Read kalabari Izikẹlị 21 Bible Online

Izikẹlị 21 - kalabari bible

Izikẹlị 21

¹KỊNỊNYANAḄỌ ḅe ẹkwẹn ị̀ pịrịm.

²Ori mẹẹ, “Fịị-fịị tomḅọ, Jeruselemu sime si ḅara na á paka ḅẹ ye na ḍuko-pakama. In mu-mu tẹ tẹkẹarị ayọ ma sime si ḅara ḍuko-pakama. Izirẹlị amakiri mẹ ḅẹ apụ ma ḅeri nụnụ

³mịnẹ yẹrị, KỊNỊNYANAḄỌ ḅe ḅarị: yẹrị na ọmịnị na fịya-a ḅọ, arị ì okologie wọrọ-pakama-ḅo tẹ ọmịnị-mgba ḅaa ḅa, iḅi-apụ na si-mịẹapụ na gbọrụ ḅara.

⁴Àrị ì okologie kẹ ọmịna ḅụ gbọrụḅọ-gbọrụḅọ na mịẹ ḅa ọgọnọ-jụ ideri-ḅo suku-jụ la.

⁵Ḅẹḅọ-ḅẹḅọ nimi ḅa mịnẹ yẹrị, KỊNỊNYANAḄỌ ḅe, ì okologie wọrọ-pakama-ḅo tẹ, anịsakị arị anị ḅelema ḅịa.

⁶“Fịị-fịị tomḅọ, gbala í ḅioḅẹngbọ kan-sararị pembe ḅara kẹ ḅio-fiema. Kururu ḅụ ḅio-fiema, ḅẹḅọ-ḅẹḅọ inetẹ í ḍiki ḅarị anga ḅụ.

⁷Ini í tiegotẹ ḅio-fiemarị mọ kẹ í gbela sakị, ḍuko ịn pịrị ḅo ḅeri la ḅẹ-yearị ḍukoye mẹ gotẹ. Anị ḅo sakị, kururu ịna aḅioḅẹngbọ ḅin ḅa, ịna aḅara kpalasaịma ịna akaka ịnyọ ofori ḅara kẹ sime ḅa, ịna tẹmẹ-kụrọ so ḅa, tẹ ịna aḅụọ-kụkụ jen-jen gbolo ḅa. Sakị mẹ ḅo tẹ; mie anị.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

⁸KỊNỊNYANAḄỌ ḅe ị̀ ḅẹẹm,

⁹“Fịị-fịị tomḅọ, ịkịankoro. Yẹrị KỊNỊNYANAḄỌ ḅe ḍukoarị ye ḍuko tomi ma pịrị: Okologie, farị oḅuma tẹ sịkịrị vịọịmatẹ okologie.

¹⁰Ini anị farịm kẹ kịnị ḅaa, in sịkịrị vịọịma lamam, anị so-ḅalapụ ḅe kịka tẹ kọrị paka ḅẹ ḅara. Ḍereku ḅarị inetẹ paka ḅịa, kẹ gotẹ ọkọ ḅarị ị̀ atomi ḅeri nụnụ goyegoye na fomu-ḅara goyegoye na bala-a.

¹¹Okologie mẹ ini anị sịkịrị vịọịmarị, kẹ mịẹ ḅụ suu ḅẹ ḅara. Ini anị farị oḅuma tẹ sịkịrị vịọịmatẹ, kẹ kịnị-ḅaḅọ aḅara-ḅio su ḅẹ ḅara.

¹²Fịị-fịị tomḅọ, kururu-oloku kọn-pakama; ị̀ atomi mie mịẹ okologie mẹ tẹlẹma pịrịye pịkị Izirẹlị ḅẹ sịḅịdapụ mamgba na. Ini ịn ḅaa ḅẹ-yearị, ini na tomi ma ḅụ kirikọn-apụ ma na. Ḅara kẹ í ekpe fomuu, mịẹḅẹ-ọkụ ḅarị ofori ḅara ḅụ!

¹³Àrị ị̀ atomi daaḍikiarị, tẹ ịn si-ḅụ-pịkị ḍụkụ-a ḅẹḅẹ, mịna aị mamgba ịna aḅụụ paka ḅa.”

¹⁴“Fịị-fịị tomḅọ, mịọkụ ịkịankoro. Ị́ aḅara farị, tẹ okologie mẹ pẹlẹ-siin pẹlẹ ḅa. Kịnị-ḅaaḅa okologiee, okologie tẹ tẹmẹ-naịn-naịnmarị tẹ pẹị ḅẹ nama ḅaa ḅara kẹ kịnị-ḅaaḅa sararị ye.

¹⁵Anị ị̀ atomi mịẹ tẹ ịna ḅiokpọ fa tẹ ịn pụmbụarị. Àrị okologie kẹ ịna opu ama mẹ ẹrẹmarị, anie so-ḅalapụ ye kịka tẹ wanama kọrị pakarị tẹ tẹlẹma tẹ kịnị ḅaa ḅẹ ye.

¹⁶Oḅuarị okologie, ama-ḅara pẹlẹ ma mu, pịkị ere-ḅara pẹlẹ ma mu! Ị́ pịkị da anga-da anga pẹlẹ.

¹⁷Yẹrị sọ ị̀ aḅara farị ḅa, tẹ ịganị ḅọrọ ḅa. Yẹrị KỊNỊNYANAḄỌ ḅe ọkọ ḅẹẹm.”

¹⁸KỊNỊNYANAḄỌ ḅe ẹkwẹn ị̀ pịrịm.

¹⁹Ori mẹẹ, “Fịị-fịị tomḅọ maa etela tọn pakama Babịlonịya ḅẹ amadaḅọ ḅe pịrị ori ori okologie kẹ ḅọrọ ḅo ḅẹ anga. Maa aị ma gbọrụ bele amakiri ḅụ arị saakị ḅa. Elekima pike-pike wẹrị etela ma tẹra-isira mịẹ ḅẹ anga ḅụ.

²⁰Gberie kẹ amadaḅọ ḅe ḍie ḅa ọ̀ ḅọrọ Amọnị ḅẹ opu ama Raba mu ḅẹ etela, osi ye mẹ ọ̀ ḅọrọ Juda mu ḅẹ etela, tẹ mịẹ kụrọma wararị opu ama, Jeruselemu mẹ la.

²¹Babịlonịya ḅẹ amadaḅọ ḅe kẹ elekima sụa ḅẹ tẹ pike sịn mẹ akaka sịẹ wararị, tẹra-isira mẹ ḅụ. Ọ̀ sọ ḅẹ etela ḍọkị-nimi ḅụ ọ̀ ḍiein ma jikearị; ori oru-afụḅara ma ḅịḅị gbelarị; ọ̀ kẹ agbamịẹ oru pịrị tẹ nama ḅe pụmbụra mẹ pekele-ḍikiarị.

²²Mịọkụ! Ori ori ama-ḅara in ‘Jeruselemu’ ẹrẹ kẹẹ wararị ḍiein mẹ ọlọ wararị! Anị ḍuko ọ̀ pịrịarị ò mu onu jine gbin ḅẹ ejimina ma kẹ kirikiri ḅụ sịẹma wẹrị onu aḅọkọ ma ḅụ, ọmụ oloku kọn, pịkị lịka sarasara gelema, pịkị nkọrọ soku-soku sara.

²³Jeruselemu ḅẹ apụ ma miemẹ minini ḅịa, ịn jen-apụ na fị tẹ ọḅọkụ ma ẹrẹsị. Kụma mie tọrọkọ-jụ paka ḅẹ tẹ ḍuko ye mẹ anie kẹ ịna asi kẹ ịna ḅiokoroma tẹ ịna aḅeri nụnụ mịnẹ kịnị in kun-so ḅa.

²⁴Ọkọ ẹrẹsị miemẹ anie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: ‘ọmịna asi ma ịn kẹ ama ḍie tẹẹ. Ḅẹḅọ-ḅẹḅọ nimi tẹ ḅẹrẹ ọmịna aḅara si la ḅara. Ọmịnị ma nyana tẹ mịẹarị ye goyegoye ḅụ ọmịnị ọmịna asi ḍie-pakamarị. Ọ́ ḅarị ḅịḅị nyana-a kiri ḅụ sịẹ wararị, tẹ arị ọ́ saḅama si kẹ ọ́ tọn-arị apụ ma pịrị ḅa.’ ”

²⁵“Ị́yẹrị si-sịḅịḅio-sụa Izirẹlị ḅẹ fịafịa-a ḅẹrẹtọnḅọ, í eneḅaka í kunoma fomu-ḅara da ḅẹ ene mẹ ḅoarị.

²⁶Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: Ị́ kịranị na ḅịtẹ kala sun mẹ na siin koromaa. Gberie sọ ḅarị anị sime-sime ḅara sime ḅịa. Igoin-apụ ma iwoma tẹ ịn kụrọ nyana! Ḅẹrẹtọn-arị apụ ma iderima!

²⁷Gulugulu fa, gulugulu fa! Inn, àrị opu ama mẹ kan guluguluma ḅa. Kụma miemẹ paka ḅịa nwenii à sẹlẹ ọkị tẹ kẹ opu ama mẹ fomu ḅẹ ḅọ ḅe ḅo sakị la ḅa. Anịsakị àrị anị kẹ ọ̀ pịrị ḅa.”

²⁸Fịị-fịị tomḅọ, ịkịan koroo. Ḍuko wasamaa, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko Amọnị ḅẹ apụ ma pịrịarị ye mẹ, anie Izirẹlị mịẹ-simarị apụ ma. Ịn ḅẹẹ: okologie tẹlẹma sime wararị, kẹ ḅaa guluguluma; anị sịkịrị-vịọị wararị kẹ kịnị ḅaa, So-tọrụ ḅalapụ ḅọrọ ḅara kẹ wanamụarị.

²⁹Ọmịnị ẹrịarị ịkịan ma papaa aị, tẹ tọrọkọ-jụ paka ḅa nwẹn ḅẹẹ tẹ ò ḍukoarị aị ma sọ iruo aị. Ó si-sịḅịḅio-sụa wararị pịkị si wararị, tẹ ọmịna eneḅaka ḅoarị, ọmịna kunoma fomu-ḅara ene mẹ. Okologie mẹ ọmịna akọngọ koro ḅẹ-yearị.

³⁰“Okologie mẹ saakị-gelema! Ị́ tẹmẹ anga mẹ ḅụ arị ị́ kọn ḅa, í iyi amakiri mẹ ḅụ.

³¹Ị̀ ịganị mẹ ọmịna aḅụụ ịnọ ḅa à kiki ofori ḅara kẹ anị wẹrịso tẹ anị ọmịna ọgọnọ fịnị kịka tẹ kọrị ḅẹ sakị. Tẹ arị ọ́ saḅama piri-ḅio-ḅẹ si anama ḅara kẹ kịnị na mịẹarị atomi pịrị ḅa, ḅaa-guluguluma nimi ḅara ḅa tẹ apụ.

³²Fịnị ọ́ ḅaa guluguluma ḅa. Ọmịna ḅara-kuḅu ḅẹ bebe amakiri mẹ ḅio mie ini ọmịna ọmbie ọsụma ḅarịye, tẹ gbọrụḅọ-sọ ḅarị jen kẹ ọ́ kẹ ḅiokoroma ḅịa.” KỊNỊNYANAḄỌ ḅe ọkọ ḅẹẹm.