Read kalabari Izikẹlị 1 Bible Online

Izikẹlị 1 - kalabari bible

Izikẹlị 1

¹Suei karama kụra[2] mẹ ḅẹ ini karama akalụ mẹ ḅẹ sọnọ karama eneḅaka mẹ ḅụ, yẹrị Izikẹlị, agbamịẹḅọ, Buzi tụḅọ ḅe, Juu-ḅẹ-apụ tẹ in kun-so Babịlonịya mu apụ ma na anga simem Keba Tọrụ akaka mẹ ḅụ. So nwẹnị finji tẹ à nwẹnị Tamụnọ gboloma ịkịan ẹrị.

²(Anie ini Amadaḅọ Jehohakịnị kun-so jen sịẹ mu tẹ sọnọ karama kụra mẹ.)

³Anị anga Babịlonịya ḅụ Keba Tọrụ akaka mẹ ḅụ, à KỊNỊNYANAḄỌ ḅe ẹkwẹn ị̀ pịrị ye naa tẹ nwẹnị ọ̀ kụrọ ị̀ ḅụụ ḅio sọ tẹ ye mẹ nimim.

⁴À tọrụ saakị tẹ ḍiki tẹ ẹrịm ọgọnọ-jụ da pakịrị anga ḅụ erise fie ḅoarị. Oḅuto opu kpoo ḅụ bele sime tẹ ḅalapụ-ḅalapụ pakarị, tẹ anị ḅẹ ọgọnọ mẹ ikelema-koro mẹ ḅụ bele ḅịya-ḅịya tọrụngbọ tọrụ sọarị. Bele mẹ ḅalapụ-ḅalapụ pakarị anga mẹ ḅụ ojo kịkaye ḅịyam.

⁵Erise mẹ karakara ogboku mẹ ḅụ, à Tamụnọ tẹmẹ tẹ tomḅọ kịka inia aị ẹrịm,

⁶kụma ịna ḅụ gbọrụḅọ-gbọrụḅọ inia atọrụ-kuḅu sụam, pịkị inia apamba na.

⁷Ịna aḅụọ ma tụkụ wararị, tẹ nambulo aḅụọ ḅẹ okuro kịka aị mie ịn sụa yee. Arị ḅịya ḅara, sịkịrị vịọịma tẹ ojo ọkụ.

⁸Kẹ ịna inia atọrụ-kuḅu ma na inia apamba ma na ḅụ sụa, ịna ḅụ gbọrụḅọ-gbọrụḅọ pịkị inia tomḅọ aḅara nyanam gbọrụ pamba suku-ḅio goyegoye.

⁹Gberie-gberie maa apamba finji saram, arị nwẹnị jen-jen bịan tẹ inia ịkọlị mịẹ. Ịn mẹnjị kụma inimgba gbọrụ ḅụ saakị mẹnjịm ịna oju ma pịkị-a ḅara ḅụ.

¹⁰Ini Tamụnọ tẹmẹ-aị ma gberie-gberie nyana ye ini atọrụ-kuḅu, jen-na jen-na kịka-a: tọrọkọ tomḅọ tọrụkuḅu ama-ḅara anga ọkụkụ tọrụkuḅu ere-ḅara anga nambulo tọrụkuḅu, tẹ ọḅụjụ nwẹnị igo tọrụkuḅu.

¹¹Nama ma gberie-gberie maa apamba saakị-gelema tẹ arị ori na kpeki nama ḅe apamba ḅịḅị bịanm, tẹ osi maa apamba ma kẹ ori oju oḅolom.

¹²Ọrụ nama-nama tọrụ kẹ inia apakịrị mamgba dam, tẹ inetẹ mẹnjị gbọrụ ḅụ ḅụ in mu ḅii-anga ḅii-anga mum, tọrụ pịkị-a ḅara ḅụ.

¹³Nama ma ogboku ḅụ opuma kọrịarị tọsị kịka bele sịkọpẹlẹ-a ḅara kẹ kọrị ma mẹnjịm. Fịnị mẹ kọrị iwo-iwo tẹ ḅẹḅẹ, anị ḅalapụ-ḅalapụ tẹẹ.

¹⁴Nama ma ḅioju sọ mangị-mangị iwo-na-ideri-nam, so-ḅalapụ tẹ fọnya ḅọrọ ḅara.

¹⁵Àrị ini anama ma ḍikiarị ogbo à bayịsikoli aḅụọ kịka inia aị ẹrịm, kiri la wararị, tẹ jen-jen akaka simem.

¹⁶Inia kirimẹnjịarụ-aḅụọ mamgba kịkam gberie-gberie ḅịya ḅara yela ḍụḅarị ọkụ, tẹ gberie-gberie jen kiri mẹnjị arụ ḅụọ osiye mẹ bịan tẹ tụkụ sịẹm,

¹⁷mịẹ tẹ kiri mẹnjị arụ aḅụọ ma inia pakịrị ma ḅụ inetẹ arị mu ḅẹ anga-anga mu ḅẹ ḅara.

¹⁸Kirimẹnjịarụ-aḅụọ ma ikelema-koro ḅụ tọrụngbọ-tọrụngbọ-tọrụngbọ.

¹⁹Nama mẹnjị sakị-sakị kirimẹnjịarụ-aḅụọ ma arị na mẹnjịm, tẹ nama ma saakị iwo-iwo, kirimẹnjịarụ-aḅụọ ma sọ iwom.

²⁰Nama ma mu ḅii anga-anga arị mum, tẹ kirimẹnjị-arụ aḅụọ ma sọ anị gbọrụ ye mẹ mịẹm, anie nama ma anie arị mịẹ ḅẹ ye tọn arị pịrịarị ẹrẹsị.

²¹Mie ḅụ nama ma mẹnjị sakị-sakị, anịanịa daasịẹ, anịanịa saakị iwo So-tọrụ mu-mu kirimẹnjị-arụ aḅụọ ma sọ anị gbọrụ ḅara mẹ mịẹm.

²²Nama ma asịḅị ọgọnọ-jụ ḅụ fongolo koro tẹ ye simem, tẹ yori-yorima ḅịya tọrụngbọ ḅio sọ tẹ tẹmẹ-ḍikiye kịkam.

²³Anị anga ikelema-koro ye mẹ suku-ḅio ḅụ nama ma sịẹsimem, gberie-gberie maa apamba finji sara tẹ arị anị kpeki aị bịan tẹ nwẹnị osi maa apamba ma kẹ amịna oju gbaịn.

²⁴Àrị in fiin-arị tẹ ịna apamba fie ḅara naam anị fie ḅara gbala abajị ḍarị ye ọkụ, anị ḅakatẹ ọmụ-ogbo fie ḅara kịkam, anị Kụrọmamgba nyana Tamụnọ ḅe pọkọ kịkam. In fiin ḅo daasịẹ tẹ ḅẹḅẹ ini ịna apamba iko tẹ,

²⁵kụma pọkọ paa fie ma ḅom ịna asịḅị ikelema-koro ye ọgọnọ-jụ ḅụ.

²⁶Fongolo koro wararị ye mẹ ọgọnọ-jụ ḅụ emine kịkaye simem, ịn safaya nwẹn-sịn yela ḍụḅarị kẹ mịẹ ye, tẹ emine mẹ ọgọnọ tomḅọ kịkaye lẹgịm, ḍiki-tọrụ ḅụ.

²⁷Emine mẹ ọgọnọ lẹgị ḅọ mẹ ḅụ bele ḅịya pakam, gbala ojo ḅịya ḅara fịnị ogboku ḅụ. Opu ḅara mịẹ anị kẹ ḅịya yọ-yọ mamgba la ye,

²⁸tẹ anị ḅẹ ogono mẹ ḅụ tọrụ-tọrụ mamgba karam. Mie ḅịya tọrụngbọ sọ-sọ bele mẹ tẹ KỊNỊNYANAḄỌ ḅe emi anga mẹ ḍie-pakamarị ye mẹ. À miemẹ ẹrị sakị, à kiri ọgọnọ iḅom. Anịtẹso à pọkọ naam.