Read kalabari Izikẹlị 45 Bible Online

Izikẹlị 45 - kalabari bible

Izikẹlị 45

¹In kiri mẹ ḍie furo-furo ma pịrịarị sakị, ịn gbọrụ anga wẹrị sikima KỊNỊNYANAḄỌ ḅe pịrị. Anị ḅẹ nangwọ oyi maa kilomita finji na pakịrị na, finji mẹ nwẹnị oyia akilomita (10 km). Bebe kiri mẹ fịafịa-yọ sọ ḅa.

²Mị yọ mẹ ḅụ finji na nangwọ na gbasị kiri ịn nwẹn tọn pakama Tamụnọ-warị mẹ pịrị, mita oyia asi mesi finji na oyia amita na, pakịrị-pakịrị, warị nama-a kiri anị ikelema-koro, anị ḅẹ finji si sọnọ amita finji.

³Mị yọ mẹ kẹ maa anga ḍiya ḅẹ gbọrụ anga, nangwọ oyi maa kilomita finji na pakịrị na, tẹ finji nwẹnị sọnọa akilomita (10 km) ịn nwẹn tọn sikima ḅa; anịanga mie Tamụnọ-warị mẹ ye mamgba ḅụ fịafịa tẹịn ye mẹ sime ḅẹ anga.

⁴Bebe amakiri mẹ ḅụ, anị fịafịa yọ sọ ḅa, wẹrị sikima agbamịẹapụ tẹ fịrịmẹnjị KỊNỊNYANAḄỌ ḅe pịrịarị apụ ma ọ̀ Warị mẹ ḅio. Ịna awarị anị anga sime ḅa, tẹ kiri mẹ ḅẹ gbọrụ anga ḅụ Tamụnọ Warị mẹ sime ḅa. Anị anga ini ama ma sime ḅa pịkị Tamụnọ-warị mẹ ḅẹ kiri mẹ na.

⁵Anị yọ mẹ kẹ maa kiri ḍie ḅẹ gbọrụ kiri sime Livayị apụ ma pịrị, anie Tamụnọ-warị mẹ ḅio namakọrịarị apụ ma. Anị anga ama-ama paka tẹ ini anga ḅa.

⁶Fịafịa kiri ḅọrọtẹ soarị-soarị ḅo jen anga la ḅa, oyi maa kilomita finji kẹ nangwọ tẹ maa kilomita na pakịrị na kẹ finji ye, in sikima gbọrụ opu ama pịrị ḅa, anie Izirẹlịapụ ma ḅụụ ḅii ḅọ ḅii ḅọ mu anga ḅẹ yọ.

⁷Izirẹlịapụ Ḅẹrẹtọnḅọ ḅe sọ in kiri sikima ọ̀ pịrịị. Fịafịa-yọ mẹ ḅẹ ịrụa-ideriarị-anga mẹ ḅẹ kiri mẹ daasịẹ anga ọkị mu Mẹdịterenanị opu-tọrụ mẹ ḅẹ ịrụa-ideriarị-anga mẹ la; tẹ pịkị ịrụa saakịarị pakịrị ḅụ anị daasịẹ anga ọkị mu bebe kiri mẹ daasịẹ anga la, mịẹ tẹ anị ḅẹ nangwọ mẹ na kẹ Izirẹlị afuro ma pịrị kiri mẹ ḅẹ nangwọ na gbasị ḅẹ ḅara.

⁸Mị kiri mẹ sime Izirẹlịapụ Ḅẹrẹtọnḅọ ḅe pịrị ḅa, mịẹtẹ ọ̀ ḅarị jen kẹ tomi ma ponoma ḅịa ḅara, kụma wẹrịso tẹ bebe amakiri mẹ ḅụ kirikọn anga mẹ sime Izirẹlị ḅẹ afuro ma pịrị ḅẹ ḅara.

⁹Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Ọmịnị Izirẹlị ḅụ ḅẹrẹtọn-arị apụ, ọ́ kpọma si mịẹ alama tẹẹ! Ọmịnị ọmịna kụrọ-kụrọ amịẹaị na ponoma na dasịẹma. Ó kuraye tẹ inoma ofori ye mịẹẹ. Ọ́ ḅarị gbala-gbala jen kẹ ị̀ atomi dee-siin ma ịna kiri ḅụ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe mie mẹ ḍuko ọ́ pịrịarị.”

¹⁰“Ọrụḅọ-ọrụḅọ kịnị mingirima-a ye-tọn-aị kẹ ye tọọn:

¹¹Kẹ samụnọtẹ fịaị ye-tọnye tẹ ịn kẹ ẹfa nwẹn-sịn ye mẹ na kẹ minji ye-tọnye bati nwẹn-sịn ye mẹ na gbasịị. Karakara ye-tọnye mẹ anie oma nwẹn-sịn ye. Gbọrụ oma anie oyia ẹfa, tẹ oyia ẹfa anie oyia bati.”

¹²Ọ́ kẹ ikuye laa ḅara tọn nimi ḅẹ ḅara mẹ mie anị: si gera (Gera) gbọrụ sẹkẹlị (Shekel) na gbasịm sẹkẹlị tesi gbọrụ mịna na gbasịm.

¹³Mie karakara ḍiepịrịye mẹ tẹ ọ́ pịrị ḅarịye mẹ: Witi gbọrụ oma ḅụ ọ́ gbọrụ ẹfa kẹ sonioa akiri ḍiya ḅẹ gbọrụ kiri pịrịị, ọ́ pịkị ọkọ kẹ bali mẹ tọọn.

¹⁴Ḍuko wẹrị wararị pulo mẹ, bati kẹ anị tọn ḅụ, gbọrụ bati kẹ oyia akiri ḍiya ḅẹ gbọrụ kiri, gbọrụ Kọ nwẹn-sịn ye-tọnye ḅụ, (anie oyia abati anịanịa gbọrụ oma; gbala oyia abati na gbọrụ oma na gbasịm.)

¹⁵Jen anie Izirẹlị ḅụ minji iḅiọkụ laarị osuka-fị-anga ḅụ kokoarị anana ḅụ oyia asi goyegoye ḅụ in gberie ọkịị. Ma ma kẹ mịẹ ḅụ suu ḅa mgbọlị fịaị agba na, dọkịma-agba na, gboloma agba na mịẹarị sakị ḅụ, kẹ gbọrụ ḅụ sime ḅẹ mịẹ mẹ mịẹ tomi ma pịrị ḅụ, Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko-pakam.

¹⁶Amakiri mẹ ḅẹ atomi mamgba mịna agbamịẹ-aị ma ọkị mu Izirẹlịapụ Ḅẹrẹtọnḅọ ḅe pịrị nyanam!

¹⁷Ori anie bebema dọkịma-agba mịẹ anama na, kẹ mgbọlị afịaị mịẹ ḅẹ mgbọlị aị na, pịkị Ịwọ Akalụ alalị ma na, Ịnyọsara-Ene ma na ḅụ kẹ iru sara bebe Izirẹlị sịẹ mẹ pịrị ḅẹ iru na pakama-ḅo nyana ye. Ori anie si gotẹ kẹ agba mịẹ ḅẹ aị, mgbọlị agbamịẹ-aị na, bebema dọkịma-agba mịẹ ḅẹ aị na gbọrụḅụụ-sime-agba mịẹ-aị na pakama-ḅo nyana ye, kẹ Izirẹlịapụ ma asi siin.

¹⁸Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Tarị akalụ mẹ ḅẹ tarị eneḅaka ḅụ ọ́ ḅụụ ḅụ ḅẹẹ-ḅẹẹye ofori gbọrụ nambulo ọkị tẹ kẹ agbamịẹ tẹ kẹ Tamụnọ-warị mẹ mịẹ-fịafịama ḅa.

¹⁹Agbamịẹḅọ ḅe ọmbie mẹ ḅụ ọmbie ọkị tẹ kẹ Tamụnọ-warị ḅọkọ ḅẹ asịn ma na, agbamịẹ-anga mẹ ḅẹ inia ịkọlị ma na, pịkị ḅioju ḅẹ ogigo-ḅọkọ mẹ ḅẹ asịn ma na ọmbịị.

²⁰Akalụ mẹ ḅẹ sọnọma aḍin karama eneḅaka mẹ ḅụ ọ́ pịkị anị gbọrụ ḅara mẹ mị, ḅiotọn-a ḅara, anịanịa nimi-a ḅụ si mịẹ ḅọ goḅọ-goḅọ gotẹ. Mị ḅọkọ ḅụ ọ́ ḅọrọ tẹ Tamụnọ-warị mẹ wẹrị fịafịama ḅa.”

²¹“Tarị akalụ mẹ ḅẹ ngei aḍin fa jei eneḅaka ḅụ ọ́ Saḅaḅọrọ-Alalị mẹ saakị ḅa. Sọnọma aḍin ḅẹḅọ-ḅẹḅọ nwẹn kẹ sunmaye sọ-a fịturu fị ḅa.

²²Alalị mẹ ḅẹ tarị ene mẹ ḅụ, Izirẹlịapụ Ḅẹrẹtọnḅọ ḅe gbọrụ nambulo kẹ agba mịẹẹ, ori asi na tomi mamgba asi na gotẹ.

²³Sọnọma aḍin ma ḅụ ene goyegoye alalị mẹ ḅụ, sọnọma anambulo na sọnọma ejimina na, ḅụụ ḅụ ḅẹẹ-ḅẹẹye ofori aị ọ̀ nwẹn bebema dọkịma agbamịẹ ḅa. Ọ̀ pịkị gbọrụ ekpe-oḅori kẹ si gotẹ agbamịẹ ḅa ene goyegoye ḅụ.

²⁴Kẹ gbọrụ nambulo na gbọrụ ejimina na ḅụ sụa agba mẹ mịẹ ḅarị mbịaka gberie-gberie, anie lita nwẹn sịn ye-tọnye ḅụ tẹrẹị fa si na pakịrị na, pịkị olivu pulo ḅụ tẹra lita.”

²⁵“Igurugu Awarị ḅio anga tẹ fị-fị alalị mẹ, tẹ sọnọma karama akalụ mẹ ḅẹ jei aḍin ene mẹ ḅụ saakị-saakị ye mẹ, Izirẹlịapụ Ḅẹrẹtọnḅọ ḅe sọnọma aḍin ma ḅụ ene goyegoye ḅụ anị gbọrụ agba aḅara ma mịẹ ḅa si gotẹ, kẹ bebe dọkịma ḅẹ agba mịẹ tẹ ọ̀ pịrị-pịrị aị ma sọ gbọrụ ḅara mẹ, pịkị gbọrụ apịrịaị ma mbịaka na olivu pulo na ḅụ.”