹgị-simem; ịn fọọn kẹ ịna asịḅị sara tẹ akpa sụa tẹẹ. Jeruselemu ḅẹ fịrịmẹnjị-ereme ma, ịna asịḅị-tuu mu kiri lama tẹẹ.

¹¹Owu ḅụ ị̀ atọrụngbọ agụnkwọ ḅịya tẹ foin tẹẹ; ị̀ ḅala sịḅịḅio pikiri tẹ owuarị inweni-ogbo ḅio emi ḅioḅu ḅụ ì ḅioḅẹngbọ ḅịkị koro tẹ, ị̀ atomi ma ẹrẹḅọtụḅọ ma gulugulu mẹ ẹrẹsị, gbala ḍọkọḍọkọ-awọmẹ na, ndo-ndoarị awọmẹ na naịn-naịn-ḅọrarị opu ama mẹ ḅẹ etela-ogbo ḅụ.

¹²Ini owu-owu ịna iyingiapụ pịrịarị “Fịye na minji na tọ-anga emi?” Ye la wararị owiapụ opu ama mẹ ḅe etela-ogbo ḅụ ịnyọ fa tẹ koro-sime ḅara, ini ịna iyingiapụ ekpe ọgọnọ sime tẹ ịna ịnyọ biinm.

¹³Àrị í gotẹ tiye ẹkwẹn tẹ tiye kẹ ị́nịna pii-pii ḅẹẹ ḅẹ, yei kpọma-ḅẹlẹmarị Jeruselemu? À tiye kẹ inetẹ í kịkama ḅẹ, mịẹ tẹ àrị í dedema ḅẹ ḅara, yei Zayọnị ḅẹ ḅụụ-gboloa ẹrẹḅọtụḅọ? Kẹ gotẹ ọkọ ḅẹẹarị, opu tọrụ mẹ finjima la ḅara, mie ị́ ḅụụ si-aị ma ḍụḅa la ḅara; tụḅọ inetẹ ị́ kẹ í sime-sime ḅara wẹrị ḅẹ?

¹⁴Ị́ ịkịankoroapụ iruo ịkịan na, oḅori kẹ ị́ sịn ịkịan na, koro-koro ị́ pịrị tẹẹ; ini amụ ị́ mịẹ-irima mẹ mịẹ pakama-a kẹ sime ị́ pịrị aị pịkịma-ḅo, kụma iruo aị na, kịnị irima aị na mie ini ẹrị-ẹrị ị́ pịrị yee.

¹⁵Inima tẹ etela mẹ ḅụ mẹ ḅụ mẹnjị-ḅọrọ apụ mamgba, ịna aḅara farị-farị ị́ dam; ini í kombo-kombo tẹ ịna asịḅị jike Jeruselemu ḅẹ ẹrẹḅọtụḅọ ma pịrịm; “Mie opu sịẹ mẹ tẹ ini iḅi kọnma-a ama kẹ siin sime opu ama mẹ, tomikiri mamgba ḅẹ ḅioḅẹlẹ mẹ anị-a?”

¹⁶Ị́ na fịya-a apụ mamgba, ịna ḅịḅị ḅẹ sọ-sọ ye, sọ ye kẹ í worim, ini í kombom, ini ịna aka farịm, ini olokum: “Wa á guluguluma tẹẹ!” Mie wa koru sime ene mẹ, wamịna ḍumo-tọrụ ḅụ wa anị ẹrị tẹẹ.

¹⁷KỊNỊNYANAḄỌ ḅe ọ̀ mịẹ ḅẹ tọn ye mẹ mịẹ tẹẹ, ori ẹrẹma ye mẹ ọ̀ mịẹ tẹ; ọ̀ wẹrịtẹ ala tẹ sakị ḅụ tọn kuroma ḅara, ori ọkụrụkụrụ nyana-a ḅara kẹ kan-sara tẹ; ọ̀ mịẹ tẹ kịnị-na-fịya-a ḅọ ḅe í gotẹ ḍerekum, tẹ ị́ ọmụḅọ ḅe kụrọ saakị-gelemam.

¹⁸Oloku-oloku owu KỊNỊNYANAḄỌ ḅe pịrịị, yei kpọma-ḅẹlẹmarị Jeruselemu! Yee owu-minji ofion-minji ḅọrọ-ḅọrọ ḅara kẹ ị́ tọrụkuḅu ḅụ sara, eneḅaka na ḍin na ḅụ! Ịnyọsara kẹ ị́ ḅụụ pịrị ma, pịkị gbene-sime sọ kẹ ị́ atọrụngbọ pịrị ma!

¹⁹Saakịị, owu pakamaa ḍin ḅụ, ḍin koru mẹ suku-saakịarị ḅiri ḅụ! Minji ọsụma ḅara kẹ í ḅioḅẹngbọ ọsụma KỊNỊNYANAḄỌ ḅe pịrịị! Ị́ aḅara saakị-gelema ọ̀ daa ị́ awọmẹ ma aḍumo gotẹ, inima tẹ ḅuru pọkọ-tarị ḅụ naịn-ḅọrọarị apụ ma, etela goyegoye sịḅị ḅụ.

²⁰Yei KỊNỊNYANAḄỌ, ḍikii, tẹ ẹrịị! Ị́ ḅọrọ mịẹ ḅara mẹ kẹ tụḅọ na mịẹarị? Ereme ini iyi awọmẹ pẹị na-iḅi, ini ḍikiarị awọmẹ ma? Agbamịẹḅọ na, ịkịankoroḅọ na ḅaa na-iḅi KỊNỊNYANAḄỌ ḅe fịafịa yọ ḅụ?

²¹Etela ma ḅẹ fọọn ma ḅio asambịrịmaḅọ mẹ na, omongitẹ ḅọ mẹ na ḅọlọlọ simem ị̀ iriawọ ma na, ị̀ asawọ ma na, okologie mẹ ḅụ ḅịkị tẹ; ị́ ịganị ene mẹ ḅụ ị́ ịn ḅaa tẹ, ọkụrụkụrụ nyana-a ḅaa ḅara.

²²Ị́ wẹrịtẹ alalị ene ḅụ kịnị sịn kobiri ḅara, mie pakịrị-pakịrị ḅụ í tẹmẹ-naịn-naịn sịn ì gbori ḅara tẹ KỊNỊNYANAḄỌ ḅe ịganị ene mẹ ḅụ, gbọrụḅọ-sọ mangị-soa, anịanịa ḍumo-sime; inima tẹ à bala tẹ ḍikiḍiki pakama-ḅo apụ ma, ị̀ na fịya-a ḅọ ịn ḅaa famam.