Read kalabari Izikẹlị 40 Bible Online

Izikẹlị 40 - kalabari bible

Izikẹlị 40

¹Ịwọ kụra mẹ ḅụ oyi aḍin karama eneḅaka mẹ ḅụ, anie ịn wa kun-so tẹ si sọnọ finji karama kụra mẹ ḅụ, anie pịkị Jeruselemu ḅịkị tẹ tẹrẹị fa si karama kụra mẹ. Anị eneḅaka mẹ ḅụ KỊNỊNYANAḄỌ ḅe ị̀ na emi ye mẹ ḅẹ kụrọ ị̀ ịnọm, tẹ ọ̀ nwẹnị ị̀ dogi-so.

²Ḍawọ-jụ pembe ḅara ḅụ Tamụnọ ị̀ ọkị-so Izirẹlị amakiri mẹ mu tẹ ị̀ kẹ geletẹ tụndụ ọgọnọ koromam. Ị̀ tọrụ da anga ḅụ warị-warị-warị mie àrị ẹrị yee, gbala opu ama ọkụ.

³Ọ̀ nwẹnị ị̀ ọkị mu kpekima tẹ àrị ojo ḅịya ḅara ḅịya owiḅọ ẹrịm. Ọ̀ pịna-fa ye-tọn ḍigi na ye-tọn sịn-ikiḅa na ọlọ wararị, tẹ ogigo-ḅọkọ akaka ḅụ sịẹsimem.

⁴Ori ị̀ ḅẹẹm, “Ẹbịị, fịị-fịị tomḅọ, Iḅiọkụ poki tẹ tọrụ-kwueinma tẹ à kẹ í ḍiearị ye goyegoye kẹ ye-sịn lama, miemẹ mie in gotẹ ị́ kẹ mị yọ ḅo ye ẹrẹsị. Ị́ ẹrị ye goyegoye ḍuko Izirẹlịapụ ma pịrị.”

⁵“Àrị ẹrị ye Tamụnọ-warị mẹ, ini onu gbori anị ikelema-korom. Tomḅọ ḅe ò ye-tọn sịn-ikiḅa ọkịm, anị ḅẹ nangwọ tẹra mita, tẹ nwẹnị akaka mẹ tọn. Anị ḅẹ gele tẹra mita, anị ḅẹ akpakpa sọ pịkị tẹra mita.

⁶Anịtẹso ọ̀ mẹnjị ogigo-ḅọkọ mẹ tẹ ịrụa-saakịarị-anga anga sime ye mẹ da-mum. Ọ̀ tanjị aị ma kpọlị iwom, tẹ ọgọnọ-jụ mẹ ḅẹ ḅọrọ sọ mu anga mẹ tọnm; tẹra mita mie anị kẹ ideri ye.

⁷Anị ḅọrọ mu ḅụ, mẹnjị-toluḅọrọ-anga simem. Anị ḅẹ maa akaka ma ḅụ, tẹra kịnị-ịkasị-aḅio anị nwẹn nyanam. Ḅio ma nangwọ na finji na gbasịm, gberie-gberie tẹra mita pakịrị-pakịrị ḅụ, tẹ akaka mẹ, gbọrụ pakịrị ḅụ mu osi akaka la, maa mita na pakịrị na (3.5 m) kẹ akpakpa sọm. Kịnị-ịkasị-aḅio ma ḅọrọ mu ḅụ, mẹnjị-toluḅọrọ-anga simem; tẹra mita anị nwẹn kẹ nangwọ mu opu ḅio lam, tẹ anị tọrụ kẹ Tamụnọ-warị mẹ damam.

⁸Anịtẹso ori ogigo-ḅọkọ mẹ ḅẹ tolu-ḅọrọ anga mẹ ḅụ ọgbụrụ-sụn tẹ sịẹ-sịẹ wararị ḅeriaị ma tọnm;

⁹anị ḅẹ akpakpa sọ inia mita, tẹ ḅọkọ sụka sịn mẹ ḅẹ akpakpa mẹ maa mita. Mẹnjị tolu-ḅọrọ anga mẹ tọrụ kẹ Tamụnọ-warị mẹ dam.

¹⁰(Mịna kịnị ịkasị wẹrị aḅio ma tẹ tolu-ḅọrọ anga mẹ akaka ma ḅụ sime aị ma jen-jen nẹngị-a, tẹ kiki ma ḅẹ akpakpa ma sọ gbọrụ ḅara mẹ.)”

¹¹Anie ḅọrọ tẹso, tomḅọ ḅe ogigo-ḅọkọ mẹ ḅụ mẹnjị-ḅọrọ-anga mẹ tọnm. Arịmgba paka ye sonio amita na pakịrị na, tẹ finji sara sime ogigo-ḅọkọ mẹ sọnọ amita.

¹²Ḅio goyegoye tọrọkọ ḅụ tẹịn tẹ onu ịn nwẹn namam, mita kẹ maa kiri ḍie ḅẹ gberie la ye anị nwẹn kẹ gelem, tẹ anị ḅẹ akpakpa sọ gbọrụ ḅara mẹ. (Ḅio ma ḅẹ ḍụḅa anga tẹra mita-mita, ini akaka mamgba).

¹³Anịtẹso ọ̀ gbọrụ ḅio ḅẹ ọḅụjụ tọn mẹnjị ḅọrọ anga mẹ saḅa-ḅọrọ mu osi ḅio ḅẹ ọḅụjụ lam, tẹ anị paka ye oyi maa mita finji na pakịrị na.

¹⁴Kunoma jụ ḅio sime ḅio mu ogigo ḅio finji saram. Ori anị ḅio mẹ tọn tẹ ḍọkị ẹrịm anị ḅẹ finji oyi amita.

¹⁵Bebe nangwọ mẹ, ogigo-ḅọkọ mẹ ḅẹ ọḅụjụ ḅụ onu mẹ ḅẹ etela anga ḅụ ọkị mu kunoma ḅio mẹ la paka ye si sọnọ amita finji.

¹⁶Etela da akaka mẹ ḅụ ḅẹ ḅio mamgba ḅụ fịọn-fịọntẹ finji wararị anga simem, pịkị ḅioju ḅẹ aḅio ma ḅẹ akaka ma ḅụ sọ. Ḅioju ḅẹ aḅio ma akaka tẹ mẹnjị-ḅọrọ-anga mẹ da anga mẹ ḅụ ịn eneme asịn kịka aị sọkịm.

¹⁷Tomḅọ ḅe ị̀ ọkị tolu-ḅọrọ mu ogigo mẹ ḅio sọm. Anị anga ḅụ in ḅio asuei namam etela da onu mẹ bịan ḅụ, tẹ arịḅẹ nụngọ mẹ ḅẹ gbọrụ anga ḅụ ịn ḍụḅarị kẹ kiri mẹ dẹẹm,

¹⁸anị nwẹnị mu ogigo mẹ ikelema-koro. Mie etela da anga ḅẹ ogigo mẹ tuuma ḅioju mẹ nẹngịm.

¹⁹Iwo ḅụ ogigo-ḅọkọ simem ḅọrọ mu ḅioju ḅẹ ogigo mẹ la ḅẹ anga. Tomḅọ ḅe nwẹnị maa ogigo-aḅọkọ ma ḅele mẹ la ḅara tọn, tẹ anị mita amesi oyi finji paka.

²⁰Anịtẹso tomḅọ ḅe ọgọnọ-jụ pakịrị anga mẹ ḅẹ ogigo-ḅọkọ mẹ ḅụ tolu-ḅọrọ ogigo mẹ ḅio paka-paka anga mẹ tọnm.

²¹Tẹra kịnị-ịkasị-aḅio ma tẹ mẹnjị-toluḅọrọ-anga mẹ ḅẹ maa akaka ma ḅụ sime aị ma, arị ḅẹ akiki ma na opu ḅio mẹ ḅẹ warị-akaka ma na, arịmgba gbasịm, arị na ịrụa-saakịarị-anga anga ḅụ tolu ogigo mẹ sọ-sọ anga mẹ ḅẹ aị ma na gbọrụ ḅara mẹ. Ogigo-ḅọkọ mẹ tolu-ḅọrọ anga ḅẹ nangwọ mẹmgba la ye si sọnọ amita finji, tẹ finji mẹ nwẹnị oyi maa mita finji na pakịrị na.

²²Mẹnjị-toluḅọrọ-anga mẹ na, ikiḅa-aḅọkọ ma na, kẹ eneme-sịn kịkama kịra aị ma na, ịrụa-saakịarị-anga anga mẹ ogigo-ḅọkọ mẹ ḅụ sime aị ma na kịkam. Mịanga ḅụ sọnọma aḅụọ tanjị tẹrẹmẹ ḅo ogigo-ḅọkọ mẹ lam, tẹ mẹnjị-toluḅọrọ-anga mẹ kunoma jụ mẹ ḅụ sime tẹ tọrụ kẹ ogigo mẹ ḅio damam.

²³Mị ọgọnọ-jụ ḅẹ ogigo-ḅọkọ mẹ ḅụ mẹnjị saḅa ḅioju ḅẹ ogigo mẹ lam, ịrụa saakịarị pakịrị anga mẹ ḅụ anị sime gbọrụ ḅara mẹ anie anị sime ye. Tomḅọ ḅe ama ogigo-aḅọkọ ma ḅẹ ḅele mẹ tọnm, tẹ anị paka ye mita amesi oyi finji.

²⁴Anịtẹso, tomḅọ ḅe ị̀ kẹ suku-jụ pakịrị mum, tẹ anị anga wa jen ogigo-ḅọkọ mẹ ḅẹ mẹnjị-toluḅọrọ-anga ẹrịm. Ori anị tọnm tẹ anị na osi-aị ma na gbọrụ ḅara.

²⁵Ogigo-ḅọkọ mẹ ḅẹ mẹnjị-ḅọrọ-anga mẹ aḅio ma ḅụ ikiḅa ḅọkọ-ḅọkọ-ḅọkọ, anie osi aị ma ḅụ anị sime gbọrụ ḅara mẹ. Ogigo-ḅọkọ mẹ ḅẹ mẹnjị-ḅọrọ-anga mẹ tọn mu kunoma la mẹ si sọnọa amita finji lam, tẹ finji mẹ nwẹnị oyi maa amita finji na pakịrị na.

²⁶Sọnọma aḅụọ tanjị mu anị lam, tẹ anị ḅẹ opu ḅio mẹ kunoma jụ sime tẹ tọrụ kẹ ogigo mẹ ḅio dam. Ḅioju mẹ ḅẹ warị-akaka ma tẹ mẹnjị-toluḅọrọ-anga mẹ da aị ma ḅụ, in eneme-asịn kịka aị sọkị wararị.

²⁷Mị anịanga ḅụ sọ ogigo-ḅọkọ tolu-ḅọrọ mẹ mu ḅioju ḅẹ ogigo mẹ lam. Tomḅọ ḅe mịẹ maaịn karama ogigo-ḅọkọ mẹ ḅẹ ḅele tọnm, tẹ anị paka ye mita amesi oyi finji.

²⁸Tomḅọ ḅe nwẹnị ị̀ kẹ suku-jụ ḅẹ ogigo-ḅọkọ mẹ ḅụ tolu-ḅọrọ ḅo ḅioju ḅẹ ogigo mẹ sọ mu. Ori ogigo-ḅọkọ mẹ tọnm, tẹ anị nwẹnị ọḅụjụ ḅẹ ogigo-aḅọkọ ma na gbasị.

²⁹Anị ḅẹ ḅioju na, sụn-pakama aị na, iḅoma ma na osi-aị ma ḅẹ aị na gbasị famam. Ogigo-ḅọkọ mẹ ḅẹ mẹnjị-toluḅọrọ-anga mẹ akaka ma ḅẹ aḅio ma na, iḅoma ma na ḅụ tọnwa ikiḅa-aḅọkọ emi. Anị ḅẹ nangwọ mita amesi oyi finji (50 m), nwẹnị si sọnọa amita (5 m) kẹ finjima.

³⁰Ḅio ma tẹ ḅioju ḅẹ ogigo mẹ ikelema-koro aị ma ḅẹ nangwọ si sọnọa amita finji (25 m), nwẹnị sọnọa amita (5 m) kẹ finjima.

³¹Mẹnjị-toluḅọrọ-anga mẹ tọrụ kẹ osi ogigo mẹ dam, tẹ anị ḅẹ warị-akaka ma ḅụ ịn eneme-asịn kịka aị sọkịm, bebe warị-akaka ma ḅẹ nangwọ la ḅara. Ninea aḅụọ ịn nwẹn tanjị tẹ mu ogigo-ḅọkọ mẹ lam.

³²Tomḅọ ḅe nwẹnị ị̀ ọkị ịrụa saakịarị ogigo-ḅọkọ mẹ ḅẹ tolu-ḅọrọ anga mẹ ḅụ sọ ḅioju ḅẹ ogigo mẹ sọ mu. Ori ogigo-ḅọkọ mẹ ḅẹ tolu-ḅọrọ anga mẹ tọnm, tẹ anị osi-aị ma na gbasịm.

³³Anị ḅẹ kịnị-ịkasị-aḅio ma na, mẹnjị-toluḅọrọ-anga mẹ na, ḅioju ḅẹ warị-akaka ma na tọn mẹ osi-aị sime-ḅara simem. Anị ikelema-koro ḅụ, ikiḅa-ḅọkọ-ḅọkọ-ḅọkọ, pịkị mẹnjị-toluḅọrọ-anga mẹ ḅụ sọ. Bebe nangwọ mẹ si sọnọ amita finji (25 m), tẹ anị ḅẹ finjima, oyi maa amita finji na pakịrị na (12.5 m).

³⁴Mẹnjị-toluḅọrọ-anga mẹ, etela anga ḅẹ ogigo mẹ dam. Mẹnjị-toluḅọrọ-anga mẹ ḅẹ warị-akaka ma ḅụ in eneme-sịn kịka aị sọkị wararị anị bebe nangwọ la ḅara. Ninea aḅụọ tanjị iwo mu ogigo-ḅọkọ mẹ lam.

³⁵Anịtẹso tomḅọ ḅe ị̀ ọkị mu ọgọnọ-jụ ogigo-ḅọkọ mẹ lam. Ori anị tọnma, tẹ anị na osi aị ma na gbasịm.

³⁶Arị na kịka ḅụ, anị kịnị-ịkasị-aḅio nyanam, warị-akaka mamgba pịkị ḅirima famam ḅioju ḅụ, mẹnjị-toluḅọrọ-anga na, ikiḅa-aḅọkọ pịkị anị ikelema-korom. Anị ḅẹ bebe nangwọ si sọnọa amita finji (25 m), tẹ nwẹnị oyi maa amita finji na pakịrị na (12.5 m) kẹ finjima.

³⁷Mẹnjị-toluḅọrọ-anga mẹ, finji etela da ogigo mẹ dam. Eneme-asịn kịka aị ịn nwẹn sọkị wararị mẹnjị tolu-ḅọrọ anga mẹ akaka ma ḅụ. Ninea aḅụọ tanjị tẹ mu ogigo-ḅọkọ mẹ lam.

³⁸Etela da ogigo mẹ ḅio, ịn sụa-pakama wararị anga mu ḅioju ḅẹ ogigo-ḅọkọ mẹ lam, ọgọnọ-jụ pakịrị mẹ ḅụ. Anị finji mu tọrụ kẹ etela ogigo mẹ da wararị mẹnjị-toluḅọrọ-anga mẹ sọm, tẹ anịanga mie ịn kẹ bebe ḅara kẹ dọkịma agba mịẹ ḅẹ anama oju ma sịkịrị-fịafịama-fịafịama yee.

³⁹Mị mẹnjị-toluḅọrọ-anga mẹ ḅio, inia adẹbịlẹ simem; maaịn gbọrụ pakịrị anga, maaịn pịkị osi pakịrị anga. Mịna adẹbịlẹ ma ọgọnọ mie ịn kẹ agba mịẹ ḅẹ anama ma ḅaa-ḅaa yee, anị ḅọrọ ịn kẹ bebema dọkịma ḅẹ ye-o, anịanịa kẹ si agbamịẹ ḅẹ ye-o, anịanịa kẹ siin ye gbẹ ḅẹ agba ḅẹ ḍie pịrị-aị sọ.

⁴⁰Ḅio mẹ nụngọ ḅụ sọ ọkọ sime inia adẹbịlẹ simem; maaịn ọgọnọ-jụ ḅẹ ogigo-ḅọkọ mẹ sọ-muarị yọ mẹ ḅẹ gbọrụ pakịrị anga, osi maaịn pịkị osi pakịrị anga.

⁴¹Arịmgba gboloma nine adẹbịlẹ, ịn kẹ agba mịẹ ḅẹ anama ḅaa ḅẹ anga; inia adẹbịlẹ ḅio mẹ ḅụ emii, tẹ inia adẹbịlẹ pịkị nụngọ mẹ ḅio emii.

⁴²Maa anga ma gboloma wararị yọ mẹ ḅẹ ini adẹbịlẹ ma tẹ ịn kẹ bebema dọkịma ḅẹ agbamịẹ anama tẹlẹma ḅẹ anga mẹ ḅẹ adẹbịlẹ ma ḍụḅarị ḅụ ịn pẹlẹ pakama-ḅom. Arịḅẹ gele mita kẹ maa kiri ḍie ḅẹ gbọrụ kiri lam, tẹ ọgọnọ mẹ ḅẹ inia apakịrị ma nwẹnị gbasị mita kẹ inia akiri ḍiya ḅẹ tẹra kiri pakịrị-pakịrị. Ịn kẹ agbamịẹ ḅẹ anama ḅaa ḅẹ aị mamgba ịn kẹ mịna adẹbịlẹ ma ọgọnọ gbanam.

⁴³In ye kẹ dẹbịlẹ ma pono ikelemam, ḅara ẹnjụ finji la ye. Kẹ agbamịẹ ḅẹ anama mamgba ịn kẹ dẹbịlẹ ma ọgọnọ gbanam.

⁴⁴Anịtẹso ori ị̀ kẹ ḅo ḅioju ḅẹ ogigo mẹ ḅio lam. Anị anga maa ḅio finji ḅioju ḅẹ ogigo mẹ dam, gberie tọrụ kẹ suku-jụ dam ọgọnọ-jụ ḅẹ ogigo-ḅọkọ mẹ akaka, tẹ osi ye tọrụ kẹ ọgọnọ-jụ dam suku-jụ ḅẹ ogigo-ḅọkọ mẹ akaka.

⁴⁵Tomḅọ ḅe ḍuko ị̀ pịrịm mịnẹ tọrụ kẹ suku-jụ da ḅio mẹ sime agbamịẹapụ ma pịrịm, anie Tamụnọ-warị mẹ ḅio namakọrịapụ ma

⁴⁶tẹ ḅio mẹ tẹ tọrụ kẹ ọgọnọ-jụ da ye mẹ sime agbamịẹ-anga mẹ ḅụ namakọrị agbamịẹapụ ma pịrịm. Agbamịẹapụ mamgba Zadọkụ furo paka apụ, ini ngẹrị mie Erọnị furo-ḅẹ-apụ mamgba ḅụ in minini pịrị tẹ KỊNỊNYANAḄỌ ḅe tọrọkọ mu tẹ fịrịmẹnjị ọ̀ pịrị ḅẹ apụ.

⁴⁷Tomḅọ ḅe ḅioju ḅẹ ogigo mẹ ḅio tọnm, anị mita amesi oyi finji pakam inia apakịrị ma gbasịm. Ịrụa tuukoroarị pakịrị mẹ ḅụ mie Tamụnọ-warị mẹ sime ye sime ye, tẹ anị ḅẹ nụngọ ḅụ agbamịẹ-anga mẹ simem.

⁴⁸Anịtẹso ori ị̀ ọkị Tamụnọ-warị mẹ ḅẹ mẹnjị-toluḅọrọ-anga mẹ mum. Anị ḅẹ pokolo anie maa amita na pakịrị na (2 m), tẹ sọnọma amita (7 m) mie anị kẹ finjima yee, tẹ warị-akaka ma nwẹnị gbọrụ mita na pakịrị na kẹ akpakpa sọ, anga-anga ḅụ.

⁴⁹Tanjị mu mẹnjị-toluḅọrọ-anga mẹ laarị ye oyia amita (10 m) kẹ finjimam, tẹ anị ḅẹ pokolo sonioa amita (6 m). Sịẹ wararị maa ḍụḅarị-aḅeriye ḅọrọ sọ-mu anga mẹ ḅụ simem, gberie pakịrị-pakịrị.