Read kalabari Izikẹlị 30 Bible Online

Izikẹlị 30 - kalabari bible

Izikẹlị 30

¹KỊNỊNYANAḄỌ ḅe siin ẹkwẹnm.

²Ori mẹẹ: Fịị-fịị tomḅọ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye mẹ ḅẹ ịkịan koroo, tẹ ḍuko wasamaa. Mịna ẹkwẹn ma oloku-pakama mẹ anie ị́ nyana tẹ mịẹ ḅẹ ye: opu ḅalafa ene ḅoarị!

³Ene mẹ ḅo kpeki tẹẹ, KỊNỊNYANAḄỌ ḅe ye mịẹ ḅẹ ene mẹ, Oḅuto na ḅụụ-fụka na ene tẹ sime sịẹ-sịẹ ma pịrị ye mẹ.

⁴Ijiputi ḅio ọmụ koro ḅa Tẹ Sudanị ḅio opu ḅụụ-ḅalaḅala paka ḅa. Ijiputi ḅio ịn tọnwa-apụ ḅaa ḅa; In bebe amakiri mẹ fọịn fama ḅa Tẹ anị kẹ kaan-kọsịtẹ ḅara koroma so ḅa.

⁵“Anị ọmụ mẹ pịkị Sudanị na, Lidiya na, Libiya na, Arebịya na, Kuku na ḅụ ini ọkụ ḅo ọmụapụ ma ḅaa ḅa, pịkị ị̀ atomi ma ogboku ḅụ sọ.”

⁶Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Ọgọnọ-jụ Migidọlị ḅụ ọkị-ḅo ideri-mu Asiwanị la, Ijiputi ḍụarị apụ mamgba ini ọmụ ḅio ịn ḅaa ḅa. Ini Ijiputi kẹ ḅụụ-tọn-arị ọmụ-ogbo mẹ guluguluma ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

⁷Amakiri mẹ gberie-sọ ofori ḅara sime tẹịn amakiri sọ ḅa tomikiri mẹ ḅụ, tẹ anị ḅẹ opu ama ma ye-kọnma-a ḅara kẹ kan-saratẹ koro sime ḅa.

⁸À fịnị kẹ Ijiputi ḅụ sụa tẹ á ḍuuarị apụ mamgba fịị fama sakị, mie in nimi ḅarịye mịnẹ Yẹrị anie KỊNỊNYANAḄỌ ḅe.

⁹“Anị ene mẹ ḅụ tẹ Ijiputi gulugulu sakị, àrị arụ kẹ oku kẹ ḅụụ-nimi-nimia Sudanị ḅẹ apụ ma fịrịma tẹ in jike saakịma ḅa, tẹ ịna tẹmẹ-naịn-naịn ḅa. Anị ene mẹ ḅoarị!”

¹⁰Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị, “À Nebukadineza, Babịlonịya ḅẹ Amadaḅọ ḅe kẹ mịẹ tẹ Ijiputi ngọ ma faa ḅa.

¹¹Ori na ori ọkụrụkụrụ nyana-a ọmụ-ogbo mẹ na ḅo tẹ amakiri mẹ sima kọsịma ḅa. Okologie-ogie mie ịn kẹ owu kẹ Ijiputi paka ḅarịye, tẹ amakiri mẹ ḅụ ḍụẹịn-ḍụẹịn-ḍụẹịn ḅin ḅa.

¹²À Nayịlị tọrụ mẹ samụnọma ḅa, tẹ Ijiputi kẹ si-mịẹapụ pịrị daa ḅa. Jen asịẹ ḅẹ kịnị tọrụ nimi-a atomi bebe amakiri mẹ fama-fama ḅa. Yẹrị KỊNỊNYANAḄỌ ḅe ọkọ ḅẹẹm.”

¹³Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị, “Arị oru-afụḅara ma na tamụnọ-a atamụnọ ma na guluguluma ḅa Mẹmụfịsị ḅụ. Ijiputi da ḅẹ ḅọ paka ḅịa, tẹ à tomi ma tẹmẹ-naịn-naịnma ḅa.

¹⁴Arị Ijiputi suku-jụ mẹ mịẹ tẹ anị fa tẹẹ papaa koro-sime ḅa, tẹ fịnị kẹ Zohanị opu ama ḅụ sụa ḅa ọgọnọ-jụ mẹ ḅụ. À fomu-ḅara kẹ Tibesi, sịḅịda opu ama mẹ, pịrị ḅa.

¹⁵À mịẹ tẹ Pẹlusiyọmụ opu ama, Ijiputi opu kụrọnị-yọ mẹ, ì owi ịganị da ḅa. Tibesi ngọ ma à guluguluma ḅa.

¹⁶À fịnị kẹ Ijiputi ḅụ sụa tẹ Pẹlusiyọmụ opu akụye ḅio sọ ḅa. Tibesi onu ma ini arị kan-sara ḅa, tẹ ẹgẹnẹ-minji opu ama mẹ gbaịn ḅa.

¹⁷Hẹlịyopolisi na Bubasitisi na opu ama ma ḅẹ asawọ ma ọmụ ḅio fịị ḅa, tẹ ini ikoliapụ ḅara kẹ osi apụ kun-so ḅa.

¹⁸Kanakana Tafanisi gbaịn ḅa arị Ijiputi kụrọ mẹ ḅụọ anyịma, tẹ mịẹ tẹ Ijiputi kẹ ḅụụ-boma-boma ịnyọ ma à ḅụụ so sakị. Oḅuto Ijiputi ḅara ḅụ.

¹⁹À mị-ḅara kẹ Ijiputi fomu sakị in nimi ḅa mịnẹ yẹrị anie KỊNỊNYANAḄỌ ḅe.”

²⁰Ịn wa kun-so tẹ oyi gberie finji karama kụra mẹ ḅẹ tarị akalụ mẹ ḅụ ḅẹ sọnọma ḍin karama ene mẹ ḅụ, KỊNỊNYANAḄỌ ḅe ẹkwẹn ị́ pịrịm.

²¹Ori mẹẹ, “Fịị-fịị tomḅọ, arị Ijiputi ḅẹ amadaḅọ ḅara-kọngọ anyịma tẹ. Gbọrụḅọ sọ amụ anị fịna-a, anịanịa ḅịtẹ kẹ ọ̀ kọngọ sụa tẹ kẹ anị sololo, mịẹ tẹ anị inetẹ gwọọ tẹ kụrọ tẹ siin okologie ọlọ ḅẹ ḅara sime.

²²Ọkọ ẹrẹsị mịọkụ mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko yee: Yẹrị anie Ijiputi ḅẹ amadaḅọ ḅe na fịya-a ḅọ. Àrị ọ́ maa aḅara kọngọ mamgba anyịma ḅẹ-yearị — iḅiye mẹ na anyị tẹ ye mẹ na — tẹ okologie mẹ ọ̀ ḅara siin-koro ḅa.

²³Arị Ijiputi-ḅẹ-apụ ma gala-galama ḅẹ-yearị bebe tomikiri mẹ ḅụ.

²⁴Anịtẹso à nwẹnị Babịlonịya ḅẹ amadaḅọ ḅe aḅara kọngọ ma mịẹ kụrọma ḅa, tẹ ì okologie kẹ ori aḅara ḅụ sụa ḅa. Kụma arị Ijiputi ḅẹ amadaḅọ ḅe aḅara kọngọ ma anyịma tẹ ori ori na fịya-a ḅọ ḅe tọrọkọ ḅụ iningi nwenii tẹ fịị ḅa.

²⁵Inn, arị ọ̀ kụrọ siin tẹ Babịlonịya ḅẹ amadaḅọ ḅe mịẹ kụrọma ḅa. Àrị ì okologie kẹ ọ̀ pịrị tẹ ori anị kẹ Ijiputi tọkịma sakị, ḅẹḅọ-ḅẹḅọ nimi ḅa mịnẹ yẹrị anie KỊNỊNYANAḄỌ ḅe.

²⁶Arị Ijiputi-ḅẹ-apụ ma gala-galama ḅa bebe tomikiri mẹ ḅụ. Anịtẹso in nimi ḅa mịnẹ yẹrị anie KỊNỊNYANAḄỌ ḅe.”