Read kalabari Izikẹlị 29 Bible Online

Izikẹlị 29 - kalabari bible

Izikẹlị 29

¹Ịn wa kun-so tẹ oyi karama kụra mẹ ḅẹ oyi akalụ karama akalụ mẹ ḅẹ oyi maa aḍin finji karama eneḅaka mẹ ḅụ, KỊNỊNYANAḄỌ ḅe ẹkwẹn ị̀ pịrịm.

²Ori mẹẹ, “Fịị-fịị tomḅọ, Ijiputi ḅẹ amadaḅọ ḅe, si ḍuko ori ọgọnọ gbanaa. Ḍuko ọ̀ pịrịị, ịn kẹ ori na Ijiputi bebe amakiri mẹ na fomu ḅarị ḅara mẹ.

³Ḅẹẹ mịnẹ mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko Ijiputi ḅẹ amadaḅọ ḅe pịrịarị ye: ‘yẹrị anie ị́nịna fịya-a ḅọ, ị́yẹrị mamataḅaye opu awakịḅa ḅe, tẹ tọrụ mẹ ḅio ḅọlọlọ simearị ḅọ. Ị́ ḅẹẹarị ị́yẹrị Nayịlị tọrụ mẹ nyanam, tẹ anị tẹmẹm.

⁴Àrị arị kẹ ị́ amgba ḅụ sụka toluma ḅọrọma ḅa, tẹ mịẹ tẹ ị́ tọrụ mẹ ḅio ḅẹ inji ma í oḅolo kụrọma ḅa. Anịtẹso àrị ị́ nụnụ pakama-ḅo ḅa Nayịlị tọrụ mẹ ḅio, inji mamgba í oḅolo wararị ḅara mẹ ḅụ.

⁵Àrị ị́yẹrị na inji mamgba na kẹ ịkpa mẹ ḅio gbin ḅa. Í oju akpakpa kiri ọgọnọ ḅịkị koro tẹ ini anị ḍiḅi-a ḅara kẹ anị wẹrịso ḅa. Àrị anị kẹ fịye sọma feni amẹẹ na nama amẹẹ na pịrị ḅa.

⁶Anịtẹso Ijiputi-ḅẹ-apụ mamgba nimi ḅa mịnẹ yẹrị anie KỊNỊNYANAḄỌ ḅe.’ ” KỊNỊNYANAḄỌ ḅe ḅẹẹarị, “Izirẹlịapụ ma ọmịnị Ijiputi-ḅẹ-apụ ma ịn mịẹ kụrọma ḅẹ ẹrẹsị ọmịna ḅụ sịrẹrẹm, kụma ọmịnị iḅi lọkọarị sịn nẹngị-a.

⁷Ini ọmịna ḅụụ sịrẹrẹ sakị ọmịnị anyị tẹ ịna atonuḅio temi kọsịmam, tẹ ịn mịẹ tẹ ini ikem.

⁸Kụma mịọkụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ị́ pịrịarị mịnẹ arị owiapụ nyana ḅo tẹ ini okologie kẹ owu kẹ ị́ paka ḅa, tẹ ini ị́ atomi ma na ị́ anama ma na ḅaa ḅa.

⁹Ijiputi fa tẹ papaa koro-simearị yọ sọ ḅa. Anịtẹso í nimi ḅa nimi ḅa mịnẹ yẹrị anie KỊNỊNYANAḄỌ ḅe. “Ị́ ḅẹẹm mịnẹ Nayịlị mẹ anị nyanam pịkị anị tẹmẹm ẹrẹsị,

¹⁰yẹrị anie ị́ na fịya-a ḅọ pịkị ị́ Nayịlị mẹ na fịya-a ḅọ. À mịẹ tẹ bebe Ijiputi mamgba fa tẹ koro-simearị yọ sọ ḅa, Migidọlị opu ama mẹ tẹ ọgọnọ-jụ simearị ye mẹ ḅụ ọkị mu Asiwanị opu ama mẹ la suku-jụ ḅụ, bebe etela mẹ ḅụ mu Sudanị oke la.

¹¹Gbọrụ tomḅọ sọ, anịanịa nama sọ mẹnjị tolu-ḅọrọ ḅịa. Kụra amesi kụra amesi na gbasị ye ḅụ gberie-sọ anị yọ anga ḅịa.

¹²Àrị Ijiputi bebe amakiri mẹ kẹ tomikiri ḅụ fa tẹịn tẹ yọ sọma ḅa. Kẹ gotẹ ọkọ ḍukoarị, kụra amesi na gbasị ye Ijiputi ḅẹ opu ama ma nwẹn kẹ papaa kaan-saratẹ gbiin-koro sime ḅa, jen opu ama tẹ kaan-kọsị anị la ḅẹ ye paka ḅịa. Àrị Ijiputi-ḅẹ-apụ ma mịẹ tẹ ini amịna ama koroma mangị tẹ apụ sọ ḅa. Ịn mangị-so sịẹ goyegoye mu tẹ japụ-japụ ogboku anga ḅa.”

¹³Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Kụra amesi ḅọrọ tẹso, àrị Ijiputi kẹ pịkịma-ḅo ḅa sịẹ-sịẹ ma tẹ àrị ịn gala-galama mu tẹ anga ma ḅụ,

¹⁴tẹ à wẹrịso tẹ ini Ijiputi ḅẹ abajị-suku ḅụ anga ḅa, tarị-pịrịpịrị-ḅụ ịna sime-yọ mẹ. Ịn kụrọ nyana-a ama-da yọ sọ ḅa,

¹⁵amadapụ daarị ayọ mamgba ḅụ ịnyọ nyana-a tẹịn yọ, tẹ gbala-gbala ịn ḅarị jen kẹ ḅẹrẹtọn jen asịẹ pịrị ḅịa. Àrị ịn kẹ mu kịnị kẹ ye-sịn ḅịa ḅara la ḅarị ḅara ḅụ, ịn ḅarị inetẹ mịẹ tẹ jen sịẹ in ḅiiarị ye mịẹ ḅịa.

¹⁶Izirẹlị ḅarị gbala-gbala jen kẹ ịna ḅụ sịrẹrẹ ḅịa, ḅarasụa gotẹ. Ijiputi ḅụ paka ḅarị ye mẹ kẹ Izirẹlị ḅiokoroma ḅa ịna ḅụ sịrẹrẹ mẹ kura-a la ḅara. Anịtẹso Izirẹlị nimi ḅa mịnẹ yẹrị anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe.”

¹⁷Ịn wa kun-so tẹ tẹrẹị fa suei karama kụra mẹ ḅẹ tarị akalụ mẹ ḅẹ tarị ene ḅụ, KỊNỊNYANAḄỌ ḅe ẹkwẹn ị̀ pịrịm.

¹⁸Ori mẹẹ, “Fịị-fịị tomḅọ, Nebukadineza, Babịlonịya ḅẹ Amadaḅọ ḅe, saakị owu kẹ Taya pakam. Ori ori ọmụapụ ma mịẹ tẹ ini iku-aị dogi nwenii ịna asịḅị firi kpọkpọnịm tẹ ịna apana ma sịẹ saram, kụma amadaḅọ ḅe-o ori ọmụ-ogbo mẹ-o gbọrụ sọye sọ nyana ḅo-a ini ẹrị tọrụsiẹrị mẹmgba ḅụ.

¹⁹Mịọkụ mie ḅụ, mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ye: àrị Ijiputi amakiri mẹ kẹ Ama-da Nebukadineza pịrịarị. Ori Ijiputi kẹ ḅụụ wẹrịma ngọ mamgba dogi-dogi so tẹ arị fọịn fama ḅa, kẹ gbẹẹ-ye kẹ ori ọmụ-ogbo pịrị ḅẹm.

²⁰Àrị Ijiputi kẹ ọ̀ gbẹẹ-ye ḅụ ọ̀ pịrịarị ọ̀ mẹnjị tẹ afịrị gotẹ, ori ọmụ-ogbo mẹ kọrịnama kọrị ị̀ pịrị simem ẹrẹsị. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

²¹Anị ene mẹ ḅụ, àrị Izirẹlịapụ ma mịẹ kụrọma ḅa, tẹ mịẹ tẹ ị́yẹrị, Izikẹlị ḅe, ẹkwẹn pakama ḅa ḅẹḅọ-ḅẹḅọ inetẹ ị́ naa ḅẹ anga ḅụ, mịẹ tẹ in nimi ḅarị ḅara mịnẹ yẹrị anie KỊNỊNYANAḄỌ ḅe.”