Read kalabari Izikẹlị 11 Bible Online

Izikẹlị 11 - kalabari bible

Izikẹlị 11

¹Tamụnọ tẹmẹ ị̀ saakị iwo tẹ ị̀ ọkị mu Tamụnọ-warị mẹ ḅẹ ịrụa saakị paka-ḅoarị anga da ogigo-ḅọkọ mẹ lam. Anị anga ogigo-ḅọkọ mẹ kpeki ḅụ si sọnọ owiapụ finji à nwẹn ẹrịm, Jazanaya, Ezuru tụḅọ ḅe na, Pẹlataya, Bẹnaya tụḅọ ḅe na sọ ịna ḅụ simem, sịẹ mẹ ḅẹ ḅẹrẹtọn apụ ma ḅẹ maa apụ.

²Tamụnọ nwẹnị ị̀ ḅẹẹ, “Fịị-fịị tomḅọ, mịna owiapụ ma si aḅẹrẹ tọn wẹrị-wẹrị tẹ si-aị kẹ mịẹ opu ama mẹ tolumarị.”

³Ịn ḅẹẹarị, “Ala-a wa siin warị-warị-warị nama ḅa. Opu ama mẹ kịkarị ye anie ye-sọ ḅẹlẹ, tẹ wamịnị nwẹnị anị ḅio sọọarị nama mẹ, kụma si ḅara si ḅara sọ, anị paa fịnị mẹ ḅụ wa kikimarị.

⁴Ọkọ ẹrẹsị, fịị-fịị tomḅọ, mịọkụ in si ḅara ḍuko-pakama.”

⁵KỊNỊNYANAḄỌ ḅe tẹmẹ ḅe ị̀ ọkị tẹ ḅẹrẹtọn ị̀ pịrịm, tẹ KỊNỊNYANAḄỌ ḅe ḍuko ị̀ pịrịm à mịẹ oku mẹ kẹ tomi ma pịrị: “Izirẹlịapụ ó ḍukoarị ye na mịẹ ḅẹ tẹ tọn-arị ye na à nimi wararị.

⁶Ọ́ tọnwa-apụ nini tẹ mịanga opu ama mẹ ḅio, anie mịẹ tẹ etela ma ḅio ḍụẹịn-ḍụẹịn-ḍụẹịn ḅin tẹ.

⁷“Mie ḅụ mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọ́ pịrịarị ye. Karakara-ḅara-ḅụ mịẹ opu ama mẹ ye-sọ ḅẹlẹ, kụma tiye ḅọrọ nama mẹ? Ọmịnị ḅaa tẹ apụ ma ḍụẹịn ma! Ọ́ mịanga sime ḅịa — àrị ọ́ kẹ gbin pakama ḅa opu ama mẹ ḅio ḅụ.

⁸Ọ́ kọkọ ọmụ gotẹ ḅalafaarị? Okologie ọlọ owiapụ mie à kẹ fịrịma tẹ owu kẹ ọ́ paka ḅarịye.

⁹Àrị ọ́ pakama ḅa mịẹ opu ama mẹ ḅio, tẹ ọ́ saḅama ḅọrọma jen asịẹ ḅẹ apụ pịrị ḅa. À fịị ḅẹrẹ-pẹlẹ ọ́ pịrị tẹẹ,

¹⁰tẹ ọmịna ḅara-kuḅu ḅẹ bebe amakiri mẹ ḅio ọmịnị ọmụ ḅio fịị ḅa. Anịtẹso ḅẹḅọ-ḅẹḅọ nimi ḅa mịnẹ yẹrị anie KỊNỊNYANAḄỌ ḅe.

¹¹Mị opu ama mẹ ọ́ gbaịn-wẹrị ḅịa, ọpọ ḅio ḍarị ḅẹlẹ anị ḅio ịn sọarị nama gbaịn-wẹrị ḅara. Izirẹlị amakiri mẹ ḅụ ó sime anga-anga arị ó fomu ḅa.

¹²Ó nimi ḅa mịnẹ yẹrị anie KỊNỊNYANAḄỌ ḅe, anịsakị ọmịnị ọmịna na kpeki asịẹ ma oloko ma koko sime sakị mẹ ọ́ kẹ ì oloko ma kan tẹ à tọn koroma aị ma poki tẹ mịẹ-a.”

¹³Àrị ịkịan mẹ koroarị ogbo, Pẹlataya wẹrẹwẹrẹ sara tẹ fịịm. À nwẹnị ị̀ ḅụụ sẹma-kiri-gbin tẹ iḅo tẹ oloku, “Ẹn-ẹn, Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́ ḅọrọ Izirẹlị ḅụ kirikọnḅọ goḅọ-goḅọ ḅaa ḅẹ mụnọọ?”

¹⁴Anịtẹso, KỊNỊNYANAḄỌ ḅe ẹkwẹn ị̀ pịrịm.

¹⁵Ori mẹẹ, “Fịị-fịị tomḅọ, Jeruselemu ḅụ simearị apụ ma na í pembema Izirẹlịapụ ma na tẹ Kun-ḅara ḅio sime apụ ma gboloma ye kẹ ẹkwẹn-arị. Ịn ḅẹẹarị, ‘Kun-soapụ ma in simearị jụ iḅerea, KỊNỊNYANAḄỌ ḅe tẹkẹ ḅụ. Ori amakiri mẹ nyana kụrọ mẹ kẹ wa pịrịtẹ!’ ”

¹⁶“Mịọkụ à ḍuko ị́ pịrị ḅẹ-yearị ye mẹ ḍuko ị́ na Kun-ḅara ḅio simearị apụ ma pịrị. Yẹrị anie ịn kẹ fịrịma ḅọ ḅe, mịnẹ in mu sụma-jụ simearị asịẹ ḅụ anga, tẹ ịn gala-galama osi amakiri ma ḅụ suu ye. Anịsọ, mịọkụ mẹ ḅụ àrị ini na sime ḅa in mu tẹ amakiri ma ḅụ.”

¹⁷“Mie ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye mẹ ḍuko ịn pịrịị. Àrị ịn gala-galama mu tẹ amakiri ma ḅio in kobiri pakama-ḅo ḅa, tẹ Izirẹlị amakiri mẹ kẹ siin ịn pịrị ḅa.

¹⁸Ịn pịkịma-ḅo sakị in pino-pino sịḅị-ngụngụnma oru-afụḅara ma tẹ ini ẹrị aị ma kẹ nguma ḅa.

¹⁹Àrị ịwọ ḅioḅẹngbọ kẹ ịn pịrị ḅa, na ịwọ kuroma na. Àrị ịna kụrọ tẹ, ḍụḅarị ḅioḅẹngbọ mẹ siin tẹ ḅịḅịpoki ḅioḅẹngbọ kẹ ịn pịrị ḅa.

²⁰Anịtẹso ini ì oloko ma koko tẹ ḅioḅẹngbọ-kẹ-sịrẹrẹ-niḅi ḅara kẹ à tọn-koroma-aị mamgba poki tẹ mịẹ ḅa. Ini ị̀ atomi sọ ḅa, yẹrị pịkị ịna Tamụnọ sọ ḅa.

²¹Kụma à fomu-ḅara kẹ ini ma tẹ pino-pino sịḅị-ngụngụnma oru-afụḅara ma ḅẹlẹma tẹ sunsin pịrịarị apụ ma pịrị ḅa. Tẹịn-Ḅẹrẹtọn-Kụrọ-Nyana KỊNỊNYANAḄỌ ḅẹ ọkọ ḅẹẹm.”

²²Ḍumo wararị Tamụnọ tẹmẹ-aị ma nwẹnị saakị fiin, tẹ kirimẹnjị-aḅụọ ma ini na mum. Izirẹlịapụ tẹkẹarị Tamụnọ ḅe bele tẹ ḅịya tọrụngbọ ḅio sọarị ye mẹ tẹ Izirẹlịapụ tẹkẹarị Tamụnọ ḅe anịanga emi ye mẹ ḍie-pakamarị ye mẹ ịna ọgọnọ-jụ ịn gbaịnm.

²³Anịtẹso ḅịya tọrụngbọ ḅio sọarị bele mẹ opu ama mẹ ḅụ so tụndụ mẹ ọgọnọ ịrụa saakị pakarị pakịrị anga da yọ mẹ mum.

²⁴Ịkịan mẹ ḅụ Tamụnọ tẹmẹ ḅe ị̀ saakị iwo tẹ ì ọkị-ḅo kun-soapụ ma lam Babịlonịya ḅụ. Anịtẹso ịkịan mẹ ị̀ tọrụ sọm,

²⁵tẹ à ye goyegoye tẹ KỊNỊNYANAḄỌ ḅe kẹ ì ḍie tẹ ye mẹ ḍuko kun-so apụ ma pịrịm.