Read kalabari Izikẹlị 17 Bible Online

Izikẹlị 17 - kalabari bible

Izikẹlị 17

¹KỊNỊNYANAḄỌ ḅe ẹkwẹn ị̀ pịrịm.

²Ori mẹẹ, “Fịị-fịị tomḅọ, egberi gbaa Izirẹlịapụ ma pịrị,

³kẹ mịẹtẹ in nimi yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ịn ḅẹẹm: ‘ḍụḅa ḅụratẹ igo simem, ḅụụ-ḅẹlẹmarị pịkọ pịkị opu apamba iyingi tẹ finji sara wararị ye na. Ọ̀ nwẹnị fiin Lẹbanọnị Tụndụ ma iwo mu tẹ gbọrụ sida nwẹn-sịn sịn ḅụ tịkị-tịkị ọgọnọ-jụ ḅụ ịkpangị anyịma siin,

⁴tẹ anị dogi-so mu masịnịapụ amakiri la, tẹ kẹ gbọrụ masịnịapụ masịnịapụ opu ama ḅụ koroma.

⁵Anịtẹso ori Izirẹlị amakiri ḅụ ịwọma so-pakarị sịn ọkị tẹ kẹ ye pakama-pakama ḍụọ-ḍiḅi-kiri ḅụ ḍiḅi mu minji sakị mamgba sime-sime anga lam, mịẹ tẹ anị so-paka ḅẹ ḅara.

⁶Sịn mẹ puu-paka tẹ ḍụḅa ḅo tẹịntẹ ḅara sụa wasama sara wararị kụrọ girepu mgbọlụ sụam. Ḅara ma gele iwo igo ḅe dam, tẹ kuno ma kiri ḅio pokolo sọ-mum. Kụrọ sịn mẹ gbaịn koro ḅụ ḅara-ḅara na ịnyịnya-ịnyịnya-ịnyịnya na famam.’ ”

⁷“Ḍụḅa ḅụra tẹ jen igo sọ simem, tẹ opu apamba iyingi na pụrụkụ lama wararị pịkọ na sụam. Tẹ mịọkụ kụrọ sịn mẹ akuno ma mẹnjị ò sime pakịrị dam, tẹ nwẹnị amịna ịnyịnya ma pịkị ọ̀ da, ḅiokpọarị mịnẹ ò minji kẹ anị pịrị anị nyana-nyana ḅara nẹngị ḅa anị sime tẹ so-paka sime anga mẹ ḅụ.

⁸Kụma kụrọ sịn mẹ ye pakama-pakama kiri tẹ minji sime anga ḅụ ini anị ḍiḅi tẹ, mịẹtẹ anị inetẹ ịnyịnya pakama tẹ girepu mgbọlụ sụa tẹ ḍụḅa ḅụra tẹ iḅi kụrọ sịn sọ ḅẹ ḅara.”

⁹“Mie ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe gbelarị: ‘mị girepu-ḍụọ mẹ anị inetẹ ḍumo tẹ so-paka ḅẹ? Tarị igo ḅe suku-na-suku-na anị nụnụ pakama-ḅo tẹ anị ḅẹ girepu asịnmgbọlụ ma kanị sara, tẹ ḅara ma anyịma tẹ arị kpatụ ḅịa? Anị nụnụ pakama-ḅo mẹ ḅaka ịnyọ anịanịa opu kụrọ nyana tẹ sịẹ ḅii ḅịa.

¹⁰Inn, ini anị ḍiḅi tẹ, kụma anị ḍumo tẹ so-paka ḅẹ? Anị kpatụ ḅịa ịrụa saakịarị pakịrị anga ḅoarị fẹrụ fie anị sarama sakị? Anị so-pakarị yọ mẹ ḅụ anị sime tẹ kpatụ ḅịa?’ ”

¹¹KỊNỊNYANAḄỌ ḅe ị̀ ḅẹẹm,

¹²“Mịna kọngọ kụrọma apụ ma gbela ini egberi mẹ fiearị ye nimi ḅoto. Ḍuko ịn pịrị mịnẹ Babịlonịya ḅẹ amadaḅọ Jeruselemu ḅo tẹ amadaḅọ ḅe na ọ̀ fịrịmẹnjị-opuapụ na ọkị tẹ kẹ ori na pịkị-so Babịlonịya mum.

¹³Ori amadaḅọ ḅe warị-kpoo ḅụ gbọrụḅọ ọkị tẹ ori na ọḅọkụ fịm, tẹ ò ye karị ḅara kẹ nimim ọ̀ sịḅị-tuu ḅa. Ọ̀ karakara opu atomi ọkị so tẹ in kun so apụ ḅara kẹ simem,

¹⁴kẹ mịẹ tẹ sịẹ mẹ ḅarị jen kẹ saakị ḅịa ḅara, tẹ ẹrị mịnẹ ọḅọkụ mẹ in kokom.

¹⁵Kụma Juda ḅẹ amadaḅọ ḅe kọngọ-kụrọma tẹ kịnị kẹ Ijiputi fịrịma mu asụ amẹẹ na opu ọmụ-ogbo na nyana ḅẹm. Anị ò ḅii ḅara paka ḅẹ? Ori inetẹ pụkọ-so ḅẹ? Ori inetẹ ọḅọkụ mẹ kan tẹ fomu-ḅara da-a ḅara kẹ so ḅịa!

¹⁶“Piki-pikiye-ofori ḅara ḅụ yẹrị, anie ḍumo wararị Tamụnọ ḅẹ sakị goyegoye,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹarị, “ḅị amadaḅọ ḅe Babịlonịya ḅio sime tẹ fịị ḅa, ori Babịlonịya ḅẹ amadaḅọ na fị ọḅọkụ mẹ kan ye ẹrẹsị, anie ọ̀ kẹ emine mẹ ọgọnọ lẹgịma ḅo ḅe.

¹⁷Ijiputi ḅẹ amadaḅọ opu kụrọ nyana ọmụ-ogbo mẹ sọ inetẹ ḅarasụa ọ̀ pịrị tẹ ori owu-sọ ḅịa, Babịlonịya ḅẹ apụ ma lịka sara gelema-gelema tẹ nkọrọ soku-soku sara tẹ kẹ tọnwa-apụ ḅaa ḅẹ sakị.

¹⁸Ori ọ̀ karị ye na ọ̀ fị ọḅọkụ na kanm. Ọ̀ ma mamgba mịẹm, tẹ mịọkụ ọ̀ pụkọ-so ḅịa.”

¹⁹Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Piki-pikiye-ofori ḅara ḅụ, yẹrị anie ḍumo wararị Tamụnọ ḅe sakị goyegoye, à fomu-ḅara kẹ ọ̀ pịrị ḅa, ori ọ̀ fị ọḅọkụ mẹ tẹ koko ḅẹ tẹ ị̀ ẹrẹ kẹ ye karị pịrị ye mẹ kan ye gotẹ.

²⁰À piri-ḅio ịgbọ sụa tẹ kẹ ọnya kẹ ò tuu ḅa tẹ anị ori ọlọ ḅa. Àrị ori ọkị-so Babịlonịya mu tẹ anị anga ò fomu ḅa, ò ḅioḅẹngbọ-kẹ-sịrẹrẹ-niḅi ḅara sime ị̀ pịrị-a ẹrẹsị.

²¹Ini ọmụ ḅio ori iḅitẹịn ọmụapụ ma ḅaa ḅa, tẹ fịịa-so apụ ma gala-gala anga-anga da ḅa. Anịtẹso ó nimi ḅa mịnẹ yẹrị KỊNỊNYANAḄỌ ḅe ọkọ ḅẹẹm.”

²²Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “À geletẹ sida sịn-arị ọgọnọ-jụ ḅio ịwọma paka-ḅoarị ịkpangị anyịma ọkị ḅa; Àrị anị kẹ gele tụndụ ọgọnọ ḍiḅi ḅa,

²³Izirẹlị ḅẹ tụndụ ma ḅụ geletẹịn ye mẹ ọgọnọ. Anị ḅara sụa sara tẹ mgbọlị sụa ḅa tẹ ḍụḅa ḅụra tẹ sida sịn-arị sọ ḅa. Kịrị-kịrị afeni anị yọ anga ḅa tẹ sịḅị-kikima-yọ ḍọkị-ẹrị ḅa anị suku ḅio ḅụ.

²⁴Amakiri mẹ ḅio sime sịn goyegoye nimi ḅa mịnẹ yẹrị anie KỊNỊNYANAḄỌ ḅe. Yẹrị anie sịn ma pẹlẹ-gbin tẹ mịẹ tẹ tim-timtẹ asịn ma ḍụḅa paka-ḅo tẹ sịn sọarị. À mịẹ tẹ ịwọ-jaja asịn ma kpatụarị pịkị mịẹ tẹ samụnọtẹ asịn ma ịwọ aị sọarị. Yẹrị KỊNỊNYANAḄỌ ḅe ọkọ ḅẹẹm. À mịẹ ḅẹ tẹ ḍuko ye mẹ à mịẹ ḅa.”